1, 2. Faanra ngad fel’gad u wan’ Got, ma susun ba ‘miti mang girdi’ e ngad boded’?

 YOOREN e girdi’ e ba ga’ fan u wan’rad e n’en ni be lemnag e girdi’ u murung’agrad. Machane, tin riyul’ e Kristiano e ka ba ga’ fan u wan’rad e n’en ni be lemnag Jehovah u murung’agrad. Ya ir e en Th’abi Tolang u palpalth’ib, ma ir “enggin gubin e yafos.”​—Ps. 36:9, BT.

² Ere ke weliy apostal Peter nib t’uf ni nge par ‘pangidad nib thothup ma ngad pied gadad nga pa’ Got’ me yag ni ngad fel’gad u wan’. (Mu beeg e 2 Peter 3:11.) Rayog ni ngad fel’gad u wan’ Got ni faanra ba thothup ‘pangidad’, ni aram e ngad pared nib beech e ngongol nge lem rodad, nge n’en ni gad ma rin’ ni fan ku Got. Maku ba t’uf ni ngad ‘pied gadad nga pa’ Got’ u fithik’ e tayfan, ma ngad yul’yul’gad ngak. Ere, rogon ni ngad fel’gad u wan’ Got e gathi kemus ni be yip’ fan ni ngad rin’ed e ngongol nib fel’, ya ku be yip’ fan rogon ni gad be lemnag murung’agen Got. Jehovah e be “changar nga gum’irchaen gubin e girdi’,” ere manang ko ba thothup pangidad fa danga’, maku manang ko kemus ni yigoo ir e gadad be liyor ngak, fa.​—1 Kron. 29:17, BT.

3. Mang boch e deer ni bay rogon ko tha’ u thildad Got ni thingar da fal’eged i lemnag?

³ Satan ni Moonyan’ e dabun ni ngad fel’gad u wan’ Got. Bin riyul’ riy e be athamgil ni nge rin’ e tin rayog rok ni nge waliydad ni ngad paloggad rok Jehovah. Satan e der ma magawon ni nge fanay e pi ban nge sasalap ni nge waliydad ngad paloggad rok Got ni ir e gad be liyor ngak. (John 8:44; 2 Kor. 11:13-15) Ere, ba puluw ni ngad fithed gadad ni nge lungudad: ‘Uw rogon ni ma bannag Satan e girdi’? Ma mang e rayog ni nggu rin’ me yag ni nggu ayuweg e tha’ u thilmow Jehovah?’

4. Mang e be gay Satan rogon ni nge rin’, ya nge yag ni nge kirebnag e tha’ u thildad Got, ma mang fan?

⁴ I yoloy James ni gaar: “Pi n’en ni ma waliy e girdi’ nge  denen e ma yib ngak e en ni pag ir ko n’en nib kireb ni be ar’arnag nge waliy faanem nge aw ko wup; ma aram me diyen e tin nib kireb ni be ar’arnag nge gargeleg e denen; ma faani ilal e denen nge mus nga rogon me gargeleg e yam’.” (Jas. 1:14, 15) Satan e ma guy rogon ni nge kirebnag gum’ircha’dad, ya manang ni ireram e gin ni ma sum e tin nib tagan ban’en riy ni yima ar’arnag.

5, 6. (a) Mang boch e kanawo’ ni ma gagiyegnag Satan lanin’dad riy? (b) Mang boch ban’en ni ma fanay Satan ni nge kirebnag gum’ircha’dad, ma uw feni rib salap ni ma fanay e pi n’em?

⁵ Uw rogon ni be gay Satan rogon ni nge kirebnag gum’ircha’dad? Be yog e Bible ni gaar: “Girdi’ nu fayleng e ke suweyrad Faanem nib Kireb.” (1 John 5:19) Talin e maruwel rok Satan e ba muun ngay e tin “nib mil fan nga fayleng.” (Mu beeg e 1 John 2:15, 16.) U lan bokum biyu’ e duw ma ke fanay Moonyan’ e re fayleng ney ni nge bannag urngin e girdi’. Bochan ni gadad be par ko re fayleng ney, mab t’uf ni ngad kol ayuwgad ko pi ban rok.​—John 17:15.

