1, 2. Mang fan ni ke yoor mit e ban e ngiyal’ ney, ma mang boch e pi n’em ni gad be guy ni be buch? (Mu guy e sasing ni bay u tabolngin e re article ney.)

 BAN nge sasalap e ba ga’ ni ireray e n’en ni gad be guy ni yibe rin’ u fayleng e ngiyal’ ney. Dab da gingad ko re n’ey, ya be tamilangnag e Bible ni Satan ni Moonyan’ e be’ nib salap i bannag e girdi’, ma ir e en ni be gagiyegnag e re fayleng ney. (1 Timothy 2:14; 1 John 5:19) Bochan ni gad be chugur i yan nga tomuren e re m’ag nib kireb ney, ma ri be gel e damumuw rok Satan ya manang “ndaki n’uw nap’an ni nge par.” (Rev. 12:12) Ere, gad manang ni piin ni be gagiyegnagrad Moonyan’ e bayi munmun mi ri gel e sasalap rorad. Ma ba ga’ ni bay ur bannaged e piin ni yad ma pigpig ngak Jehovah.

² Bay yu ngiyal’ ni yima weliy ko news boch ban’en nde riyul’ u murung’agen e Pi Mich Rok Jehovah nge pi n’en nib michan’rad ngay. Ku yima fanay e pi shimbung, nge TV, nge Internet ni ngan wereg boch e pi ban ney riy. Boch e girdi’ e yad ma damumuw ni bochan e ke mich u wan’rad e pi ban nem u m’on, mfin ra nanged e tin riyul’ ko tomur.

3. Uw rogon ni ngad ayuweged gadad ko pi ban rok Satan?

³ Rayog ni ngad ayuweged gadad ko pi ban rok Satan. Gad ba felfelan’ ni bay e Thin rok Got nrayog ni nge ayuwegdad, ma ‘ba ga’ fan . . . ya be yal’uweg e tin ni be oloboch e girdi’ riy.’ (2 Tim. 3:16) Rib ga’ fan ni ngad folgad ko n’en ni yog apostal Paul u murung’agen boch e Kristiano u Thessalonika ko bin som’on e chibog ni kan bannagrad. I yog ngorad ‘ndab ra gurgad nge wagagey lanin’rad nga rogon e lem ni yad be tay.’ (2 Thess. 2:1, 2) Mang boch ban’en nrayog ni ngad filed ko fonow ni pi’ Paul, ma uw rogon nrayog ni ngad folgad ko pi n’ey?

4. Uw rogon ni kan puguran ko pi Kristiano u Thessalonika murung’agen e “rran” rok Jehovah, ma uw rogon ni ku yibe puguran ngodad e ngiyal’ ney?

⁴ U lan e gin som’on e babyor rok Paul ngak piyu Thessalonika,  me puguran ngorad murung’agen e “rran” rok Jehovah. Dabun ni nge maathuk lanin’rad nge dab kur fal’eged rogorad ni fan ko re rran nem. I yog ngorad ni yad “girdien e tamilang” ma ‘ngaur pired ni yad ba od ma ba tamilangan’rad.’ (Mu beeg e 1 Thessalonika 5:1-6.) Ngiyal’ ney e gad be sonnag e ngiyal’ ni yira thang fare Babylon nib Gilbuguwan ni aram e pi yurba’ i teliw ni googsur u fayleng. Re n’ey nra buch e aram tabolngin fare rran rok Jehovah. Kad nanged rogon nra lebguy Jehovah e n’en nib m’agan’ ngay. Ku yima puguran boch ban’en ngodad u lan e ulung nra ayuwegdad ni ngad pared nib tamilangan’dad. Ere, faan gad ra tedan’dad ko pi n’ey ma rayog ni nge ayuwegdad ni ngad pied e ‘bin riyul’ e liyor ni susun e ngad pied ngak Got’ ma gad nang e tin nib fel’ ko tin nib kireb.​—Rom. 12:1.

5, 6. (a) Mang e ke yoloy Paul murung’agen ko gin l’agruw e babyor rok ni pi’ nge yan ngak piyu Thessalonika? (b) Mang e bayi rin’ Jesus ni dabki n’uw nap’an, ma mang e thingar da fithed gadad riy?

