1. Mang boch ban’en ni ma pag boch e girdi’ farad riy, ma mang fan?

 GIRDI’ e ba ga’ ni yad ma pag fan boch ban’en ni fan e ngar rin’ed boch ban’en nib ga’ fan u wan’rad. Piin gallabthir e yad ma fanay e tayim rorad, nge salpiy rorad, nge gelngirad ni fan ngak pi fakrad. Pi fel’ yangaren ni yad ba cheg u ba mit e gosgos ma yad baadag ni ngar uned ko Olympic e yad ma tay boor e tayim ni ngar fal’eged rogorad ni fan ko fare miti gosgos ni ngar uned ngay ko bin ni ngar felfelan’gad e pi fager rorad u taabang. Mus ngak Jesus ni ki pag fan ir ni bochan boch ban’en nib ga’ fan u wan. De nameg ni nge fel’ rogon e par rok, maku de fakay e bitir, ya tirok Got ban’en e aram e n’en ni i m’oneg. (Matt. 4:17; Luke 9:58) Ku aram rogon pi gachalpen Jesus ni ku ur paged farad. Gil’ilungun Got e aram e n’en th’abi ga’ fan u wan’rad. Ere, aram fan ni ur paged fan boch ban’en ya nge yag nra ayuweged fare maruwel ni yibe rin’ ni fan ko re Gil’ilungun nem. (Matt. 4:18-22; 19:27) Ere, susun ni nge bagadad me fith ir ni nge gaar: ‘Mang e n’en nib ga’ fan u lan e yafas rog?’

2. (a) Mang boch e maruwel nib ga’ fan ni nge pag e tin riyul’ e Kristiano farad riy? (b) Ku mang boch ban’en ni ku ma pag boch e walag farad riy?

² Bay boch ban’en nib t’uf ni nge pag e tin riyul’ e Kristiano farad riy. Pi n’ey e ma ayuwegdad ni nge chugur e tha’ u thildad Jehovah. Pi n’ey e ba muun ngay e tayim nge athamgil ni gad ma tay ni fan ko meybil, nge beeg Bible ni gad ma tay ni gubin e rran, nge fol Bible ni tabinaw, nge muulung, nge machib. * (Josh. 1:8; Matt. 28:19, 20; Heb. 10:24, 25) Bochan e athamgil ni gad be tay nge bochan ni be tow’athnagdad Jehovah, ma aram fan ni be mon’og fare maruwel ni machib, ma boor e girdi’ ni yad be yan ko fare “burey ni bay e tempel” rok Jehovah riy. (Isa. 2:2) Ku boor e walag ni yad be pi’ e ayuw ko pi maruwel ni yibe rin’ ni fan nga Gil’ilungun Got ni aram e  kar paged fan boch ban’en yad be un ko pigpig u Bethel, ma boch i yad e ma un ko dimow Kingdom Hall nge Assembly Hall, ma boch i yad e ma yarmiy e pi convention ni yima tay, ara ra pied e ayuw u nap’an ni ke yib e yoko’ ara durru’ ara ku boch ban’en ni yima gafgow riy. Pi maruwel ney ni gad ma rin’ e gathi ri ireray e pi maruwel nra yognag e yafas ndariy n’umngin nap’an ngodad, machane, gad ma rin’ ya fan nga Gil’ilungun Got.

3. (a) Mang angin nra yib ngodad ni faan gad ra pag fadad ni fan nga Gil’ilungun Got? (b) Mang boch e deer ni susun e ngad fal’eged i lemnag?

³ Ngiyal’ ney e rib ga’ fan ni ngad rin’ed e tin rayog rodad ni fan nga Gil’ilungun Got. Ri gad be felfelan’ ni gad be guy boor e walag ni yad be pag farad ni fan ngak Jehovah! (Mu beeg e Psalm 54:6.) Faan gad ra rin’ e re n’ey ma gad ra felfelan’ ko ngiyal’ ney ni gad be sonnag e ngiyal’ nra tabab Gil’ilungun Got ko gagiyeg. (Deut. 16:15; Acts 20:35) Machane, gad gubin ni susun e ngad fal’eged i yaliyed gadad. Bay boch e kanawo’ nrayog ni ngkud paged fadad riy, fa? Uw rogon ni gad be maruwel ko tayim, nge salpiy rodad, nge gelngidad, nge salap rodad? Mang boch ban’en nthingar da kol ayuwgad riy? Chiney e ngad weliyed boch ban’en nrayog ni ngad filed u rogon ni un ognag e pi maligach kakrom. Re n’ey e ra gelnag e felfelan’ rodad.

