1, 2. Mang e ra rin’ Gil’ilungun Got, ma mang fan nrayog ni nge pagan’dad nra yib Gil’ilungun Got?

 NAP’AN ni immoy Jesus Kristus nge pi gachalpen u daken bburey ni bay u tooben yu Kapernaum ko duw ni 31 C.E., me fil ngorad ni ngar meybilgad ni nge lungurad: “Nge yib Gil’ilungum ngomad.” (Matt. 6:10, NW) Ngiyal’ ney e boor e girdi’ ni be maruwar u wan’rad ko rriyul’ nra yib Gil’ilungun Got fa danga’. Machane, gadad e ba pagan’dad ni yira fulweg taban e meybil ni gad be tay ni aram e gad be yibilay ni nge yib Gil’ilungun Got.

² Ra fanay Jehovah Gil’ilungun ni nge taarebnag e ulung rok u tharmiy ngu fayleng. Aram e ngiyal’ nra lebug e n’en nib m’agan’ ngay. (Isa. 55:10, 11) Bin riyul’ riy e, Jehovah e ir e Pilung rodad e chiney! Pi n’en ni ke buch u lan fa 100 i duw ni ke yan e be micheg nriyul’ e re n’ey. Boor ban’en nib manigil ni be rin’ ni fan ko pi tapigpig rok. (Zek. 14:9; Rev. 15:3) Yugu aram rogon, mab thil e re n’ey ko bin ni nge yib Gil’ilungun Got ni ir e ke fil Jesus ngodad ni ngad yibilayed. Uw rogon nib thil e gali n’ey, ma mang angin ngodad?

3. (a) Wuin e Pilung Jesus, ma uw e mang Pilung riy? (b) Uw rogon ni ga ra micheg ni ke tabab Gil’ilungun Got ko gagiyeg ko duw ni 1914? (Mu guy e footnote.)

³ Nap’an ni chugur ni nge m’ay e bin 19 e chibog, me tabab ni nge  nang e pi tapigpig rok Got fan ba yiiy ni yoloy Daniel ni ke pag 2,500 e duw n’umngin nap’an ni gaar: “Ngiyal’ ni bay i gagiyeg e pi pilung nem, e aram e bayi sunumeg Got nu tharmiy reb e gagiyeg ndariy e rofen nra mus.” (Dan. 2:44) Boor e duw ni i yog e Piin ni Yad Ma Fil e Bible ni fare duw ni 1914 e aram reb e duw nib ga’ fan. Boor e girdi’ e ngiyal’ nem ni ur lemnaged e n’en ni yog reb e tayol ni gaar: “Boor ban’en ni un athapeg ni nge buch u nap’an e duw ni 1914, maku boor ban’en ni un micheg.” Machane, nap’an ni tabab e Bin Som’on e Mahl ko Fayleng ko re duw nem, ma aram me riyul’ e n’en ni ke yiiynag e Bible. Ggan ni be lich, nge durru’ ni be yib u gubin yang, nge m’ar, nge ku boch e yiiy u Bible ni be lebug e be micheg ni ke tabab Jesus Kristus ko gagiyeg u tharmiy ni ir e Pilung u Gil’ilungun Got ko duw ni 1914. * Bochan ni ke Pilungnag Jehovah Fak, ma aram fan nrayog ni nga nog ni ki mang Pilung u reb e kanawo’!

4. Mang e som’on ni rin’ Jesus u nap’an ni mang Pilung, ma mang e migid ni rin’?

⁴ N’en th’abi som’on ni rin’ Jesus u nap’an ni mang Pilung u Gil’ilungun Got e aram e cham ko bin th’abi ga’ e Toogor ko Chitamangin ni aram Satan. Tomur riy ma aram mi yad chagil e pi engel rok nga ron’ed Moonyan’ nge pi engel rok nga wuru’ e tharmiy. Rib gel e felfelan’ ni kan tay u tharmiy ni bochan e re n’ey, machane kari gafgow e fayleng. (Mu beeg e Revelation 12:7-9, 12.) Bin migid, me tabab ni nge beechnag, ma be skulnag, ma be yarmiy e pi tapigpig rok Got u fayleng ya nge yag ni ngar rin’ed e tin nib m’agan’ Got ngay. Ere, chiney e ngad weliyed rogon nra fel’ rogodad ni bochan e ke fol e pi tapigpig rok Got ko fonow ni ke pi’ Jesus.

