1. Bochan ni kan sunmiydad ni gadad bod yaan Got, ma mang boch ban’en nrayog ni ngad rin’ed?

 “RE PAGEL nir e bod e chitamangin.” Aram ban’en ni ma yog e girdi’ u murung’agen e bitir ni bod e gallabthir rok. Bin riyul’ riy e gubin e bitir ni ma m’ug rarogon e chitamangin nge chitiningin ko ngongol rok. Jehovah ni chitamangidad nu tharmiy e ir “enggin gubin e yafos.” (Ps. 36:9, BT) Ma bochan ni gadad pi fak, ma taareb rogodad ngak u boor e kanawo’. Bochan ni kan sunmiydad ni gadad bod yaan Got, ma rayog ni ngad fal’eged i lemnag boch ban’en, ma gad dugliy e pi n’en ni ngad rin’ed, maku rayog ni nge yag e fager ngodad nib fel’.​—Gen. 1:26.

2. Uw rogon ni nge mang Jehovah e bin th’abi fel’ e Fager rodad?

² Rayog ni nge mang Jehovah e bin th’abi fel’ e Fager rodad ni bochan ni gadad ba t’uf rok, nge bochan nib michan’dad ngak nge Fak. I yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Boor e girdi’ ni ke yag ni nge chugur e tha’ u thilrad Jehovah. Gad ra weliy murung’agen l’agruw ni’ ko pi girdi’ ney.

3, 4. Mang fan nib thil e fager ni tay Abraham nge Jehovah ko fager ni tay piyu Israel nge Jehovah?

³ I yog Jehovah ni chitamangin piyu Israel ni ‘Abraham e fager rok.’ (Isa. 41:8) Bin l’agruw e Kronicles 20:7 e ku be tamilangnag ni Abraham e fager rok Got. Mang e ke k’aring Abraham ni nge chugur e tha’ u thilrow e En ni Sunmiy? I par nib gel e michan’ rok.​—Gen.15:6; mu beeg e James 2:21-23.

⁴ Jehovah e ir e Chitamangin pi girdien Abraham nra manged fare nam nu Israel kakrom, maku ir e Fager rorad. Machane, rib gel e kireban’ riy ya dakur manged fager rok Got. Mang fan? Bochan ndaki mich u wan’rad e pi n’en ni ke micheg Jehovah ni fan ngorad.

5, 6. (a) Uw rogon ni ke mang Jehovah e Fager rom? (b) Mang boch e deer ni thingar da fithed gadad riy?

⁵ Ra yoor ban’en nim fil u murung’agen Jehovah, ma ra gel e michan’ nge t’ufeg rom ngak. Mu lemnag e ngiyal’ ni baaram nsom’on nim fil ni Got e riyul’ ni ir Be’ nrayog ni nge chugur e tha’ u thilmew. Kum fil ni gadad gubin ni ke af e denen ngodad ni bochan nde fol Adam. Ma kam nang fan ni ke mal’af gubin e girdi’ rok Got. (Kol. 1:21) Kam fil ni Jehovah e gathi ir be’ ndabiyog ni ngan chugur ngak ma der ma lemnagdad. Nap’an ni kad nanged ni ke pi’ Jehovah Fak ni maligach, ma ke michan’dad ko fare biyul, ma ke chugur e tha’ u thildad Got.

⁶ Nap’an ni gad ra lemnag rogon ni ke yag ni ngad nanged Jehovah, ma ngad fithed gadad ni nge lungudad: ‘Be gel e chugur ko tha’ u thilmow Got, fa? Gubin e rran ni ma pagan’ug ngak, mab gel e t’ufeg u thilmow, fa?’ Be’ ni chugur e tha’ u thilrow Jehovah kakrom e aram Gideon. Ngad weliyed e n’en ni buch rok ya nge yag ni ngad folwokgad riy.

7-9. (a) Mang e buch rok Gideon, ma mang angin ni yib riy? (Mu guy e sasing ni bay u tabolngin e re article ney.) (b) Uw rogon ni ngari fel’ e tha’ u thildad Jehovah?

