Nge Puluw e Ngongol Rom ko fare Kenggin e Meybil ni Fil Jesus​—Guruy ni 1

“Ngan tay fan fithingam nib thothup.”​—MATT. 6:9.

KA GA MANANG?

Mang e rayog ni ngad filed ko fare bugithin ni “Chitamangimad”?

Mang nib ga’ fan ni ngad yibilayed ni ngan thothupnag fithingan Got?

Uw rogon ni nge puluw e ngongol rodad ko n’en ni gad ma yibilay ni aram e ngan rin’ e tin nib m’agan’ Got ngay u roy u fayleng?

1. Uw rogon ni gad ma weliy murung’agen fare meybil ni bay ko Matthew 6:9-13 u nap’an ni gad be machib?

 BOOR e girdi’ ni kar filed fare meybil ni ka nog e Chitamangimad ngay ke mit ngorad, ma rayog ni ngar sulod u daken ni boor yay. Ma nap’an ni gad ra yan ko machib, ma ba ga’ ni gad ma weliy murung’agen e re meybil ney ko girdi’ ya nge yag nda ayuweged yad ni ngar nanged ni Gil’ilungun Got e riyul’ nreb e am nra thilyeg urngin ban’en u fayleng nge manigil. Kub ga’ ni gad ma weliy e n’en nsom’on ni bay ko re meybil nem ni bochan e ngad tamilangnaged ni bay fithingan Got, ma thingar da ‘ted fan’ ya ba thothup.​—Matt. 6:9.

2. Uw rogon ni kad nanged ni fare kenggin e meybil ni weliy Jesus murung’agen e gathi ba meybil ni ngan fil nge mit ngaun sul u daken ni boor yay?

² Gur, i fil Jesus e re meybil ney ngak pi gachalpen ni bochan e ngan fil e thin riy nge mit mu un sul u daken ni boor yay ni bod rogon ni ma rin’ e girdi’ ko pi yurba’ i Teliw ko Kristiano ni Googsur? Danga’, ya u m’on ni nge weliy murung’agen e re meybil ney, me yog ni gaar: “Faanra mmeybilgad ma dab um sulod u daken taab bugithin ni pire’ yay.” (Matt. 6:7) Boch nga tomuren, miki sul u daken e re meybil ney, machane ba thil rogon ni weliy. (Luke 11:1-4) Ere, re meybil ney ni fil Jesus ngak pi gachalpen e be ayuwegdad ni ngad nanged e pi n’en nrayog ni ngad ninged u  lan e meybil rodad nge n’en nib ga’ fan ni ir e thingar da m’oneged ko meybil rodad. Ere, aram fan ni yima yog nre meybil ney e aram kenggin e meybil rodad.

3. Mang deer e rayog ni ngad fal’eged i lemnag u nap’an ni gad be weliy murung’agen fare kenggin e meybil ni fil Jesus ngak pi gachalpen?

³ Re article ney nge bin migid e gad ra weliy riy e pi n’en ni bay ko re kenggin e meybil nem. Nap’an ni gad be weliy e pi n’ey, ma ngam fithem ni nge lungum, ‘Uw rogon nrayog ni nge ayuwegeg e re kenggin e meybil ney ni nge mon’og rogon e meybil ni gu ma tay? Ma bin th’abi ga’ fan riy e, ba puluw e ngongol rog ko pi n’en ni bay ko re meybil ney, fa?’

“CHITAMANGIMAD NI GA BAY U THARMIY”

4. Mang e be puguran fare bugithin ni “Chitamangimad” ngodad? Uw rogon ni Jehovah e ir e ‘Chitamangin’ e pi Kristiano ni yad be athapeg e par u fayleng?

⁴ U tabolngin e re meybil ney e yog Jesus riy fare bugithin ni “Chitamangimad,” ma gathi “Chitamag.” Re n’ey e be puguran ngodad ni gad bang u ba ulung i walag u ga’ngin yang e fayleng ara ‘pi cha’ ni gadad ni ke mich Got u wan’rad’ ni gad ma t’ufeged gadad. (1 Pet. 2:17) Ireray reb e tow’ath ni bay rodad nrib manigil! Pi Kristiano ni kan dugliyrad ni ke pofrad Got ni ngar manged pi fak, maku yad be athapeg e yafas ni manemus u tharmiy e yad ma yog e ‘Chitamangimad’ ngak Jehovah u reb e kanawo’ ni yugu ba thil. (Rom. 8:15-17) Ma pi Kristiano ni yad be athapeg e yafas ni manemus u fayleng e ku rayog ni ngar pininged Jehovah ni nge lungurad, ‘Chitamangimad.’ Ir e En ni Ke Pi’ e Yafas ngorad, maku ma pi’ e tin nib t’uf rorad. Piin ni yad be athapeg e par u fayleng e yad ra mang pi fak Got u tomuren ni kar flontgad ma ke yag ni ngar pared ni yad ba yul’yul’ u nap’an e bin tomur e skeng ni yira tay ngorad.​—Rom. 8:21; Rev. 20:7, 8.

