1, 2. Uw rogon ni ma non Jehovah ko pi tapigpig rok?

 KAB kakrom i yib ni boor e kanawo’ ni ma pow’iy Jehovah e girdi’ riy. Bay boch i yad ni i non ngorad u daken e engel, ara i pilyeg e changar rorad, ara i non ngorad u malik’ay, me weliy ngorad boch ban’en ni bayi buch boch nga m’on. Ku bay boch i yad ni i pi’ Jehovah boch e maruwel ni ngar rin’ed. (Num. 7:89; Ezek. 1:1; Dan. 2:19) Ku immoy boch i yad ni i yog Jehovah e n’en ni ngar rin’ed u daken e piin owchen ni ur pigpiggad ko ulung rok u fayleng. Demtrug rogon ni i non Jehovah ko pi girdi’ ney, machane i tow’athnag e pi arorad ni i fol rok.

² Ngiyal’ ney e ma pow’iy Jehovah e girdi’ rok u daken e thin rok u Bible, ngu daken gelngin nib thothup, ngu daken e ulung rok. (Acts 9:31; 15:28; 2 Tim. 3:16, 17) Rib tamilang e pi n’en ni ma yog ngodad ni ngad rin’ed, ya gowa bod ni ‘gad be rung’ag lungun nga fiti keru’dad ni be gaar, “Baaray e wo’. Mu leked.”’ (Isa. 30:21) Ku ma fanay Jehovah Jesus ni nge pow’iydad. Ke mel’eg Jesus ni nge pow’iy e ulung rok u daken “fare tapigpig nib yul’yul’ ma ba gonop.” (Matt. 24:45) Ba t’uf ni ngaud folgad u rogon ni yow be pow’iydad, ya bay rogon e athap rodad ko yafas ndariy n’umngin nap’an ko re n’ey.​—Heb. 5:9.

3. Mang e rayog ni nge magawonnag rogon ni gad ma fol u rogon ni be pow’iydad Jehovah? (Mu guy e sasing ni bay u tabolngin e re article ney.)

³ Ma guy Satan ni Moonyan’ rogon ni nge magawonnag rogon ni be pow’iydad Jehovah, ya manang ni ireray e n’en nra yognag e yafas  ngodad. Maku reb e, bochan nib “sasaliyeb” gum’ircha’dad ma rayog ni nge k’aringdad ni ngad dabuyed ni ngad folgad u rogon ni be pow’iydad Jehovah. (Jer. 17:9, BT) Ere, chiney e ngad weliyed rogon nrayog ni ngad gelgad nga boch ban’en ni ma mo’maw’nag ngodad ni ngad motoyilgad ngak Got. Ku gad ra weliy ni faanra ud motoyilgad ngak Jehovah ma gad be non ngak u daken e meybil, ma rayog ni nge ayuwegdad ni ngad pared ni gad ba chugur ngak ndemtrug e miti magawon ni kad mada’naged.

4. Uw rogon ni ma guy Satan rogon ni nge gagiyegnag e lem ko girdi’?

⁴ Ma guy Satan rogon ni nge gagiyegnag e lem ko girdi’ u daken boch ban’en nde riyul’ ngu daken boch ban’en ni yima weliy ko news nge ku boch ban’en. (Mu beeg e 1 John 5:19.) Ku boor ban’en ni yima weliy ko pi shimbung, nge babyor, nge magazine, nge radio, nge TV, nge internet u ga’ngin yang e re fayleng ney. Yugu aram rogon ni bay boch ban’en ko pi n’ey nib ga’ fan, machane ba ga’ ni gad ma guy ara yima weliy boch ban’en riy nib togopuluw ko pi motochiyel rok Jehovah. (Jer. 2:13) Bod nib ga’ ni yima yog ko news ngu TV ndariy ban’en nib kireb riy ni nge mabgol e pumoon nge pumoon ara ppin nge ppin. Maku boor e girdi’ ni ma lemnag ni kaygi thum’ nga wuru’ e n’en ni be yog e Bible u murung’agen e par ko pumoon nge pumoon ara ppin nge ppin.​—1 Kor. 6:9, 10.

