“Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus. Ma binem e gagiyeg e dariy be’ nra gel ngay biid, machane bayi thirif u but’ urngin e pi pilung nem nge gagiyeg ni yad be tay me mang fa birok e gagiyeg e i par ndariy n’umngin nap’an.”​—Daniel 2:44.

Gil’ilungun Got e aram e am rok ni bay u tharmiy. Ma Jesus Kristus ni ir e pilung riy e ra yan nga lon urngin e pilung ko am ko girdi’, ma ra lebguy e tin nib m’agan’ Got ngay u tharmiy ngu roy u fayleng. (Matthew 6:9, 10) Dariy reb e am ko girdi’ nra yan nga lon e re am ney, ya aram e “gin’en ni bayi par ndariy n’umngin nap’an, ni aram gin’en ni suwon e Somol rodad i Jesus Kristus.” Ma ra aw e gapas ndariy n’umngin nap’an.​—2 Peter 1:11.

“Rayog rok moonyan’ ni nge piliyeg ir nge bod yaan ba engel ko tamilang! Ere gathi ban’en ni ngan gin ngay ni faanra piliyeg e pi tapigpig rok moonyan’ yad ngar boded yaan e pi tapigpig ko tin nib mat’aw. Machane tomur riy e ri bay ni pi’ wenegan ngorad nri bod rogon e pi n’en ni yad be rin’.”​—2 Korinth 11:14, 15.

Yira nang ni pi yurba’ i teliw ni googsur e aram e maruwel rok Moonyan’ ma yira chuweg u fayleng. Ma ngiyal’ nem e dakuriy e laniyan’ nge cham. Bochan e re n’ey, ma urngin e piin nib t’uf rorad e “bin nriyul’ e Got ni ir e be par nib fos,” e yad ra liyor ngak ni taareb e ‘michan’ rorad, ma “be pagan’rad nga gelngin Got nib thothup ngu daken e tin riyul’.” Re n’ey e ra yibnag e gapas nge taareban’.​—1 Thessalonika 1:9; Efesus 4:5; John 4:23, NW.

“Mi Got e bay i par rorad, mi ir e bayi mang Got rorad. Ma bayi n’ag urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith. Ya tin kakrom ban’en e ke chuw.”​—Revelation 21:3, 4.

Jehovah Got e ke bing e kanawo’ ni nge yag ni lebug e re n’ey u daken Jesus ni Fak ya ir e ke pi’ e yafas rok  ni fan ko girdi’. (John 3:16) U tan e gagiyeg rok Jesus e ra sul e girdi’ ngkur flontgad bayay. Ma dakuriy e gafgow ya “Got e bay i par rorad” ma “dab ku un yor.” Dabki n’uw nap’an ma dakuriy e girdi’ nde flont ma dab kur gafgowgad, ya “piin ni yad mmat’aw e bay ra pired u daken fare but’, me par ni taferad ni dariy n’umngin nap’an.”​—Psalm 37:29.

“Me kol [Jesus Kristus] fare dragon, ni ir fare porchoyog ni ke kakrom, ni aram fare Moonyan’, ara Satan, me m’ag nge tay ni aram rogon nib biyu’ e duw. Me yin’ fare engel fare moonyan’ nga lan fare low nib toar, me loknag nge mu’ me pag e hang nga daken ni bochan e nge dabkiyog ni nge bannag girdien e pi nam nge yan i mada’ ko ngiyal’ ni ke m’ay fare biyu’ i duw. Ma tomren e re biyu’ i duw nem e bay kun pag riy nib ngoch nap’an.”​—Revelation 20:2, 3.

Dakuriy ban’en ni nge rin’ Satan nge pi moonyan’ rok u nap’an ni yira m’agrad min nin’rad nga lan “fare low nib toar” ara abyss, ni be yip’ fan nri dakuriy ban’en nrayog ni ngar rin’ed. Dabkiyog ni ngar gagiyegniged e girdi’. Ri gadad ba felfelan’ ni ngad pared u fayleng ni dabki yog ni nge bannagdad Satan nge pi kan nib kireb!

