1. Mang fan nib t’uf ni nge par e tha’ u thildad Jehovah nib gel?

 GUR reb e Pi Mich Rok Jehovah ni kam ognag e yafas rom ngak Got, ma kam un ko taufe? Faanra gur bagayad, ma bay reb e tow’ath rom nrib manigil. Re tow’ath nem e aram e tha’ u thilmew Got. Machane, gubin ngiyal’ ni be guy e re fayleng rok Satan ney rogon ni nge kirebnag thilmew Got. Maku reb e ku dawor da flontgad. Ma gubin e Kristiano ni ma buch e re n’ey rorad. Ere, aram fan nthingar da guyed rogon ni nga i par e tha’ u thildad Jehovah nib gel.

2. (a) Mang fan fare bugithin ni tha’? (Mu guy e footnote.) (b) Uw rogon ni ngari gel e chugur ko tha’ u thildad Jehovah?

² Uw feni chugur e tha’ u thilmew Jehovah? Ga baadag ni ngari gel boch e chugur ko tha’ u thilmew, fa? Be yog e James 4:8 rogon nrayog ni ngam rin’ e re n’ey, ni aram e: ‘Mu chugur ngak Got, me chugur ngom.’ Mu tay fanam i yan riy ni tha’ u thilmew Jehovah e gimew l’agruw ngay. * Faan ga ra guy rogon ni ngam chugur ngak Jehovah, ma ra chugur ngom. Ma faanra um rin’ e re n’ey, ma aram e rayog ni  ngari gel e chugur ko tha’ u thilmew. Angin nra yib riy e ra riyul’ Jehovah u wan’um, me pagan’um ni bod rogon Jesus ni faani gaar: “En ni ke l’ugeg ku gub e ba riyul’ . . . gag e gu manang ir.” (John 7:28, 29) Ere, mang boch ban’en nrayog ni ngam rin’ ya nge yag ni ngari chugur e tha’ u thilmew Jehovah?

3. Uw rogon ni gad ma non Jehovah?

³ Faanra ngarim chugur ngak Jehovah, ma thingar mu guy rogon ni ngari fel’ e numon u thilmew. Uw rogon ni gimew ma non Got? Am lemnag rogon ni gimew ma non reb e fager rom ni ma par u bang nib palog. Dabisiy ni gimew ma yol ngomew, ma gimew ma non u telefon ni gubin ngiyal’. Ere, ga ma non ngak Jehovah ni gubin ngiyal’ u daken e meybil. (Mu beeg e Psalm 142:2.) Ma Jehovah e ma non ngom u daken e Thin rok ni kan yoloy nga Bible ni ga ma beeg ni gubin ngiyal’ mag fal’eg i lemnag. (Mu beeg e Isaiah 30:20, 21.) Ere, chiney e ngad weliyed rogon nrayog ni nge ayuwegdad e meybil nge fol Bible ni ngari gel e chugur ko tha’ u thildad Jehovah, mi ri riyul’ u wan’dad.

4, 5. Uw rogon ni ma non Jehovah ngom u daken e fol Bible ni ga ma tay? Mu weliy reb e kanawo’ ni ma rin’ e re n’ey riy.

⁴ Dariy e maruwar riy nib mich u wan’um ni Bible e aram e gin ni bay e thin rok Got riy ni fan ngak urngin e girdi’. Machane gur, be weliy e Bible rogon nrayog ni ngam chugur ngak Jehovah? Arrogon, be weliy. Ni uw rogon? Nap’an ni ga ra beeg ma ga be fil e Bible u gubin e rran, ma ngam fal’eg i lemnag rogon fapi thin u wan’um nge rogon nrayog ni ngam fol ko n’en ni ga be beeg riy. Faan ga ra rin’ ni aray rogon ma aram e ga be pag Jehovah ni nge non ngom u daken e Thin rok. Re n’ey e ra ayuwegem ni ngarim chugur ngak.​—Heb. 4:12; Jas. 1:23-25.