⁷ Gideon ni ir reb e Judge e i pigpig ngak Jehovah u ba ngiyal’ ni ke mo’maw’ e par rok piyu Israel ya ka fin ra thapgad nga lan fare Nam ni Kan Micheg. Be yog e Judges ko guruy ni 6 ni yib reb e engel rok Jehovah i guy Gideon u Ofra. Ngiyal’ nem e i magawonnag piyu Midian fare nam nu Israel. Bochan e re n’em, ma aram e da i gunugunuy Gideon wom’engin e wheat u daken e milay’ ya i gunugunuy u lan ban’en ni yima uduy e grapes riy ni bochan e nge mom ni nge mithag. Ke gin u nap’an ni m’ug ba engel ngak me yog ni Gideon e ir reb e ‘pumoon ndariy e marus rok.’ Yugu aram rogon ni ke ayuweg Jehovah piyu Israel u pa’ piyu Egypt, ma i maruwar u wan’ Gideon ko rriyul’ nra ayuwegrad Jehovah e ngiyal’ nem fa danga’. Machane, me non fare engel ni pa’ Jehovah, ni be micheg ngak Gideon nriyul’ nra ayuweg Jehovah.

⁸ I par Gideon nga i lemnag rogon ni nge “chuweg piyu Israel u tan pa’ yu Midian.” Machane, ba tamilang e fulweg ni pi’ Jehovah ngak ni gaar: “Rayog rom, ya bay gu ayuwegem. Bay mu gel ngak piyu Midian nrib mom nsusun e ri taabe’ e kam cham ngak!” (Judg. 6:11-16) Ere, yog Gideon ngak Got ni nge dag e pow ngak nsana bochan e be lemnag rogon ni nge rin’ e re n’ey. Mu tay fanam i yan riy nnap’an ni ur nonow Jehovah ma da i maruwar u wan’ ko riyul’ ni Jehovah e ir Be’ fa danga’.

⁹ N’en ni buch ni migid e gelnag e michan’ rok Gideon me chugurnag e tha’ u thilrow Got. I fal’eg rogon e ggan nge pi’ ko fare engel ni nge kay. Ma nap’an ni ngongliy fare engel e maang’ang nge m’ay fapi ggan nga bang, ma aram me nang Gideon ni Jehovah e ir e ke l’og fare engel. Ma aram me tolul ni be gaar: “Somol ni Got! Kug guy fare engel rom nga owcheg!” (Judg. 6:17-22) Machane, gur, ke magawon e tha’ u thilin Gideon nge Jehovah ni bochan e re n’ey? Danga’. Ya ke aw e gapas u thilrow Got. Kad nanged e re n’ey ni bochan ni fithingan fare altar ni ubung Gideon u rom e be yip’ fan ni Jehovah e “Ir e Gapas.” (Mu beeg e Judges 6:23, 24) Gad ra fal’eg i lemnag e n’en ni ma rin’ Jehovah ni fan ngodad ni gubin e rran, ma gad ra nang ni ir e bin riyul’ e  Fager rodad. Ra ud meybilgad ngak Got ni gubin ngiyal’, ma ra gapas lanin’dad me gel e chugur ko tha’ u thildad Got.

10. Mang e baadag Jehovah ni ngad rin’ed ni faanra ngad manged boch e fager rok nrogon ni bay ko Psalm 15:3, 5?

¹⁰ Machane, faanra nge mang Jehovah e fager rodad ma bay boch ban’en nthingar da rin’ed. I tangnag David ko Psalm 15 murung’agen e pi n’en nib t’uf ni ngad rin’ed me yag ni ngad ‘pared u lan e tempel’ rok Jehovah ara ngad manged fager rok. (Ps. 15:1) Ngad weliyed l’agruw ko pi n’ey, ni aram e​—rogon ndab ud t’ared e thin nga daken be’ nge rogon ni ngaud ngongolgad u fithik’ e yul’yul’. Baaray e n’en ni yog David u murung’agen be’ nra m’agan’ Jehovah ngay ni nge mang fager rok. I yog ni gaar: “Der ma t’ar e thin nga daken e girdi’. . . . ma dabiyog ni nge fek e salpiy ni ka ni pi’ ngak ni fan e nge yog ban’en nib togopuluw ngak be’ nib fel’ e rok.”​—Ps. 15:3, 5.

