I YOG Julian ni gaar: “Nap’an nnog ni kan tharbog reb e pagel ni fakag, mug thamiy ni gowa dakuriy fan e yafas rog. Ir e bin th’abi ilal e bitir ni fakag, ma ri gamow ba chugur; maku boor ban’en ni gamow ma rin’ u taabang. Re tir rog nem e rib fel’ e ngongol rok, machane rib pay ni thil nge ngongol u reb e kanawo’ nde mat’aw. Gubin ngiyal’ nra i par e ppin rog ma be yor, ma da kug nang rogon ni nggu fal’eg laniyan’. Ug lemnagew ni sana gomanga bay ban’en nde yag ni nggu ayuwegew riy ni gamow e gallabthir rok.”

Faanra rib gel e kireban’ ni yima tay u nap’an ni yira tharbog reb e Kristiano, me ere mang fan ni yibe yog ni ireray reb e yaram ni bay e t’ufeg riy? Mang fan ni be yog e Bible nthingar ni rin’ e re n’ey? Ma mang e ra rin’ be’ min tharbog ko ulung?

L’agruw ban’en ni yima tharbog reb e Pi Mich Rok Jehovah riy. Bin som’on e, ke rin’ reb e denen nib ubchiya’. Ma bin l’agruw e, de kalngan’ ko fare denen ni ke rin’.

Yugu aram rogon ni manang Jehovah ndawor da flontgad, machane bay e motochiyel rok u murung’agen rogon ni ngaun par ni yib machalbog ni baadag ni nga i fol e pi tapigpig rok riy. Bod rogon ni, ke yog ndabiyog ni ngad rin’ed boch e denen nib ubchiya’ ni bod rogon e ngongol ndarngal, meybil ko liyos, moro’ro’, cham, ngan li’ be’ ngem’, nge ngongolen e pig.​—1 Kor. 6:9, 10; Rev. 21:8.

Gathi riyul’ nib puluw e pi motochiyel rok Jehovah ma ra ayuwegdad? Mini’ e arodad ndabun ni nga i par u fithik’ boch e girdi’ ni yad ba gapas ma rayog ni nge pagan’uy ngorad? Aray rogon pi walagdad u lan e ulung, ma ri gad ba felfelan’ ni bochan e nap’an nda ognaged e yafas rodad ngak Got ma gad micheg ngak ni gad ra fol ko pi motochiyel ni bay ko Thin rok.

Machane, uw rogon ni faanra ke rin’ reb e Kristiano ni kan taufenag reb e denen nib ubchiya’ ni bochan ndawori flont? Immoy boch e tapigpig rok Jehovah kakrom ni yad ba yul’yul’ ni ur olobochgad, machane de digeyrad Got. Bagayad e pi girdi’ nem e aram David ni Pilung. I par David nge be’ ni gathi mabgol rok, miki li’ be’ ngem’ ndariy ban’en ni ke bucheg. Machane, me yog Nathan ni profet ngak ni gaar: “I Somol e ke n’ag fan e denen rom.”​—2 Sam. 12:13.

I n’ag Got fan e denen rok David ni bochan e riyul’ ni ke kalngan’. (Ps. 32:1-5) Ere, ku arrogon e ngiyal’ ney nrayog ni ngan tharbog reb e tapigpig rok Jehovah ni faanra dabi kalngan’ ko kireb rok ara ka be ulul nga i rin’ boch e ngongol nib kireb. (Acts 3:19; 26:20) Faanra guy e piin piilal ndawori kalngan’ facha’, ma aram e thingar ni tharbog ko ulung.

Som’on e sana rayog ni ngad lemnaged ni kaygi pag rogon e n’en ni kan rin’ ngak facha’ ni kan tharbog ara dan dag e sumunguy ngak. Mab mom ni ngad lemgad ni aray rogon ni faanra ba chugur thildad facha’. Machane, be tamilangnag e Thin rok Jehovah ni bay fan ni ngad lemnaged nre yaram ney ni yima rin’ e riyul’ ni bay e t’ufeg riy.

I tamilangnag Jesus ni “gonop rok Got e [ma] m’ug nib riyul’ ko tin kan guy ni ke yib riy.” (Matt. 11:19) Nap’an ni yira tharbog be’ nde kalngan’ ko kireb rok, ma ma yib angin nib fel’. Baaray dalip i fan:

Yira tharbog e piin ndar kalgadngan’rad ko kireb rorad, ma aram e yibe n’uf fithingan Jehovah. Bochan ni gad ma fek fithingan Jehovah, ma aram fan ni bay rogon e ngongol rodad ko ngachal rok ni gad ma fek. (Isa. 43:10) Ngongol rok reb e bitir e ir e ra fal’eg ara kirebnag thin e gallabthir rok. Ere, ku arrogon ni ngongol ni ma dag e pi tapigpig rok Jehovah e rayog ni nge k’aring e girdi’ ni ngar ted fan Jehovah fa ra darifannaged. Rayog ni nge m’ug ni yibe tayfan fithingan Got ni faanra i fol e piin ni yad be fek e re ngachal nem ko pi motochiyel rok. Re n’ey e taareb rogon ko fa ngiyal’ nem u nap’an Ezekiel nib ga’ ni ma yog e girdi’ ko pi nam ni pi Jew e aram e re nam ni yad ma fek fithingan Jehovah.​—Ezek. 36:19-23.