5. Uw rogon ni nge dab da paged e pi ban rok Satan ni nge gagiyegnagdad?

⁵ Faanra ba t’uf e pi motochiyel rok Jehovah rok be’, ma uw rogon ni nge dabi pag e pi ban rok Satan ni nge gagiyegnag? Uw rogon ni nge nang e n’en nib thil u thilin e tin nib fel’ nge tin nib kireb? Thingari ‘fol ko tin ke yog [Got] ni ngan rin’’! (Ps. 119:9) Boor ban’en ko Thin rok Got nib ga’ fan nrayog ni nge pow’iydad me ayuwegdad u rogon ni ngad nanged ko mang e ba riyul’ ma mang e de riyul’. (Prov. 23:23) I yog Jesus ni “girdi’ e . . . urngin bug e thin ni be yog Got e ir e ra i tay . . . nib fos ndabi yim’.” (Matt. 4:4) Ba t’uf ni ngad nanged rogon ni ngad folgad ko pi kenggin e motochiyel nu Bible. Ba n’uw nap’an u m’on ni yoloy Moses e motochiyel rok Jehovah u murung’agen e nge par be’ nge be’ ni gathi mabgol rok nga Bible, ma manang Josef ni faanra un be’ ko biney e ngongol ma aram e ke denen nib togopuluw ngak Got. Dariy ba ngiyal’ ni lemnag Josef ni nge dabki fol rok Jehovah u nap’an ni guy leengin Potifar rogon ni nge waliy Josef ni nge rin’ ban’en nib kireb. (Mu beeg e Genesis 39:7-9.) Yugu aram rogon nib n’uw nap’an ni i guy e re ppin nem rogon ni ngar parew, machane ke mel’eg Josef ni nge motoyil ngak Jehovah ma gathi re ppin nem. Ere, ku arrogodad ni faanra ngad nanged e n’en nib thil u thilin e tin nib fel’ nge tin nib kireb, ma thingar da motoyilgad ngak Jehovah ma gathi pi ban rok Satan.

6, 7. Mang e thingar da rin’ed ni faanra gad baadag ni ngad siyeged e pi ban rok Satan?

⁶ Re fayleng ney e ke sug ko machib ni ma weliy e pi yurba’ i teliw, ere aram fan ni boor e girdi’ ni yad ma lemnag nib m’ay fan ni ngan gay ko baan ngan e teliw e ba riyul’. Machane, ke momnag Jehovah e re n’ey ngak e piin ni yad baadag  ni ngar motoyilgad ngak. Ere thingar da dugliyed e en ni ngad motoyilgad ngak. Ya gad manang ndabiyog ni ngad motoyilgad ngak l’agruw ni’ taab yay. Ere ba t’uf ni ngad ‘nanged lungun’ Jesus ma gad motoyil ngak, ya ir e en ni ke mel’eg Jehovah ni nge gafaliy e pi saf Rok.​—Mu beeg e John 10:3-5.

⁷ I yog Jesus ni gaar: “Mu uthmed telmed ko tin ni gimed be rung’ag!” (Mark 4:24) Ba tamilang e pi fonow rok Jehovah mab mat’aw, machane faanra nge mom ni ngad folgad riy ma thingar da adaged ni ngad motoyilgad ngay. Faanra dab da kol ayuwgad, ma rayog ni nge mang ban rok Satan e da motoyilgad ngay ma dab da motoyilgad ko fonow rok Got. Ere dab um pag e pi musik ko fayleng, nge pi video, nge pi kachido, nge pi babyor, nge piin ni ga ma chag ngorad, nge pi sensey, ara piin ni yima yog ni boor ban’en ni yad manang ni nge gagiyegnag e yafas rom.​—Kol. 2:8.

8. (a) Uw rogon nrayog ni nge bannagdad gum’ircha’dad ma gad pag Satan ni nge gagiyegnagdad? (b) Mang e ra buch ni faanra dab da tedan’dad?

