KENGGIN E RE KE BABYOR NEY

Ke Chugur E Tomur, Fa?

Ra pag Got e girdi’ ni ngar ululgad ngaur gagiyegniged yad ma yad be magawonnag rogon e par ko girdi’ boch nga m’on, fa? Danga’, ya kad filed faram nra rin’ boch ban’en ni nge chuweg e girdi’ u fithik’ e gafgow nge kireb. Baadag e En ni Ke Sunmiy e girdi’ nge fayleng ni ngam nang e ngiyal’ ni ke chugur ni nge buch e re n’ey. Uw rogon ni ke tamilangnag e re n’ey?

Am lemnag: Susun ni faanra ngam milekag u karrow nga bang, ma som’on e sana ga ra yaliy boch ban’en ko Internet, ara mu yaliy e map, ara ku boch ban’en ni nge ayuwegem ko gin ni ngam sor ngay. Ma nap’an ni ga ra guy e sign ara boch ban’en u kanawo’ nib puluw ko n’en ni bay u daken fapi map ni ga be fol riy, ma rayog ni nge pagan’um ni bochan e kam nang ni ke chugur ni ngam taw ko gin ni ga be sor ngay. Ere, ku arrogon e n’en ni ke rin’ Got. Ke pi’ e Thin rok ni be weliy boch ban’en ni be thil u fayleng. Ma nap’an ni gad ra guy e pi n’em ni be buch ara be thil, ma aram e ra mich u wan’dad nriyul’ ni gad be par u ba ngiyal’ ni ke chugur ko tomur.

Be weliy e Bible ni pi n’en ni ke buch u fayleng ni kab kakrom i yib e ra buch nge yan i taw nga ba ngiyal’ nib ga’ fan, ma re ngiyal’ i n’em e ra mus u nap’an nra yib e tomur. Ra taw ko re ngiyal’ i n’em ma ra i buch boch ban’en ndariy ba ngiyal’ ni ka a buch ni ka nap’an ni sum e girdi’ keb i mada’ ko chiney. Baaray boch e pi n’em ni be weliy e Thin rok Got murung’agen.

1. BOCH BAN’EN NRA THIL U FAYLENG I YAN Fare yiiy ni bay murung’agen ko Matthew ko guruy ni 24 e be weliy murung’agen boch ban’en nra buch u fayleng ni aram bang ko fare pow ni be dag ni gad bay ko “ngiyal’ ni ke chugur nga tomuren e re m’ag ney,” ma ra buch e pi n’en ni bay ko re pow ney nge yan i mada’ ko ngiyal’ nra yib e “tomur.” (Verse 3, nge 14, NW) Pi n’ey e ba muun ngay e mahl nib gel ni yibe tay, nge ggan ni be lich, nge durru’ ni be yib u gubin yang, nge kireb ni be rin’ e girdi’, ma ke war e t’ufeg ko girdi’, maku be chel e pi tayugang’ ko pi yurba’ i teliw yad be bannag e girdi’. (Verse 6-26) Riyul’ ni ke yoor e chibog ni be buch e pi n’ey. Machane, nap’an nra chugur e tomur, ma ra buch gubin e pi n’ey u taabangiyal’ i ban’en. Maku reb e, ku ra buch e pi n’ey ko ngiyal’ ni be buch e re dalip i n’en ni baaray.

2. RAROGON E GIRDI’ Be yog e Bible nnap’an nra taw ko “tin tomren e rran” ma ra gel e kireb ko ngongol ko girdi’. Be gaar: “Bayi par e girdi’ ni ke mus ni yad e yad be lemnagrad, ma kari gel e chogow rorad, ma kar ufanthingad, ma ke tolangan’rad ni yad be lemnag nri ba ga’ farad; ma bay urogned e thin nib kireb ngak e girdi’, ma bay dab kur folgad rok e gallibthir rorad, ma bay dab kur pininged e magar ngak be’ u lanin’rad, ma bay dab kur liyorgad ngak Got; ma bay dab kur golgad, ma bay dab kur runguyed e girdi’, ma bay ur t’ared e thin nga daken e girdi’, ma dariy fan ban’en u wan’rad, ma yad ba damumuw; ma bay ra dabuyed e tin nib fel’; ma dabiyog ni nge pagan’uy ngorad, ma dariy fan e girdi’ u wan’rad, ma yad ba uf; ma bayi t’uf e fafel rorad me tomur Got u wan’rad.” (2 Timothy 3:1-4) Riyul’ ni kab kakrom i yib ni yima darifannag boch e girdi’, machane nap’an nra taw ko “tin tomren e rran” ma ra mun daken e pi ngongol ney. Ere, aram fan ni ka nog nra taw ko re ngiyal’ i n’em ma ra “mo’maw’” e par. Kam guy ni ke thil e ngongol ko girdi’ e ngiyal’ ney ni ke gel e kireb riy ko kafram, fa?

