1-3. Uw rogon ni gel e pagan’ ni i tay Paul ngak Jehovah? (Mu guy e sasing ni bay u tabolngin e re article ney.)

 NGIYAL’ nem e rib mo’maw’ e par ko pi Kristiano u Roma. Rib gel e gafgow ni un tay ngak e pi gachalpen Kristus u rom ni bochan e unog ni yad e ra urfiyed e re mach nem u nap’an e duw ni 64 C.E. mu ku nog ni yad ma fanenikay e girdi’. Faan gomanga gur reb e Kristiano ni um moy ko ngiyal’ nem, ma rayog ni ngan kolem ngan gafgownagem. Ku rayog ni immoy boch i walagem ni Kristiano ni un pi’rad ko gamanman nge li’rad ngar m’ad ara ni richibiyrad ko gek’iy min urfiyrad ni ka yad ba fos.

² Ku rayog ni aram e ngiyal’ ni gaman e l’agruw yay ngay nni kalbusnag apostal Paul u Roma. Ere gur, ra yib boch e Kristiano ra ayuweged? Dabisiy ni i magafan’ Paul ko re n’ey. Aram fan ni yol ngak Timothy ni gaar: “Dariy be’ ni ayuwegeg ko yay nsom’on ni gu ayuwegeg u tafen e pufthin; ya yad urngin nra paged gag. Mang e yigi runguyrad Got nge n’ag fan u wan’!” Yugu aram rogon ma de yog Paul ndariy bang ni yib e ayuw riy ngak. Ya yoloy ni gaar: “Machane Somol e par rog nge pi’ gelngig.” Arrogon, Jesus e ir e pi’ gelngin Paul. Ma uw feni ga’ fan e re ayuw nem ni pi’ ngak? Am tay fanam i yan ko n’en ni yog Paul ni gaar: “Somol  e ayuwegeg nda kug wan nga lan l’ugun e layon.”​—2 Tim. 4:16, 17. *

³ Pi n’em ni i lemnag Paul e dabisiy ni pi’ gelngin me ayuweg ni nge pagan’ nra pi’ Jehovah gelngin ni nge athamgil u fithik’ e pi skeng ni be mada’nag nge tin bay fini mada’nag boch nga m’on. Bin riyul’ riy e, yog ni gaar: “Somol e bayi chuwegeg u fithik’ urngin e gafgow.” (2 Tim. 4:18) Arrogon, ke nang Paul ni mus ni faanra dabiyog rok pi walagen ni ngar ayuweged, machane rayog ni nge pagan’ ngak Jehovah nge Fak ni bochan e manang ni yow ra ayuweg!

4, 5. (a) Mini’ e rayog ni nge ayuwegem ni gubin ngiyal’? (b) Uw rogon ni ngari gel e chugur u thilmew Jehovah?

⁴ Bay yu ngiyal’ ni kam mada’nag boch e magawon ma ga lemnag ndariy be’ ni nge ayuwegem, fa? Sana kan talegem ko maruwel rom, ara ga be mada’nag boch e magawon u skul, ara kam m’ar, ara kam mada’nag boch e magawon nib mo’maw’. Sana bay boch e girdi’ ni kam ning e ayuw ngorad, machane de yag ni ngar ayuweged gur. Riyul’ ni bay boch e magawon ndabiyog ko girdi’ ni ngar pithiged. Ere, mang e rayog ni ngam rin’? Be yog e Bible ngodad ni nge ‘pagan’dad’ ngak Jehovah. (Prov. 3:5, 6) Gur, ba m’ay fan e re thin ney? Danga’, ya rriyul’ ni ma ayuweg Got e pi tapigpig rok, ma rayog ni ngad beeged murung’agen boch e girdi’ u lan e Bible ni be dag nriyul’ e re n’ey.