⁵ De n’uw nap’an nga tomuren ni pi’ Paul e gin som’on e babyor rok nge yan ko pi Kristiano nu Thessalonika ma aram miki pi’ e gin migid e babyor. Ke yoloy murung’agen fare gafgow nib ga’ ni bay yib u nap’an nra yib Somol Jesus ni nge pufthinnag e “piin nde t’uf rorad ni ngar nanged murung’agen Got nge piin ndarir folgad ko Thin nib Fel’ ni yib rok Got.” (2 Thess. 1:6-8) Ke tamilangnag Paul ko guruy ni l’agruw ko re babyor nem ni immoy boch e girdi’ u lan e ulung ni kar “rusgad” u nap’an ni kar rung’aged ni ke chugur fare rran rok Jehovah. (Mu beeg e 2 Thessalonika 2:1, 2.) Pi Kristiano e ngiyal’ nem e dawor ri tamilang u wan’rad rogon nra lebguy Jehovah e n’en nib m’agan’ ngay, ma ireray e n’en ni tamilangnag Paul u tomuren ni yoloy murung’agen fare yiiy ni gaar: “Llowan’ rodad ni pi’ Got ngodad nib tow’ath nge thin ni pi’ fare Kan ni Thothup [“gelngin Got nib thothup,” NW] ni nga nog ngak e girdi’ e ke mus ni bochi yang ko n’en ni bay ni pi’ ngodad; machane nap’an ni bayi taw e bin polo’ ma bin bochi yang e bay chuw.” (1 Kor. 13:9, 10) Machane, rayog ni ngar pared ni yad ba yul’yul’ ni faan yad ra motoyil ko pi n’en ni ke thagthagnag Jehovah nge laniyan’ Paul nge apostal Peter nge ku boch e walag ni kan dugliyrad ni nga rogned ngorad.

⁶ Ke thagthagnag Got nga laniyan’ Paul ni nge weliy nu m’on nra yib fare rran rok Jehovah ma bay boch e girdi’ ni yad ra chel ngar togopuluwgad ko tin riyul’ maku ra yib “faanem nib kireb.” *  I yog e re n’ey ni bochan e nge yal’uweg e lem ko pi Kristiano kakrom. Ma nap’an nra yan i taw ko ngiyal’ ni ke dugliy Got me “li’” Jesus urngin e piin ni kar paged yad kan bannagrad. Ke yog apostal Paul ni yira pufthinnagrad ni bochan e “daburad ma de t’uf rorad e tin riyul’.” (2 Thess. 2:3, 8-10) Thingar da fithed gadad ni nge lungudad: ‘Uw feni t’uf e tin riyul’ rog? Gu ma fil e re ke babyor ney nge ku boch e babyor ni kan fal’eg ni fan ko girdi’ rok Got u ga’ngin yang e fayleng, ya nggu nang rogon ni kad nanged fan e pi machib u lan e Bible, fa?’

7, 8. (a) Mang boch ban’en ni i magawonnag e pi Kristiano kakrom? (b) Mang boch ban’en nrayog ni nge magawonnag e tin riyul’ e Kristiano e ngiyal’ ney?

⁷ Gathi kemus ni pi n’en ni ma fil e piin ni kar chelgad kar togopuluwgad ko bin riyul’ e liyor e ir e ra i magawonnag e piin Kristiano. Nap’an ni yol Paul ngak Timothy, me yog ni “chogowen e salpiy e ir lik’ngin urngin mit e kireb.” Ki yog ni bay boch e girdi’ nri “yad ba adag ni nge yog ngorad ni aram tapgin ma kar mal’afgad u rogon ni nge mich Kristus u wun’rad, ma ke m’ingan’rad ke yib e kireban’ ni pire’ ngorad.” (1 Tim. 6:10) Ku rayog ni nge magawonnagdad e “tin nib kireb ni yima ar’arnag.”​—Gal. 5:19-21.

