Genesis ni aram e bin som’on e babyor u Bible e be weliy nib tamilang rogon ni sum e palpalth’ib ni gaar: “Aram ko tabolngin ni tabab Got i sunmiy e fayleng nge urngin ban’en ni bay u lan e lang.” (Genesis 1:1) Tomuren ni ke sunmiy Got e woldug nge gamanman, ma aram me sunmiy Adam nge Efa. Girdi’ e yad ba thil ko gamanman, ya bay boch i fel’ngin Got rorad nib muun ngay e puf rogon. Ere, yad e ba milfan ngorad e ngongol rorad ni yad ma rin’. Faanra fol Adam nge Efa ko n’en ni tay Got chilen ngorow ma rayog ni ngar parew u roy u fayleng ni yow ba gapas ni manemus ni ireray e n’en nib m’agan’ Got ngay.

Machane, bay reb e engel ni ke fanay e girdi’ ya nge yag e tin ni be chogownag. Ere ke mang Satan nre thin ney e be yip’ fan e “Tatogopuluw.” Ke non Satan u l’ugun ba porchoyog ni ke bannag Efa me yog ngak nra dabi pag Got ni nge pow’iy ma ra fel’ boch rogon e yafas rok. I fol Adam nge Efa rok Satan ma aram mar kirebnigew e tha’ u thilrad e En ke Sunmiyrow. Bochan nde puluw e n’en ni kar dugliyew, ma aram fan ni ke mul e yafas ni manemus u pa’row, me af e denen, nge thibngirow, nge yam’ ngak gubin e girdi’.

Ka chingiyal’ nem, me gay Got rogon ni nge yal’uweg e n’en ni buch, me bing e kanawo’ ngak pi fak Adam ni nge yag e yafas ndariy n’umngin nap’an ngorad. Ke yog Got ni be’ nib moon ni “fak” e ra munmun ma ra thang Satan, me chuweg urngin e gafgow ni ke yib nbochan e n’en ni rin’ Satan, nge Adam nge Efa. (Genesis 3:15) Ere mini’ e en ni “fak”? Ra munmun ma yira nang.

Ngiyal’ ney, ma i gay Satan rogon ni nge taleg e tin nib m’agan’ Got ngay. Denen nge tin nib kireb e garer nib papey. Ere ke dugliy Got ni nge pi’ e ran ni nge thang e girdi’ nib kireb. Ke yog ngak Noah ni nge toy reb e arke, ni bod reb e kahol nib ga’, nra ayuweg e yafas rok nge chon e tabinaw rok nge pi gamanman ni ka nog ngak ni nge tayrad nga lan fare arke.

Tomuren ni ke yan reb e duw ni ke yib fare Ran ni nge tharey e fayleng, me yan Noah nge chon e tabinaw rok nga wuru’ fare arke nga daken e fayleng nib klin. Machane ngiyal’ nem e dawori m’ug fa en ni ir e “fak.”

​—Kan fek ko Genesis 1-11; Jude 6, 14, 15; Revelation 12:9.