5, 6. Mang reb e tow’ath nrib manigil nrayog ni nge pi’ e piin gallabthir ngak pi fakrad? Ra reb e bitir ma mang e ba milfan ngak ni nge rin’ ko re tow’ath ney? (Mu guy e sasing ni bay u tabolngin e re article ney.)

⁵ Nap’an nra fil e piin gallabthir ngak pi fakrad rogon ni ngaur meybilgad mar ayuweged yad ni ngar ted Jehovah ni ir e Chitamangirad ni bay u tharmiy, ma aram e kar pied reb e tow’ath nrib manigil ngak pi fakrad. Bay reb e walag ni pumoon ni ma lekag boch e ulung u South Africa e chiney ni yog ni gaar: “Ka rofen nni gargeleg l’agruw i ppin ni fakag ni gamad ma meybil u taabang ni gubin e blayal’ keb i mada’ ko chiney. Fin ngiyal’ nda gur meybilgad u taabang e faanra da gu moy u tabinaw. Ba ga’ ni ma yog e gali ppin ni fakmow nem ndakir yib ngan’row e n’en ni gu ma yog u lan e pi meybil nem ni gamad ma tay u taabang ni blayal’. Machane, ke yib ngan’row rogon ni gamad ma meybil, miki ayuwegrow ni ngar nangew feni ga’ fan ni ngaud nonad ngak Jehovah ni Chitamangidad ni gubin ngiyal’, maku ma ayuwegrow ni nge gapas lanin’row me pagan’row. Nap’an nra ilalgow boch nrayog ni ngaur meybilgow rorow, ma aram mug pi’ e athamgil nga lanin’row ni ngaur meybilgow nib ga’ lamrow ya nge yag ni gu rung’ag lamrow u nap’an ni yow be weliy lanin’row ngak Jehovah. Ireray reb e ban’en ni ayuwegeg ni nggu nang ko mang e bay u gum’ircha’row. Miki ayuwegeg u rogon ni nggu fil ngorow rogon ni ngar unegew boch ban’en ni bay ko fare kenggin e meybil ni fil Jesus nga lan e meybil rorow, ya nge yag ni mon’og rogon e meybil ni yow ma tay.”

⁶ Angin ni yib riy e mon’og e gali ppin nem ni fak e re walag ney ko tirok Got ban’en. Chiney e yow l’agruw ni kar unew ko mabgol, ma ra bagayow ma yow be pigpig e pumoon rok u taabang u polo’ e tayim rorow. Ere, bin th’abi fel’ e tow’ath nrayog ni nge pi’ e piin gallabthir ko bitir rorad e aram e ngar ayuweged yad ni ngari chugur e tha’ u thilrad Jehovah. Machane, bin riyul’ riy e ra be’ ma ke milfan ngak ni nge ayuweg e tha’ u thilrow Jehovah ni nga i par nib fel’. Ma re n’ey e ba muun ngay ni nge fil rogon ni ngari t’uf fithingan Got rok, mi i tayfan.​—Ps. 5:11, 12; 91:14.

“NGAN TAY FAN FITHINGAM NIB THOTHUP”

7. Mang reb e tow’ath ni bay ko pi tapigpig rok Got, ma mang e ba milfan ngodad ni ngad rin’ed?

⁷ Ri gad ba tow’ath ni bochan e gathi kemus ni kad nanged fithingan Got, ya kki mel’egdad ni  ngad “manged girdien” ni ngaud feked fithingan. (Acts 15:14; Isa. 43:10) Ba ga’ ni gad ma non ngak ni ir e Chitamangidad ni bay u tharmiy ni ma lungudad: “Ngan tay fan fithingam nib thothup.” Nap’an ni gad ra yog e pi thin ney ngak ma aram e gad be wenig ngak ni nge ayuwegdad ni nge dab da rin’ed ara dogned ban’en nra darifannag fithingan. Dubdad ni ngad boded boch e girdi’ ni ur moyed u nap’an e bin som’on e chibog nda i puluw e ngongol rorad ko n’en ni ur machibnaged. I yoloy apostal Paul murung’agrad ni gaar: “Piin ni gathi yad piyu Israel e yad be yog e thin nib kireb nga fithingan Got ni bochan e ngongol romed piyu Israel.”​—Rom. 2:21-24.