4. Mang angin e pi maligach ni i pi’ piyu Israel?

⁴ Kakrom e i pi’ piyu Israel e maligach ni fan ko denen rorad. Ur pied e maligach ni bochan e nge yag nra pared ni yad ba fel’ u wan’ Jehovah. Boch e pi maligach nem ni un pi’ e ban’en nthingar ni rin’, ma boch e yad ma pi’ ni lem rorad. (Lev. 23:37, 38) Pi maligach ni yima urfiy e yima pi’ ngak Jehovah nib tow’ath. Reb ko pi maligach ney e aram fare maligach nni ognag ngak Jehovah ko fare madnom ko tempel nni un tay u nap’an Solomon.​—2 Kron. 7:4-6.

5. Mang e yog Jehovah nrayog ni nge rin’ e piin gafgow kakrom?

⁵ Manang Jehovah ni gathi gubin e girdi’ nu Israel kakrom nrayog ni ngar pied e maligach ni taareb rogon. Ere, ke yog nra be’ me pi’ e maligach nrogon nrayog rok. Rogon ni bay ko motochiyel rok Jehovah e thingar ni puog rachaen e pi gamanman ni yima pi’ ni maligach ya nge par ni “yaan e pi n’en nib fel’ ni bay fini yib” u daken Jesus ni Fak. (Heb. 10:1-4) Machane, ba fel’ rogon ni yog Jehovah ni ngaun fol ko re motochiyel ney. Bod ni yog ni faanra dabiyog ni nge pi’ be’ reb e saf ni pumoon ara reb e kaming ni maligach, ma rayog ni nge pi’ reb e arche’ ni dove. Ere, mus ko piin gafgow ni ku rayog ni ngar ognaged e maligach ngak Jehovah. (Lev. 1:3, 10, 14; 5:7) Yugu  aram rogon nib thilthil e maligach ni i pi’ e girdi’, machane bay l’agruw ban’en nthingar ra rin’ed.

6. Mang l’agruw ban’en nthingari rin’ be’ ni ke yan ni nge ognag reb e maligach, ma uw feni ga’ fan ni nge fol ko gal motochiyel ney?

⁶ Som’on e, thingari ognag be’ e bin th’abi fel’ e gamanman ni maligach. I yog Jehovah ngak piyu Israel nthingar ra pied e gamanman ndariy bang u downgin nib kireb ya nge yag ni “fel’” fare maligach u wan’. (Lev. 22:18, 20) Faanra bay bang u downgin fare gamanman nib kireb, ma aram e dabi m’agan’ Jehovah ko fare maligach. Bin l’agruw e, faen ni ke ognag fare maligach e susun e bbeech. Faanra ke alit be’ nrogon ko Motochiyel, ma som’on e thingari ognag reb e maligach ni fan ko denen ya nge yag ni ngki fel’ u wan’ Jehovah bayay, ngemu’ mfini pi’ fare maligach ni ir e ke yan ni nge pi’. (Lev. 5:5, 6, 15) Rib ga’ fan e re n’ey, ya ke yog Jehovah ni faanra kay be’ bang ko fare maligach ni yima pi’ ni nge gapaseg thilin Got nge girdi’ nib muun e maligach ni yima pi’ ngak Jehovah nib tow’ath u nap’an ndawori beech faanem, ma yira li’ nge yim’. (Lev. 7:20, 21) Machane, faanra ba fel’ faanem u wan’ Jehovah, ma dariy bang nib kireb ko fare maligach ni nge pi’, ma aram e ra par ndariy ban’en nra i magawon laniyan’ ngay mab felfelan’.​—Mu beeg e 1 Kronicles 29:9.

7, 8. (a) Mang boch ban’en ni ma felfelan’ e pi walag ngay ni kar paged fan boch ban’en ni fan e ngar rin’ed boch e maruwel ni fan nga Gil’ilungun Got? (b) Mang boch ban’en nrayog ni ngad pied ngak Jehovah?

