Thin ko Bible e be gaar: “Nap’an nra gagiyeg be’ nib kireb, me kireban’ e girdi’.”​—Proverbs 29:2.

Kab kakrom i yib, ma boor e piin ni ur gagiyeggad nib gel lungurad, maku yad ma towasariy e piin ni bay u tan e gagiyeg rorad, ma pi girdi’ nem e rib gel e gafgow ni yad ma tay. Machane, gathi gubin e piin ni ur gagiyeggad e ireray e n’en ni ur rin’ed. Dabisiy ni bay boch i yad ni ur lemnaged ni ngar ayuweged e girdi’ ni yad bay u tan e gagiyeg rorad. Machane, nap’an ni ke yag reb e liw ngorad nib tolang, mab ga’ ndabki yib angin e maruwel rorad nbochan nder taareb lungurad, ma yad ma guy rogon ko mini’ arorad e nge tolang e liw rok. Ara yad ma fanay e re liw rorad n’ey ni nge yag boch ban’en ngorad ni kemus nyigoo yad e nge fel’ ngorad, ma tin ni ka bay e girdi’ e yad ra gafgow. Henry Kissinger ni ir e U.S. Secretary of State kafram e yog ni gaar: “Chepin girdien e am e de yib angin e maruwel ni kar ted, ara de m’ug nib riyul’ e n’en ni yad be nameg.”

Be tamilangnag e thin ko Bible ni be gaar: “Dariy be’ ni bay gafan e yafos rok u pa’.” (Jeremiah 10:23) Girdi’ e dawori flont, ma de gaman e gonop rorad maku dabiyog rorad ni ngar guyed e n’en ni bay nga m’on, ya nge yag ni ngar gagiyegniged e yafas rorad nib fel’ rogon. Ere, faanra dabiyog rok be’ ni nge gagiyegnag ir, me ere uw rogon ni nge gagiyegnag reb e nam? Ke tamilang u wan’um ko mang fan ndabiyog rok e pi tayugang’ ko am ni ngar chuweged e gafgow u fayleng? Bin riyul’ riy e pi am nib kireb e yad be gafgownag e girdi’.

I yog Jesus ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.”​—John 13:35.

Pi tayugang’ ko pi yurba’ i teliw e yad ma machibnag murung’agen e t’ufeg nge taareban’. Ma bin riyul’ riy e der yag ni ngar filed ngak girdien e teliw rorad murung’agen e t’ufeg ya nge yag ni ngar chuweged e lem ni laniyan’. Darur ayuweged e girdi’ ni ngar daged e t’ufeg, ya ba ga’ ni yad be k’aring e girdi’ ni ngar ruw raba’gad, me sum fare lem ni laniyan’ u thilrad, mar chamgad. Tin tomuren e thin u baken e babyor ni yoloy Hans Küng e be gaar: “Pi yurba’ i teliw e yad ma k’aring e girdi’ ni ngar lemnaged boch ban’en nde puluw ma yad ma k’aring e togopuluw u thilin e pi am. Ma pi n’ey e yad ma guy rogon ni nge puluw u wan’ boch e girdi’.”​—Christianity and the World Religions.

Pi tayugang’ ko pi yurba’ i teliw e yad ma pag e piin ndawor ra uned ko mabgol ni ngar uned ko ngongol ndarngal, maku yad ma pag e piin ni yad ba mabgol ni ngar pared e piin ni gathi mabgol rorad, maku yad ma  pag ni nge par e ppin nge ppin nge pumoon nge pumoon. Ke yoor mit e m’ar nbochan e pi n’ey ni yibe rin’, maku bay e piin ni yad ma mali’ bitir u mayel, nge piin ni yad be diyen ndariy e pumoon rorad, maku der yag ni nge ayal e mabgol nge tabinaw, ma be gafgow lanin’uy.

“Machane pi n’en ni ma waliy e girdi’ nge denen e ma yib ngak e en ni ma pag ir ko n’en nib kireb ni be ar’arnag nge waliy faanem nge aw ko wup; ma aram me diyen e tin nib kireb ni be ar’arnag nge gargeleg e denen.”​—James 1:14, 15.

