Fas ko yam’ ni tay Jesus e ke pi’ e athamgil nga laniyan’ pi gachalpen ni nge mich u wan’rad miki yag ni ngar pasiggad. I milekag apostal Paul u Asia Minor nge mada’ nga Mediterranean, ma be tabab ni nge yarmiy e ulung ma be pi’ e athamgil ngak e pi Kristiano u rom, ya nge yag ni ngar pired ni yad ba mudugil u nap’an ni kar mada’niged boch e magawon nge togopuluw. Yugu aram rogon ni kar mada’niged e pi magawon nem, machane ke yoor e pi Kristiano.

Ka nin’ Paul nga kalbus. Machane, nap’an ni immoy u kalbus me yoloy e babyor ngak e piin Kristiano ni be pi’ e athamgil nga lanin’rad ma be fonownagrad. Ki yog ni ngar kol ayuwgad rok e piin ni kar digeyed e bin riyul’ e liyor ma kar chelgad kar togopuluwgad ngay. Gelngin Got nib thothup e ke ayuweg Paul ya nge yag ni guy e girdi’ ni yad bod e “wolf nib damumuw” ni yad be wereg e “tin nde riyul’” ma yad be pow’iy e “piin ni ke mich Jesus u wan’rad nga bang ngar uned ngorad.”​—Acts 20:29, 30.

U tomuren e bin som’on e chibog, ma piin ni kar digeyed e bin riyul’ e liyor e kur tababgad i wereg e machib nib togopuluw ko bin riyul’ e liyor. Aram e ngiyal’ ni dag Jesus ngak apostal John boch ban’en nra buch boch nga m’on. Ma rogon ni yoloy John, e dabiyog rok e piin ta togopuluw nge pi tamachib ni googsur ni ngar taleged Got ni nge lebguy e tin nib m’agan’ ngay ni fan ko fayleng nge girdi’. Ma “urngin e pi nam nge ganong nge thin nge gubin mit e girdi’” e yad ra rung’ag fare thin nib fel’ ni murung’agen Gil’ilungun Got. (Revelation 14:6) Yira paradisnag e fayleng, ma urngin e girdi’ ni yad baadag ni ngar rin’ed e tin nib m’agan’ Got ngay e rayog ni ngar pared riy!

Gur, re n’ey e ban’en nib “fel’” u wan’um? Faanra aram rogon, ma ngkum fil boch murung’agen e thin rok Got u Bible ni fan ko girdi’ nge rogon nrayog ni nge fel’ rogom riy e ngiyal’ ney nge boch nga m’on.

Rayog ni ngam beeg e Bible u online ko www.pr418.com. Mu lan e re Web site ney, e rayog ni ngam beeg fare brochure ni Thin nib Fel’ ni Yib rok Got! Nge fare babyor ni Mang e Ri Be Fil e Bible? nge boch e babyor ni be weliy fan nrayog ni ngad pagedan’dad ko thin nu Bible nge rogon ni ngad folgad ko fonow ni bay riy ni fan ngodad nge tabinaw rodad. Ara ngam fith reb e Pi Mich Rok Jehovah nge yag ni ngkum nang boch.

​—Kan fek ko Acts, Efesus, Filippi, Kolose, Filemon, 1 John, nge Revelation..