Gathi riyul’ ni faanra ba sasalap girdien reb e nam, ma aram e kub sasalap e am riy? Faanra aram rogon, me ere ba t’uf ni nge gagiyeg reb e am nde sasalap, ni gathi am ko girdi’. Be weliy e Bible murung’agen Gil’ilungun Got, ni aram e re am ni yog Jesus ngak pi gachalpen ni ngaur yibilayed.​—Matthew 6:9, 10.

Gil’ilungun Got e aram reb e am nib riyul’ ni be gagiyeg u tharmiy. Ireray e re am nra yan nga lon gubin e am ko girdi’. (Psalm 2:8, 9; Revelation 16:14; 19:19-21) Reb ko pi tow’ath nra yibnag Gil’ilungun Got ko girdi’ e aram e ra chuweg ngongolen e sasalap ko pi am ko girdi’. Ngad weliyed nel’ ban’en ni be micheg nrayog ko re am ney ni nge rin’ e re n’ey.

MAGAWON NI BAY: Ba ga’ ni ma yag e salpiy nga reb e nam ni bochan e tax ni ma pi’ girdien fare nam. Ma re n’ey e ma k’aring boch i girdien e am ko fare nam ni ngar adaged ni ngar iringed e salpiy nib milfan ko re nam nem. Maku boch i yad e ma fek e salpiy ni puluwon e sasalap ni ke pi’ boch e girdi’ ya nge achig e tax ni nge pi’ e pi girdi’ nem, ara nge achig e salpiy ni ngar pied ko am. Bochan e re n’ey, ma aram fan ni ma tolangnag e am e tax ni be pi’ e girdi’, ya nge yan nga lon e salpiy ko fare nam ni yibe gothey, ma aram e ku be mun daken e sasalap ko am. Nap’an nra buch boch ban’en ni aray rogon, mab ga’ ni piin ni yad ba yul’yul’ e rib gel e gafgow ni yad ma tay.

ROGON NI NGAN PITHIG: Jehovah Got ni gubin ma rayog rok e ma pi’ gelngin e Am rok. * (Revelation 11:15) Ma re am nem e de t’uf ni nge kunuy e tax ni bochan e nge yag ni nge maruwel nib fel’ rogon. Machane, bochan ni “rib gel” gelngin Got maku ir be’ nib gol mab mudugil nra pi’ e Am rok e tin nib t’uf rok e piin ni yad ma pigpig ngak.​—Isaiah 40:26; Psalm 145:16.

MAGAWON NI BAY: Rogon ni yog Susan Rose-Ackerman ko fa binem e article ni ke yan e faanra ngan pithig e magawon ko sasalap u reb e nam ma susun ni nge “tabab rok en ni ir e be gagiyegnag e re nam nem.” Girdien reb e nam e dabiyog ni nge pagan’rad ko am rorad ni faanra fare am e kemus ni be gay rogon ni nge taleg e sasalap u tabon e maruwel ko polis, ara pi ta mokun tax, machane mar paged e pi tayugang’ ko am ni ngkur ululgad ko sasalap ni yad be tay. Mus ngak e piin ni yad ma gagiyeg nib fel’ rogon, maku dawor ra flontgad. Be yog e Bible ni gaar: “Dariy be’ u fayleng ni goo tin nib mat’aw e ma ngongliy ni gubin ngiyal’ ma der ma oloboch.”​—Eklesiastes 7:20, BT.

ROGON NI NGAN PITHIG: Ba thil Jesus Kristus ko girdi’ ndawor ra flontgad, ya ir e en ni ke mel’eg Got ni nge gagiyeg u Gil’ilungun, ma dabiyog ni ngan waliy ni nge rin’ e tin nde mat’aw ban’en. Ke dag Jesus nriyul’ e re n’em u nap’an ni siyeg “urngin e nam nu fayleng nge fel’ngin” ni ognag Satan ngak. I yog Satan ngak Jesus nra pi’ e pi nam nem nge fel’ngin ngak ni faanra ragbug nga but’ nge tayfan ni ir e be gagiyegnag e fayleng. (Matthew 4:8-10; John 14:30) Mus nga nap’an ni yibe gafgownag Jesus me dugliy u wan’ ni nge par nib yul’yul’, ma aram fan ni siyeg ba mit e falay nni guy rogon ni nge unum ni fan e nge dabki thamiy e amith. Machane, re falay nem e rayog ni nge k’aring ni nge dabki puluw rogon ni be lemnag ban’en. (Matthew 27:34) Ngiyal’ ney ni bay Jesus rok Got u tharmiy e ke micheg ni ir e bay rogon ni nge gagiyeg u Gil’ilungun Got.​—Filippi 2:8-11.