⁶ Ma fanay Satan boch ban’en nra kirebnag gum’irchaen e girdi’. Ke weliy apostal John murung’agen dalip ban’en nra waliyey ko kireb ni aram e: (1) “tin nib tagan ban’en ni yima ar’arnag” (2) “tin nra guy e girdi’ ma yad ba adag ni nge yog ngorad,” (3) “urngin ban’en ni bay u roy u fayleng nri ma uf e girdi’ ngay.” Ke fanay Satan e pi n’em u nap’an ni skengnag Jesus u daken e ted. Bochan ni bokum e duw ni ke fanay Satan e pi wup ney, ma aram fan e ngiyal’ ney e ke salap u rogon ni ma waliy e girdi’, ma ma rin’ e re n’ey ni be yan u rogon e n’en ni baadag e girdi’. U m’on ni ngad weliyed rogon ni ngad ayuweged gadad ko re magawon ney, ma ngad guyed rogon ni ke fanay Moonyan’ boch ban’en ni nge waliy Efa me yib wenegan, machane nap’an ni gay rogon ni nge waliy Jesus ni fak Got ma de fol rok.

7. Uw rogon ni ke fanay Satan e “tin nib tagan ban’en ni yima ar’arnag” ni nge waliy Efa?

⁷ Girdi’ e ba t’uf ni ngar gayed e ggan ya ireray e n’en nib t’uf nga fithik’ i dowrad. En Ta Sunmiy e ke sunmiy e fayleng nrayog ni nge tugul boor mit e woldug riy nra pi’ e ggan. Bochan ni baadag e girdi’ e ggan ma aram fan ni ke fanay Satan e re n’ey ya nge yag ni nge talegdad ni nge dabkud rin’ed e tin nib m’agan’ Got ngay. Ngam lemnag ko uw rogon ni ke rin’ e re n’ey ngak Efa. (Mu beeg e Genesis 3:1-6.) Ke yog Satan ngak Efa nrayog ni nge kay wom’engin fare “ke gek’iy ni ma tamilangnag an’uy ko tin nib fel’ nge tin nib kireb” ma dabi yim’, miki yog ngak nnap’an nra kay ma ra bod Got. (Gen. 2:9) Ere thin ni yog Moonyan’ e be m’ug riy nrayog ni nge par Efa nib fel’ e par rok ni yugu aram rogon ndabi fol rok Got. Ri de riyul’ e n’en ni ke yog Satan! Tomuren ni ke yog e pi thin nem ma bay l’agruw ban’en nrayog ni nge mel’eg Efa ni nge rin’: Rayog ni nge dabi fol ara rayog ni nge ulul ngi i lemnag, ma re n’ey nra rin’ e ra k’aring ni nge adag ni nge kay wom’engin fare ke gek’iy. Ere, yugu aram rogon ni ku bay e gek’iy ko fagi milay’ nrayog ni nge kay wom’ngin, machane ke dugliy u wan’ ni nge par ni be lemnag e ken  nem ni bay u lukngun fa gi milay’, ma aram me “t’ar boch i wom’engin nge kay.” Satan e ke k’aring Efa ni nge adag ni nge yag ban’en ngak nde m’agan’ e En Ta Sunmiy ngay.

8. Uw rogon ni gay Satan rogon ni nge waliy Jesus ni be fanay e “tin nib tagan ban’en ni yima ar’arnag,” ma mang fan nde yag ni nge waliy Jesus?

⁸ Maku ireray e n’en ni ke fanay Satan u nap’an ni guy rogon ni nge waliy Jesus u daken e ted. Tomuren 40 e rran nge nep’ nde abich Jesus, me gay Satan rogon ni nge waliy Jesus ni nge adag ni nge kay ban’en. Ma aram me non Satan ngak Jesus ni gaar: “Faanra Fak Got gur, me ere mu non ko re malang ney nge ngal’ ni flowa.” (Luke 4:1-3) Rayog rok Jesus ni nge mel’eg l’agruw ban’en ni nge rin’: Reb e rayog ni nge fanay gelngin ni nge pilyeg fare malang nge ngal’ ni flowa, ya nge yag ni nge kay ara dabi fanay gelngin ni nge rin’ e re n’em. Jesus e manang ni thingari dabi fanay gelngin ni yigoo ir e nge fel’ ngak. Ere, yugu aram rogon ni kari yib e bilig ngak, machane de tay ni nge m’on e ggan u wan’, ya kub ga’ fan e tha’ u thilrow Jehovah. Ere, ke fulweg Jesus ni gaar: “Fare babyor nib thothup e be gaar, Girdi’ e dabiyog ni yigoo flowa e ra i kay mi i par nib fos.”​—Luke 4:4.