⁸ Ki yog Paul ngak piyu Thessalonika ni ngar kol ayuwgad ko piin ni “gathi riyul’ ni yad bogi apostal,” ya bay boch i yad ni i machibnag boch ban’en “nde riyul’ ngar pow’iyed e piin ni ke mich Jesus u wan’rad nga bang ngar uned ngorad.” (2 Kor. 11:4, 13; Acts 20:30) Boch nga tomuren, me yog Jesus nib fel’ e n’en ni ke rin’ e ulung nu Efesus ni bochan e da ur paged e “girdi’ nib kireb” ni ngar pared u lan e ulung. Ere, kar micheged ni pi girdi’ nem e riyul’ ni yad boch e apostal ni googsur ma yad be lifith l’ugunrad. (Rev. 2:2) Machane, ke fonownag Paul e ulung nu Thessalonika ko gin l’agruw e babyor ni pi’ nge yan ngorad ni gaar: “Pi walagmad ni girdien Kristus, gamad be ta’ chilen ngomed u fithingan Somol ni Jesus Kristus ni ngam tiyed gimed u urel rok urngin e piin ni walagey ni girdien Kristus ni yad mmalmal ndarir uned nga reb e maruwel, ma darir folgad ko fonow ni gu pied ngorad.” Ngemu’, me yog fithingan boch e Kristiano ‘ndaburad ni ngar maruwelgad.’ (2 Thess. 3:6, 10) Ere, faanra kan fonownagrad ni ngar paloggad ko piin ni yad ba malmal ndarir uned ko maruwel, me ere ri kub ga’ fan ni ngar paloggad rok be’ ni be ngongol ni bod rogon be’ ni ke chel ke togopuluw ko tin riyul’! Arrogon, ri de fel’ ni ngan chag ko girdi’ ni aram rogon e ngongol rorad kakrom, maku er rogon e ngiyal’ ney.​—Prov. 13:20.

9. Mang fan ni ngad kol ayuwgad u nap’an nra tabab be’ ni nge susunnag boch ban’en nder tamilangnag e Bible ara gathibthibnag e piin piilal nge ku boch e tapigpig rok Got?

⁹ Ke chugur fare gafgow nib ga’ nge ngiyal’ ni yira thang e re m’ag nib kireb ney. Ere, pi fonow ni un pi’ u nap’an e bin som’on e chibog e kub ga’ fan ngodad e ngiyal’ ney. Ba mudugil ni dubdad ni nge ‘yog ngodad e tow’ath ni pi’ Got, ma gad pag nge maadab.’ Ra buch ni aram rogon ma ra mul u pa’dad fare tow’ath ni nge yag e yafas ni manemus ngodad. (2 Kor. 6:1) Thingar da kol ayuwgad ko girdi’ ni yad ma un ko muulung ni yad ma guy rogon ni ngar waliyed gadad ni ngad susunnaged boch ban’en nder tamilangnag e Bible ara ud gathibthibnaged e piin piilal nge ku boch e tapigpig rok Got.​—2 Thess. 3:13-15.

10. Mang e tin riyul’ ni ka nog ko pi Kristiano nu Thessalonika ni ngar folgad riy?

¹⁰ I fonownag Paul e pi walag nu Thessalonika ni ngar ‘pired ni yad mmudugil’ mi yad chichiiyed pa’rad ko tin riyul’ ni kar filed. (Mu beeg e 2 Thessalonika 2:15.) Mang e tin ‘riyul’’ ni kan fil ngorad? Tin riyul’ ni i weliy Paul murung’agen e gathi pi machib ni ma fil e pi yurba’ i teliw ni googsur, ya be weliy murung’agen e machib ni i weliy Jesus nge n’en ni thagthagnag Got nga laniyan’ boch e girdi’ ni ngar yoloyed. Ke pining Paul e magar  ngak e pi walag u Korinth ya yoloy ni gaar: “Gubin ngiyal’ ni gu ba’ u wun’med ma gimed be fol ko pi n’en ni ug machibnag ngomed.” (1 Kor. 11:2) Pi machib ney e ke yib rok be’ nrayog ni nge pagan’uy ngak.

11. Mang e rayog ni nge buch rok e piin ni kan bannagrad?

¹¹ Nap’an ni yol Paul ngak e pi Hebrew me weliy l’agruw e kanawo’ nrayog ni nge dabki par reb e Kristiano nib mich Jehovah u wan’ ma dabki par nib yul’yul’. (Mu beeg e Hebrews 2:1; 3:12.) I yoloy murung’agen rogon nrayog ni nge ‘man’ be’ nga orel’ ko tin riyul’, nge rogon nrayog ni nge ‘pi’ be’ keru’ ngak Got.’ Ba mo’maw’ ni ngan nang ni be man’ reb e bowoch be palog u dap’elay. Sana som’on e ra man’ ni buchuuw ma buchuuw, me munmun ma be palog ko binaw. Machane, ku rayog ni nge thuruy be’ fare bowoch nge palog ko binaw. Gali n’ey e be tamilangnag e n’en nrayog ni nge buch ni faanra pag be’ ir ngan bannag, ma dabki pagan’ ko tin riyul’.