MAGAWON NI BAY: Boor e nam ni yima tay e towal riy, ma re n’ey e ma ayuweg e girdi’ ni nge yag ni ngar towaliyed be’ ni nge yan nga lon be’ nder fel’ e maruwel rok. Machane, bin riyul’ riy e pi n’en ni yima rin’ ni bay rogon  ko towal e ku bay ngongolen e sasalap riy, ma re n’ey e ku ma buch ko pi nam nib fel’ rogon. Girdi’ ni boor e salpiy rorad e rayog ni ngar k’aringed girdien e am nge piin ni yira towaliyrad ni ngar rin’ed boch ban’en nib kireb.

Justice John Paul Stevens ko Bin Nth’abi Ga’ e Kort u Meriken e yoloy ni mit ney e ngongol e ma “kirebnag rogon ni ma maruwel e pi am maku ma k’aring e girdi’ ni nge dabki pagan’rad ko am ko nam rorad.” Ere, dab ni gin ngay ni yooren e girdi’ u ga’ngin yang e fayleng e yad ma lemnag ni piyu raba’ i maruwel ko am e yad e th’abi gel e sasalap rorad.

ROGON NI NGAN PITHIG: Bochan nra par Gil’ilungun Got ndariy n’umngin nap’an, ma aram e dakuriy fan ni ngan towal. (Daniel 7:13, 14) Ma bochan ni Got e ke mel’eg e En ni Nge Gagiyegnag e re am nem, ma aram fan ndaki t’uf ni ngan towaliy be’, maku dakuriy be’ nrayog ni nge chuweg e en ni ke mel’eg Got ni nge par ko re liw nem. Bochan nib mudugil e re am ney, ma aram fan nrayog rok ni nge rin’ gubin ban’en ni nge fel’ rogon e girdi’ riy.

MAGAWON NI BAY: Sana ga ra lemnag ni faan yira ngongliy boch e motochiyel nib beech ma rayog ni nge mon’ognag e par ko girdi’. Machane, ke pirieg e piin ni yad ma fil murung’agen e re n’ey nib ga’ ni faan yira yoornag e motochiyel, ma aram e be mun daken e sasalap. Maku reb e, pi motochiyel nem ni yima fal’eg e ba ga’ ni boor e salpiy ni yima n’ag ngay ma der yag ni nge taleg ngongolen e sasalap.

ROGON NI NGAN PITHIG: Pi motochiyel u Gil’ilungun Got e kab th’abi fel’ ko pi motochiyel rok e pi am ko girdi’. Bod nde fal’eg Jesus bogi motochiyel ni boor ni ngan fol riy ya kemus ni taareb ni aram e re motochiyel ni baaray ni gaar: “Mu rin’ed ngak e girdi’ e tin ni gimed ba adag ni ngar rin’ed ngomed.” (Matthew 7:12) N’en th’abi ga’ fan ko pi motochiyel u tan Gil’ilungun Got e ra ayuweg e girdi’ u rogon ni yad ma lem nge rogon ni yad ma ngongol. I yog Jesus ni gaar: “Gin’en ni ga ba’ riy e thingari t’uf rom e en ni ir e mmigid ngom ni gowe gur.” (Matthew 22:39) Ma bin riyul’ riy e kemus ni Got e ir e manang e n’en ni bay u gum’irchaey, ere rayog ni nge pi’ e binem e motochiyel.​—1 Samuel 16:7.

MAGAWON NI BAY: Gali n’en ni be k’aringey ni ngan sasalap e aram ngongolen e chogow nge ngongol ni fel’  ngak. Ba ga’ ni pi tayugang’ ko am nge girdien reb e nam e yad e ri yad ma rin’ e miti ngongol nem. Fare kantin nib ga’ u Seoul ni kan weliy murung’agen ko bin ni ke yan e article e puth ni bochan ni pi tayugang’ ko am ko re binaw nem e ur feked puluwon e sasalap ni i pi’ girdien e dimow naun. Fapi girdien e dimow naun ni kar toyed e re kantin nem e kar pied e salpiy ngak girdien e am ni puluwon e sasalap ya yad manang ni yad ra rin’ ni aram rogon ma buchuuw e salpiy ni ngar fanayed ni fan ko re kantin nem ko bin ni ngar folgad ko motochiyel ko dimow naun.