⁵ Ere, faanra der ayuwegdad be’ u nap’an ni ke yib e magawon ngodad, ma dab da damumuwgad ngak. Ya ngad lemgad ni bod apostal Paul ni i pagan’ ngak Jehovah me guy rogon ni ke ayuweg. Faan gad ra rin’ ni aray rogon, ma aram e rayog ni ngari gel e pagan’ rodad ngak, miki gel e chugur u thildad.

6. Mang fan nib mo’maw’ ni nge pagan’dad ngak Jehovah u nap’an ni kad mada’naged reb e magawon nib ga’?

⁶ Sana kam mada’nag reb e magawon nib ga’, ni kari kireban’um ngay. Kam rin’ urngin ban’en nrayog ni ngam rin’, ma kam meybil ngak Jehovah ni nge ayuwegem. Ere gur, rayog ni nge gapas lanin’um u tomuren ni kam meybil ni bochan e be pagan’um ngak nra ayuwegem? Rayog! (Mu beeg e Psalm 62:8; 1 Peter 5:7.) Ma rib ga’ fan ni ngam fil rogon ni ngam rin’ e re n’ey ni bochan e rayog ni nge ayuwegem ni ngari chugur e tha’ u thilmew Jehovah. Machane, bay yu ngiyal’ nib mo’maw’ ni nge pagan’dad nra pi’ Jehovah e tin nib t’uf rodad ko ngiyal’ ni ke t’uf e ayuw rodad riy. Mang fan? Reb i fan e bochan ni gathi gubin ngiyal’ ni gad ra meybil me fulweg Jehovah taban ni ka ngiyal’ nem.​—Ps. 13:1, 2; 74:10; 89:46; 90:13; Hab. 1:2.

7. Mang fan ni gathi gubin ngiyal’ ni gad ra meybil ngak Jehovah me fulweg taban ni ka ngiyal’ nem?

⁷ Mang fan ni gathi gubin ngiyal’ ni gad ra meybil ngak Jehovah me fulweg taban ni ka ngiyal’ nem? Dab mu pagtalin ni ke taarebrogonnag Jehovah e tha’ u thildad ko tha’ u thilin bochi tir nge chitamangin. (Ps. 103:13) Gathi gubin ban’en nra ning fare tir ara yog ma ra pi’ fare matam ngak ara rin’ ni ka chingiyal’ nem. Ya bay boch ban’en ni ma ning fare tir ni manang fare matam ni gathi rib ga’ fan. Maku bay yu ngiyal’ nthingari son nge taw ko ngiyal’ nib fel’ ni nge pi’ ara nge rin’ fare n’em mfini rin’ fapi n’em ni be yog fare tir. Maku reb e, bay boch ban’en nra ning fare tir ara yog ni ngan rin’ nib kireb ngak ara ra kireb ngak boch e girdi’. Machane, faanra yigi ning fare tir ban’en ara yog ni nge rin’ e chitamangin ban’en, me rin’ ni ka chingiyal’ nem, ma ra yan i aw ni fare tir e ir e be yog e n’en ni nge rin’ e chitamangin. Ere, ku arrogon Jehovah ni bay yu ngiyal’ ni gad ra ning ban’en ngak u daken e meybil ma ma pag ba ngiyal’ ni nge yan ma aram mfini fulweg taban e meybil rodad. Ma bochan ni ir e ke Sunmiydad mab gonop, ma ir e Masta rodad nge Chitamangidad ni bay u tharmiy, ma aram fan ni manang e n’en nib t’uf rodad nge ngiyal’ ni nge pi’ riy. Faanra nga yugu da ninged ban’en ngak me pi’ ni ka chingiyal’ nem, ma rayog ni nge magawonnag e tha’  u thildad.​—Mu taarebrogonnag ko Isaiah 29:16; 45:9.