9. Mang e be yip’ fan fare thin ni “tin nra guy e girdi’ ma yad ba adag ni nge yog ngorad”, ma uw rogon ni ke fanay Satan e re n’ey ni nge waliy Efa?

⁹ Ke yog John ni “tin nra guy e girdi’ ma yad baadag ni nge yag ngorad” e rayog ni nge waliyrad. Re n’ey e be yip’ fan nrayog ni nge adag be’ ban’en nfaanra kemus ni be par be fal’eg i yaliy e re n’em. N’en ni ke rin’ Satan ngak Efa e ke yog nra ‘tamilangan’row ngar nangew e n’en nib fel’ nge n’en nib kireb.’ Nap’an ni be par Efa be fal’eg i yaliy wom’engin fare ke gek’iy, ma kari adag ni nge kay, ya rib “fel’ yaan.”

10. Uw rogon ni ke fanay Satan e “tin nra guy e girdi’ ma yad ba adag ni nge yog ngorad” ni nge waliy Jesus, ma mang e rin’ Jesus?

¹⁰ Mang e ke rin’ Satan ngak Jesus? Ke fek “Jesus nga bayang nib tolang me dag ngak urngin e pi nam nu fayleng nnap’an e talab ni tay be’. Me gaar fare moonyan’ ngak, “Gu ra pi’ mat’awum ni nguum gagiyegnag e pi nam ney nge urngin e pi flaab ney.” (Luke 4:5, 6) Dabiyog rok Jesus ni nge guy urngin e pi nam nga owchen e chingiyal’ nem, machane sana ke lemnag Satan nfaanra pilyeg e changar rok ya nge yag ni guy e pi flaab ko pi am nem, ma ra adag Jesus ni nge rin’ e n’en ni be yog Satan. De tamra’ Satan ni nge yog ni gaar: “Urngin e pi n’ey ma ra mil suwon ngom ni faanra mu ragbug nga but’ u p’eowcheg.” (Luke 4:7) Ri dabun Jesus e re n’em ni ke yog Satan ngak ni nge rin’. I fulweg Jesus nib papey ni gaar: “Fare babyor nib thothup e be gaar, ‘Mu siro’ ma ga meybil ngak Somol ni Got rom ma yigoo ir e ngam pigpig ngak!’”​—Luke 4:8.

11. Uw rogon ma ke yag rok Satan ni nge waliy Efa?

¹¹ Nap’an ni weliy John murung’agen e pi n’en  nib milfan nga fayleng me yog nib muun ngay “urngin ban’en ni bay u roy u fayleng nri ma uf e girdi’ ngay.” Nap’an ni immoy Adam nge Efa u roy u fayleng ni yigoo yow, ma dabiyog ni ngar ‘ufgow ko pi n’en ni bay rorow’ ya yigoo yow e yow bay. Machane ke tolang e lem rorow. Nap’an ni waliy Satan Efa, me tay nga laniyan’ ni bay ban’en nib fel’ ni dabun Got ni nge pi’ ngak. Ke yog Moonyan’ ngak ni rofen ni ra kay wom’engin “fare ke gek’iy ni ma tamilangnag an’uy ko tin nib fel’ nge tin nib kireb” e ra ‘tamilangan’row ngar nangew e n’en nib fel’ nge n’en nib kireb ni bod Got.’ (Gen. 2:17; 3:5) Ere, bod ni ke yog Satan ngak Efa nde t’uf e ayuw ku Jehovah rok. Ma dabisiy ni ke fol Efa rok Satan, ya ke tolang e lem rok. Ke kay wom’engin fare ke gek’iy, ya be lemnag ndabi yim’. Ri de puluw e n’en ni ke lemnag.

