Kab kakrom i yib ni ma athapeg e girdi’ ni nge dab ra pilibthirgad, ma kur pared nib fel’ fithik’ i dowrad ndariy n’umngin nap’an. Machane, rib gel e kireban’ riy ni bochan e: Gad ma yim’. Riyul’ ni ka be buch e n’en ni weliy Job murung’agen ko fare thin ni baaray u lang ni yugu aram rogon ni ke pag dalip biyu’ e duw ni ke yog e pi thin ney.

Gubin e girdi’ ni yad baadag ni ngar pared ndariy n’umngin nap’an. Be yog e Bible ni ke tay Got e manemus nga lanin’dad, ara ke taydad ni gad baadag ni ngad nanged e tin ni bay nga m’on ni bay fini yib. Ki taydad ni gad baadag ni ngad nanged rarogon e binem e par. (Eklesiastes 3:11) Ere, faanra aray rogon ni kan sunmiydad, me ere gur, ba puluw ni nge tay ba Got ni ma t’ufegey ban’en nga lanin’dad ndabiyog ni nge buch? Faanra ga be lemnag ndabiyog, mab puluw e n’en ni ga be lemnag. Be yog e Thin rok Got ni yam’ e toogor rodad ma ke micheg nra “gel” Got ko re toogor ney.​—1 Korinth 15:26.

Dariy e maruwar riy ni yam’ e toogor rodad. Ma dariy be’ nib tamilangan’ ni baadag ni nge yim’. Aram fan nnap’an ni gad ra mada’nag ban’en ni bay e riya’ riy, ma gad ma guy rogon ni ngad pilo’gad riy, ara da mithgad, ara da milgad riy. Nap’an ni gad ra m’ar, ma gad ma guy rogon ni ngad golgad. Gad ma athamgil u rogon nrayog rodad ni ngad siyeged boch ban’en nrayog ni ngad m’ad riy.

Ere gur, ba puluw ni nge mich u wan’dad nra chuw e re toogor rodad ney? Arrogon, ya de Sunmiy Jehovah Got e girdi’ ni ngar pired in e duw, ngemu’ mar m’ad. Gathi aram e n’en ni lemnag aram ko som’on. I sunmiy e girdi’ ni ngar pared ndariy n’umngin nap’an, ma gad manang ni ma lebguy e tin nib m’agan’ ngay.​—Isaiah 55:11.

Ere, uw rogon ni yira gel ko yam’? Kab kakrom i yib ni be guy e girdi’ rogon ni ngar pithiged e biney e magawon, machane der yag rorad. Ma ireray e n’en ni ka yibe guy rogon ni ngan rin’ e chiney. Boor e falay ni ke ngongliy e piin llowan’ ni be sagaalnag boch e m’ar. Maku yad be fal’eg i fil murung’agen rarogon e girdi’, nge gamanman, nge ku boch ban’en nib fos. Bay boch e nam nib n’uw nap’an e yafas ko girdi’ riy e chiney ko tin baaram e chibog ni ke yan. Machane, ku der yag ni nge par e girdi’ ndab ra m’ad. Ya bod rogon ni be yog e Bible ni be gaar, “bay ra sulod ngar ngal’gad ni fiyath.”​—Eklesiastes 3:20.

Machane, gad ba felfelan’ ni bochan e gad manang nde t’uf ni ngad taga’gad ko llowan’ ko girdi’ ni nge ayuwegdad ni ngad pithiged e biney e magawon ni ke n’uw nap’an. Ke mu’ Jehovah Got i rin’ boch ban’en nra ayuwegdad u rogon ni nge yag e yafas ngodad bayay ma gad chuw u pa’ e yam’. Ma ra rin’ Jehovah e re n’ey u daken Jesus Kristus.