8. Mang e ke micheg Jehovah u murung’agen e pi magawon ni ma yib ngodad ni gad ma athamgil u fithik’?

⁸ Maku reb e, manang Jehovah e tin ndabiyog rodad. (Ps. 103:14) Ere, aram fan nder ma lemnag ni ngad athamgilgad u fithik’ e pi magawon rodad ni yigoo gadad, ya ma ayuwegdad. Riyul’ ni bay yu ngiyal’ ni gad ma lemnag ndabkiyog ni ngad athamgilgad u fithik’ e pi magawon rodad. Machane, ke micheg Jehovah ngodad ndabi pag e pi tapigpig rok ni nge yib e magawon ngorad nge pag rogon ndabkiyog ni ngar athamgilgad u fithik’, ya ra ‘pi’ e kanawo’ ngorad ni ngar bad riy nga wuru’ e pi n’em.’ (Mu beeg e 1 Korinth 10:13.) Ere, aram fan nrayog ni nge pagan’dad ni manang Jehovah urngin e tin nrayog ni ngad athamgilgad u fithik’.

9. Mang e susun ni ngad rin’ed ni faanra kad meybilgad ma de fulweg Jehovah taban ni ka ngiyal’ nem?

⁹ Faanra kad meybilgad ma dawori fulweg Jehovah taban, ma ngad gum’an’niged gadad ngad sonnaged e En ni ir e manang e ngiyal’ nib puluw ni nge ayuwegdad riy. Dab mu pagtalin ni ku arrogon ir ni be gum’an’, ma be sonnag e ngiyal’ nib puluw ni nge ayuwegdad riy. Be gaar e Bible: “Somol e be sonnagmed ni ngam sulod ngak me ayuwegmed. Ba adag ni nge runguymed, ya gubin ngiyal’ ni ma rin’ e tin nib mat’aw. Ba felfelan’ e piin ni ke pagan’rad ngak Somol.”​—Isa. 30:18.

10-12. (a) Uw rogon nrayog ni nge mo’maw’ ngak reb e Kristiano ni nge ayuweg be’ u tabinaw rok ni ke m’ar? (b) Faanra pagan’um ngak Jehovah u nap’an ni kam mada’nag reb e magawon nrib ga’, ma uw rogon nrayog ni nge ayuweg e tha’ u thilmew? Mu weliy e n’en ni ke buch rok be’.

¹⁰ Nap’an ni ga ra mada’nag reb e magawon nrib ga’, ma rayog ni ngam lemnag ni gowa ga bay u “lan l’ugun e layon” ni bod rogon ni lemnag Paul. Ireray e ngiyal’ nra mo’maw’ ngom ni nge pagan’um ngak Jehovah. Machane, rib ga’ fan ni ngam rin’ e re n’ey. Bod ni, sana ga be ayuweg reb i chon e tabinaw rom ni ke m’ar, ma sana ga be meybil ngak Jehovah ni nge pi’ e gonop ngom miki pi’ gelngim. * Tomuren ni kam rin’ e tin nrayog rom, ma gathi ga ra thamiy ni ke gapas lanin’um ni bochan e ga manang ni be guyem Jehovah ma ra pi’ e n’en nib t’uf ni nge ayuwegem ni ngam athamgil u fithik’ e re magawon nem ma ga par ni gab yul’yul’ ngak?​—Ps. 32:8.

¹¹ Sana ga ra lemnag nder ayuwegem Jehovah. Ya sana yug ra reb e togta ma rogon e n’en ni be yog. Fa reb e rayog ni ga be taga’ ko girdi’ u tabinaw rom ni yad e ngar ayuweged gur, machane bin riyul’ riy e yad e yad be gelnag e magawon ngom. Ere, gubin ngiyal’ ni nga i pagan’um ngak Jehovah nra pi’ gelngim. Mag guy rogon ni nga i chugur e tha’ u thilmew i yan. (Mu beeg e 1 Samuel 30:3, 6.) Ma ra yan i boch nga tomuren ni kam guy rogon ni ke ayuwegem Jehovah, ma aram e ra gel e chugur ko tha’ u thilmew.