11. Mang fan ndab ud t’ared e thin nga daken be’?

¹¹ Ki fonownigey David u reb e tang ni gaar: “Ngam talgad ndab ku umogned e thin nib kireb.” (Ps. 34:13) Faanra dab da folgad ko re fonow ney ma rayog ni nge palog thildad e Chitamangidad ni bay u tharmiy. Bin riyul’ riy e, Satan ni ir e bin th’abi ga’ e toogor rok Jehovah e ir e th’abi salap i t’ar e thin nga daken be’. Fare bugithin ni “Moonyan’” e kan fek u bbugithin ni Greek ni be yip’ fan “be’ ni ma t’ar e thin nga daken be.” Faanra ud kol ayuwgad u rogon ni gad ma non ngak boch e girdi’ nge pi n’en ni gad ma weliy u murung’agrad, ma ra ayuwegdad ni ngad pared ni gad ba chugur ngak Jehovah. Ma rib ga’ fan ni ngaud kol ayuwgad u rogon ni gad ma ngongol ngak e pi walag ni ke dugliyrad Got ni nga u rogned e thin u lan e ulung.​—Mu beeg e Hebrews 13:17; Jude 8. 

12, 13. (a) Mang fan ni ngaud yul’yul’gad u gubin ban’en? (b) Faanra ud yul’yul’gad, ma mang e ra rin’ ngak boch e girdi’?

¹² Pi tapigpig rok Jehovah e goo yi manangrad ni yad ba yul’yul’. I yoloy apostal Paul ni gaar: “Um pired ni gimed be yibiliymad ngak Got. Ya gamad e mmudugilan’mad ngomad ndariy ban’en ni be yog lanin’mad ngomad ni kug rin’ed nib kireb, ya gamad baadag ni nggu yul’yul’gad u gubin ban’en.” (Heb. 13:18, NW) Bochan ni kad dugliyed u wan’dad ni ngaud “yul’yul’gad u gubin ban’en” ma aram fan ndarud bannaged pi walagdad ni Kristiano ni bochan e nga i fel’ boch ban’en riy ngodad. Bod ni, faanra ma maruwel boch e walag rodad, ma thingar ud pied puluwrad nrogon ni kad micheged ngorad ni gad ra pi’. Gadad e piin Kristiano e thingar ud yul’yul’gad ngak chonggin e maruwel rodad nge yug girdi’. Ma faanra gadad be maruwel rok reb e walag u lan e ulung, maku thingar da yul’yul’gad ngak maku dab ud lemnaged ni nga i rin’ boch ban’en ni fan ngodad nib thil ngak e tin ni ka bay i girdien e maruwel rok.

¹³ Ba ga’ ni gad ma rung’ag boch e thin nib fel’ ni ma yog e girdi’ u murung’agen e Pi Mich Rok Jehovah ni bochan e yad ba yul’yul’! Immoy be’ nib ga’ u barba’ e maruwel ni yad ma dimow naun ni guy ni Pi Mich Rok Jehovah e nap’an ni yad ra micheg ban’en, ma dab ra thilyeged. Ere yog ni gaar, “Gubin ngiyal’ ni gimed ma rin’ e tin ni kam micheged.” (Ps. 15:4) Mit ney e ngongol e ra ayuwegdad ni ngaud pared nib fel’ e tha’ u thildad Jehovah. Ma reb e ku yira pining e sorok riy ngak.

14, 15. Uw rogon nrayog ni ngad ayuweged be’ ni kad mada’naged u nap’an e machib ni nge mang reb e fager rok Jehovah?