⁵ Am beeg ma ga fal’eg i lemnag fapi thin ni yog Jesus ni faani gaar, “dab mu ulunguyed e flaab u roy u fayleng.” Nap’an ni ga ra beeg e pi thin ney ma faanra ga manang ni ga be m’oneg e tirok Got ban’en u lan e yafas rom, ma aram e ga ra nang ni be felfelan’ Jehovah ngom. Machane, faan ga ra beeg e pi thin ney ma ga manang nib t’uf ni ngam momnag rogon e par rom ya nge yag nim m’oneg e tirok Got ban’en, ma aram e kam nang ni be puguran Jehovah boch ban’en ngom nib t’uf ni ngam maruweliy ya nge yag ni ngarim chugur ngak.​—Matt. 6:19, 20.

6, 7. (a) Uw rogon nra ayuwegdad e fol Bible ni gad ma tay ni ngari t’uf Jehovah rodad, mu kud t’ufgad rok? (b) Mang e ngad nameged u nap’an ni gad be fil e Bible rodad?

⁶ Nap’an ni ga ra fil e Bible ma gathi kemus nra ayuwegem ni ngam nang boch ban’en nib t’uf ni ngam mon’og riy. Ya thin nu Bible e ku ma  ayuwegdad ni ngari ga’ fan u wan’dad e pi n’en ni ma rin’ Jehovah, me yag ni ngari gel feni t’uf rodad. Ma faanra gel feni t’uf Got rodad, ma aram e ku ra i t’ufegdad, me yag ni ngari gel e chugur ko tha’ u thildad.​—Mu beeg e 1 Korinth 8:3.

⁷ Machane, faanra ngar da chugurgad ngak Jehovah, ma thingari puluw fan ni ngaud filed e thin rok u Bible. Be gaar e John 17:3: “Baara’ ira’ e yafos ndariy n’umngin nap’an: ni aram e nge nangem e girdi’ ni kari mmus ni gur e bin riyul’ e Got, mi yad nang ko mini’ Jesus Kristus, ni ir e kam l’og ke yib.” Ere, n’en ni ngad nameged e gathi kemus ni ngad filed murung’agen Got, ya thingar kud ‘nanged’ rarogon nib fel’ rogon mi ri riyul’ u wan’dad.​—Mu beeg e Exodus 33:13; Ps. 25:4.

8. (a) Mang e rayog ni nge lemnag boch e girdi’ ko n’en ni rin’ Jehovah ngak Azariah ni Pilung ni bay murung’agen ko 2 Kings 15:1-5? (b) Faanra ri gad manang Jehovah nib fel’ rogon, ma uw rogon nra ayuwegdad ni nge dabki maruwar u wan’dad rogon ni ma rin’ boch ban’en?

⁸ Gad ra nang Jehovah nib fel’ rogon, ma dabi magawon lanin’dad u nap’an ni gad ra beeg boch e thin nu Bible nder tamilangnag fan ni ke rin’ ban’en nge ban’en. Bod ni, uw rogon u wan’um e n’en ni rin’ Jehovah ngak Azariah ni Pilung nu Judah kakrom? (2 Ki. 15:1-5, BT) Mu tay fanam i yan riy ni yugu aram rogon nda i “tal e girdi’ i pi’ e maligach nge incense” ko yungi n’en ni tagil’ e meybil rok e piin ndar nanged Got, miki ulul Azariah nga “i rin’ e tin nib m’agan’” Jehovah ngay. Yugu aram rogon me tay Jehovah Azariah ni “nge yib ba m’ar ni daraw ngak ndaki chuw rok u n’umngin nap’an e yafos rok.” Mang fan? Der yog e Bible. Ere gur, ngad paged e re n’ey ni nge magawonnag lanin’dad ara k’aringdad ni ngad lemnaged ko yigi gechignag Jehovah Azariah ndariy tapgin, fa? Faanra gad manang rarogon Jehovah nib fel’ rogon, ma dab da lemgad ni aram rogon. Ya gad manang nib “mat’aw” rogon e gechig ni ma tay ko girdi’. (Jer. 30:11, BT) Ere, mus ni faanra dad nanged ko mang fan ni rin’ Jehovah e re n’em, ma rayog ni ngad pared nib pagan’dad ngak ni bochan e gad manang nib mat’aw e n’en ni Ke rin’.

