“Ke Chugur ni Ngan Chuwegmed u Fithik’ e Gafgow”!

“Mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.”​—LUKE 21:28.

TANG: 49, 43

UW ROGON NI GA RA FULWEG?

Mang boch ban’en ni bayi buch ndab ki n’uw nap’an ni bod e n’en ni buch u nap’an e duw ni 66 C.E.?

Uw rogon ni yira skengnagdad u tomuren ni kan thang fare “Babylon nib Gilbuguwan”?

Mang maruwel e yira rin’ nrogon ni kan weliy ko Matthew 24:31?

1. Mang e buch u nap’an e duw ni 66 C.E.? (Mu guy e sasing ni bay u tabolngin e re article ney.)

 MU SUSUNNAG ni gur reb e Kristiano ni um par u Jerusalem u nap’an e duw ni 66 C.E. Boor ban’en ni be buch ko gin ni ga be par riy. Som’on e bay reb e tayugang’ ko am nu Roma ni ka nog Florus ngak ni ke iring 17 yang e salpiy ni ka nog e talent ngay ko gin ni ma par e salpiy riy u tempel. Ere, kari damumuw e pi Jew. Ma kar chelgad kar lied boor e salthaw nu Roma, maku yad be yog ni yad baadag ni ngar chuwgad u tan pa’ yu Roma ngar pared rorad. Machane, ka chingiyal’ nem me rin’ yu Roma ban’en. De gaman dalip e pul nga tomuren, me fek Cestius Gallus ni ir e governor nu Syria 30,000 e salthaw ngar bad ra longobiyed fare mach. Ma aram me mil fapi Jew ni ur togopuluwgad ko am nu Roma nga ranod ra mithgad nga lan e tempel. Machane, me yib e pi salthaw rok piyu Roma ko yoror ko fare tempel mi yad guy rogon ni ngar buthuged. Gubin e girdi’ ni kar rusgad. Ere, mang e ga ra lemnag u nap’an ni ga be guy urngin e pi n’ey ni be buch?

2. Mang e ba t’uf ni nge rin’ e pi Kristiano u nap’an e duw ni 66 C.E.? Uw rogon ni ke mab e kanawo’ ngorad ni ngar rin’ed e re n’ey?

 ² Dariy e maruwar riy nra yib ngan’um fapi thin ni yog Jesus ni faani yoloy Luke nga lan e Gospel rok ni gaar: “Faanra mu guyed yu Jerusalem ni ke longobiy yu raba’ i salthaw, ma aram e kam nanged ndab ki n’uw nap’an min kirebnag.” (Luke 21:20) Machane, sana ga ra fith ni nge lungum, ‘Uw rogon ni nggu fol ko re thin ney e chiney?’ Ki yog Jesus ni gaar: “Ma aram e piin ni yad bay u lan yu Judea e thingar ra milgad nga daken e pi burey; ma piin ni yad bay u lan e binaw e thingar ra chuwgad riy, ma piin ni yad bay u wuru’ e binaw e thingar dab ranod nga lan binaw.” (Luke 21:21) Uw rogon ni ngam chuw u lan yu Jerusalem ni aram urngin e salthaw nib liyeg e re mach nem? Machane, bay ban’en ni buch ni kar mu gin ngay. I tabab fapi salthaw nu Roma ni ngar chuwgad ko fare mach. Ya kan yiiynag ni yira ‘lichnag e pi rran nem’ ni ngar chamgad riy. (Matt. 24:22) Chiney e rayog ni ngam rin’ e n’en ni yog Jesus. Ka chingiyal’ nem mi gimed mil boch e Kristiano ni yad ba yul’yul’ ni ku yad ma par u lan e re mach nem nge boch e mach u tooben, ngam marod nga daken e pi burey ni bay u barba’ fare Lul’ nu Jordan. * Ma nap’an e duw ni 70 C.E. ma aram miki yib barba’ fapi salthaw rok piyu Roma ko fare mach nu Jerusalem mar bad ra gotheyed. Machane, ke yag ni ngam magey ni gab fas ni bochan e kam fol ko n’en ni yog Jesus.