⁸ Manang Satan e pi n’en ni gad ba meewar riy, ere aram fan ni bay i n’en mi i fanay e pi n’em ni nge mo’maw’nag ngodad ni ngad pared ni gad ba yul’yul’. (John 8:44-47) Ere, uw rogon ni ngad pired ni gad ba gel u nap’an ni kad mada’naged e pi skeng ney? Susun e bay be’ ni ke par ni ke mit ko pi n’en ni baadag ni be ngongliy. Ra munmun ma rayog ni nge rin’ ban’en nib kireb, ni ban’en nda i lemnag nra rin’. (Rom. 7:15) Ere mang e ke rin’ ma ke buch e re n’ey? Ba mudugil nda kir motoyil ngak Jehovah. Reb e ke buch e pi n’em ni bochan e da i tiyan’, ma reb e manang nib kireb ma ka be rin’ ma der lemnag ni nge thilyeg. Bod ni sana ke tal nda kir ma meybil, ara ke malmal ko machib, ara yugu ma digey e muulung. Faanra buch e re n’ey rok be’, ma aram e ra munmun ma ra pag e pi ar’ar rok ni nge gel ngak me rin’ ban’en ni manang nib kireb. Machane, faan gad ra tedan’dad ngad yal’uweged boch ban’en u rarogodad nra fekdad i yan ko kireb, ma aram e rayog ni ngad siyeged e pi n’ey. Maku reb e, faanra gad ma motoyil ngak Jehovah ma aram e dab ud motoyilgad ko pi n’en ni ma fil e piin ni kar digeyed e bin riyul’ e liyor ma kar chelgad yad be togopuluw ngay.​—Prov. 11:9.

9. Mang nib ga’ fan ni ngad nanged ni bay boch ban’en ni gad be ar’arnag nrayog ni nge fekdad i yan ko kireb?

⁹ Faan yira pirieg e m’ar rok be’ nib papey, mab mom ni ngan tafalaynag. Ere, ku arrogon ni faanra kad nanged ni bay boch ban’en ni gad be ar’arnag nrayog ni nge fekdad i yan ko kireb, mab fel’ ni ngad guyed rogon ni nge chuw u m’on ni nge ‘koldad [Satan] nge taydad, ni ngaud folgad ko tin ni ba adag.’ (2 Tim. 2:26) Faanra kad nanged ni gad be lemnag ara gad be ar’arnag boch ban’en nde m’agan’ Jehovah ngay, ma mang e susun ni ngad rin’ed? Thingar da gurgad  ngad sulod ngak Jehovah, ma gad motoyil ko fonow rok, ma gad fol riy. (Isa. 44:22) Thingar da nanged ni faanra dad folgad ma gad rin’ ban’en nib kireb, maku ra kad sulod ngak Jehovah ma thingar darod u fithik’ wenegan e kireb ni ud rin’ed. Ere kab fel’ ni ngad guyed rogon ndab da paloggad rok Jehovah!

10, 11. (a) Uw rogon be’ nib tolangan’? (b) Mang e gad ra fil ko n’en ni buch rok Korah, nge Dathan, nge Abiram?

¹⁰ Thingar da nanged nrayog ni nge bannagdad gum’ircha’dad ma gad palog rok Jehovah. Rib gel e ar’ar rodad, ma rayog ni nge mang ir e i gagiyegnagdad! Am lemnag rogon nrayog ni nge k’aringdad e tolangan’ nge chogow ni nge dab kud motoyilgad ngak Jehovah me waliydad nga bang nib gel e kireb riy. Be’ nib tolangan’ e ma lemnag ni yugu ba thil ko tin ka bay e girdi’, ma rayog ni nge rin’ e tin ni baadag ma dariy be’ ni nge yog e n’en ni nge rin’. Ku ma lemnag ni ki mada’ ko piin piilal, ara ulung rok Got ma dab rogned ngak e n’en ni nge rin’ ara ra fonownaged. Faanra aray rogon be’, ma rayog ni nge palog rok Jehovah ma dab ki motoyil ko pi fonow rok.

¹¹ Nap’an ni immoy piyu Israel u daken e ted, me togopuluw Korah, nge Dathan, nge Abiram ngak Moses nge Aron. Bochan nib tolangan’rad, ma aram mar lemnaged ni ngar liyorgad ngak Jehovah u rogon ni yad baadag. Ere, mang e rin’ Jehovah? I li’rad ngar m’ad. (Num. 26:8-10) Bay ban’en nib ga’ fan ni gad ra fil ko re n’ey! Gad ra togopuluw ngak Jehovah ma rayog ni nge yib wenegan nib kireb ngodad. Maku reb e, dab da paged talin ni “tolngan’ e be sor i yan ko riya’.”​—Prov. 16:18, BT; Isa. 13:11.

12, 13. (a) Mu weliy ban’en ni buch kakrom ni be dag wenegan e chogow. (b) Mu weliy rogon nrayog ni nge gel e chogow rodad nib papey ni faanra dab da kol ayuwgad.