8, 9. Mu weliy ban’en ni ke buch rok reb e walag ni be dag rogon ni ma tow’athnag Jehovah e piin ni yad ma tayfan fithingan nib thothup ni gubin ngiyal’.

⁸ Gad baadag ni ngaud ted fan fithingan Got nib thothup. Immoy reb e walag nib pin u Norway ni yim’ figirngin ma aram ma ranow ra parew bochi pagel ni fak ni l’agruw e duw rok ni yigoo yow. Ere, yog ni gaar: “Aram ba ngiyal’ u lan e yafas rog nri kug mada’nag boch e magawon nrib mo’maw’. Ba dake gubin e awa u gubin e rran ni gu ma meybil ni nge ayuwegeg Jehovah ni nge dabi waliyeg Satan ni nge dab kug par ni gub yul’yul’ ara gu mel’eg ban’en nde fel’ nra darifannag Jehovah. Gu baadag ni nggu tayfan fithingan Jehovah nib thothup, ma kug baadag ni nge guy fakag e chitamangin bayay u nap’an nra Paradis e fayleng.”​—Prov. 27:11.

⁹ Ere gur, ke fulweg Jehovah taban e meybil ko re walag ney? Arrogon, ya bochan ni i chagil ko pi walag u lan e ulung ni gubin ngiyal’, ma aram me yag ni ngar ayuweged mu ur pied e athamgil nga laniyan’. Lal e duw nga tomuren, me leay e re walag ney reb e piilal u lan e ulung. Ma chiney e ke gaman 20 e duw ko fare pagel ni fak ma ke mang reb e walag u lan e ulung. I yog e re ppin nem ni gaar: “Kar gu felfelan’ ni ke ayuwegeg e pumoon rog ni nggu chuguliyew e re pagel ni fakag ney u taabang nib fel’ rogon.”

10. Mang e ba t’uf ni ngan rin’ ya nge yag ni gagiyel feni thothup fithingan Got ma dab kun darifannag?

¹⁰ Ere, mang e ba t’uf ni ngan rin’ ya nge yag ni gagiyel feni thothup fithingan Got ma dab kun darifannag? U m’on ni nge buch e re n’ey, ma thingari chuweg Jehovah urngin e piin ni yad be togopuluw nga mat’awun e gagiyeg rok. (Mu beeg e Ezekiel 38:22, 23.) Ra munmun u tomuren e re ngiyal’ i n’em, ma aram e ra sul e girdi’ ngkur flontgad bayay. Ri gad be athapeg ni nge papey nge taw ko ngiyal’ nrayog ni nge par urngin e pi n’en ni ke sunmiy Jehovah ni yad be tayfan fithingan nib thothup! Ma aram e ra yan i tomur riy me pi’ e Chitamangidad ni bay u tharmiy “urngin” ban’en nib t’uf ko girdi’.​—1 Kor. 15:28.

“MA GA PAR NI GUR E GA BE GAGIYEGNAGMAD”

11, 12. Mang e tamilangnag Jehovah u wan’ e tin riyul’ e Kristiano u tungun e bin 19 e chibog?

¹¹ U m’on ni nge sul Jesus nga tharmiy, me fith e pi apostal rok ngak ni lungurad: “Somol, ra taw ko re ngiyal’ i n’ir ma aram ma ga fulweg e nam nu Israel nga rogon?” Fulweg ni pi’ Jesus ngorad e be m’ug riy ndawori taw nga nap’an ni ngar nanged e ngiyal’ nra tabab Gil’ilungun Got ko gagiyeg. I yog ngak pi gachalpen ni ngar tedan’rad ko fare maruwel ni machib ni ke pi’ ngorad ni ngar rin’ed ya aram e re maruwel nth’abi ga’ fan ni ngan rin’. (Mu beeg e Acts 1:6-8.) Machane, i fil ngak pi gachalpen ni ngaur pared ma yad be lemnag e ngiyal’ nra tabab Gil’ilungun Got ko gagiyeg. Ere, aram fan ni ka nap’an e pi apostal ni i yibilay e pi Kristiano ni nge yib Gil’ilungun Got.