¹⁴ Boor e girdi’ ni gad ma mada’nag u nap’an e machib e yugu aram rogon nib mich u wan’rad ni bay Got, machane yad ma lemnag ndabiyog ni nge mang Fager rorad. Ere, uw rogon ni ngad ayuweged yad? Am lemnag e n’en ni yog Jesus ngak fa 70 i gachalpen u nap’an ni l’ograd ni nga ranod ni yad l’al’agruw ni ngar machibgad. I yog ngorad ni gaar: “Ma ngiyal’ ni gimed  ra yan riy nga lan reb e naun, e som’on e nge lungumed, ‘Nge yib e gapas ngak girdien e re naun ney.’ Ya faanra bay be’ riy nib t’uf e gapas rok, mi gimed pag e gapas ni ka mogned nge par u daken; ma faanra dangay, mi gimed fulweg murung’agen e gapas ni ka mogned.” (Luke 10:5, 6) Faanra ud sumunguygad ko girdi’ ma rayog ni ngar adaged e machib. Maku reb e, faan gad ra sumunguy ngak e piin ni kar togopuluwgad ngodad u nap’an e machib, ma rayog ni nge war e damumuw rorad, me m’agan’rad ngay ni ngar motoyilgad ko yay ni migid ni ka darod nga taferad.

¹⁵ Nap’an ni gad ra mada’nag e girdi’ nri yad ba m’ing ko teliw rorad ara yad ma fol u boch ban’en ni ma rin’ e pi yurba’ i teliw ni googsur, ma thingar kud sumunguygad ngorad. Boor ban’en ni aray rogon ni ke buch rok boch e girdi’ ni gad ra pirieg ko fapi article ni kenggin e “Bible e Rayog ni Nge Thilyeg e Ngongol Rok Be’.”

16. Uw rogon nrayog ni ngad manged fager rok Jehovah ma ka gad ‘maruwel u taabang’?

¹⁶ Girdi’ ni ma maruwel u taabang e ba ga’ nri ma fel’ e tha’ u thilrad. Gubin e piin ni kar ognaged yad ngak Jehovah e gathi kemus ni yad e fager rok ya ku yad ‘ma maruwel u taabang.’ (Mu beeg e 1 Korinth 3:9.) Ere, faanra ud uned ko machib ma gad be ayuweg e girdi’ ni ngar manged boch i gachalpen Jesus, ma rayog ni ngkud nanged boch i fel’ngin e Chitamangidad ni bay u tharmiy. Ku gad ra guy rogon ni be ayuwegdad gelngin nib thothup ni ngad rin’ed e maruwel rodad ni aram e ngad machibnaged fare thin nib fel’.

17. Uw rogon ni ma m’ug ko pi assembly nge convention ni Jehovah e ir e Fager rodad?

¹⁷ Ra ga’ e tayim ni ngaud machibgad riy, ma aram e gad ra thamiy ni be gel e chugur u thildad Jehovah. Gad ma guy rogon ni ma n’igin Jehovah ni nge dabi taleg boch e girdi’ fare maruwel ni machib. Am lemnag e n’en ni ke buch ni kab kafram i yib. Gathi gad be guy ko pi n’ey nriyul’ ni be pow’iydad Got? Riyul’ ni gad ra ngat nga rogon ni be pi’ e tin nib t’uf rodad ni fan ko pigpig ni gad be tay ngak. Pi convention nge assembly ni gad ma tay e ma m’ug riy ni manang e Chitamangidad e pi magawon ni gad ma mada’nag nge pi n’en nib t’uf rodad. Tomuren reb e convention, me yoloy reb e tabinaw bangi babyor nge pi’ ko ulung rodad ni be gaar: “Pi welthin ni kan pi’ e kari taw nga gum’ircha’mad. Kug nanged ni gamad gubin ni gamad ba t’uf rok Jehovah ma baadag ni nggu mon’oggad.” Tomuren ni un ba wu’ i mabgol nu Chiyamen nga reb e convention nni tay u Ireland, mar piningew e magar ko pi walag ni bochan rogon e ayuw ni kan pi’ ngorow. Ku rognew ni lungurow: “Machane, ri ka gamow be pining e magar ngak Jehovah nge fare Pilung ni ke dugliy ni aram Jesus Kristus. Kar piningew gamow ni nggu mangew bang ko re ulung ney nib taareban’ e girdi’ riy. Gathi kemus ni gamow be weliy murung’agen e taareban’,  ya ku ireray e n’en ni gamow be guy ni gubin e rran. Pi n’en ni ke buch romow u Dublin e be puguran ngan’mow e tow’ath ni bay rodad ni gad gubin ni aram e ngaud pigpiggad ngak e Got rodad u taabang.”