¹² A kum lemnag e chogow. Be’ nib chogow e ba ga’ ni ma lemnag nde m’ag e pi fonow rok Jehovah ngak, ma yug rayog ni nge fek ban’en ni gathi ir e fen. Tomuren ni chuweg Elisha e daraw rok Naaman ni ir faen nib ga’ ko salthaw rok yu Syria, me yog Naaman ngak Elisha ni baadag ni nge pi’ boch e tow’ath ngak. Machane, me siyeg Elisha fapi tow’ath nde fek. Machane, Gehazi ni tapigpig rok Elisha e kari chogownag e pi tow’ath nem. Ere, gaar u wan’: “Rogon feni riyul’ ni ba’ Somol e nggu lol’og [Naaman] nggu fek boch ko fapi tow’ath ni ba’ rok.” Ma aram me mil nde yog ir ngak Elisha, me lol’og Naaman, ma nap’an ni taw ko gin bay riy, me yog ngak ni nge pi’ “dalip biyu’ yang e silber nge ruw wu’ e mad nib fel’” ngak. Mang wenegan e ban ni tay Gehazi? I chuw e daraw rok Naaman, me af ngak!​—2 Ki. 5:20-27.

¹³ Faanra dab da kol ayuwgad ko chogow, ma rayog ni nge munmun me mang ir e i gagiyegnagdad. N’en ni buch rok Akan ni bay u Bible e be dag rogon nrayog ni nge gagiyegnagey e chogow. I yog ni gaar: “Gguy ba wuru’ e mad nib n’uw ma rib fel’ yaan nni ngongliy u Babylonia, nge gonap’an e lal e pawn e silber, nge bang i gol nib pag reb e pawn tomalngin. Mar gum’ ni bochan mu gu fek.” De guy Akan rogon ni nge siyeg e ar’ar rok nib kireb, ya n’en ni rin’ e iring fapi chugum me yan i mithag nga lan e tento rok. Nap’an nnang e n’en ni ke rin’ Akan, me yog Joshua ngak nra gechignag Jehovah ni bochan e n’en ni ke rin’. Ere, n’en ni buch e ni malangnag Akan nge chon e tabinaw rok ngar m’ad. (Josh. 7:11, 21, 24, 25, BT) Demtrug be’ nrayog ni nge af e mit ney e lem ngak. Ere, ngaud ‘ayuwgad ma gad guy rogodad rok urngin mit e chogow.’ (Luke 12:15) Yugu aram rogon ni bay yu ngiyal’ ni gad ma lemnag boch ban’en nde puluw, machane ba ga’ fan ni ngad gagiyegniged rogon ni gad ma lem ma dab da paged e pi ar’ar rodad ni nge waliydad i yan ko kireb.​—Mu beeg e James 1:14, 15.

14. Mang e susun ni ngad rin’ed ni faanra gad be lemnag ni ngad rin’ed ban’en nib kireb ni bochan e tolangan’ nge chogow?

¹⁴ Faanra i tolang e lem rodad ma gad be chogow, ma rayog ni nge yib wenegan ngodad nib kireb. Machane, faan gad ra lemnag wenegan nra yib ngodad ni faan gad ra rin’ ban’en nib kireb,  ma ra ayuwegdad ni ngaud motoyilgad ngak Jehovah. (Deut. 32:29) Gathi kemus ni ma yog e bin riyul’ e Got ngodad e n’en nib fel’ ni ngad rin’ed u Bible, ya ku ma yog angin nra yib ngodad, maku arrogon ni ku ma yog wenegan nra yib ngodad ni faan gad ra rin’ e tin nib kireb. Faanra k’aringdad e tolangan’ ara chogow ni ngad adaged ni ngad rin’ed ban’en nib kireb, mab fel’ ni ngad lemnaged wenegan nra yib ngodad, nge piin nib t’uf rodad, nge n’en nra rin’ ko tha’ u thildad Jehovah.