¹² Nap’an ni chugur ko ngiyal’ ni nge tabab Gil’ilungun Got ko gagiyeg ni Jesus e ir e pilung riy, me ayuweg Jehovah e girdi’ rok ni ngar nanged e ngiyal’ nra tabab e re am nem ko gagiyeg. Nap’an e duw ni 1876, min tay boch e thin ni ke yoloy Charles Taze Russell nga lan ba ken e babyor ni kenggin e Bible Examiner. I tamilangnag ko re article rok nem ni kenggin e, “Gentile Times: When Do They End? (Wuin e Ra Mus Ngal’an e Piin ni Gathi Yad Piyu Israel?),” ni fare duw ni 1914 e aram reb e duw nib ga’ fan. Ki tamilangnag ni fa ‘medlip i duw’ ni yiiynag Daniel murung’agen e bay rogon ko fa ngiyal’ nra i yot’ e ‘piin ni gathi yad piyu  Israel daken yu Jerusalem’ ni faani weliy Jesus murung’agen. *​—Dan. 4:16; Luke 21:24.

13. Mang e buch u nap’an e duw ni 1914, ma mang e be micheg e pi n’en ni ke buch ni ka nap’an e re ngiyal’ i n’em keb i mada’ ko chiney?

¹³ Nap’an e duw ni 1914, ma aram me tabab boch e nam u Europe ko mahl, me munmun me garer e re cham ney nga ga’ngin yang e fayleng. Nap’an ni mus e re mahl ney ko duw ni 1918, ma aram me yib e uyungol, ngemu’ miki yib ba m’ar ni misilpig ni boor e girdi’ ni yim’ riy ko girdi’ nra m’ad u nap’an e re mahl nem. Aram e ngiyal’ ni tabab ni nge lebug ara nge m’ug fare “pow” ni yog Jesus nra m’ug u nap’an nra mang Pilung u Gil’ilungun Got u tharmiy. (Matt. 24:3, NW, 4-8; Luke 21:10, 11) Ku bay boch ban’en ni ki buch ni be dag ni fare duw ni 1914 e aram e ngiyal’ ni yira “teeliyawnag” Somol Jesus Kristus riy. Maku aram e ngiyal’ ni “yan nrogon be’ ni ma gel ko mahl ni nge yan ko mahl nge gel.” (Rev. 6:2) I cham ngak Satan nge pi moonyan’ rok, me yon’rad nga wuru’ e tharmiy nga daken e fayleng. Ka aram nap’an i yib ni be guy e girdi’ ni be buch e n’en ni ka nog ko fare thin ni be gaar: “Ri bayi gafgow e fayleng nge day! Ya ke yib fare Moonyan’ ngomed ni kari damumuw, ya manang ndaki n’uw nap’an ni nge par.”​—Rev. 12:7-12.

14. (a) Mang nib ga’ fan ni ngkud ululgad i yibilay Gil’ilungun Got ni nge yib? (b) Mang reb e tow’ath ni bay rodad?

¹⁴ Fare yiiy ni bay ko Revelation 12:7-12 e be weliy fan ni tabab ni nge buch boch ban’en nib kireb u fayleng u nap’an ni tabab Gil’ilungun Got ko gagiyeg u tharmiy. I tabab Jesus ni ir e Pilung u Gil’ilungun Got ni nge gagiyeg u fithik’ e pi toogor rok. Ere, gad ra ulul i yibilay Gil’ilungun Got ni nge yib  nge yan i taw ko ngiyal’ ni ke gel Jesus ko re mahl ney ma ke chuweg urngin e kireb u fayleng. Machane, nap’an ni gad be sonnag e re ngiyal’ i n’em, ma thingar da guyed rogon ni nge puluw e ngongol rodad ko n’en ni gad be yibilay, ma gad un i lebguy boch ban’en nni weliy u lan fare “pow,” ya yiiynag Jesus u m’on riy ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matt. 24:14.

“MIN RIN’ E TIN NIB M’AGAN’UM NGAY U ROY U BUT’”

15, 16. Uw rogon ni nge puluw e ngongol rodad ko n’en ni gad ma yibilay ni aram e ngan rin’ e tin nib m’agan’ Got ngay u roy u fayleng?