3. YIBE KIREBNAG E FAYLENG Be yog e Bible nra “kirebnag [Got] e piin ni kar kirebniged e fayleng.” (Revelation 11:18) Uw rogon ni be kirebnag e girdi’ e re fayleng ney? Ku aram e n’en ni i buch u nap’an Noah, ya be gaar e Bible: “Urngin e tin ni ka ba’ e girdi’ e yad gubin ni yad ba kireb u p’eowchen Got, ma kireb rorad e ke wer nga gubin yang. Me par Got nge guy e girdi’ nu fayleng me guy ni yad ba kireb.” Ere, yog ni gaar: “Bay gu thang owcherad.” (Genesis 6:11-13) Kam guy e mich riy ni ke gel e kireb ko girdi’ ko re fayleng ney, fa? Chiney e kad tawgad nga ba ngiyal’ nrayog ko girdi’ ni ngar lied urngin e pumoon, nge ppin, nge bitir ni bay u fayleng. Ya bay talin e cham riy u pa’rad. Ku bay reb e kanawo’ ni yibe kirebnag e re fayleng ney riy. Bochan e pi n’en ni be rin’ e girdi’, ma aram fan ni ke alit e nifeng u toobdad, ma be yim’ e gamanman nge woldug u toobdad, maku be thil rogon e day ni be kireb i yan. Ma gubin e pi n’ey ni yibe kirebnag e aram e pi n’en ni ma ayuweg gubin mit e yafas u fayleng.

Ere, mu fithem ni nge lungum, ‘Nap’an raay e duw nge boch ni ke yan, ma gur bay gelngin e girdi’ nrayog ni ngar lied urngin e pumoon, nge ppin, nge bitir ni bay u fayleng?’  Machane, chiney e be dag e girdi’ ni bay gelngirad nrayog ni ngar rin’ed e re n’ey ni bochan e pi talin e cham ni kar sunmiyed nge pi n’en ni bay u toobdad ni yad be kirebnag ni bod rogon e day, nge gek’iy, nge nifeng, nge ku boch ban’en. Ba papey rogon ni be mon’og boch e llowan’ ko girdi’ ni bod rogon e Internet, nge computer, nge cell phone, nge ku boch ban’en nga rogon ni be tamilangan’rad ara rogon ni yad be pithig e pi magawon ni be sum ni bochan e pi n’ey. Bin riyul’ riy e gathi girdi’ e ba milfan ngorad ni ngar dugliyed ara ngar gagiyegniged rogon nra yan i aw e re fayleng ney boch nga m’on. Dabi pag Got e girdi’ ni ngar thanged urngin mit e yafas ni bay ko re fayleng ney, ya ra thang e piin ni yad be kirebnag e fayleng. Ma ke micheg nra rin’ e re n’ey!

4. MACHIB NI YIBE TAY U GA’NGIN YANG E FAYLENG Ku bay reb e maruwel ni kan yiiynag murung’agen. Re maruwel nem e aram bang ko fare pow ko tin tomuren e rran. Be gaar e Bible: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini yib e tomur.” (Matthew 24:14, NW) Re machib nem ni yira tay e ba thil nga rogon e machib ni ma tay e pi yurba’ i teliw ni ke yoor e chibog ni ke yan. Nap’an e tin tomuren e rran, ma yira machibnag fare ‘Thin rok Got Nib Fel’ ni murung’agen e gagiyeg rok.’ Bay barba’ e teliw ni ga manang ni ireray kenggin e machib rorad, fa? Mus ni faanra bay boch e girdi’ ni yad be machibnag e re thin ney, ma gur, kemus ni yad taab ulung i girdi’ ni yad bay u taabang i ban’en, fa kar wereged e re thin nib fel’ ney nga “gubin yang u fayleng ni nge urngin e girdi’ me nang”?

Fare Web site ni ka nog e www.pr418.com ngay e be weliy murung’agen e “re Thin rok Got ney Nib Fel’ ni murung’agen e gagiyeg rok.” Bay yu ken e babyor ni kan tay ko re Web site ney ni be weliy murung’agen e re n’ey ni kan pilyeg nga boor ko 700 mit e thin. Bay ban’en ni ga manang ni ke ngongliy be’ ni be gagiyelnag fare thin nib fel’ ni murung’agen e gagiyeg rok Got ni bod rogon e re Web site ney, fa? Kafram u nap’an ndawori yib e Internet, ma goo yimanang e Pi Mich Rok Jehovah ni bochan e yad ma athamgil ni ngar wereged fare thin nib fel’ ni murung’agen Gil’ilungun Got ara gagiyeg rok. Ka nap’an e duw ni 1939, ma gubin ken Fare Wulyang ko Damit ni yira ngongliy, ma yima tay fapi thin nga wuru’ ni be gaar, “Ni Be Weliy Morngaagen Gil’ilungun Jehovah.” Bay ba ken e babyor ni murung’agen e teliw ni be yog ni fare maruwel ni machib ni be tay e Pi Mich Rok Jehovah e “rib gel rogon ni yad be maruweliy ma kub ga’ yang e gin ni ke garer riy, ma dariy be’ ara ba ulung e girdi’ ni kar rin’ed ban’en ni aray rogon.” Re maruwel ney ni yibe tay ni yibe machibnag fare thin nib fel’ e be tamilangnag ndab ki n’uw nap’an me yibnag Gil’ilungun Got e “tomur.”