5. Mang e kan beechnag u thilin e duw ni 1914 nge yan i mada’ nga tabolngin e duw ni 1919?

⁵ Tomuren ni beechnag Jesus gubin ban’en ni ke kirebnag Satan nge pi engel rok u tharmiy, ma aram me yog Jehovah ngak ni nge fal’eg i yaliy me beechnag e liyor ni be tay pi gachalpen u fayleng. Ke yog Malaki ni profet nre n’ey e aram e kan beechnagrad. (Mal. 3:1-3) Pi n’en ni ke buch ko pi tapigpig rok Got ni kab kakrom i yib e be m’ug riy ni ireray e n’en ni buch u thilin e duw ni 1914 nge yan i mada’ nga tabolngin e duw ni 1919. * Ere, faanra ngad manged bang ko ulung rok Jehovah ni bay u ga’ngin e palpalth’ib, ma thingar da pared ni gad ba beech ara gad ba thothup. (1 Pet. 1:15, 16) Thingar da paloggad ko pi machib ko pi yurba’ i teliw ni googsur ara pi ngongolen e am ko fayleng.

6. Uw rogon ni yima pi’ e tin nib t’uf rodad ni fan ko tirok Got ban’en, ma mang nib ga’ fan e re n’ey?

⁶ Tomuren e biney ma aram me maruwel Jesus nga mat’awun nib pilung ni nge dugliy fare “tapigpig nib yul’yul’ ma ba gonop.” Re tapigpig ney e ra i pi’ e tin nib t’uf rok e piin ni yad ba muun ko fa “ran’ i saf” ni be ayuwegrad Jesus ni fan ko tirok Got ban’en. (Matt. 24:45-47; John 10:16) Ka nap’an e duw ni 1919, ma immoy bochi ulung ni gubin i girdien ma kan dugliyrad ni ur rin’ed e re maruwel ney ni aram e ngar pied gan e “tin ni ka bay e tapigpig.” Boor ban’en ni ma pi’ e re tapigpig nib yul’yul’ mab gonop ney ni fan ko tirok Got ban’en ni ma ayuwegdad ni nge gel e michan’ rodad. Ku ma ayuwegdad ni ngad pired ni gad bbeech ko tirok Got ban’en, miki beech e ngongol rodad, nge lem rodad, nge dowdad. Ku gad ma fil boor ban’en ko pi n’ey maku ma ayuwegdad ni ngad fal’eged rogodad ni ngad uned i rin’ fa bin th’abi ga’ fan e maruwel ni yibe rin’ u fayleng ni aram e machib. Gubin ngiyal’ ni ga be maruwel ko pi n’ey, fa?

7. Mang maruwel e tababnag Jesus u nap’an ni immoy u fayleng, ma ra ulul e re maruwel nem nge mada’ ko mingiyal’?

⁷ Nap’an ni tabab Jesus ko machib u fayleng, me yog ni gaar: “Dabi siy ni ngku gu machibnag u boch e binaw i yan fare Thin Nib Fel’ ni murung’agen e gagiyeg rok Got, ya ke l’ugeg Got ku gub ni ereray e n’en ni nggu rin’.” (Luke 4:43) Ireray e n’en  ni rin’ Jesus u lan dalip nge baley e duw. I yog ngak pi gachalpen ni gaar: “Marod ngam machibgad ni nge lungumed, ‘Gagiyeg rok Got e ke chugur!’” (Matt. 10:7) Tomuren ni fas ko yam’, me yiiynag nra machibnag pi gachalpen fare thin nib fel’ nge yan i mada’ ko “yungi n’en ni yan i mus e fayleng ngay.” (Acts 1:8) Ke micheg ngorad nra un i rin’ e re maruwel ney nge mada’ ko ngiyal’ ney ni gad bay riy.​—Matt. 28:19, 20.

