Ban’en Nri Ma Magawonnag Laniyan’ Urngin e Gallabthir
KENGGIN E RE KE BABYOR NEY: MU AYUWEG E BITIR ROM NI NGE DABI BUCH BAN’EN ROK!
Ban’en Nri Ma Magawonnag Laniyan’ Urngin e Gallabthir
Heather nge Scott e l’agruw i yabgol ni yow ba felfelan’, ma bay bochi pagel * ni fakrow ni dalip e duw yangaren, ma chi pagel nem e rib fel’fel’ rogon, ya ri yow ma ayuweg. Machane, de mom ni ngan rin’ e re n’ey e ngiyal’ ney, ya ba ga’ ni ma k’aring e magafan’ ko gallabthir ma kub gel e maruwel riy. Boor ban’en nib t’uf ni ngan fil ko bitir! Bay ban’en nri ma magafan’ Heather nge Scott ngay. Re n’em e aram e: Yow baadag ni ngar ayuwegew fakrow ko girdi’ ni ma kol e bitir u fithik’ e yargel. Mang fan?
I yog Heather ni gaar: “Chitamag e be’ nib damumuw mab tachingaw. Ma lieg nib gel, ma ma kolmow walageg nib pin u fithik’ e yargel.” * Boor e girdi’ ni ma yog ni mit ney e ngongol e rayog ni nge par u lanin’uy ndabi chuw. Ere, dabisiy ni aram fan ni baadag Heather ni nge ayuweg fachi pagel ni fak! Ku aram e n’en ni ma lemnag Scott.
Boor e gallabthir ni ma magafan’rad ko re n’ey. Dabisiy ni ku er rogom. Sana dawori buch rom e n’en ni ke buch rok Heather, machane dabisiy ni ga ma rung’ag murung’agen e re ngongol ney ni ke garer u gubin yang. Boor e gallabthir ni yad be gin ko n’en ni be buch ko bitir ko yungi n’en ni yad ma par riy.
Reb e pumoon ni ma gay murung’agen e bitir ni yima kol u fithik’ e yargel e ke yog ni “aram reb e ban’en nrib gel e kireb riy ni be buch e ngiyal’ ney.” Re n’ey e rib gel e kireban’ riy. Machane, ban’en ni ngad gingad ngay, fa? Piin ni kar filed e Bible e dab ra gingad ngay ya yad manang ni aram boch ban’en nra i buch. Be yog e Thin rok Got ni gad be par ko “tin tomren e rran,” ma ngiyal’ ney e ‘dakuriy fan ban’en u wan’ e girdi’ ma “ke mus ni yad e yad be lemnagrad” ma ‘dakurur runguyed e girdi’.’—2 Timothy 3:1-5.
Mokol bitir u fithik’ e yargel e aram reb e ban’en nrib gel e kireb riy. Boor e gallabthir ni ma magawon lanin’rad u nap’an ni yad ra lemnag feni kireb e piin ni yad ma guy rogon ni ngar rin’ed e re n’ey ko bitir. Ere, dabiyog ni nge pithig e gallabthir e re magawon ney? Fa bay boch ban’en nrayog ni ngar rin’ed ni ngar ayuweged pi fakrad ndabi buch ban’en rorad ni aram rogon? Gal ni migid e article e ra pi’ e fulweg ko gal deer ney.
[Boch e thin nra tamilangnag murung’agen]
^ Kan thilyeg fithingan e girdi’ ko re article ney nge gal ni migid.
^ Ra kol be’ ni ke ilal reb e bitir u fithik’ e yargel ma aram e be rin’ boch ban’en ko fare tir ni bay rogon ko par ko pumoon nge ppin ni bochan e nge fel’ rogon ko tin ni be ar’arnag. Ireray boch e ngongol ndarngal ara por·neiʹa nrogon ni be yog e Bible. Re n’ey e ba muun ngay ni nga i math nga yu yang nib mith u dow fare tir, ara ngar parew fare tir, ara nge rin’ boch e ngongol nib kireb ngak ni bay rogon ko par ko pumoon nge ppin ni yima fanay l’uguney nge chigiyey nge paay. Kub muun ngay ni nga i kol e thuth ko fare tir, ara i yog boch e thin ni puwlag ngak, fa be dag boch e sasing nib kireb ngak, ara i mith nga i yaliy fare tir ndariy e mad rok, ara yog ngak ni nge luf e mad rok. Urngin e pi n’ey ni be yog e Bible e “ngongol ni golong” ngay ara “ngongol ni puwlag.”—Galatia 5:19-21; Efesus 4:19.