3. Mang e bayi buch ni bod e n’en ni buch u Jerusalem kakrom? Mang e gad ra weliy ko re article ney?

³ Ri dabki n’uw nap’an, ma bay ban’en ni bayi buch ni bod e n’en ni buch u Jerusalem kakrom. Gathi kemus ni weliy Jesus ngak e pi Kristiano kakrom murung’agen yu Jerusalem ni yira gothey, ya ki fanay e pi n’en ni buch ko re ngiyal’ i n’em ni nge weliy murung’agen e n’en nra buch u nap’an fare “gafgow” nib ga’. (Matt. 24:3, 21, 29) Bin riyul’ riy e, bay ba ulung i girdi’ nib “pire’ ni pire’” ni yad ra magey ni yad ba fas u nap’an e re gafgow nem nra yib nga fayleng. (Mu beeg e Revelation 7:9, 13, 14.) Mang e be yog e Bible u murung’agen e pi n’ey ni bayi buch? Rib ga’ fan ni ngad lemnaged e fulweg ko re deer ney ni bochan e bay rogon e yafas rodad ngay. Ere, chiney e ngad weliyed e n’en nra rin’ e pi n’ey ngodad.

TABOLNGIN FARE GAFGOW NIB GA’

4. Uw rogon nra tabab fare gafgow nib ga’?

⁴ Uw rogon nra tabab fare gafgow nib ga’? Be pi’ fare babyor ni Revelation e fulweg ko re deer ney. U rom e kan weliy riy murung’agen fare “Babylon nib Gilbuguwan” ni yira thang. (Rev. 17:5-7) Ma rib puluw e n’en ni ke rin’ e Bible ni aram e ke taarebrogonnag e pi yurba’ i teliw ngak be’ nib pin ni ma pi’ ir ni chuway’! Ya pi tayugang’ ko pi yurba’ i teliw e yad be un ngak e pi pilung ko re fayleng nib kireb ney yad be rin’ boch ban’en nib kireb. Yad be ayuweg e pi pilung nu fayleng, maku yad be darifannag e n’en ni be yog e Bible ya nge yag nni pi’ mat’awrad ni ngar uned i gagiyegnag e pi am nu fayleng ko bin ni ngar ayuweged Jesus nge birok e am ara Gil’ilungun. Ri yad ba thil ko piin ni ke dugliyrad Got ni yad ba machalbog. (2 Kor. 11:2; Jas. 1:27; Rev. 14:4) Machane, mini’ e ra gothey fare ulung ni kan taarebrogonnag ngak be’ nib pin ni ma pi’ ir ni chuway’? Ra tay Jehovah Got nga laniyan’ “fa ragag i gagey” ko fare “gamanman nib row” ni ngar rin’ed e “tin ni be finey.” Pi gagey ney e be yip’ fan e pi am nu fayleng ni yad ma ayuweg fare ulung ni ka nog e United Nation ngay ara fare “gamanman nib row.”​—Mu beeg e Revelation 17:3, 16-18.

5, 6. Mang fan nrayog ni nga dogned nnap’an ni yira thang fare Babylon nib Gilbuguwan ma gathi gubin e piin ni yad ma un ko pi yurba’ i teliw nem ni ku yad ra un ngak ko magothgoth ni ka ngiyal’ nem?

⁵ Ere gur, nap’an ni yira thang fare Babylon nib Gilbuguwan, ma gubin e piin ni yad ma un ko pi yurba’ i teliw nem ni ku yad ra un ngak ko magothgoth ni ka ngiyal’ nem? Danga’, ya bay e thin nni thagthagnag nga laniyan’ Zekariah ni profet ni nge yoloy u murung’agen e re ngiyal’ i n’em. Be weliy e re thin nem murung’agen be’ ni immoy ko teliw ni googsur ni gaar: “Ra gaar, ‘Gathi gub profet, ya gub  girdien e milay’​—maruwel u milay’ e gu ma rin’ u n’umngin e yafas rog.’ Ma faanra fith be’ ngak ni gaar, ‘Mang e tin beer e maad’ad u daken ngorongorem?’ Ma ra fulweg ni gaar, ‘Maad’ad ni gu tay u tabinaw rok e tafager rog.’” (Zek. 13:4-6, BT) Ere, ba tamilang ni ku bay boch e pi tayugang’ ko pi yurba’ i teliw ni googsur nem ni yad ra digey e teliw rorad mu u rogned ni gathi yad bang ko pi yurba’ i teliw ni googsur nem.