12. Mang reb e kanawo’ ni ke gay Satan rogon ni nge waliy Jesus, ma mang e rin’ Jesus?

¹² Rib thil e n’en ni ke rin’ Jesus ko n’en ni rin’ Efa, ya ke dag ko ngongol rok ni ir be’ nib sobut’an’. Ke gay Satan rogon ni nge waliy Jesus u yugu reb e kanawo’, machane de rin’ Jesus e n’en ni ke yog Satan ngak nrayog ni nge skengnag Got. Ya faanra ke rin’ Jesus e n’en ni ke yog Satan ma be m’ug riy ni ir be’ nib tolangan’! Machane, fulweg ni pi’ Jesus ngak Satan e ba tamilang, ya yog ni gaar: “Fare babyor nib thothup e be gaar, Ri dab mu skengnag Somol ni Got rom.”​—Mu beeg e Luke 4:9-12.

13, 14. Mu weliy ko uw rogon ni ma fanay Satan boch ban’en ni nge waliydad e ngiyal’ ney.

¹³ Ngiyal’ ney, e ku ma fanay Satan boch ban’en ni nge waliydad nib chugur ko pi n’en ni i fanay ni nge bannag Efa nge Jesus. Be gagiyelnag Moonyan’ ni ngongol nib kireb nge abich nge muun rrum nib pag rogon e aram e “tin nib tagan ban’en ni yima ar’arnag.” Maku ma fanay yaan e puwlag ni bay ko Internet nrayog ni nge k’aring e girdi’ ni ngar adaged ni ngar yaliyed, ma ireray boch ban’en ni bay rogon ko n’en ni ka nog e “tin nra guy e girdi’ ma yad ba adag ni nge yog ngorad.” Ma boch ban’en ni “bay u roy u fayleng nri ma uf e girdi’ ngay” ni bod rogon chogowen e chugum, nge yag e liw nib tolang, nge gilbuguwan e ba papey ni nge waliy e girdi’ nib tolangan’.

¹⁴ Pi n’en ni bay u “roy u fayleng” e bod e wal ni ma fanay be’ nib ta fita’. Pi n’em e bogi ban’en nra guy be’ ma baadag ni nge yag ngak, machane, nap’an nra yag ngak ma rayog ni nge pirieg e magawon ko tomur. Ma fanay Satan e pi n’en ni ma lemnag e girdi’ nib t’uf ni nge yag ngorad u reb e rran nge reb ni ngar th’abed e motochiyel rok Got.  Pi n’en ni ma fanay ni nge waliydad e ba mo’maw’ ni ngad guyed nib kireb ma ra k’aringdad ni ngad ar’arnaged ban’en nib kireb, ma ra kirebnag gum’ircha’dad. Re n’ey ni be rin’ Satan e be gay rogon ni ngad lemnaged ni kub ga’ fan e tirodad ban’en ni ngad maruweliyed ko bin ni ngad rin’ed e maruwel ni ke pi’ Got ngodad. Ma uw rogodad, rayog ni nge waliydad Satan, fa?

15. Uw rogon ni ngad folwokgad rok Jesus u rogon ni gel ko pi skeng ni fek Satan i yib ngak?

¹⁵ De yag rok Efa ni nge gel ko pi skeng ni fek Satan i yib ngak, machane, Jesus e yag rok ni nge gel ko pi skeng nem. Gubin ngiyal’ ni pi’ Jesus e fulweg ni be fanay e thin nu Bible, ma ma yog ni gaar: ‘Be yog e babyor nib thothup.’ Faan gad ra tiyan’dad ni ngad filed e Bible nib fel’ rogon, ma gad ra nang e pi thin ni bay riy, ma rayog ni nge yib ngan’dad e thin riy u nap’an ni gad ra mada’nag e skeng. (Ps. 1:1, 2) Gad ra lemnag e girdi’ ni bay murung’agrad u Bible ni ur pared ni yad ba yul’yul’ ngak Got ma rayog ni ngad folwokgad rorad. (Rom. 15:4) Gad ra tayfan Jehovah, ma gad ra adag e tin ni baadag, ma gad ra fanenikay e tin dabun, ma rayog ni ngad ayuweged e yafas rodad.​—Ps. 97:10.