18. Mang e rayog ni ngad fithed gadad riy u murung’agen e numon u thildad Jehovah?

¹⁸ Ra fel’ e numon u thilin l’agruw e fager ma aram e ra gel e chugur ko tha’ u thilrow. Ngiyal’ ney e gubin ngiyal’ ni ma yan e girdi’ ko Internet ara yad ma text ko cell phone rorad. Machane, uw rogon e re n’ey ni faanra ngad taareb rogonnaged nga rogon e numon u thildad e bin th’abi fel’ e Fager rodad ni aram Jehovah? Riyul’ ni ir e en ni ma “fulweg taban e meybil.” (Ps. 65:2) Machane, uw urngin yay ni gad ma non ngak?

19. Mang e ra ayuwegdad ni faanra ba mo’maw’ ngodad ni ngad weliyed lanin’dad ngak e Chitamangidad ni bay u tharmiy?

¹⁹ Bay boch e tapigpig rok Got nib mo’maw’ rorad ni ngar weliyed lanin’rad ngak be’. Machane, aram e n’en ni baadag Jehovah ni ngad rin’ed u nap’an ni gad ra meybil ngak. (Ps. 119:145; Lam. 3:41) Mus ni faanra ba mo’maw’ ni ngad weliyed ngak e tin ni bay u lanin’dad, ma rayog ni nge ayuwegdad. I yol Paul ngak e pi Kristiano nu Roma ni gaar: ‘Ra dad nanged e yu bugithin ni nga dogned nge yog nda meybilgad nrogon, ma gelngin Got nib thothup e ir e ma weliy ngak Got e n’en ni gadad be wenignag nrogon ndabiyog i weliy ko thin. Mi Got, ni ma guy e tafinay rok e girdi’, e manang e tin ni be lemnag gelngin nib thothup; ya gelngin nib thothup e ma wenignag e tirok Got e girdi’ ngak Got nrogon nib m’agan’ Got ngay.’ (Rom. 8:26, 27) Gad ra fal’eg i lemnag e thin ni bay ko pi babyor ko Bible ni bod e Job, nge Psalms, nge Proverbs ma ra ayuwegdad ni ngad nanged rogon ni ngaud weliyed lanin’dad ngak Jehovah.

20, 21. Uw rogon nra fal’eg fapi thin ko Filippi 4:6, 7 lanin’dad?

²⁰ Nap’an ni gad ra mada’nag boch e magawon nib ga’, ma dab da paged talin e thin ni yog Paul ngak piyu Filippi ni gaar: “Dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med.” Gad ra meybil ngak Jehovah ni aray rogon, ma rayog ni nge gapas lanin’dad, ya yog Paul ni gaar: “Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” (Fil. 4:6, 7) Manga yugu da pared ni gad be pining e magar ngak Got ni be pi’ e “gapas rok” ngodad ni ir e be yororiy gum’ircha’dad nge tafinay rodad.

²¹ Ma ayuwegdad e meybil ni nge fel’ e tha’ u thildad Jehovah. Ere, ngaud “meybilgad ni gubin ngiyal’.” (1 Thess. 5:17) Susun ni ngaud guyed rogon ni nga i gel e tha’ u thildad Got mu ud rin’ed e tin nib m’agan’ ngay. Ere, ngad ted e tayim ni ngaud fal’eged i lemnag e pi tow’ath ni be yag ngodad ni bochan e Jehovah e ir e Chitamangidad, nge Got rodad, nge Fager rodad.