Ga ra motoyil nga murung’agen e pi n’en ni be buch u fayleng i yan ni yima weliy ko news, ma dabisiy ni ga ra nang ni yu ngiyal’ e bay boch ban’en nib kireb ni ma rin’ boch e girdi’ ni fan ko teliw rorad. Gathi gubin e teliw ni ke sum ko bin riyul’ e Got. (Matthew 7:15) Riyul’ ni kan bannag boor e girdi’.​—Mu beeg e 1 John 5:19.

Machane, ma guy Got e piin nib yul’yul’ nib t’uf rorad e tin riyul’ nge tin nib mat’aw ban’en. (John 4:23) Be pining Got e miti girdi’ ney ni ngar filed e tin riyul’ ni bay ko Thin rok u lan e Bible.​—Mu beeg e 1 Timothy 2:3-5.

Be kunuy Jehovah e girdi’ nib thilthil e teliw rorad nga taabang ya nge yag ni fil e tin riyul’ ngorad, maku be ayuwegrad ni ngar nanged rogon ni ngar t’ufeged yad. (Mikah 4:2, 3) Ere, rayog ni ngam nang e piin ni yad be un ko baan riyul’ e teliw ni bochan rogon ni yad ma t’ufeged yad.​—Mu beeg e John 13:35.

Girdi’ ko baan riyul’ e teliw e ba mich u wan’rad e thin nu Bible, maku yad ma fol ko pi kenggin e motochiyel ni bay riy. (2 Timothy 3:16) Maku yad ma tayfan fithingan Got. (Psalm 83:18) Yad ma machibnag ni kemus ni Gil’ilungun Got e ir e rayog ni nge chuweg e pi magawon ko girdi’. (Daniel 2:44) Yad ma folwok rok Jesus ma ma ‘gal ramaerad’ u daken e ngongol nib fel’ ni yad ma rin’ ko girdi’. (Matthew 5:16) Rayog ni ngan poy e tin riyul’ e Kristiano ni bochan e yad ma yan u mit e tabinaw i yan ni yad be machibnag fare thin nib fel’ ni murung’agen Gil’ilungun Got.​—Mu beeg e Matthew 24:14; Acts 5:42; 20:20.