9. Mang boch ban’en ni buch ni be ayuwegdad ni ngad nanged fan ni k’aring Jehovah ni nge yib e daraw ngak Azariah?

⁹ Ku bay boch ban’en ni be weliy e Bible u murung’agen e re Pilung ney ni ka nog Azariah ngak. Cha’ney i Azariah ni Pilung e ku yima pining Uzziah ni Pilung ngak. (2 Ki. 15:7, 32) Gad ra fil ko fare thin ni bay ko 2 Kronicles 26:3-5, 16-21, BT ni yugu aram rogon ni immoy ba ngiyal’ ni i rin’ Uzziah e tin nib mat’aw u p’eowchen Jehovah, machane boch nga tomuren, “me tolangan’, ma aram tapgin me mul pa’ ko pilung.” I guy rogon ni nge rin’ boch e maruwel ni kemus ni yigoo pi prist e rayog ni ngar rin’ed. Ma aram me guy rogon meruk i ragag nge taareb e prist ni nga rogned e kireb rok ngak mar yal’uweged. Machane, mang e rin’ Uzziah? I tolang e lem rok, ma aram mi “ri damumuw” ngak fapi prist. Aram fan ni k’aring Jehovah ni nge yib e daraw ngak!

10. Mang fan ni gathi gubin ngiyal’ nib t’uf ni ngad nanged fan ni ke rin’ Jehovah ban’en? Uw rogon nrayog ni ngari pagan’dad ni gubin ban’en ni ma rin’ Jehovah e ba mat’aw?

¹⁰ Mang e gad be fil ko re n’ey? Faan gomanga dan tamilangnag boch ban’en u murung’agen e n’en ni buch ko re pilung ney ni bod rogon ni kan rin’ ko pi thin nu Bible ney, ma gur ga ra lemnag ko rib mat’aw Got ko n’en ni ke rin’? Fa ga ra lemnag ni pi n’en ni kan yoloy nga lan e Bible e ba gaman nrayog ni nge micheg ngodad ni gubin ban’en ni ma rin’ Jehovah e ba mat’aw? (Deut. 32:4) Ra fel’ rogon nda nanged rarogon Jehovah, ma aram e ra gel feni t’uf rodad me pagan’dad ngak. Ma faanra gel e re t’ufeg nge pagan’ ney rodad, ma aram e gathi gubin ban’en ni ma rin’ nra t’uf ni ngad nanged fan. Ku dab mu pagtalin ni faanra um athamgil ni ngaum fil e Bible ma ga be fal’eg i lemnag e pi n’en ni be yog Got ngom u daken e Thin rok, ma rayog ni ngari  pagan’um ngak. (Ps. 77:12, 13) Ma re n’ey e ra ayuwegem ni ngari chugur e tha’ u thilmew Jehovah, mi ri riyul’ u wan’um.

11-13. Uw rogon ni kam nang ni ma motoyil Jehovah ko meybil rodad? (Mu guy e sasing ni bay u tabolngin e re article ney.)

¹¹ Ma chugur e tha’ u thildad Jehovah u daken e meybil. Gad ma pining e sorok ngak, ma gad ma pining e magar ngak, maku gad ma pag ni nge pow’iydad. (Ps. 32:8) Machane, faanra ngari chugur e tha’ u thilmew Jehovah, ma thingari mich u wan’um ni ma motoyil ko meybil.

¹² Bay boch e girdi’ ni yad ma lemnag ni meybil e kemus ni ban’en ni yima rin’ ni nge fal’eg lanin’uy. Yad ma yog ni faanra ga be lemnag ni kan fulweg taban e meybil rom, ma aram e bochan ni kam rin’ e n’en ni ga be lemnag, ma ke yag ni ngam nang ko mang e magawon rom, ma kam pirieg rogon ni ngam pithig fare magawon rom. Machane, uw rogon mag nang ni be motoyil Jehovah ko meybil rom?

¹³ Am lemnag e re n’ey: Nap’an ni immoy Jesus u tharmiy, ma i guy rogon ni i fulweg Jehovah taban e meybil ko pi tapigpig Rok u fayleng. Ma nap’an ni immoy u fayleng ni i machib, ma ma weliy laniyan’ ko Chitamangin u daken e meybil. Ku bay bayay nib polo’ reb e nep’ ni meybil ko chitamangin. Ga be lemnag nra rin’ e re n’ey ni faanra manang nder motoyil Jehovah ngak? (Luke 6:12; 22:40-46) Ga be lemnag nra fil ngak pi gachalpen rogon ni ngar meybilgad ni faanra manang ni meybil ni yima tay e kemus ni ban’en ni nge fal’eg lanin’uy? Ba tamilang ni manang Jesus ni meybil e aram rogon ni yima non ngak Jehovah. Ku immoy bayay ni yog Jesus ni gaar: “Chitamag, kari mmagar, ni ga be rung’ag lungug. Gu manang ni gubin ngiyal’ ni ga ma rung’ag lungug.” Ere, ku arrogodad nib pagan’dad ni ma fulweg Jehovah “taban e meybil” rodad.​—John 11:41, 42; Ps. 65:2.