¹⁵ Sogonap’an 6,000 e duw ni ke yan ma un rin’ e tin nib m’agan’ Got ngay u roy u fayleng. Aram fan ni sap nga urngin ban’en ni ke ngongliy ma “rib fel’ u wan’.” (Gen. 1:31) Boch nga tomuren me togopuluw Satan ngak Got, ma aram me yan i par nri ka in e girdi’ u fayleng e yad be rin’ e tin nib m’agan’ Got ngay. Machane, gad ba tow’ath ni gad bay u ba ngiyal’ ni ke gaman sogonap’an meruk milyon e Pi Mich Rok Jehovah u fayleng, ma yad gubin ni gathi kemus ni yad be yibilay ni ngan rin’ e tin nib m’agan’ Got ngay u roy u fayleng, ya ku yad be athamgil ni nge puluw e ngongol rorad ko n’en ni yad be yibilay. Yad ma rin’ e tin nib m’agan’ Got ngay ma yad ma rin’ fare maruwel ni machib u fithik’ e pasig.

¹⁶ Bay reb e walag nib pin nni taufenag ko duw ni 1948 ma i pigpig u Africa ni ir reb e missionary ni yog ni gaar: “Gathi kemus ni gu ma yibilay ni ngan rin’ e tin nib m’agan’ Got ngay u roy u fayleng, ya kug ma yibilay e piin ni yad bod e saf ni ngar rung’aged fare thin nib fel’ me m’agan’rad ngay ni ngan ayuwegrad ni ngar nanged murung’agen Jehovah u m’on ni nge sagaal. Maku reb e, u m’on ni nggu machibnag be’ ma gu ma meybil ngak Jehovah ni nge pi’ e gonop ngog ya nge yag ni nggu ayuweg facha’ ni nge taw e thin rok Got nga gum’irchaen. Ma kug ma meybil ngak Jehovah ni nge ayuwegdad ni ngad nanged rogon ni ngad ayuweged e piin ni yad bod e saf.” Bochan e re n’ey ma aram fan ni ke yib angin e machib ni ma tay e re walag nib pin ney ni ke gaman 80 e duw rok, ya boor e girdi’ ni ke ayuwegrad ke yag ni ngar manged boch e Pi Mich Rok Jehovah. Dabisiy ni ku ra yib ngan’um boch e walag ni taareb rogorad ko re walag ney ni yad ba pasig i rin’ e tin nib m’agan’ Got ngay ni yugu aram rogon ni kar pilibthirgad.​—Mu beeg e Filippi 2:17.

17. Uw rogon u wan’um e n’en nra rin’ Jehovah boch nga m’on ni fan ko piin ni yad ra par u roy u fayleng?

¹⁷ Gad ra ulul i yibilay ni ngan rin’ e tin nib m’agan’ Got ngay u roy u fayleng nge yan i mada’ ko ngiyal’ ni kan thang e piin ni yad be togopuluw nga Gil’ilungun Got. Fin aram e ngiyal’ ni gad ra guy ni ke lebug e n’en nib m’agan’ ngay ni fan ko fayleng, ya aram e ngiyal’ ni yira faseg e piin ni kar m’ad mar pared u paradis u fayleng. I yog Jesus ni gaar: “Dab mu gingad ko re bugithin ney; ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag [lamag], mi yad yib u lan e low rorad nga wuru’.” (John 5:28, 29) Am lemnag gelngin e felfelan’ ni gad ra tay e ngiyal’ nem u nap’an ni gad ra mada’nag e piin ni yad ba t’uf rodad ni kan fasegrad ko yam’! Aram e ngiyal’ nra n’ag Got ‘urngin e lu’ u owchedad.’ (Rev. 21:4) Yooren e piin ni yira fasegrad ko yam’ e aram e piin “nib kireb [“de mat’aw,” NW],” ara piin ni kar m’ad ndawor ra nanged e tin riyul’ u murung’agen Jehovah Got nge Fak. Rib tow’ath e piin ni yad ra un i ayuweg e piin ni yira fasegrad ko yam’ ni ngar nanged e tin nib m’agan’ Got ngay, mu kur ayuweged yad ni nge yag e “yafos ndariy n’umngin nap’an” ngorad.​—Acts 24:15; John 17:3.

18. Mang e rib t’uf ko girdi’?

¹⁸ Nap’an nra yib Gil’ilungun Got, ma ra gagiyelnag feni thothup fithingan Jehovah, ma urngin e girdi’ ni yad ra liyor ngak u taabang. Aram e ngiyal’ nra lebguy Got fa dalip ni som’on e n’en ni gad ma wenignag ngak u lan fare kenggin e meybil ni fil Jesus ngak pi gachalpen. Machane, ka bay aningeg ban’en ko re kenggin e meybil nem ni ku gad ma yibilay ngak Got. Aram e n’en ni gad ra weliy ko bin migid e article.

[Boch e thin nra tamilangnag murung’agen]

[Deer ni ngan pi’ e fulweg riy]