JONATHAN e kan ni gargeleg u Meriken, machane gallabthir rok e yow e girdi’ ko fare nam nu Korea, ma nap’an ni kab bitir Jonathan ma yima laniyan’ ngak. Ere, nap’an ni ilal me lemnag ni nge yan i par nga bang ndariy e biney e lem riy. Ma aram me mang reb e togta ko fare binaw ni bay ko lel’uch u Alaska, U.S.A. Girdi’ ko re binaw nem ni yad ma yib nga aspital ngar uned ko tafalay e ba chugur yaarad ngak. Ke athapeg nra yan ko re binaw nem ma dariy be’ nra laniyan’ ngak.

Kari kireban’ ya nap’an ni ke tafalaynag be’ nib ppin ni 25 e duw yangaren, ma nap’an ni gol fare pin me yog e thin nib kireb ngak Jonathan ni be m’ug riy nri be fanenikay e girdi’ nu Korea. Re n’em ni ke buch e be puguran ngak Jonathan ni yugu demtrug e n’en ni ke rin’, ma dabiyog ni nge palog ko lem ni laniyan’.

Re n’ey ni buch rok Jonathan e be tamilangnag nriyul’ ni bay e miti ney e lem. Gubin yang u fayleng ni bay e re lem ni laniyan’ ney riy. Ere, kub tamilang ni  gubin yang ni bay e girdi’ riy maku bay e re lem ni laniyan’ ney riy.

Ere, yugu aram rogon ni ke garer e re lem ney, machane boor e girdi’ nde fel’ u wan’rad. Re n’ey e ban’en nde puluw. Ere mang fan ni ke garer e re lem ney u ga’ngin yang u fayleng? Ba tamilang ni piin ndubrad e re n’ey, e ba m’omaw’ ni ngar nanged ni ku bay e miti ney e lem rorad. Ma uw rogom? Uw rogon ni ga ra pi’ e fulweg ko re deer ney?

Mo’maw’ rodad ni ngad nanged ni bay e miti ney e lem rodad. Be tamilangnag e Bible ni gum’irchaey e ban’en nib “sasaliyeb.” (Jeremiah 17:9) Ere, rayog ni ngad lemnaged ni gubin e girdi’ ma taareb rogorad u wan’dad. Ara gad ma gay e tawey ni ngad laniyan’gad ngak boch e girdi’.

Ngad weliyed reb e ban’en nrayog ni nge ayuwegdad ni ngad nanged ko bay e miti ney e lem rodad fa dariy, mu lemnag e re n’ey: Bay reb e nep’ ni ga be yan u ba pa’ e kanawo’ ni yigoo gur. Ma bay l’agruw e pumoon ndawor mu mada’gad bayay ni yow be yib i yib ngom. Yow l’agruw ni yow ba gel, ma bay bagayow ni ba’ ban’en u pa’.

Ga ra lemnag ma bay rogon ni ngam magar ko gal pumoon nem, fa? Dabisiy ma bay boch ban’en ni i buch rom kafram ma aram fan ni bay rogon ni ngam magar, machane bochan e re n’em ni buch rom ma ireram fan ni ngam magar ngak fa gal pumoon? Reb e deer nib fel’ ni ngan fith e, be’ u uw e gal pumoon nem? Sana fulweg rom e ra tamilangnag ko bay e re lem ni laniyan’ ney rom, fa?

Faanra ngad fal’eged i yaliy rarogodad, ma dabisiy ni gad urngin ni gad ma laniyan’. Ku be tamilangnag e Bible ni: “Girdi’ e yad ma guy be’ u wuru’ i downgin.” (1 Samuel 16:7) Ere bochan ni gadad urngin ni bay e re lem ni laniyan’ ney rodad, nib ga’ ni bay wenegan, ma gur bay e athap rodad nrayog ni ngad gelgad ngay ara ngad chuweged ko yafas rodad? Bay ba ngiyal’ ni gad ra guy ni dakuriy e biney e lem u ga’ngin yang u fayleng, fa?