16, 17. Faan gad ra ‘fal’eg i lemnag’ ban’en, ma mang e ra rin’ nga rarogodad?

¹⁶ Ke pi’ apostal Paul e athamgil nga lanin’dad ni ngad ‘fal’eged i lemnag’ e tin nib m’agan’ Got ngay, ya nge yag ni ngad boded e girdi’ ni be folwok ko lem rok Got, ma gathi lem nu roy u fayleng. (Rom. 12:1, 2, NW) Be puguran Paul ngodad ni thingar da gagiyegniged rogon e n’en ni gad be lemnag, ya yog ni gaar: “Kug buthuged urngin e lem nib tolang ni yibe togopuluwnag ko tin ni kan nang ni murung’agen Got; gamad be fek urngin e lem ni bod ni yima kol e girdi’ ko mahl nggu pingeged nge fol rok Kristus.” (2 Kor. 10:5) Pi n’en ni gad ma lemnag e rayog ni nge thilyeg e ngongol rodad, ere ba t’uf ni ngad ‘suguyed lanin’dad’ ko tin nra gelnag e michan’ rodad.​—Fil. 4:8.

¹⁷ Dab da lemnaged nrayog ni ngad pared ni gadad ba thothup nfaanra gad be lemnag e tin nib kireb. Thingar da t’ufeged Jehovah nib “machalbog” gum’ircha’dad. (1 Tim. 1:5) Gum’ircha’dad e ba sasalap, ma rayog ni dab da nanged rogon ni be magawonnagdad e pi n’en “ni ba’ u roy u fayleng.” (Jer. 17:9) Ere, thingar da ‘changargad ngodad ko gadad be par ni gadad be ngongol u fithik’ e michan’ rodad’ ni aram e ngad yaliyed gadad u fithik’ e yul’yul’ ko ba puluw e ngongol rodad ko tin ni gad be fil u Bible, fa.​—2 Kor. 13:5.

18, 19. Mang fan ni ngad nameged ni ngad fel’gad u wan’ Jehovah?

¹⁸ Ku reb e ban’en nrayog ni nge ayuwegdad ni ngad gelgad ko “tin ni bay u fayleng” e aram e dab da paged talin e thin ni yog John ni ke thagthagnag Got nga laniyan’ ni gaar: “Re fayleng ney nge urngin ban’en ni ba’ riy ni be yim’ e girdi’ ni bochan e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.” (1 John 2:17) Fare m’ag rok Satan e gowa ra par ndariy n’umngin nap’an. Machane, boch nga m’on ma ra m’ay. Dariy ban’en ko fayleng rok Satan nra par ni manemus. Faanra dab da paged talin e re n’ey ma ra ayuwegdad ni nge dabi waliydad Moonyan’.

¹⁹ Be fonownagdad apostal Peter ni ngad maruweliyed nge yag ni ngad fel’gad u wan’ Got e chiney ni “gadad be sonnag e chirofen nem, ni ir e Rran rok Got, ma gadad athamgiliy nrogon nrayog rodad nge papey nge taw ngay - Rofen ni baaram ni bay yik’ lan e lang nge kireb e urngin ban’en ni bay u lan e lang e bayi ranrannag e gowel.” (2 Pet. 3:12) Dabki n’uw nap’an, ma ra taw e re rran nem ngodad, me gothey Jehovah urngin yang ko fayleng rok Satan. Machane, u m’on ni nge yib e re rran ney ma ra ulul Satan ni nge fanay e “tin ni bay u fayleng” ni nge waliydad ni bod e n’en rin’ ngak Efa nge Jesus. Thingar dab da rin’ed e n’en ni baadag dowdad ni bod ni rin’ Efa. Ya faanra ngad rin’ed ban’en ni aram rogon ma bod ni gad be yog ni Satan e ir e got rodad. Ba t’uf ni ngad boded Jesus, ma dab da paged Satan ni nge waliydad, ni yugu demtrug feni manigil yaan bogi ban’en ni ke fal’eg. Gadad gubin ni ngad nameged ni ngad manged e piin nib m’agan’ Jehovah ngorad.