⁶ Ere, mang e ra buch ko girdi’ rok Got e ngiyal’ nem? I yog Jesus ni gaar: “Machane ke lichnag Got e pi rran nem; ya faan mang e dabi rin’ ni aram rogon, ma dariy be’ nra fas. Machane bayi lichnag Got e pi rran nem ni bochan e piin ni girdien ni ke mel’egrad.” (Matt. 24:22) Kad weliyed faram ni fare gafgow ni buch u nap’an e duw ni 66 C.E. e kun ‘lichnag e rran riy.’ Re n’ey e ayuweg e ‘piin ni kan mel’egrad,’ ara pi Kristiano ni kan dugliyrad ni ngar milgad ngar chuwgad ko re mach nem. Ere, ku arrogon ni ku ra ‘lichnag Got e rran’ ko gin nsom’on ko fare gafgow nib ga’ ni bochan e ‘piin ni ke mel’egrad.’ Dabin pag e pi am ara “fa ragag i gagey” ni ngar thanged mit e girdi’ rok Got. Ya tomuren ni yira thang e pi yurba’ i teliw ni googsur, ma yug ra mocha’ bochi ngiyal’.

ARAM E NGIYAL’ NI YIRA SKENGNAG E MICHAN’ RODAD MAKU ARAM NGAL’AN E PUFTHIN

7, 8. Mang e ka bay ni ngad rin’ed u tomuren ni yira thang e pi yurba’ i teliw ni googsur u fayleng? Uw rogon nra gagiyel e pi tapigpig rok Got ni yad ba yul’yul’ u fithik’ e tin ni ka bay e girdi’ e ngiyal’ nem?

⁷ Mang e ra buch u tomuren ni kan thang e pi yurba’ i teliw ni googsur u fayleng? Aram e ngiyal’ nra gagiyel ko mang e bay u gum’ircha’dad. Yooren e girdi’ e yad ra sap ko pi ulung ni ke sunmiy e girdi’ ni ngan ayuwegrad, ma pi ulung nem e kan taarebrogonnag ko “war u daken e burey.” (Rev. 6:15-17) Machane, girdi’ rok Got e yad ra sap ngak Jehovah ni nge ayuwegrad. Fa ngiyal’ i n’em ni chuw fapi salthaw nu Roma ko fare mach nu Jerusalem nib ngoch nap’an e gathi aram e ngiyal’ ni nge thilyeg e pi Jew e teliw rorad ngar manged boch e Kristiano. Ya aram e ngiyal’ ni nge rin’ e piin Kristiano boch ban’en mar folgad ko n’en ni yog Jesus ngorad. Ere, ku arrogodad ndab da lemnaged ni fapi rran nra “lichnag” Got u nap’an fare gafgow nib ga’ e aram e ngiyal’ nra thilyeg boor e girdi’ e teliw rorad ngar manged boch e tin riyul’ e Kristiano. Ya aram e ngiyal’ ni nge reb e tapigpig rok Jehovah me dag nriyul’ nrib t’uf Jehovah rok me ayuweg pi walagen Kristus ni kan dugliyrad.​—Matt. 25:34-40.