BA NGIYAL’ U CHEPIN E GIRDI’ NRIB GA’ FAN

Kam guy ni ke buch fa aningeg i pow ni be weliy e Bible murung’agen u nap’an e yafas rom, fa? Ke pag raay e duw ni ma weliy e re ke babyor ney murung’agen boch ban’en ni be buch u fayleng, ya nge ayuweg e girdi’ ni ngar guyed e mich riy ni ke chugur e tomur. Machane, bay boch e girdi’ ni yad ma yog nde puluw e re n’ey. Yad ma yog ni pi n’en ni ma buch nge urngin yay ni be buch e be yan u  rogon e n’en ni ma lemnag e girdi’, ma pi n’ey e rayog ni ngan thilyeg rogon ni yibe weliy ara ni gagiyegnag rogon ni be buch. Ku yad ma yog ni bochan ni ke mom rogon ni yibe non u bang nga bang, ma aram fan ni be m’ug ni gowa be gel e kireb u fayleng i yan. Machane boor e girdi’ ni kar guyed e mich riy nriyul’ ni kad tawgad nga ba ngiyal’ u chepin e girdi’ nrib gel e thil riy ko kafram, ma ke chugur ni nge mus e re ngiyal’ i n’em.

Bay boch e girdi’ ni llowan’ ni yad be lemnag ni gad be chugur i yan nga ba ngiyal’ nra thil boor ban’en u fayleng. Bod nnap’an e duw ni 2014, me ginang fare ulung ni ka nog e Science and Security Board ngay fare ulung ni ka nog e United Nations Security Council ngay u murung’agen boch ban’en nra tay e yafas ko girdi’ nga thatharen e riya’ boch nga m’on. I yog e pi girdi’ ni llowan’ nem ni lungurad: “Kug fal’eged i yaliy e pi n’ey ma kug nanged ni boor ban’en ni kan ngongliy rogon kan tay ni kari tay e yafas ko gubin e girdi’ nga thatharen e riya’.” Be yoor e girdi’ i yan ni be mich u wan’rad nriyul’ ni kad tawgad nga ba ngiyal’ u chepin e girdi’ nrib ga’ fan. Piin ni kar ngongliyed e re ke babyor ney nge ku boor ko piin ni yad ma beeg e kari mich u wan’rad nre ngiyal’ i n’ey ni gad bay riy e aram e tin tomuren e rran ma kari chugur e tomur. Machane, rayog ni ngam felfelan’ ko n’en ni bayi buch ko bin ni ngam rus ngay. Mang fan? Ya rayog ni ngam magey ni gab fos u nap’an nra yib e tomur!

[Thin ni bay u tan e sasing ni bay ko page 7]

YAD BOCH E PROFET NI YAD MA WELIY MURUNG’AGEN BOCH BAN’EN NIB KIREB NRA BUCH KO FAYLENG, FA?

Pi Mich Rok Jehovah e gathi yad boch e profet ni yad ma weliy murung’agen boch ban’en nib kireb nra buch ko fayleng. Ke pag raay e duw ni yad be machibnag murung’agen boch ban’en nib fel’ nra buch boch nga m’on. Bod nnap’an e duw ni 1958, mar pied reb e welthin u nap’an reb e convention rorad ni kenggin e, “Be Gagiyeg Gil’ilungun Got​—Ke Chugur Tomuren e Fayleng, Fa?” Ra tamilangnaged ko re welthin nem ni “gathi ra yib Gil’ilungun Got ni nge thang e re fayleng ney, ya ra yib ni nge thang e fayleng rok Satan. Gathi ra yib Gil’ilungun Got ni nge urfiy e re fayleng ney, ya ra yib ni nge rin’ e tin nib m’agan’ Got ngay u roy u but’ ni bod rogon ni yibe rin’ u tharmiy. Bochan e re n’ey, ma aram fan ndabi kirebnag Got e re fayleng ney, ya ir e ke sunmiy; ma ra ayuweg ni nge par ndariy n’umngin nap’an.”