⁷ Ngiyal’ ney e boor e walag ni ke m’agan’rad ngay ni ngar paged farad ni fan ko pigpig ni yad be tay ngak Jehovah. Ri ma felfelan’ Jehovah ko re n’ey. Gad ra felfelan’ ni faan gad ra maruwel nib gel ni ngad ayuweged pi walagdad. Reb e walag ni ma un ko dimow Kingdom Hall maku ma un i pi’ e ayuw ko pi walag ko yungi n’en ni ke yib e yoko’, ara durru’, ara boch ban’en ni yima gafgow riy e yog ni dabiyog ni nge weliy gelngin e felfelan’ ni ma tay u nap’an nra un i rin’ e pi maruwel ney. I yog ni gaar, “Ma yib fan e maruwel nge athamgil ni gu ma tay u nap’an ni gu ra guy gelngin e felfelan’ ni ke tay e pi walag u tomuren ni ke m’ay reb e Kingdom Hall ara nap’an ni kan ayuwegrad ko tin nib t’uf rorad u tomuren reb e yoko’, ara durru’, ara ku boch ban’en ni yima gafgow riy.”

⁸ Gubin ngiyal’ ni ma gay e ulung rok Jehovah u fayleng kanawoen ni ngar ayuweged e maruwel rok Jehovah. Nap’an e duw ni 1904 me yoloy Brother C. T. Russell ni gaar: “Ra bagadad ma thingari athamgil ni nge maruwel ko tayim rok, nge salpiy rok, me rin’ e ngongol nib fel’ ni yira pining  e sorok riy ko Masta rodad.” Yugu aram rogon nde mom ni ngad paged fan boch ban’en ko pigpig ni gad be tay ngak Jehovah, machane boor e tow’ath nra yag riy ngodad. (2 Sam. 24:21-24) Ere, gur rayog ni ngad maruwelgad ko pi n’en ni bay rodad nib fel’ rogon, fa?

9. Mang e gad ra fil ko fare thin ni yog Jesus ni bay ko Luke 10:2-4 u rogon ni gad ma maruwel ko tayim rodad?

⁹ Tayim rodad. Boor e tayim ni yima fanay ni ngan pilyeg e pi babyor rodad, min ngongliy tagil’ e liyor rodad, min yarmiy e pi convention ni gad ma tay, min pi’ e ayuw u nap’an ni ke yib e yoko’ ara durru’ ara ku boch ban’en ni yima gafgow riy, nge ku boch e maruwel. Reliw’ nge aningeg e awa u reb e rran. Machane, ke pi’ Jesus reb i kenggin e motochiyel nrayog ni nge ayuwegdad. Nap’an ni l’og pi gachalpen ni nga ranod ko machib, me yog ngorad ndab ra ‘talgad ni ngar fingichiyed be’ u daken e kanawo’.’ (Luke 10:2-4) Gur, mang fan ni yog Jesus ban’en ni aram rogon? I yog be’ ni boor ban’en u murung’agen e Bible ni manang ni gaar: “Girdi’ e ngiyal’ nem e nap’an ni yad ra fangich, ma gathi kemus ni yad ma rurug pa’rad ara ra siro’gad ni kemus ni ngar t’ared e ngure’ u k’angrad, ya ri yad ma gumuchmuch ni boor yay, mi yad siro’ nge chugur owcherad nga daken e but’. Re n’ey e ban’en ni yima rin’ nib n’uw nap’an.” Ere, gathi be yog Jesus ngak pi gachalpen ndab kur golgad ko girdi’, ya be guy rogon ni ngar nanged nde yoor e tayim nrayog ni ngar rin’ed e re maruwel nem riy, ere ba t’uf ni ngar fanayed e tayim rorad ni ngar rin’ed e n’en th’abi ga’ fan ni ngar rin’ed. (Efe. 5:16) Gur, rayog ni ngad folgad ko re kenggin e motochiyel ney ya nge yag ni yoor e tayim ni ngad rin’ed boch e maruwel ni fan nga Gil’ilungun Got, fa?

10, 11. (a) Uw rogon ni yibe maruwel ko pi salpiy ni gad ma pi’ ni ayuw ko fare maruwel ni machib ni yibe rin’ u ga’ngin yang e fayleng? (b) Mang reb i kenggin e motochiyel ni bay ko 1 Korinth 16:1, 2 nrayog ni nge ayuwegdad?