¹² Aray rogon e lem rok be’ ni ka nog Linda * ngak. U m’on ni nge yim’ e gallabthir rok, ma boor e duw ni i pigpig ngorow u nap’an ni kar m’argow. I yog ni gaar: “Re ngiyal’ i n’em e da kug nanged e pumoon rog nge be’ nib pumoon ni walageg e n’en ni nggu rin’ed. Immoy yu ngiyal’ ni ug lemnaged ndabkiyog ni nggu pithiged e binem e magawon. Machane, faan gamad ra sul nggu lemnaged e n’en ni buch romad, ma gamad be guy riy gelngin e ayuw ni i pi’ Jehovah ngomad. I pi’ gelngimad ma i ayuwegmad ko tin nib t’uf romad. Ki mada’ nga yu ngiyal’ nda kug nanged e n’en ni nggu rin’ed, ma bay ni nge ayuwegmad.”

13. Bochan ni i pagan’ reb e walag nib pin ngak Jehovah, ma uw rogon ni ayuweg e re n’ey ni nge athamgil u nap’an ni mada’nag boch e magawon nib tomgin?

¹³ Faanra pagan’um ngak Jehovah u polo’ i gum’irchaem,  maku rayog ni nge ayuwegem u nap’an ni ke sum reb e magawon nib tomgin. Nap’an ni be fal’eg e pumoon rok reb e walag ni ka nog Rhonda ngak e babyor rorow ni ngar dargow, ma aram min pirieg ni bay ba mit e m’ar nrib ubchiya’ rok be’ nib pumoon ni walagen ni ka nog e lupus ngay. In e pul nga tomuren, me yim’ e ppin ko re pumoon ni walagen nem. Nap’an ni guy Rhonda ni ke yag ni nge athamgil u fithik’ e pi magawon rok nem, ma aram me tabab ni nge un ko pioneer. Ma de n’uw nap’an nga tomuren, me yim’ e chitiningin. Ere, mang e ayuweg Rhonda ni nge athamgil u fithik’ e pi magawon ney? I yog ni gaar: “Gubin e rran ni gu ma non ngak Jehovah, ma ki mada’ nga boch ban’en ni gu ma dugliy ni gathi rib ga’ fan ni gu ma weliy murung’agen ngak. Re n’ey ni ug rin’ e ayuwegeg ni ngari riyul’ Jehovah u wan’ug. Kug fil riy rogon ni nggu taga’ ngak ko bin ni nggu taga’ ngog ara boch e girdi’. Ma rriyul’ ni ayuwegeg, ya pi’ urngin e tin nib t’uf rog. Ma angin ni yib riy e, kug guy ni gamow be maruwel Jehovah u taabang.”

14. Uw rogon nrayog ni nge ayuwegem Jehovah ni faanra bay reb e girdi’ u tabinaw rom ni kan tharbog ko ulung?

¹⁴ A kum lemnag reb e magawon nrayog ni nge sum. Susun e kan tharbog reb e girdi’ u tabinaw rom ko ulung. Ma ga manang e n’en ni be yog e Bible u murung’agen e piin ni kan tharbograd ko ulung. (1 Kor. 5:11; 2 John 10) Machane, bochan nrib t’uf facha’ rom, ma rayog ni ngam lemnag nrib mo’maw’ ara dabiyog ni ngam fol ko n’en ni be yog e Bible. * Machane, ra pagan’um nra pi’ Jehovah gelngim ya nge yag nim fol ko n’en ni be yog e Bible u murung’agen e piin ni kan tharbograd, fa? Ga ra lemnag ni ireray reb e kanawo’ nrayog ni ngam chugur riy ngak Jehovah, fa?