8. Uw rogon ni ke ayuweg Jesus pi gachalpen u fayleng ni ngar machibgad?

⁸ Nap’an ni taw ko duw ni 1919, miki yib reb i fan ni ngan machibnag fare ‘Thin Nib Fel’ ni murung’agen e gagiyeg rok Got.’ (Matt. 24:14) Ngiyal’ nem e be gagiyeg Jesus u tharmiy ni ke Pilung, ma ke kunuy bochi ulung i girdi’ u fayleng ni ngar manged pi gachalpen. Ke fol e chi ulung ney ko n’en ni tay Jesus chilen ni aram e ngar machibnaged u ga’ngin yang e fayleng fare thin nib fel’ u murung’agen Gil’ilungun Got ni bay u tharmiy! (Acts 10:42) Bod ni, ba pag 20,000 e piin ni yad ma ayuweg Gil’ilungun Got nra muulunggad nga Cedar Point, Ohio u Meriken ko rofen ni September 1922 ni fan nga reb e international convention. Aygum lemnag gelngin e felfelan’ ni kar ted u nap’an ni pi’ Brother Rutherford fare welthin ni kenggin e, “Gil’ilungun Got,” ngemu’ me gaar: “Am sapgad, be gagiyeg fare Pilung! Gimed e pi tamachib rok. Ere, ngan machibnag, ngan machibnag, ngan machibnag, murung’agen fare Pilung nge gil’ilungun.” Faani bin migid e rran, ma l’agruw biyu’ e pi walag nra uned ko machib, maku bay boch i yad ni ur moyed ko gin ni yibe tay e convention riy nra milekaggad ni sogonap’an 45 e mayel ni bochan e ngar uned ko machib. I yog reb e walag nib pin ni gaar: “Dab gu pagtalin e ngiyal’ ni baaram ni ka nog ni ngan machibnag murung’agen Gil’ilungun Got nge gelngin feni pasig e piin ni kar muulunggad!” Ku boor e girdi’ nra lemgad ni aram rogon.

9, 10. (a) Mang boch e skul ni kan fal’eg rogon ni nge ayuwegdad ko machib? (b) Uw rogon ni ke yib angin e pi skul ney ngom?

⁹ Nap’an e duw ni 1922, mab pag 17,000 e pi walag ni yad be machib u 58 e nam u fayleng. Machane, kub t’uf ni ngan fil boch ban’en ngorad. Nap’an e bin som’on e chibog, ma aram me yog e En ni Kan Mel’eg ni nge Mang Pilung ngak pi gachalpen e n’en ni ngar machibnaged ko girdi’, nge gin ni ngar machibgad riy, nge rogon ni ngar machibgad. (Matt. 10:5-7; Luke 9:1-6; 10:1-11) Ku er rogon e ngiyal’ ney ni be guy Jesus rogon ni urngin e piin ni yad be un i machibnag murung’agen Gil’ilungun Got e yibe fonownagrad maku bay e pi talin e maruwel nib t’uf rorad ni fan e nge yag nra machibgad nib fel’ rogon. (2 Tim. 3:17) Ku be fanay Jesus e ulung ni Kristiano ni nge skulnag pi gachalpen ni fan ko fare maruwel ni machib. Fare Theocratic Ministry Skul ni yima tay u boor ko 111,000 e ulung u fayleng i yan e aram reb e kanawo’ ni ma skulnagrad riy. Ba pag medlip milyon e pi walag ni yad be un ko re skul ney, ma ke yag ni ngar machibgad mi yad fil e thin rok Got u reb e kanawo’ nra yib angin ngak “urngin mit e girdi’.”​—Mu beeg e 1 Korinth 9:20-23.

¹⁰ Ku bay boch e skul ni yima fil e Bible riy ni  kan fal’eg rogon ni fan e nge ayuweg e piin piilal u lan e ulung, nge piin pioneer, nge pi walag ni muchugbil, nge piin mabgol ni Kristiano, nge pi Branch Committee nge ppin rorad, nge piin ni yad ma lekag e ulung nge ppin rorad, nge pi missionary. * Immoy bayay nni tay fare skul ni ka nog e Skul ni Fan ko Piin Mabgol ni Kristiano ngay me weliy boch e walag nra uned ngay gelngin e felfelan’ ni kar ted ni lungurad: “Skul ni kan tay ngomad e ke gelnag feni t’uf Jehovah romad ma ke ayuwegmad ni nggu nanged rogon ni nggu ayuweged boch e girdi’.”

11. Uw rogon ni ke yag ni nge ulul pi gachalpen Jesus ko fare maruwel ni machib ni yugu aram rogon nib gel e togopuluw ni kan tay ngorad?