¹⁰ Salpiy rodad. Boor e salpiy nib t’uf ko fare maruwel ni machib ni yibe rin’ u ga’ngin yang e fayleng. Bokum milyon e dolla ni yima fanay u gubin e duw ni ngan ayuweg e pi walag ni yad ma lekag e ulung, nge pi special pioneer, nge missionary. Ba pag 24,500 e Kingdom Hall ni kan toy ko pi nam nib gafgow ni ka nap’an e duw ni 1999. Yugu aram rogon mab chugur ko 6,400 e Kingdom Hall ni kab t’uf ni ngan toy. Maku, sogonap’an 100 e milyon ken e Wulyang ko Damit nge Awake! ni yima ngongliy u gubin e pul. Gubin e pi maruwel ney ni be yag ni ngan rin’ ni bochan e salpiy ni ayuw ni gimed ma pi’.

¹¹ I yog apostal Paul reb i kenggin e motochiyel ni ngan fol riy u nap’an ni yibe pi’ e salpiy ni ayuw. (Mu beeg e 1 Korinth 16:1, 2.) I pi’ e athamgil nga laniyan’ e pi walag nu Korinth ni ngar ted reb e salpiy nga bang u tabolngin e wik nrayog ni ngar pied ni ayuw ko bin ni ngar songad nge mada’ nga tungun reb e wik. Ku er rogon e pi walag e ngiyal’ ney ni yad ma lemnag urngin e salpiy nrayog ni ngar pied ni ayuw u m’on riy ni bod e n’en ni rin’ e pi walag u nap’an e bin som’on e chibog. (Luke 21:1-4; Acts 4:32-35) Ri ma felfelan’ Jehovah ko re n’ey.

12, 13. Mang boch ban’en nrayog ni nge taleg boch e walag ndab ra fanayed gelngirad nge salap rorad, machane uw rogon nrayog ni nge ayuwegrad Jehovah?

¹² Gelngidad nge salap rodad. Ma ayuwegdad Jehovah ya nge yag nda maruwelgad nga gelngidad nge salap rodad ni fan nga Gil’ilungun. Ke micheg nra pi’ gelngidad u nap’an ni kad meewargad ma kad magargad. (Isa. 40:29-31) Gur, gad ma lemnag nde gaman e salap rodad ni ngad pied e ayuw ko pi maruwel ni yibe rin’ ni fan nga Gil’ilungun Got, fa? Gad ma lemnag ni ka bay boch e girdi’ ni ka yad ba salap ngodad, fa? Dab mu pagtalin nrayog ni nge pi’ Jehovah e salap ngak be’ ni bod e n’en ni rin’ ngak Bezalel nge Oholiab.​—Ex. 31:1-6; mu guy e sasing ni bay u tabolngin e re article ney.

¹³ Baadag Jehovah ni ngad rin’ed e tin nrayog rodad, ma dab ud paged gadad. (Prov. 3:27) Nap’an ni yibe toy fare tempel u Jerusalem bayay, me yog Jehovah ko pi Jew ni yad ma par u rom ni ngar fal’eged i lemnag rogon e ayuw ni yad be pi’ ko re maruwel nem. (Hag. 1:2-5) Ya kar paged  boch ban’en ke magawonnag lanin’rad ma dakurur tedan’rad ko maruwel rok Jehovah. Ere, ba fel’ ni ngad fal’eged i lemnag ko ba puluw e pi n’en ni gad be m’oneg ko n’en nib m’agan’ Jehovah ngay fa danga’. Gur, rayog ni ngad fal’eged i lemnag e pi ‘n’en’ ni gad be m’oneg ya nge yag ni yoor ban’en nda rin’ed ni fan nga Gil’ilungun Got ko ngiyal’ ney ko tin tomuren e rran, fa?

14, 15. (a) Uw rogon ni ke pi’ boch e walag ni yad ba gafgow e athamgil nga lanin’dad? (b) Susun ni mang e ngad adaged ni ngad rin’ed?

¹⁴ Boor e walag ni yad ma par u boch e nam nib mo’maw’ e par riy ma boor e girdi’ riy nib gafgow. Ba gel e maruwel ni ma tay e ulung rodad ni ngar “ayuweged” e pi walag ni yad ma par ko pi nam ney. (2 Kor. 8:14) Yugu aram rogon, ma ki mada’ ko pi walag ni yad ba gafgow ni yad baadag ni ngaur pied ban’en. Ri ma felfelan’ Jehovah ni ma guy e piin gafgow ni yad be pi’ e tin nrayog rorad u fithik’ e felfelan’.​—2 Kor. 9:7.