12. Mang boch ban’en ni yima rin’ e ngiyal’ ney nrayog ni nge magawonnag e tha’ u thildad Jehovah?

¹² Ireray e n’en ni buch rok boch e Kristiano u Thessalonika. Rayog ni nge buch ban’en ni aray rogon e ngiyal’ ney, fa? Boor ban’en e ngiyal’ ney nrayog ni ngan n’ag e tayim ngay. Am lemnag urngin e tayim ni ma n’ag boch e girdi’ ni yad ni be yan nga yu yang ko internet nrayog ni ngar nonad ngak boch e girdi’ riy, ara ur beeged ma yad be fulweg taban e e-mail ara text, ara ur rin’ed boch ban’en ni ngar n’aged e chalban rorad ngay ko ngiyal’ ndariy ban’en ni yad be rin’, ara ur yaliyed e pi n’en ni be buch ko pi gosgos ni yibe tay u fayleng i yan. Demtrug reb ko pi’ n’ey ma rayog ni nge magawonnag reb e Kristiano me k’aring ni nge dabki pasig ko pigpig ni be tay ngak Jehovah. Mang e rayog ni nge buch ni bochan e re n’ey? Rayog ni nge tal facha’ ndab ki meybil u polo’ i gum’irchaen. Maku rayog ni nge buchuuw e tayim ni nge fanay ni fan ko fol Bible, maku rayog ni nga i pag e muulung, nge machib. Mang e rayog ni ngad rin’ed ma dab da gurgad nge wagagey lanin’dad nga rogon e lem ni gad be tay?

13. Uw rogon e lem rok boor e girdi’ nrogon ni kan yiiynag u Bible, ma mang e rayog ni nge ayuweg e michan’ rodad?

¹³ Reb e ban’en nib t’uf ni ngad rin’ed e ngad pared ni gad manang e ngiyal’ ni gad be par riy nge wenegan nra yib ni faanra ud chaggad ko girdi’ ni dubrad ni nga rogned ni gad be par ko “tin tomur e rran.” I yoloy apostal Peter murung’agen e ngiyal’ ney ni gaar: “Tin tomur e rran e bay yib i m’ug boch e girdi’ riy ni tin ni yad be yim’ ni bochan e ir e be gagiyegnag pangirad. Bay ur moninggad ngomed ni be lungurad, ‘I yog faram ni bay sul, er rogon ni yog fa danga’? Ere ba uw? Chitamangidad e kar m’ad, machane urngin ban’en ni ka be par ni ka rogon ni ka nap’an e ngiyal’ ni sum e fayleng riy ke mada’ ko chiney!’” (2 Pet. 3:3, 4) Gad ra beeg ma gad be fal’eg i fil e Bible ni gubin e rran, ma ra ayuwegdad ni ngad nanged ni gad bay ko “tin tomur e rran.” Kab kakrom i yib ni yima yog e pi thin ney nde riyul’ ni be weliy e Bible murung’agen. Ku bay “faanem nib kireb” maku be ulul nge togopuluw ko pi tapigpig rok Got. Aram fan ndab da paged talin ni be chugur fare rran rok Jehovah.​—Zef. 1:7.

14. Faan gad ra pigpig ngak Got ni gad ba pasig, ma uw rogon nra ayuwegdad?

¹⁴ Reb e kanawo’ u rogon nrayog ni ngad siyeged ni nge dabi wagagey lanin’dad e ngaud machibnaged fare thin nib fel’. Ere, nap’an ni tay Kristus Jesus chilen ngak pi gachalpen ni nga ranod ngak girdien e pi nam ngar pingeged yad ngar manged pi gachalpen, mar filed ngorad ni ngaur folgad ko tin ni ke yog ngorad ni ngaur rin’ed, ma aram e be pi’ e fonow nra ayuwegrad. (Matt. 28:19, 20) Ra ngad folgad ko re n’ey, mab t’uf ni ngad pasiggad ko machib. Ga be lemnag ma ra felfelan’ e pi walag u Thessalonika ni faanra kemus ni ngar machibgad ni bochan e kan tay chilen ngorad ni ngar rin’ed? Dab mu pagtalin e thin ni yoloy Paul nge yan ngorad ni gaar: “Dab mmagawonniged e maruwel ni be tay fare Kan ni Thothup [“gelngin Got nib thothup,” NW]; dab  mu darifanniged e thin ni be yog e Kan ni Thothup [“gelngin Got nib thothup,” NW] u l’ugun be’.” (1 Thess. 5:19, 20) Riyul’ nrib manigil e pi yiiy ni gad ma fil murung’agen ma gad weliy ko girdi’!