“Tin tomuren e rran” ni weliy Jesus murung’agen e ra m’ay u nap’an e “Armageddon” ni aram e tomur ko fare gafgow nib ga’. I yog ni gaar: “Gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.”​—Matthew 24:21.

Rib gel e re gafgow nem, ya ra buch boch ban’en ndawori buch bayay. Ma ra m’ay u nap’an fare “Rran rok Got ni Gubin ma Rayog Rok,” ni aram e “Armageddon.”​—Revelation 16:14, 16.

Girdi’ nib t’uf rorad e tin nib mat’aw e yad be sonnag ni nge m’ay e re m’ag nib kireb ney. Mu lemnag boch e pi tow’ath nra yag ngorad u tan Gil’ilungun Got.

“Girdi’ ni ke muulung ni pire’ ni pire’” e ngar pared u lan e bin nib beech e fayleng ni yad ba gapas: Thin rok Got e be yog ni girdi’ ni “ke muulung ni pire’ ni pire’” ndariy be’ nrayog ni nge theegrad e ngar ‘thapgad u fithik’ fare gafgow ni ba ga’’ e yad ra magey nib fas ngar pared u lan fa bin nib beech e fayleng ni tin nib mat’aw e ngongol e bay riy. (Revelation 7:9, 10, 14; 2 Peter 3:13) Yad ra pining e magar ngak Jesus Kristus ya ir e ke ayuweg e yafas rorad ni ir “fare Fak e Saf rok Got ni ir e nge chuweg e denen rok e girdi’ nu fayleng.”​—John 1:29.

Ra fel’ rogon e girdi’ u nap’an nra skulnagrad Got: U lan fa bin nib beech e fayleng ma “girdi’ ko nam e ri bayi tamilangan’rad u murung’agen Somol.” (Isaiah 11:9) Yira fil ngorad rogon ni ngar pared nib aw e gapas u thilrad urngin e girdi’ nge rogon ni ngar ayuweged e pi n’en ni bay u toobrad. Ke micheg Got ni gaar: ‘I gag SOMOL ni Got romed, faen baadag ni nge fil ngomed e tin nib fel’, me pow’iymed ko fare kanawo’ ni ngam marod riy.’​—Isaiah 48:17, BT.

Piin ni kar m’ad e yira fasegrad ko yam’: Nap’an ni immoy Jesus u fayleng me faseg Lazarus ni fager rok ko yam’. (John 11:1, 5, 38-44) Ere ke dag e n’en nra rin’ u tan Gil’ilungun Got.​—John 5:28, 29.

Gapas nge tin nib mat’aw e ra par ndariy n’umngin nap’an: U tan e gagiyeg rok Kristus, ma dakuriy e girdi’ ni yad ra th’ab e motochiyel. Uw rogon ni gad ra nang e re n’ey? Ya bochan ni Jesus ni manang e n’en ni bay u gum’irchaen e girdi’ e ra fanay gelngin ni nge pufthinnag e piin nib mat’aw nge piin nib kireb. Ma piin dubrad ni ngar thilyeged e ngongol rorad nib kireb e dabiyog ni ngar pared u lan fa bin nib beech e fayleng rok Got.​—Psalm 37:9, 10; Isaiah 11:3, 4; 65:20; Matthew 9:4.

Boor e yiiy ni bay ma kemus ni in riy ni be weliy murung’agen e tin nib fel’ ni bay yib e kad weliyed murung’agen. Nap’an nra gagiyegnag Gil’ilungun Got e fayleng ma ra par ni bay e “gapas” riy. (Psalm 37:11, 29) Ma ra m’ay urngin ban’en ni be k’aring e magawon nge gafgow ko girdi’. Thin rok Got e be yog ni gaar: “Chiney e nggu thiliyeg urngin ban’en nge beech. . . . Pi thin ney e ba riyul’ ma rayog ni ngan pagan’uy ngay.”​—Revelation 21:5.