⁸ Yugu aram rogon ni gathi gubin ban’en nra buch e ngiyal’ nem ni gad manang, machane gad manang nra taw ko re ngiyal’ i n’em ma bay boch ban’en nthingar da paged fan. Nap’an e bin som’on e chibog, me pag e pi Kristiano e tabinaw rorad ma ranod u fithik’ boch e magawon nib mo’maw’ ni fan e nge yag nra mageygad ni yad ba fas. (Mark 13:15-18) Ere uw rogodad, ra taw ko ngiyal’ nem ma ra m’agan’dad ngay ni ngad paged e chugum rodad nge boch ban’en ni fedad ni fan e nge yag nda pared ni gad ba yul’yul’ ngak Got, fa? Gad ra rin’ e tin nrayog rodad ya nge yag nda pared ni gad ba yul’yul’ ngak Jehovah, fa? Aygum lemnag, ya ra taw ko re ngiyal’ i n’em ma kemus ni yigoo gadad e ka gad bay ni gad be pigpig ngak Got ni bod e n’en ni rin’ Daniel ni profet kakrom.​—Dan. 6:10, 11.

9, 10. (a) Mang thin e ra weliy e girdi’ rok Got murung’agen e ngiyal’ nem? (b) Mang e ra rin’ e pi toogor rok Got?

⁹ Ra taw ko ngiyal’ nem, ma gathi aram e ngiyal’ ni ngad machibnaged fare ‘Thin Nib Fel’ ni murung’agen e gagiyeg rok Got.’ Ra taw ko ngiyal’ nem ma ke m’ay e re maruwel ney, ya ke yib e ‘tomur.’ (Matt. 24:14) Machane, dariy e maruwar riy ni aram e ngiyal’ nra weliy e girdi’ rok Got murung’agen e pufthin ni ngan tay ko re m’ag rok Satan ney. Rayog ni ireram e ngiyal’ ni gad ra yog ko girdi’ ni aram e yibe n’en ni ngan thang e re m’ag rok Satan ney. Ke taarebrogonnag e Bible e re n’ey nga yungi ayis ni gagang’ yang ni be mul u lang nga but’ ni bod e n’uw. I yog ni gaar: “Me mul e ayis ni gagang’ yang u lang nga but’ ni bod e n’uw, nra bayang ma ba’ tomalngin nib man raay e pawn, ni be mul u lang nga daken e girdi’. Me yog e girdi’ e tin nib kireb nib togopluw ngak Got ni bochan e re gafgow nem ni ke yib ko ayis ni be mul ni bod e n’uw, ya reb e gafgow nri ba ga’.”​—Rev. 16:21.

 ¹⁰ Ra rung’ag e pi toogor rodad e pi n’ey ni gad ra weliy murung’agen. I thagthagnag Got nga laniyan’ Ezekiel ni profet ni nge weliy e n’en nra rin’ Gog nu Magog ni be yip’ fan ba ulung i nam. I yog ni gaar: “Irera’ e n’en ni be yog Somol, ni Th’abi Tolang ngak Gog: ‘Nap’an nra taw ko ngiyal’ i n’em ma bay mu tabab i tanomnag e kireb. Bay mu lemnag ni ngam cham nga bbinaw ni dariy gelngin ni gin be par fapi girdi’ riy u fithik’ e gapas ni dariy ban’en ni be buch rorad u lan yochi binaw ndariy e yoror nge rungrung riy. Bay mu fek u fithik’ e yargel e chugum rok fapi girdi’ ni yad ma par u lan fapi binaw ni immoy ba ngiyal’ ni magothgoth. Ni kar mukungad ngaram u boch e nam, ma chiney e ke yoor yu ran’ i gamanman rorad nge binaw ma yad ma par ko tamdardar ko kanawo’ ko fayleng [“lukngun e fayleng,” NW].’” (Ezek. 38:10-12, BT) Ra taw ko ngiyal’ n’em ma ra yan i gagiyel e girdi’ rok Got ni yad ba thil u fithik’ e tin ni ka bay e girdi’, ni gowa bod ni yad bay u “lukngun e fayleng.” Ra guy e pi nam nem e re n’em ma dabiyog ni ngar athamgilgad, ya yad ra guy rogon ni ngar chamgad ngak e piin ni ke dugliyrad Jehovah nge piin ni yad be ayuweg e re ulung nem.

11. (a) Mang e thingar dab da paged talin u murung’agen e ngiyal’ nra buch boch ban’en riy u nap’an fare gafgow nib ga’? (b) Mang e ra rin’ e girdi’ u nap’an ni yad ra guy fapi n’em nra m’ug u lan e lang?