¹¹ Be guy Satan ni toogor rodad gelngin e athamgil ni gad be tay ni fan ko fare maruwel ni ngan machibnag murung’agen Gil’ilungun Got. Baadag ni nge taleg e re maruwel ney, ere boor e kanawo’ ni be maruwel riy ni nge talegdad ndab kud machibgad. Machane dabi yib angin e n’en ni be rin’ Satan, ya ke tay Jehovah Fak “ni ir e ba’ nga daken urngin e piin ni be gagiyeg u tharmiy, nge piin ni yad be tay murung’agen ban’en, nge piin ni ba ga’ lungurad, nge pi pilung.” (Efe. 1:20-22) Ma fanay Jesus mat’awun ni ir e Pilung ni nge ayuweg pi gachalpen me pow’iyrad ya nge yag nra lebguyed e tin nib m’agan’ e Chitamangin ngay. * Yibe machibnag e re thin nib fel’ ney, ma bokum milyon e girdi’ ni yibe fil ngorad rogon ni ngar liyorgad ngak Jehovah. Ri gad ba tow’ath ni gad be un i rin’ e re maruwel ney!

12. Mu weliy boch ban’en ni kan thilyeg u rarogon e ulung rodad ni ka nap’an e ngiyal’ ni tabab Gil’ilungun Got ko gagiyeg u tharmiy.

¹² Ka nap’an ni tabab Gil’ilungun Got ko gagiyeg ko duw ni 1914 ni i thilyeg Jesus boch ban’en u rogon e liyor ni be tay e pi tapigpig rok Got, ya nge yag ni ngar rin’ed e tin nib m’agan’ e Chitamangin ngay. (Mu beeg e Isaiah 60:17.) Nap’an e duw ni 1919 ma ra reb e ulung min dugliy reb e piilal riy ni ir e nge yarmiy rogon e machib ni yibe tay. Ma nap’an e duw ni 1927 min tabab ko machib u mit e tabinaw ni gubin e Madnom. Faani taw ko duw ni 1931 ma aram e ngiyal’ ni tabab e pi tapigpig rok Got i fanay fare ngachal ni Pi Mich Rok Jehovah. Re n’ey e k’aringrad ni ngar pasiggad i machibnag murung’agen Gil’ilungun Got. (Isa. 43:10-12) Ma nap’an ni taw ko duw ni 1938 min tal nda ku un towaliy e piin ni nga u rogned e thin u lan e ulung, ya kan tay ni faanra ngan dugliy be’, ma som’on e thingari rin’ boch ban’en ni be yog e Bible nthingari rin’ e piin ni yad ma yog e thin u lan e ulung. Nap’an e duw ni 1972, min dugliy ni nge par ni boor e piilal ni nga u rogned e thin u lan e ulung, ma gathi kemus ni taabe’. Ere, kan pi’ e athamgil nga laniyan’ e pi walag ni pumoon ni ngar nameged ni ngar manged boch e piin ni yad ma ‘gafaliy fare ran’ i saf ni Got e ke pi’ ngorad.’ (1 Pet. 5:2) Nap’an e duw ni 1976 min yarmiy nra reb i chonggin fare  Ulung ni Ma Pow’iyey me yarmiy reb fa nel’ i ulung ni be pow’iy fare maruwel ni machib ni yibe rin’ u ga’ngin yang e fayleng. Ka aram nap’an i yib ni be yarmiy Jesus pi gachalpen ni ngar rin’ed e tin nib m’agan’ Got ngay.

13. Mang angin ngom e maruwel ni ke tay Gil’ilungun Got u lan fa 100 i duw ni ke yan?

¹³ Am lemnag e pi n’en ni ke yag ni nge rin’ faen ni kan dugliy ni nge mang Pilung u lan fa 100 i duw ni ke gagiyeg riy! Ke yag ni nge beechnag ba ulung i girdi’ ni ngar feked fithingan Jehovah. Ke pow’iy fare maruwel ni ngan machibnag murung’agen Gil’ilungun Got u 239 e nam ma ke fil ngak bokum milyon e girdi’ rogon ni ngar liyorgad ngak Jehovah. Ba pag medlip milyon i gachalpen nib m’agan’rad ngay ni ngar rin’ed e tin nib m’agan’ e Chitamangin ngay ni ke ayuwegrad ni ngar pared ni ke taareban’rad. (Ps. 110:3) Ere, dariy e maruwar riy nrib pag feni fel’ e maruwel ni be rin’ Jehovah u daken Gil’ilungun fare Messiah. Ma ka bay boch ban’en nrib manigil nra rin’ boch nga m’on!

14. (a) Mang e gad be yog ngak Got ni nge rin’ u nap’an ni gad ra meybil ni nge lungudad: “Nge yib Gil’ilungum ngomad”? (b) Mang e thin nu Bible ni fan ko duw ni 2014, ma mang fan nib puluw e re thin nu Bible ney?