Bochan ni gadad gubin ndawor da flontgad, ma gad ma oloboch ma aram fan nib t’uf ni ngad athamgilgad ndab da rin’ed e ‘n’en ni ir e mm’agan’ dowdad ngay.’ (Efesus 2:3) Ri kab gel e mo’maw’ riy nfaanra ar’arnag be’ ban’en nib kireb, ma ke mab e kanawo’ ngak ni nge rin’ fare n’en ni be ar’arnag. Faanra gad ra fol ko tin ni be ar’arnag e dowef rodad, ma bay wenegan.

Reb i girdien e ta yol ni P.  D. Mehta fithingan e gaar: “Ba ga’ ni ma yib e gafgow ngodad nbochan ni gad ma ar’arnag e tin nib kireb ni bod ni gad baadag ni ngad pared be’, maku darud gonopiyed gadad ko pi n’en ni gad ma rin’ ni ngad felfelan’gad ngay, maku bay e lem rodad nib chogow, ma gad baadag ni nge yag boch ban’en ngodad.” Ar’ar nge pi n’en ni kam mecham ngay ni bod e rogon e muun alkul nib pag rogon, nge falay nib kireb ni yima fek, nge gosgos ni yima un ngay ni ngan fek salpiy riy, nge par ko pumoon nge ppin, nge ku boch ban’en e ireray e pi n’en ni be kirebnag e ‘piin’ ni yima tay farad ma ma k’aring e gafgow ngak girdien e tabinaw, nge pi fager rorad nge ku buch e girdi’. Bochan ndawori flont e girdi’ mab t’uf ni nge fel’ u wan’dad e n’en ni be yog e Bible ni gaar: “Gadad manang ni urngin e tin ni ke sunumiy Got e be gel’gel’ ko amith ni bod rogon e amith ko gargel, ni kab kakrom i yib ke mada’ ko chiney.”​—Roma 8:22.

Be tamilangnag e Bible ni Satan e ir “fare kan nib kireb nu roy u fayleng” nib muun e pi moonyan’ ngak nib gel gelngirad.​—2 Korinth 4:4; Revelation 12:9.

Pi moonyan’ e yad bod Satan, ma rayog ni ngar gagiyegniged mar bannaged e girdi’. I tamilangnag Paul e re n’ey u nap’an ni yog ni gaar: “Ya gadad e gathi gadad be cham ngak e girdi’, ya gadad be cham ngak gelngin e kan nib kireb, ni pi kan ni yad e yad be gagiyeg, nge gelngin e kan u lan e lang ko ngiyal’ ney nib talumor.”​—Efesus 6:12.

Yugu aram rogon ni baadag e pi moonyan’ ni ngar magawonnaged e girdi’, machane gathi ireray e re n’en nri yad be nameg. Yad baadag ni ngar chafeged e girdi’ nga orel rok Jehovah ni ir e Got ni Th’abi Tolang. (Psalm 83:18) Piin ni yad ma fil murung’agen e pi t’uf, pul nge boch ban’en ni bay u lan e lang, maku yad ma un ko ngongolen e pig nge matokan, ma yad ma yaliy e wol u lan paay, e ireray boch ban’en ni ma fanay e pi moonyan’ ni ngar bannaged mar gagiyegniged e girdi’. Aram fan ni ma puguran Jehovah ngodad e pi riya’ ney, ma ma ayuweg e piin ni yad ma siyeg e ngongol rok Satan nge pi moonyan’ rok.​—James 4:7.

Sogonap’an l’agruw e biyu’ e duw ni ke yan, ma ke yiiynag e Bible ni gaar: “Mu tay fanam i yan ko re bugithin ney! Tin tomuren e rran e ri bay mo’maw’ ni ngan par nrogon e tin riyul’ ni girdien Kristus.”

Be weliy e Bible fan ni ke mo’maw’ e par e ngiyal’ ney ni gaar: “Ya bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad.” Ere ba tamilang ni ke sum e gafgow ni gad be guy e ngiyal’ ney nbochan ni gad be par ko “tin tomuren e rran.”​—2 Timothy 3:1-4.

Bochan e pi n’en ni kad weliyed, mab tamilang ni yugu demtrug rogon e athamgil ni be tay e girdi’, ma dabiyog rorad ni ngar chuweged e gafgow. Ere mini’ e rayog ni nge ayuwegdad? Ba t’uf ni ngad sapgad ngak e En Tasunmiy ni ke micheg nra ‘kirebnag e maruwel rok Moonyan’’ nge piin ni yad be folwok rok. (1 John 3:8) Bin migid e article e ra weliy e n’en nra rin’ Got ni nge chuweg tapgin e gafgow.