¹¹ Chiney e ngad weliyed e n’en ni migid nra buch. Machane, nap’an ni gad be weliy e pi n’ey ma dab mu pagtalin nder tamilangnag e Thin rok Got e ngiyal’ nra buch reb nge reb e pi n’ey riy. Machane, bod nra ka be buch reb e pi n’ey ndawori m’ay, ma ke tabab reb. Nap’an ni be yiiynag Jesus murung’agen e ngiyal’ ni ke chugur nga tomuren e re m’ag ney, me yog ni gaar: “Bay e pow ni bayi m’ug u mit e yal’, ngu mit e pul, ngu mit e pi t’uf. Ma pi nam nu roy u fayleng e bay ra pired ndakur nanged e n’en ni ngar rin’ed, ya kar rusgad nga lingan e day ni be pil nge day nib gel ni ke yib. Ma bayi aw e girdi’ nga but’ ko marus ko ngiyal’ ni baaram ni yad be sonnag e n’en ni be yib i yib nga daken e fayleng ni polo’; ma gelngin e pi n’en ni bay u lan e lang e bay ni pingegrad nga ranod ko gin ni gathi ir e yad be sor ngay. Ma aram me yib i m’ug e en ni Fak e Girdi’, ni be yib nga but’ u fithik’ bangi manileng ni ba’ gelngin nib gel ma be galgal ramaen.” (Luke 21:25-27; mu beeg e Mark 13:24-26.) Gur, nap’an nra lebug e re yiiy ney mab muun ngay bogi ban’en nra i m’ug u lan e lang nra k’aring e marus ko girdi’? Thingar da songad ngad guyed ko mang e ra buch. Machane, demtrug rogon, ma gad manang ni pi n’en ni yira guy e rra k’aring e marus ko pi toogor rok Got.

12, 13. (a) Mang e ra buch u nap’an nra yib Jesus “nib gel ma be galgal ramaen”? (b) Mang e ra rin’ e pi tapigpig rok Got e ngiyal’ nem?

¹² Mang e ra buch u nap’an nra yib Jesus “nib gel ma be galgal ramaen”? Aram e ngiyal’ nra tow’athnag e piin ni yad ba yul’yul’ me gechignag e piin ndar yul’yul’gad. (Matt. 24:46, 47, 50, 51; 25:19, 28-30) I yog Matthew ni u m’on ni mu’ Jesus i weliy murung’agen fare pow, me weliy fare fanathin ni murung’agen e saf nge kaming ni gaar: “Ngiyal’ nra yib e en ni Fak e Girdi’ riy ni ke pilung, ni ke un urngin e pi engel ngak, e bay par nga tagil’ nib pilung, ma urngin girdien e pi nam nu fayleng ni bay ni kunuyrad nga p’eowchen. Me ere weregrad ngar l’agruw ulunggad, ni bod rogon e en ni ma gafaliy e gamanman ni ma fek e saf nge chuwegrad u fithik’ e kaming: bayi tay e saf nga ba’ ni mat’aw rok, me tay e kaming nga ba’ ni gilay’ rok.” (Matt. 25:31-33) Mang e ra buch ko fapi saf nge fapi kaming? I museg Jesus fare fanathin rok ni gaar: “Pi cha’ ney [fapi kaming] e bay ni pi’rad ko gechig ndariy n’umngin nap’an; ma piin ni yad mmat’aw e bay ranod ko yafos ndariy n’umngin nap’an.”​—Matt. 25:46.

¹³ Mang e ra rin’ fapi kaming u nap’an ni yad ra nang ni ke taw nga nap’an ni ngan “pi’rad ko gechig ndariy n’umngin nap’an”? Yad ra ‘yor.’ (Matt. 24:30) Machane, mang e ra rin’ e pi walagen Kristus nge piin ni yad ba muun ngorad e ngiyal’ nem? Yad ra rin’ e n’en ni yog Jesus Kristus ni faani gaar: “Faanra tabab i m’ug e pi n’ey, mi gimed sak’iy ngam changargad nga lang, ya aram e ke chugur ni ngan chuwegmed u fithik’ e gafgow.” (Luke 21:28) Arrogon, ra taw ko ngiyal’ nem ma gad ra par nib  pagan’dad ya kad nanged ni ke taw nga nap’an ni ngan chuwegdad u fithik’ e gafgow.