Faan gad ra rin’ boch e ngongol nib kireb, ma aram e gad be darifannag fithingan Got nib thothup. I fonownag apostal Paul e pi Kristiano ni gaar: “Um folgad rok Got, ma tin nib kireb ni um m’ad ni bochan ko ngiyal’ ndawor mu nanged Kristus riy e dab kum paged nge mang ir e gagiyegnag pangimed. Machane ngam pired ni gimed ba thothup u fithik’ urngin e tin ni gimed be rin’, ni bod rogon Got nib thothup ni ir e ke piningmed. Ya be gaar e babyor nib thothup, ‘Thingar mpired ni gimed ba thothup, ya gub thothup.’” (1 Pet. 1:14-16) Ere, faanra bbeech e ngongol rodad ma aram e gad be pining e sorok nga fithingan Got.

Machane, faanra i rin’ reb e Pi Mich Rok Jehovah ban’en nib kireb, ma ra munmun ma ra nang e pi fager rok ara yugu boch e girdi’. Ere, fare yaram ni ngan tharbog be’ ko ulung e be dag nib beech e pi tapigpig rok Jehovah ma yad ma fol ko pi motochiyel rok u lan e Bible ni be yog ni nga i par e pi tapigpig rok ni yad ba thothup. Ba’ bayay ni yib be’ nga reb e muulung nni tay ko Kingdom Hall u Switzerland me yog ni baadag ni nge mang reb i girdien e ulung u rom. Ma re pumoon nem e kan tharbog be’ nib pin ni walagen ni bochan e ke un ko ngongol ndarngal. I yog ni baadag ni nge un nga reb e ulung “ndarur paged e ngongol nib kireb” ni nga i par u lan e ulung rorad.

Yira tharbog be’ ko ulung, ma rayog ni nge ayuweg e ulung ni Kristiano ni nga i par nib beech. I yog apostal Paul ngak e pi Kristiano u Korinth ndab ra paged e piin ni yad ma ngongliy boch e denen nib ubchiya’ ni ngar pared u lan e ulung. I taarebrogonnag e ngongol nib kireb ni ma rin’ e pi girdi’ nem ko is ni ma thownag e flowa. I yog ni gaar: “Ri buchuuw e is me thownag ba flowa ni polo’.” Miki gaar: “Mu chuweged e en nib kireb ngongolen u lan e ulung romed.”​—1 Kor. 5:6, 11-13.

Facha’ “nib kireb ngongolen” ni weliy Paul murung’agen e rib gel e kireb ko ngongol ni i rin’. Ma bay boch e girdi’ u lan e ulung ni kar tababgad ni nga rogned nde kireb e n’en ni be rin’ e cha’nem. (1 Kor. 5:1, 2) Faan gomanga dan rin’ ban’en ko binem e denen ni i rin’ e cha’nem u lan e ulung, ma rayog ni ngki adag boch e Kristiano ni ngar folwokgad ko ngongol nib kireb ni un rin’ ko re mach nem ni ur pared riy. Faan yira fek owchey u boch e denen ni yibe rin’ ma ra munmun ma ra m’ay fan e pi motochiyel rok Got u wan’ e girdi’ u lan e ulung. (Ekl. 8:11) Maku reb e, piin ni yad be rin’ e kireb ndarur kalgadngan’rad e rayog ni ngar boded e “malang u fithik’ e day ndabiyog ni ngan guy” nrayog ni nge ser e barkow ngay. Re n’ey e be yip’ fan nrayog ni ngar kirebnaged e michan’ rok boch e girdi’ u lan e ulung.​—Jude 4, 12, NW.

Yira tharbog be’ ko ulung ma rayog ni nge ayuweg facha’ ni nge nang ni ke oloboch me kalngan’. Immoy bayay ni weliy Jesus murung’agen be’ nib pagel ni fek e birok e f’oth ko pi n’en ni bay ko chitamangin me yan nge digey e tabinaw rok nge yan i par nga bangi ban’en nib mal’af ngi i adbey e salpiy rok ko ngongol nib kireb. Tomur riy me nang fare pagel ni binem e par ni ke nameg e ba m’ay fan mab gel e kireban’ riy. Ki tamilangan’ fare pagel ko kireb rok, ma aram me kalngan’, me dugliy ni nge sul nga tafen. (Luke 15:11-24) Rogon e chitamangin fare pagel ni faani weliy Jesus murung’agen nge rogon gelngin e felfelan’ ni tay u nap’an ni nang ni ke sulan’ fare pagel e be ayuwegdad ni ngad nanged rogon laniyan’ Jehovah. Ke yog ni gaar: “Da gu adag ni ngug guy reb e tadenen ni nge yim’. Ku gub adag ni ngug guy ni ke tal ndakir denen nge par nib fos.”​—Ezek. 33:11.