14, 15. (a) Faanra rib tamilang e pi n’en ni gad ma weliy u lan e meybil rodad, ma uw rogon nra yib angin ngodad? (b) Uw rogon ni yag ni nge chugur e tha’ u thilin reb e walag nib pin nge Jehovah ni bochan e meybil ni i tay?

¹⁴ Faanra rib tamilang e pi n’en ni ga ma ning ara ga ma yog ngak Jehovah u lan e meybil rom, ma rayog ni ngam nang rogon ni be fulweg Jehovah taban e meybil rom ni yugu aram rogon ni gathi rib gagiyel rogon ni ke fulweg taban e  meybil rom. Pi meybil rom ni ke fulweg Jehovah taban e ra ayuwegem ni ngari riyul’ Jehovah u wan’um. Maku reb e, faanra um weliy urngin e pi magafan’ rom ngak, ma ra chugur ngom.

¹⁵ Am lemnag e n’en ni buch rok Kathy. * Yugu aram rogon ni gubin ngiyal’ ni ma un ko machib, machane dabun e machib. I weliy ni gaar: “Dabug e machib. Mar riyul’ ni dabug. Ya nap’an ni gu retire ko maruwel rog, me pi’ reb e piilal e athamgil nga lanin’ug ni nggu un ko pioneer; ngemu’, miki pi’ bang fa yungi babyor ngog ni ma ngongliy e piin ni yad baadag ni ngar uned ko pioneer. Ere, gu dugliy ni nggu un ko pioneer, machane gubin e rran ni gu ma meybil ngak Jehovah ni nge ayuwegeg ni nggu adag e machib.” Gur, ke fulweg Jehovah taban e meybil rok? I yog ni gaar: “Chiney e ke gaman dalip e duw ni kug un ko pioneer. Ma bochan ni ke yoor e tayim ni gu ma un ko machib ma kug ma fil boch ban’en rok boch e walag nib pin, ma ke yag ni nggu salap boch ko machib. Chiney e kar gu adag e machib. Maku reb e ke gel e chugur ko tha’ u thilmow Jehovah ko kafram.” Riyul’ ni meybil ni i tay Kathy e ir e ke ayuweg ni ngari chugur thilrow Jehovah.

16, 17. (a) Mang e thingar da rin’ed me yag ni nga i chugur e tha’ u thildad Jehovah i yan? (b) Mang e gad ra weliy ko bin migid e article?

¹⁶ Tha’ u thildad Jehovah e ban’en nthingar da maruweliyed u n’umngin nap’an e yafas rodad. Machane, faanra gad baadag ni nge chugur ngodad, ma thingar kud guyed rogon ni ngad chugurgad ngak. Ere, ngad guyed rogon nga i par nib fel’ e numon u thildad Jehovah ni gubin ngiyal’ u daken e fol Bible nge meybil. Ya angin nra yib riy e ra gel e chugur ko tha’ u thildad Jehovah, ma re n’ey e ra ayuwegdad ni ngad athamgilgad u fithik’ e pi skeng ni ma yib ngodad.

¹⁷ Machane, bay yu ngiyal’ nder ma chuw e magawon rodad ni yugu aram rogon ni gad be meybil ngak Jehovah. Ere, faanra aram rogon ma rayog ni nge war e pagan’ rodad ngak Jehovah. Ma rayog ni ngad tababgad ni ngad lemnaged ko rriyul’ ni ma motoyil Jehovah ko meybil rodad fa danga’, fa reb e da lemnaged ko rriyul’ ni gadad e fager rok fa danga’. Ere, faanra buch boch ban’en ni aray rogon, ma mang e rayog ni ngad rin’ed? Gad ra weliy e fulweg riy ko bin migid e article.