BE GAL RAMAERAD KO GIN NI GOT E BE GAGIYEGNAG

14, 15. Mang maruwel e yira rin’ u tomuren nra tabab Gog nu Magog ni nge cham ko girdi’ rok Got? Uw rogon ni yira rin’ e re n’ey?

¹⁴ Mang e ra buch u tomuren nra tabab Gog nu Magog ni nge cham ko girdi’ rok Got? I weliy Matthew nge Mark murung’agen e re n’ey nra gaargow: “Bayi l’og [e En Fak e Girdi’] e pi engel rok ngar kunuyed girdien Got ni ke mel’eg Got u lan e aningeg yangi n’en u fayleng ni ir e ma thow e nifeng riy u barba’ e fayleng nge yan i mada’ nga barba’.” (Mark 13:27; Matt. 24:31) Re maruwel ney ni ngan kunuy girdien Got e gathi be yip’ fan e ngiyal’ nsom’on nni tabab i mel’eg e pi Kristiano ni kan dugliyrad. Ku der yip’ fan e ngiyal’ ni yira tay e bin tomur e pow ko tin ni ke magey ko girdien fachi ulung. (Matt. 13:37, 38) Ya bin tomur e pow ni yira tay ko tin ni ke magey ko girdien fachi ulung e yira rin’ u m’on nra tabab fare gafgow nib ga’. (Rev. 7:1-4) Ere, mang e biney e maruwel ni ngan kunuy girdien Got ni faani weliy Jesus murung’agen? Aram e ngiyal’ ni yira pi’ e tow’ath ko tin ni ka bay ko girdien fare 144,000, ngemu’ ma ranod nga tharmiy. (1 Thess. 4:15-17; Rev. 14:1) Ra buch e re n’ey u ba ngiyal’ u tomuren ni ke tabab Gog nu Magog ni nge cham ko girdi’ rok Got. (Ezek. 38:11) Aram e ngiyal’ nra lebug fapi thin ni yog Jesus ni faani gaar: “Ma tirok Got e girdi’ e bayi gal ramaerad ni bod e yal’ ko gin ni Chitamangirad e be gagiyegnag.”​—Matt. 13:43. *

¹⁵ Boor e piin ni yad ma un ko pi yurba’ i teliw ko Kristiano ni Googsur ni yad ma lemnag ni yira fek e piin Kristiano nga tharmiy ni ka yad be fanay downgin e girdi’. Ku yad ma lemnag ni yad ra guy Jesus ni ke sul ni nge gagiyegnag e fayleng. Machane, ba tamilang nnap’an ni yog e Bible ni “bayi m’ug e pow ko en ni Fak e Girdi’ u lan e lang” ma ra  yib Jesus “u daken e manileng,” ma be yip’ fan ndariy be’ nrayog ni nge guy. (Matt. 24:30) Maku reb e, be yog e Bible ni “n’en nni ngongliy ko ufin nge racha’ e dabiyog ni nge yan nga lan suwon Got.” Ere, piin ni yira fekrad nga tharmiy e ‘lan ba talab e bay nthilyeg dowrad riy, ni bod machregin lan mit be’ ni talab, ko ngiyal’ ni bay non e bin tomur e rappa riy.’ * (Mu beeg e 1 Korinth 15:50-53.) Ere, nap’an nra taw ko ngiyal’ nem ma yira kunuy e piin ni kar mageygad ko piin ni kan dugliyrad ni ka yad bay u fayleng nga taabang u taaboch i ngiyal’ i ban’en.

16, 17. U m’on ni nge mabgol fare Fak e Saf u tharmiy, ma mang e thingari buch nsom’on?