Ku arrogon e piin ni kan tharbograd ko ulung ni Kristiano nrayog ni ngar nanged ni kar olobochgad, mu kur nanged ni ke mul ban’en nrib ga’ fan u pa’rad. Nap’an ni yad ra lemnag wenegan e denen rorad nge felfelan’ ni ur ted ko ngiyal’ ni baaram ni kab fel’ e tha’ u thilrad Jehovah nge pi tapigpig rok, ma rayog ni nge k’aringrad ni nge sulan’rad ko tin riyul’.

 Ba t’uf ni ngan dag e t’ufeg min par ni yib mudugil ya nge yag ni yib angin nib fel’. Be gaar e Bible: “Somol e ma gechignag e en nib t’uf rok, ma ma toy e en ni ke ta’ ni fak.” (Heb. 12:6) Susun e bay be’ ni be abich me mit nga bangi thum’ag ndabkiyog ni nge pogofan nib fel’ rogon, ma ke m’ay gelngin. Maku dabkiyog ni nge non. Ere, faanra dabi ayuweg be’ ni ka ngiyal’ nem, ma ra yim’. Ma aram me yib be’ i toy pa’ nga daken keru’ nib gel ni bochan e nge mul fagi thum’ag ni ke mit ngay. Dabisiy nra amith keru’, machane re n’em ni kan rin’ ngak e ra ayuweg ndabi yim’. Ere, ku arrogon ni yugu aram rogon ndabun be’ ni ngan yal’uweg, machane thingar ni rin’ ni bochan e yibe ayuweg.

Yu ngiyal’ e faan yira tharbog be’ ma aram rogon nib t’uf ni ngan yal’uweg ya nge yag ni nge sulan’. Fare pagel ni fak Julian ni faan kad weliyed murung’agen e ragag e duw nga tomuren ni kan tharbog, ma aram me thilyeg e ngongol rok, me sul bayay ko ulung, ma chiney e ir reb e piilal. I yog ni gaar: “Bochan nni tharbogeg ko ulung ma aram e n’en ni ayuwegeg ni nggu fal’eg i lemnag wenegan e binem e par ni kug mel’eg. Kug guy ni aram e n’en nib t’uf ni ngan rin’ ngog.”​—Heb. 12:7-11.

Riyul’ nrib gel e kireban’ riy ni ngan tharbog be’ ko ulung, machane de t’uf ni ngad paged e re n’ey ni nge mang reb e magawon ngodad. Ya gad gubin nib t’uf ni ngad guyed rogon ni nge yib angin e biney e yaram ni kan fal’eg u lan e ulung.

Piin piilal e aram e piin ni kan pi’ e biney e maruwel ngorad ni ngar tharboged e piin ndar kalgadngan’rad. Ere, ba t’uf ni ngar athamgilgad ngar folwokgad rok Jehovah, mar daged e t’ufeg u nap’an ni yad be rin’ e re n’ey. Nap’an ni yad ra yog ngak be’ e n’en ni kar dugliyed ni ngan rin’, ma thingar ra weliyed ngak u fithik’ e sumunguy e pi n’en nib t’uf ni nge rin’ ya nge yag ni ngkun sulweg ko ulung bayay. Ku rayog ni ngki yan e piin piilal ra guyed e piin ni kan tharbograd ni yad be dag ni yad baadag ni ngkur sulod ko ulung, ngar pugeduran ngorad rogon nrayog ni ngkur sulod ngak Jehovah bayay. *

Ku arrogon chon e tabinaw nrayog ni ngar daged nib t’uf e ulung nge facha’ rorad ni faan yad ra tayfan e pi yaram ni kan fal’eg ni fan ko piin ni kan tharbograd. I weliy Julian ni gaar: “Ka ir fakag, machane daki chugur thilmow ni bochan e n’en ni ke mel’eg ni nge rin’.”

Gubin e girdi’ u lan e ulung ni ku rayog ni ngar daged e re t’ufeg ney ni aram e dab kur nonad ngak facha’ ni kan tharbog. (1 Kor. 5:11; 2 John 10, 11) Faan yad ra rin’ ni aray rogon, ma aram e yad be tay tanggin e gechig ni ke tay Jehovah ngak facha’ u daken e piin piilal. Maku reb e, rayog ni ngar daged e t’ufeg ngak chon e tabinaw rok facha’ mar ayuweged yad, ya rib gel e gafgow ni ke tay lanin’rad. Maku reb e, susun ndab ra rin’ed boch ban’en nra k’aring chon e tabinaw rok facha’ ni ngar lemnaged ndakir chagil e girdi’ u lan e ulung ngorad ni bochan e n’en ni ke rin’ facha’.​—Rom. 12:13, 15.

I yog Julian ni gaar: “Re n’em ni yima tharbog e girdi’ ko ulung e ba yaram nib t’uf ni ngaud folgad riy, ya ra ayuwegdad ni ngaud ngongolgad nrogon nib puluw ko pi motochiyel rok Jehovah. Yugu aram rogon nrib gel e kireban’ ni yima tay riy, machane ra yib angin ko tomur. Faan gomanga ug dag ngak fakag nde kireb u wan’ug e ngongol ni i rin’, ma sana dabi kalngan’.”