15. Mang e rayog ni ngad filed ko n’en ni i rin’ Jesus?

¹⁵ Baadag Jehovah e tin nib fel’ ni fan ngodad. (Ps. 1:1-3) Ma pow’iydad ko ngiyal’ nra t’uf ni nge pow’iydad riy. (Mu beeg e Hebrews 4:16.) Yugu aram rogon nib flont Jesus, machane i par nib fel’ e numon u thilrow Jehovah, ma gubin ngiyal’ ni ma meybil ngak. I ayuweg me pow’iy Jehovah Jesus u boch e kanawo’ ni yira ngat ngay. I l’og e pi engel ni nga ranod ra pigpiggad ngak, miki pi’ Gelngin nib thothup ni nge ayuweg, miki pow’iy u rogon ni nge mel’eg fa 12 i apostal rok. Kun rung’ag laman Jehovah u tharmiy ni be yog nrib t’uf Jesus Rok mab fel’ u wan’. (Matt. 3:17; 17:5; Mark 1:12, 13; Luke 6:12, 13; John 12:28) Kub t’uf ni ngaud weliyed lanin’dad ngak Got u daken e meybil ni bod ni i rin’ Jesus. (Ps. 62:7, 8; Heb. 5:7) Ere, faanra ud meybilgad ni gubin ngiyal’, ma ra ayuwegdad ni ngad pared ni gad ba chugur ngak Jehovah mu ud ngongolgad u rogon nib m’agan’ ngay.

16. Uw rogon nrayog ni nge ayuwegdad Jehovah ni ngad motoyilgad ngak?

¹⁶ Yugu aram rogon ni ma fonownagdad Jehovah, machane, der ma towasariydad ni ngad folgad riy. Ba t’uf ni ngad ninged gelngin nib thothup, ma ma pi’ ngak e piin ni yad ma ning ngak. (Mu beeg e Luke 11:10-13.) Ere, ba ga’ fan ni ngad ‘tedan’dad nga rogon e motoyil ni gad be tay.’ (Luke 8:18) Bod ni, de puluw ni nga dogned ngak Jehovah ni nge ayuwegdad ni nge dab da uned ko ngongol ndarngal ni faanra ka gad be yaliy yaan e puwlag nge kachido nib kireb. Faanra nge ayuwegdad gelngin Jehovah nib thothup, ma thingar u darod ko yungi n’en ni bay gelngin riy, ni bod rogon e pi muulung ni gad ma tay. Boor e tapigpig rok Jehovah ni ke yag ni ngar siyeged boch e ngongol nib kireb ni bochan e yad ma un ko muulung ma yad ma motoyil ngak Jehovah. Angin ni ke yib riy e ke yag ni ngar nanged boch e ar’ar nib kireb ni ke sum u gum’ircha’rad ma kar guyed rogon ni ngar chuweged.​—Ps. 73:12-17; 143:10.

17. Mang fan nde fel’ ni ngad taga’gad ko tin ni gad be finey ni gad manang?

¹⁷ Am lemnag e n’en ni buch rok David ni Pilung nu Israel. Nap’an ni kab pagel, me gel ngak Goliath ni fare giant nu Filistia. Boch nga tomuren, me mang David reb e salthaw, miki munmun me mang pilung. Maruwel rok e nge ayuweg fare nam nu Israel ndabi buch ban’en rorad, miki ayuwegrad ni ngar mel’eged e tin nib fel’ ni ngar rin’ed. Machane, nap’an ni taga’ David ko tin ni be finey ni manang, ma aram me bannag gum’irchaen ngar rin’ew Bath-sheba reb e denen nrib ubchiya’, miki n’igin ni ngan li’ Uriah ni pumoon rok nge yim’. Nap’an nni fonownag David, me sobut’nag e lem rok nge weliy e kireb rok, me guy rogon ni ngki fel’ e tha’ u thilrow Jehovah bayay.​—Ps. 51:4, 6, 10, 11.

18. Mang e rayog ni nge ayuwegdad ni ngaud motoyilgad ngak Jehovah?

¹⁸ Susun e ngad folgad ko fare fonow ni bay ko 1 Korinth 10:12, ma yug dabi pag rogon e pagan’ ni ngad ted. Bochan ndariy bagadad nrayog ni nge gagiyegnag e “gin nge sor e yafos rok ngay,” ma aram fan nreb e gad ra motoyil ngak Jehovah ma reb e gad ra motoyil ngak Satan. (Jer. 10:23, BT) Ere, manga yug ud meybilgad ni gubin ngiyal’, ma gad be fol u rogon ni be pow’iydad gelngin Got nib thothup, mu ud motoyilgad ngak Jehovah.