15. Mang fan nde fol Adam ko fare motochiyel ni pi’ Jehovah ngak u Eden?

¹⁵ Am lemnag e n’en ni buch rok Adam. Ga be lemnag ni i lemnag ni faanra dabi fol rok Jehovah  ma dabi yim’? Danga’, ya be yog e Bible ni “gathi Adam e ni bannag.” (1 Tim. 2:14) Ere, mang fan nde fol? Dabisiy ni kay Adam wom’engin fare ke gek’iy ni pi’ Efa ngak ni bochan e kab gel e t’ufeg rok ngak leengin ko t’ufeg rok ngak Jehovah. Ere, motoyil ngak Efa ma de motoyil ngak Jehovah ni Got rok.​—Gen. 3:6, 17.

16. Mini’ e thingari t’uf rodad, ma mang fan?

¹⁶ Ere gur, re n’ey e be yip’ fan ndab da t’ufeged girdien e tabinaw rodad? Danga’! Machane, be yip’ fan nthingari gel feni t’uf Jehovah rodad nga rogon nib t’uf boch e girdi’ rodad. (Mu beeg e Matthew 22:37, 38.) Ma faanra rib t’uf Jehovah rodad, maku rayog ni ngad ayuweged girdien e tabinaw rodad ndemtrug ko yad be pigpig ngak Jehovah fa danga’. Ere, um gelnag e t’ufeg rom ngak Jehovah mi i pagan’um ngak. Ma faanra be magafan’um ni bochan e bay reb i girdien e tabinaw rom ni kan tharbog ko ulung, mag weliy lanin’um ngak Jehovah u daken e meybil. * (Rom. 12:12; Fil. 4:6, 7) Mu fanay e re n’ey ni nge ayuweg e tha’ u thilmew Jehovah ni ngari chugur. Ya faan ga ra rin’ ni aray rogon, ma aram e rayog ni nge pagan’um ngak, ma ga ra nang ni faan ga ra fol rok ma rayog ni nge yib angin ngom.

17. Uw rogon nra m’ug ni be pagan’dad ngak Jehovah ni faan gad ra tedan’dad ko fare maruwel ni machib?

¹⁷ Mang fan ni ayuweg Jehovah Paul ‘nda ki yan nga lan l’ugun e layon’? I yog ni gaar: “Nge yog ni gu weliy urngin e thin rok Got nge rung’ag urngin e piin ni gathi yad yu Israel.” (2 Tim. 4:17) Faan gad ra folwok rok Paul ngad tedan’dad ko fare maruwel ni machib, ma gad manang nra ‘pi’’ Jehovah urngin e tin nib t’uf rodad. (Matt. 6:33) Bochan ni gad boch e tamachib ni gad ma machibnag murung’agen Gil’ilungun Got, ma aram fan ni ke pag Got fan e ‘thin rok ngodad’ ni ngad machibnaged, maku aram fan ni ma taydad Jehovah ni gad be ‘maruwel rok u taabang.’ (1 Thess. 2:4; 1 Kor. 3:9) Faan gad ra rin’ e maruwel rok Got ni gad ba pasig, ma ra mom ngodad ni ngad sonnaged e ngiyal’ nra ayuwegdad riy.

18. Mang boch e kanawo’ nrayog ni nge pagan’dad ngak Jehovah riy me gel e tha’ u thildad?

¹⁸ Ere, ngad guyed rogon ni nga i gel e chugur ko tha’ u thildad Got ni gubin e rran. Faanra kad mada’naged reb e magawon ni ke magafan’dad ngay, ma gad guy rogon ni ngar da chugurgad ngak Jehovah. Faanra ud fal’eged i fil e Thin rok Got, ma gad be meybil ni gubin ngiyal’, ma gad be fanay e tayim rodad ni fan ko tirok Got ban’en, ma rayog ni nge pagan’dad nra ayuwegdad Jehovah ko pi magawon ni gad ma mada’nag e ngiyal’ ney nge tin ni bay ud mada’naged boch nga m’on.