¹⁴ Yugu aram rogon ni ke teeliyawnag Jehovah Jesus Kristus ni Fak ni nge mang Pilung ko duw ni 1914, ma gathi aram e ngiyal’ ni kan fulweg taban fare meybil ni be gaar, “nge yib Gil’ilungum ngomad.” (Matt. 6:10, NW) Ke yiiynag e Bible nra ‘gagiyeg’ Jesus u fithik’ e pi toogor rok. (Ps. 110:2) Pi am ko girdi’ ni bay u tan e gagiyeg rok Satan e ku yad be togopuluw nga Gil’ilungun Got. Ere, nap’an ni gad ra yibilay Gil’ilungun Got ni nge yib, ma aram e gad be yog ngak Got ni nge pi’ e En ni Kan Dugliy ni nge mang Pilung nge piin ni ngar uned ngak ko gagiyeg ni ngar chuweged e pi am ko girdi’ nge piin ni yad be togopuluw nga Gil’ilungun. Re n’ey e ra lebguy e thin ni bay ko Daniel 2:44 ni aram e ra yib Gil’ilungun Got ni nge “thirif u but’ urngin e pi pilung nem nge gagiyeg ni yad be tay.” Ra chuweg gubin e pi am ni be togopuluw nga Gil’ilungun. (Rev. 6:1, 2; 13:1-18; 19:11-21) Ke chugur ni nge buch e re n’ey. Ere, ba puluw e thin nu Bible ni kan dugliy ni fan ko duw ni 2014, ni aram e Matthew 6:10, NW ni be gaar: “Nge yib Gil’ilungum ngomad.” Chiney e ke gaman 100 e duw nap’an ni ke tabab Jesus ko gagiyeg u tharmiy.

15, 16. (a) Mang boch ban’en nrib manigil nra buch u nap’an e Gagiyeg nra Tay Jesus u Lan fare Biyu’ i Duw? (b) Mang e tomur nra rin’ Jesus ni ir fare Pilung ni Kan Dugliy, ma mang e ra rin’ e re n’em ko tin nib m’agan’ Jehovah ngay ni fan ko pi n’en ni ke sunmiy?

¹⁵ Tomuren nra thang Jesus e pi toogor rok Got, ma ra yon’ Satan nge pi moonyan’ rok nga lan fare low nib toar mi yad par u rom u lan bbiyu’ i duw. (Rev. 20:1-3) Nap’an nra chuw Satan, ma aram e ra rin’ Gil’ilungun Got boch ban’en nra yibnag angin fare biyul ni maligach ni pi’ Jesus me chuweg wenegan e denen ni ke af rok Adam ngodad. Ku ra faseg e re Pilung nem bokum milyon e girdi’ ni kar m’ad me yarmiy ni ngan fil murung’agen Jehovah ngorad. (Rev. 20:12, 13) Ra paradis ga’ngin yang e fayleng me yan i par ni ke bod fare milay’ nu Eden. Urngin e piin ni yad ba yul’yul’ ni yad ra magey e ngiyal’ nem e kar flontgad.

¹⁶ Nap’an nra m’ay fare Biyu’ i Duw ni ke Gagiyeg Kristus riy, ma aram e ke lebug e n’en nib m’agan’ Jehovah ngay ni fan ko fayleng. Aram e ngiyal’ nra sulweg Jesus Gil’ilungun ngak e Chitamangin. (Mu beeg e 1 Korinth 15:24-28.) Ra taw ko ngiyal’ nem ma daki t’uf ni nge mang be’ e tamaaf u thilin Jehovah nge pi fak u fayleng, ya ra par gubin pi fak Got u tharmiy ngu fayleng ni kar taarebgad u tan pa’ e Chitamangirad ni bay u tharmiy.

17. Mang e kam dugliy ni ngam rin’ ni fan nga Gil’ilungun Got?

¹⁷ Pi n’en ni ke buch u lan fa 100 i duw ni ke gagiyeg Gil’ilungun Got riy e be dag ni Jehovah e ir e kab milfan urngin ban’en nga tan pa’, ma dab ki n’uw nap’an me lebug e n’en nib m’agan’ ngay ni fan ko fayleng. Ere, ngad ululgad ngaud pigpiggad ngak ni gad ba yul’yul’ ma gad be machibnag murung’agen fare Pilung nge Gil’ilungun, ya ba pagan’dad ndab ki n’uw nap’an me fulweg Jehovah taban e meybil ni gad be tay ni be lungudad: “Nge yib Gil’ilungum ngomad”!