DEER KO PIIN MA BEEG

Mini’ Gog nu Magog ni kan weliy murung’agen ko fare babyor rok Ezekiel?

▪ Ke yoor e duw ni gad ma weliy u lan e pi babyor rodad ni Gog nu Magog e aram reb e ngachal ni kan pi’ ngak Satan ni Moonyan’ u tomuren ni ka non’ nga wuru’ e tharmiy. Un weliy ni aray rogon ni bochan e be yog fare babyor ni Revelation ni Satan ni Moonyan’ e ir pilungen e piin ni yad ra chel ngar chamgad ko girdi’ rok Got. (Rev. 12:1-17) Ere, aram fan ni un lemnag ni Gog e ku aram reb i fithingan Satan.

Machane, bay boch e deer nib ga’ fan ni ke sum ni bochan e re n’ey. Mang fan? Am lemnag e re n’ey: Nap’an ni be weliy Jehovah murung’agen e ngiyal’ nra thang Gog, me weliy murung’agen ni gaar: “Bay gu pag e ldow rorad nge mang ggan ko urngin e arche’ nge gamanman ni maloboch.” (Ezek. 39:4, BT) Ngemu’ miki gaar Jehovah: “Nap’an nra buch urngin e pi n’ey, ma bay gu pi’ ngak Gog bang ni tagil’ e gum’eyag u Israel . . . Gog nge urngin e salthaw rok e bay ni k’eyagrad u rom.” (Ezek. 39:11, BT) Ere, uw rogon ni nge longuy e “arche’ nge gamanman ni maloboch” downgin reb e kan? Ma uw rogon ni ngan pi’ ngak Satan “bang ni tagil’ e gum’eyag” u roy u fayleng? Ba tamilang ni be yog e Bible ni yira kalbusnag Satan u lan bbiyu’ i duw, gathi ra longuy e arche’ nge gamanman downgin ara ni k’eyag nga bang.​—Rev. 20:1, 2.

Be yog e Bible nu tomuren fare biyu’ i duw, ma yira pag Satan, “ma bay yan ngi i bannag e pi nam nib wer u daken e fayleng ni polo’, ni aram yu Gog nge yu Magog. Ma bayi kunuyrad Satan nga taabang ni fan ko mahl, ni yad bod urngin e yan’ ni bay u dap’e l’ay.” (Rev. 20:8) Machane, uw rogon ni nge bannag Satan Gog ni faanra ir Gog? Ere, “Gog” ni be weliy e yiiy rok Ezekiel nge fare babyor ni Revelation murung’agen e der yip’ fan Satan.

Ere, mini’ Gog nu Magog? Ra ngad nanged e fulweg ko re deer ney, mab t’uf ni ngad sapgad nga lan e Bible ya nge yag nda nanged ko mini’ e ra cham ko girdi’ rok Got. Gathi kemus ni be weliy e Bible murung’agen e cham nra tay ‘Gog nu Magog,’ ya ku be weliy murung’agen e cham nra tay e “pilung ko lel’uch” nge cham nra tay e “pi pilung nu fayleng.” (Ezek. 38:2, 10-13; Dan. 11:40, NW, 44, 45; Rev. 17:14; 19:19) Gur, ba thilthil ngal’an e pi cham ney ni yira tay? Danga’. Ere, dariy e maruwar riy ni be weliy e Bible murung’agen taab cham, machane ba thilthil fithingan ni ka nog. Mang fan nrayog ni nga dogned ni aray rogon? Ya be yog e Bible ni urngin e  nam nu fayleng ni yad ra un ko re cham ney ni ir e ra tababnag fare mahl ni Armageddon.​—Rev. 16:14, 16.

Faan gad ra papuluweg fapi thin nu Bible ni be weliy murung’agen e bin tomur e cham ni yira tay ko girdi’ rok Got, mab tamilang riy ni fare ngachal ni Gog nu Magog e der yip’ fan Satan, ya be yip’ fan ba ulung i nam. Gur, “fare pilung ko lel’uch” e ir e ra pow’iy e re ulung ney? Dariy be’ ni manang. Machane, biney e thin e ba puluw ko n’en ni yog Jehovah u murung’agen Gog ni faani gaar: “Ngam chuw ko gin ga bay riy ko lel’uch nib palog, ni ga be gafaliy baraba’ i salthaw nib gel gelngin u boch e nam nib yoor, ni yad gubin ni yad bay u daken e os.”​—Ezek. 38:6, 15, BT.

Daniel ni ku ir reb e profet ni immoy u nap’an Ezekiel e ki weliy murung’agen fare pilung ko lel’uch ni gaar: “Me rus nga murung’agen ban’en ni yib ngak u ngek ngu lel’uch, me mahl ni ke elmerin nge li’ pire’ e girdi’. Ma bayi n’uf fapi tent rok nib ga’ ni tafen nga bangi n’en ni bay u thilin e day nge fare burey ni bay e Tempel riy. Ma bayi yim’ ndariy be’ u charen ni nge ayuweg.” (Dan. 11:44, 45, BT) Ba chugur e re n’ey ko n’en ni ke yog e babyor rok Ezekiel u murung’agen e n’en nra rin’ Gog.​—Ezek. 38:8-12, 16.

Mang e ra buch u tomuren e biney e cham ni yira tay ko tomur? I yog Daniel ni gaar: “Re ngiyal’ i n’em e Mikael [ni aram Jesus Kristus], ni ir pilungen e engel, ni ir e ma matanagiy e girdi’ rom e bay yib i m’ug [u nap’an e Armageddon], ir e be par [ni ka nap’an e duw ni 1914] ni fan ko girdi’ rom. Me yib ba ngiyal’ ni nge gafgow e girdi’ riy, ni aram e bin th’abi ga’ e gafgow ni ka nap’an ni sum e pi nam. Nap’an ni ra taw e ngiyal’ nem, ma urngin e girdi’ ko nam rom ni ka ni yoloy fithingrad nga lan e babyor rok Got e bay ni chuwegrad u fithik’ e gafgow.” (Dan. 12:1, NW) Re n’ey nra rin’ Jesus ni ir owchen Got e ku bay murung’agen ko Revelation 19:11-21.

Machane, mini’ “yu Gog nge yu Magog” ni bay murung’agen ko Revelation 20:8? Nap’an e bin tomur e skeng ni yira pi’ u tungun fare biyu’ i duw, ma piin ni yad ra togopuluw ngak Jehovah e ra m’ug rorad rarogon ‘Gog nu Magog,’ ara fapi nam nra chelgad ngar chamgad ko girdi’ rok Got u tungun fare gafgow nib ga’. Machane, taab n’en e ra buch ko gal ulung i girdi’ ney. Yira thangrad ndariy n’umngin nap’an! (Rev. 19:20, 21; 20:9) Mab puluw ni nga nog “yu Gog nge yu Magog” ngak e piin ni yad ra togopuluw ngak Got u tungun fare biyu’ i duw.

Bochan nri gad ma fal’eg i fil e Thin rok Got nib fel’ rogon, ma aram fan ni gad be son ni ngad guyed ko mini’ e ra yib i gagiyel ni ir fare “pilung ko lel’uch.” Machane, yugu aram rogon, ma bay l’agruw ban’en ni ke mudugil u wan’dad, ni aram e: (1) Yira cham ngan gel ngak Gog nu Magog nge pi salthaw rok; ma (2) Jesus Kristus ni Pilung rodad e ir e ra ayuweg e girdi’ rok Got me fekrad i yan nga lan e bin nib beech e fayleng ni bay e gapas nge pagan’ riy.​—Rev. 7:14-17.