¹⁶ Nap’an nra thap urngin fare 144,000 e piin ni kan dugliyrad nga tharmiy, ma aram e ngiyal’ ni yira mu’nag e pi n’en ni ka bay ni ngan rin’ u m’on ni nge tabab fare madnom ko m’agpa’ nra tay fare Fak e Saf u tharmiy. (Rev. 19:9) Machane, bay ban’en nra buch u m’on nra buch e re n’ey. Dab mu pagtalin ni u m’on ni yira fek e tin ni ke magey ko fare 144,000 nga tharmiy, ma ra cham Gog ko girdi’ rok Got. (Ezek. 38:16) Ere, mang e ra buch? Ra m’ug ni gowa dariy gelngin e girdi’ rok Got u fayleng ni ngar ayuweged yad. Machane, yad ra fol ko fapi thin nnog u nap’an Jehoshafat ni Pilung ni be gaar: “Gathi gimed e ngam chamgad u fithik’ e re mahl ney, kemus ni ngam fal’eged rogomed nga tagil’med mi gimed son; bay mu guyed ni Somol e nge gelnagmed. Girdi’ nu Judah ngu Jerusalem, dab mu tuntungad fa mu rusgad. Mmarod ko mahl, ma bayi un Somol ngomed!” (2 Kron. 20:17, BT) Machane, ba thil e n’en ni yira rin’ u tharmiy. Baaray e n’en ni be yog e Revelation 17:14 nra buch ko pi toogor rok e girdi’ rok Got u nap’an ni ke yan urngin e piin ni kan dugliyrad nga tharmiy. Be gaar: “Bay ra chamgad ngak fare Fak e Saf; machane fare Fak e Saf nge piin ni ke piningrad ni ke mel’egrad, ni piin ni yad ba yul’yul’ ma yad be un ngak e bay ra gelgad ngorad, ya ir e Somol ko pi somol nge Pilung ko pi pilung.” Ere, ra yib Jesus ni ke un fare 144,000 ngak ni ngar ayuweged e girdi’ rok Got u roy u fayleng.

¹⁷ Fare mahl ni Armageddon e aram e re mahl nra n’uf fithingan Jehovah nib thothup. (Rev. 16:16) Ra taw ko ngiyal’ nem, ma urngin e piin ni yad bod fapi kaming e “bay ni pi’rad ko gechig ndariy n’umngin nap’an.” Ma aram e ngiyal’ nra chuw urngin mit e kireb u fayleng, ma aram min thapeg fare ulung nib ga’ nga barba’ fare gafgow nib ga’. Tomuren urngin e pi n’ey, ma aram e ngiyal’ nrayog ni nge buch e n’en ni kan weliy murung’agen u tungun fare babyor ni Revelation, ni aram e nge mabgol fare Fak e Saf. (Rev. 21:1-4) * Urngin e piin ni yad ra magey ni yad ba fas u fayleng e yad ra fel’ u wan’ Got mi i t’ufegrad. Rib gel e felfelan’ ni yira tay u nap’an e re madnom ko m’agpa’ nem ni yira tay u tharmiy! Gad gubin ni gad be athapeg ni nge papey nge taw ko ngiyal’ nem!​—Mu beeg e 2 Peter 3:13.

18. Chiney ni gad be chugur i yan ko fapi n’em ni kan yiiynag murung’agen e mang e susun ni ngad rin’ed?

¹⁸ Gad manang ndab ki n’uw nap’an me buch urngin e pi n’ey. Ere, ra bagadad ma mang e susun ni nge rin’ e chiney? Nni thagthagnag nga laniyan’ apostal Peter ni nge yoloy ni gaar: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got mi gimed athamgiliy nrogon nrayog romed nge papey nge taw ngay, . . . Pi tafager rog, n’umngin nap’an ni gimed be par ni gimed be sonnag e re Rran nem e nguum athamgilyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got.” (2 Pet. 3:11, 12, 14) Ere, ngad dugliyed u wan’dad ni ngad pared nib machalbog e liyor ni gad be tay ngak Got, ma gad ayuweg fare Pilung ko Gapas.

[Boch e thin nra tamilangnag murung’agen]

[Deer ni ngan pi’ e fulweg riy]