Faanra ngan taleg ngongolen e sasalap, mab t’uf ni ngan fil ko girdi’ rogon ni ngar paged fare lem ni chogow nge lem ni fel’ ngak. Ma pi am ko girdi’ e dubrad ni ngar ayuweged e girdi’ ko biney e magawon, maku dabiyog rorad ni ngar filed ko girdi’ rogon ni ngar paged e biney e lem.

ROGON NI NGAN PITHIG: Gil’ilungun Got e ma chuweg e sasalap ni aram e ma fil ko girdi’ rogon ni ngar paged e mit ney e lem nrayog ni nge k’aring e chogow. * Re skul ney e ra ayuweg e girdi’ ni nge pig lanin’rad nib “polo’ nge beech.” (Efesus 4:23) Pi girdi’ ney e yad ma fil rogon ni ngar paged e lem ni chogow nge lem ni fel’ ngak, mar pared nib fel’ u wan’rad e tin ni bay rorad ban’en ma ngkur lemnaged rarogon yugu boch e girdi’.​—Filippi 2:4; 1 Timothy 6:6.

MAGAWON NI BAY: Yugu aram rogon ni be par boch e girdi’ u bang nib fel’ e ngongol ko girdi’ riy, maku yibe fil e tin nib fel’ ngorad, machane ku bay boch i yad nra dugliy ndabi par nib yul’yul’ ma boch i yad e ra un nga ngongolen e sasalap. Piin llowan’ e yad ma yog ni ireray fan ndabiyog ko pi am ni ngar taleged e re ngongol ney. Kemus ni yad be athapeg ni nge buchuuw wenegan e re ngongol nem.

ROGON NI NGAN PITHIG: Immoy reb e muulung ni tay e United Nations ni kan weliy riy nrogon ni ngan togopuluw nga ngongolen e sasalap e aram e nge fil e pi am ngak e girdi’ rogon ni ngar “yul’yul’gad.” Yugu aram rogon nrib fel’ e re n’ey ni yad be nameg, machane Gil’ilungun Got e ba thil ya gathi kemus ni be fil ko girdi’ rogon ni ngar rin’ed e re n’ey ya ku be dag ni ireray reb e ban’en ni thingari rin’ e piin ni yad ra par u tan e re am nem. Be yog e Bible ni girdi’ nib “chogow” nge piin ni yad ma “lifithed l’ugunrad” e dabi yag e gin suwon Got ngorad.​—1 Korinth 6:9-11; Revelation 21:8.

Rayog ni nge fol e girdi’ ko pi motochiyel rok Got ney ni bod rogon e pi Kristiano kakrom. Bod nnap’an ni guy Simon nreb i gachalpen Jesus rogon ni nge pi’ boch e salpiy ngak fapi apostal ya ngan pi’ gelngin Got nib thothup ngak, ma aram me lungurad ngak: “Mpi keruum ko bin beer e pa’ nib kireb ni kam lemnag.” Ma nap’an ni ke guy Simon nra af riy’en e n’en ni ke lemnag nib kireb, ma aram me wenig ngak e pi apostal ni ngar yibilayed ni nge dabi buch ban’en nib kireb rok.​—Acts 8:18-24.

Demtrug be’ u kun nam, ma rayog ni nge mang bang ko Gil’ilungun Got. (Acts 10:34, 35) Fare skul ni be ognag Gil’ilungun Got ni bay u ga’ngin e fayleng e ngiyal’ ney e rayog ni dag ngom ko uw rogon. Pi Mich Rok Jehovah e yad ba felfelan’ ni ngar filed e Bible ko girdi’ ndariy puluwon, ma rayog ni ngan rin’ u lan ragag e minit u reb e wik. Maku rayog ni ngam fil fare “Thin Nib Fel’ ni murung’agen e gagiyeg rok Got,” nib muun ngay rogon nra chuweg ngongolen e sasalap ko am. (Luke 4:43) Gamad be pi’ e athamgil nga lanin’um ni ngam non ngak e Pi Mich Rok Jehovah ni bay ko binaw rom ara mman ko fare Web site ni jw.org.