¹⁵ Bay boch e walag ni yad ma par u reb e nam u Africa nrib gafgow e girdi’ riy ni kar ted bang ko milay’ rorad ni ngar yunged boch e woldug ngay ni ngar pied ni chuway’, ya ngar feked e salpiy riy ngar pied ni ayuw ko pi maruwel ni yibe rin’ ni fan nga Gil’ilungun Got. Ere, yan i taw nga ba ngiyal’ ma ngan toy reb e Kingdom Hall u reb e binaw ko re nam nem, ma baadag e pi walag nem ni ngar pied e ayuw. Machane, kan dugliy ni nge tabab e maruwel ma dawori fel’ rogon e woldug u milay’ rorad. Yugu aram rogon, ma kar dugliyed ni ngar pied e ayuw ko re maruwel nem. Ere, bayi rran mi yad un ko maruwel me chugur ni nge nep’ mi yad yan ko milay’ rorad. Riyul’ nra yib e athamgil nga lanin’uy ni ngan lemnag gelngin e maruwel ni kar ted! Re n’ey e taareb rogon ko n’en ni rin’ e pi walag u Macedonia ko bin som’on e chibog. Rib “gafgow” e pi walag nem, machane kar weniggad ngak Paul ni nge pagrad ngar pied e ayuw nga reb e maruwel ni ka nog ni ngan rin’. (2 Kor. 8:1-4) Ere, manga yigi bagadad me pi’ e ayuw ‘nrogon nrayog rok, nib m’ag nga rogon ni ke fal’eg Somol ni Got rodad waathan.’​—Mu beeg e Deuteronomy 16:17.

16. Uw rogon ni nge felfelan’ Jehovah ko pi n’en ni gad be ognag ngak?

¹⁶ Machane, bay ban’en ni ngad kol ayuwgad riy. Thingari m’agan’ Jehovah ko pi n’en ni gad be rin’ ni fan ngak ni bod rogon piyu Israel kakrom. Thingar dab da paged talin ni tabinaw rodad nge pigpig ni gad be tay ngak Jehovah e aram e n’en th’abi ga’ fan ni ngad rin’ed nib milfan ngodad. Tayim nge boch ban’en ni bay rodad ni gad ma fanay ni ngad ayuweged boch e girdi’ ngay e susun ndabi talegdad ni nge dab kud pied e tin nib t’uf ko tabinaw rodad. Ya faan gad ra rin’ ni aray rogon, ma aram e bod ni gad be pi’ ban’en ndariy rodad. (Mu beeg e 2 Korinth 8:12.) Maku reb e, thingar da guyed rogon ni nga i par nib fel’ e tha’ u thildad Jehovah. (1 Kor. 9:26, 27) Dab mu pagtalin ni faanra ud folgad ko pi motochiyel rok Got u Bible, ma ra “fek” Jehovah e pi n’en ni gad be ognag ngak nib felfelan’ ngay maku gad ra felfelan’.

17, 18. Uw rogon u wan’dad e piin ni yad ma pag farad ni fan nga Gil’ilungun Got, ma mang e thingar da fal’eged i lemnag?

¹⁷ Boor e walag ni yad ma maruwel ko tayim rorad, nge gelngirad, nge salpiy rorad ni fan nga Gil’ilungun Got. (Fil. 2:17) Rib ga’ fan e pi walag ney u wan’dad. Kub fel’ e n’en ni ma rin’ leengin nge pi fak e pi walag ni pumoon ni yad ma yarmiy e pi maruwel ni yima rin’ ni fan nga Gil’ilungun Got ni bochan e yad ba gol maku yad ma pag farad u boch ban’en.

¹⁸ Boor e maruwel nib t’uf ni ngan rin’ ni fan nga Gil’ilungun Got. Ere, nge bagadad me meybil me fal’eg i lemnag rogon nrayog ni nge rin’ e tin rayog rok ni fan ngak Jehovah. Faan gad ra rin’ ni aray rogon, ma boor e tow’ath nra yag ngodad e chiney, maku boor e tin nra yag ngodad ko “bin bay yib e tamilang.”​—Mark 10:28-30.