15. Mang boch ban’en nrayog ni ngad weliyed u nap’an e fol Bible ni tabinaw?

¹⁵ Gad urngin ni gad baadag ni ngad ayuweged chon e tabinaw rodad ni ngar mon’oggad i machibnaged fare thin nib fel’. Boor e walag ni kar pirieged nreb e kanawo’ nrayog ni ngar rin’ed e re n’ey riy e aram e ngar ted ba ngiyal’ u nap’an e fol Bible ni tabinaw ni ngar fal’eged rogorad ni fan ko machib. Sana rayog ni ngan fal’eg rogoy ni ngan sul ngan guy e piin ni kan mada’nagrad u nap’an e machib. Mang e yira yog ngorad u nap’an ni yira sul ni ngan guyrad? Mang e rayog ni nga mog ni ngam pug e tafinay rok faen ni kam non ngak ni nge adag ni ngki fil boch ban’en? Mingiyal’ e ba fel’ ni ngan sul ngan guyrad? Ku boor e tabinaw ni yad ma tay ba ngiyal’ u nap’an e fol Bible ni tabinaw ni ngar fal’eged rogorad ni fan ko muulung. Rayog ni ngam rin’ed chon e tabinaw rom e re n’ey, fa? Ga ra un ko pi n’en ni yima rin’ u nap’an e muulung, ma ra gel e michan’ rom, ma re n’ey e ra ayuwegem ni nge dabi wagagey lanin’um nga rogon e lem ni ga ma tay. (Ps. 35:18) Rayog ni nge ayuwegdad e fol Bible ni tabinaw ni nge dab ud susunnaged boch ban’en nder tamilangnag e Bible ara i maruwar boch ban’en u wan’dad.

16. Mang e ma ayuweg e pi Kristiano ni kan dugliyrad ni nge dabi wagagey lanin’rad nga rogon e lem ni yad be tay?

¹⁶ Gad ra lemnag rogon ni ke ayuweg Jehovah e girdi’ rok ni kab kakrom i yib ni nge tamilang e pi yiiy nu Bible u wan’rad, ma rayog ni nge pagan’dad ni yira tow’athnagdad boch nga m’on. Piin ni kan dugliyrad e bay e athap rorad ni ngar uned ngak Kristus ko gagiyeg u tharmiy. Riyul’ nre n’ey e ra ayuwegrad ni nge dabi wagagey lanin’rad! N’en ni yoloy Paul ngak piyu Thessalonika e bay rogon ngak e piin ni kan dugliyrad e ngiyal’ ney, ya yog ni gaar: ‘Thingar gu pininged e magar ngak Got ni gubin ngiyal’ ni bochmed, ni gimed e pi cha’nir ni gimed ba t’uf rok Somol. Yi Got e mel’egmed . . . u gelngin nib thothup ngu daken e michan’ romed ko tin nib riyul’, me ngongliymed ngam manged girdien nib thothup.’​—2 Thess. 2:13.

17. Uw rogon ni be pi’ fapi thin ni bay ko 2 Thessalonika 3:1-5 e athamgil nga lanin’um?

¹⁷ Piin ni yad be athapeg ni ngar pared u fayleng ndariy n’umngin nap’an e susun ni ngkur guyed rogon ni nge dabi wagagey lanin’rad nga rogon e lem ni yad be tay. Faanra bay e athap rom ko par u fayleng ndariy n’umngin nap’an, ma gubin ngiyal’ ni ngaum fol ko fapi thin ni yoloy Paul nge yan ngak pi walagen ni kan dugliyrad u Thessalonika. (Mu beeg e 2 Thessalonika 3:1-5.) Gad gubin ni ngad felfelan’gad ko pi thin ney. Fa gal yang i babyor nni yoloy nge yan ngak piyu Thessalonika e be fonownagdad ni dab ud susunnaged boch ban’en nder tamilangnag e Bible ara mich u wan’dad boch e machib nde mudugil ko ba puluw fa danga’. Bochan ni kari chugur e tomur, ma gad ba felfelan’ ko pi fonow ney.