1, 2. Uw rogon ni ke fil Got ngodad rogon ni ngad t’ufeged, nrogon ni yog apostal John?

 BA GA’ ni yima yog ni bin th’abi fel’ e kanawo’ nrayog ni nge skulnag reb e matam pi fak riy e, u daken e ngongol rok. I yog apostal John ni “ba t’uf Got rodad nge girdi’ ni bochan e Got e som’on ni at’ufegdad.” (1 John 4:19) Ere, ba tamilang ni Jehovah e ir e ke dag e bin th’abi fel’ e kanawo’ ngodad u rogon ni ma t’ufeg reb e matam pi fak. Ma re n’ey e rayog ni nge ayuwegdad ni ngki t’uf Got rodad.

² Mang fan nrayog ni nga dogned ni Got e “som’on ni at’ufegdad”? I yog apostal Paul ni gaar: “Got e ke dag ngodad gelngin feni ri gadad ba t’uf rok, ya ka gadad be par ni gadad bogi tadenen me yan i yim’ Kristus ni fan ngodad!” (Rom. 5:8) Re n’em ni rin’ Jehovah ni aram e pi’ Fak ni nge biyuliydad e be m’ug riy rarogon e bin riyul’ e t’ufeg. Faanra bay e bin riyul’ e t’ufeg rok be’ ma ir be’ nib gol, ma ma pag fan ir ni fan ngak e piin ni yad ba t’uf rok. N’en ni ke rin’ Got e ke bing e kanawo’ ngodad nrayog ni ngad chugurgad ngak, me yib angin e t’ufeg rok ngodad, miki yag ni nge t’uf rodad.​—1 John 4:10.

3, 4. Susun ni uw rogon ni ngad daged nib t’uf Got rodad?

³ T’ufeg e aram e bin th’abi lingagil i fel’ngin Jehovah, ere aram fan  ni yog Jesus ni bin th’abi ga’ fan e motochiyel ni ke pi’ Got e aram fare motochiyel ni be gaar: “Thingari t’uf rom Somol, ni ir e Got rom, u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30) Gad be fil ko pi thin ney ni yog Jesus ni faanra nge t’uf Got rodad, mab muun ngay e n’en ni bay u gum’ircha’dad. Baadag Jehovah ni ngad pigpiggad ngak u polo’ i gum’ircha’dad. Machane, gad manang ni faanra nge t’uf Got rodad ma kub muun ngay lanin’dad, nge lem rodad, nge gelngidad. Re n’ey e be yip’ fan ni bin riyul’ e t’ufeg ni gad ma dag ngak Got e gathi kemus ni ban’en ni gad ma thamiy u gum’ircha’dad. Ya kub muun ngay e pi n’en ni gad ma lemnag nge ngongol rodad. I yog Mikah ni profet ni ireray e n’en ni baadag Jehovah ni ngad rin’ed.​—Mu beeg e Mikah 6:8.

⁴ Ere, uw rogon ni ngad daged nriyul’ nib t’uf Jehovah rodad? Thingari par ni ir e ba m’on u lan e yafas rodad. I yog Jesus ni thingari m’ug e re n’ey ko pi n’en ni gad ma rin’, nge pi n’en ni gad ma lemnag. Fa binem e article e kad filed riy aningeg e kanawo’ ni ke dag Jehovah riy gelngin nri gad ba t’uf rok. Ere, chiney e ngad weliyed rogon nrayog ni ngad daged nriyul’ nib t’uf Jehovah rodad nge rogon nrayog ni ngad gelniged e t’ufeg rodad ngak.

5. Nap’an ni gad ra lemnag urngin ban’en ni ke rin’ Jehovah ni fan ngodad, ma mang e gad baadag ni ngad rin’ed?

⁵ Nap’an nra pi’ be’ reb e tow’ath ngom, ma mang e ga ma rin’? Dabisiy ni ga ma pining e magar riy ngak. Maku reb e, ga ra maruwel ko fare tow’ath ni ke pi’ ngom ma dab mu darifannag. I yoloy James nreb i gachalpen Jesus ni gaar: “Urngin e tin nib fel’ ni be pi’ Got ngodad nge urngin e tow’ath nrib manigil ma be yib u tharmiy ngodad, ni be yib rok Got nga but’, ni ir e sunumiy urngin ban’en ni be gal ramaen u lan e lang. Mi ir e der ma thil, ma der pi’ keru’ ngodad ngad pired u fithik’ e lumor.” (Jas. 1:17) Gubin ngiyal’ ni ma pi’ Jehovah e tin nib t’uf rodad, ya nge yag ni ngad pared ni gad ba fas ma gad ba felfelan’. Bochan e re n’ey ma aram fan ni gad baadag ni ngad daged ngak nib t’uf rodad.

6. Faanra nga i tow’athnag Jehovah piyu Israel, ma mang e thingar rin’ed?

⁶ Bokum miriay e duw ni i par piyu Israel u tan pa’ Jehovah, ma gubin ngiyal’ ni i tow’athnagrad ma be pi’ e tin nib t’uf ko par rorad nge pigpig ni yad be tay ngak. (Deut. 4:7, 8) Machane, i yog ngorad nra i tow’athnagrad ni faanra ur folgad ko pi Motochiyel rok, nib muun ngay ni ngaur pied ngak e ‘tin som’on e grain rorad ni kar t’ared.’ (Ex. 23:19) Faanra fol piyu Israel ko re n’ey ma aram e yad be dag nib ga’ fan u wan’rad e t’ufeg ni ke dag Jehovah ngorad nge pi tow’ath ni ke pi’ ngorad.​—Mu beeg e Deuteronomy 8:7-11.

7. Uw rogon nrayog ni ngad fanayed e “tin nib th’abi fel’” ban’en ni bay rodad ni ngad daged riy ngak Jehovah nriyul’ nib t’uf rodad?

⁷ Ere, uw rogodad? Yugu aram rogon ni dakurud pied e maligach e ngiyal’ ney, machane rayog ni ngad daged nib t’uf Got rodad u daken e “tin nib th’abi fel’” ban’en ni bay rodad ni gad ma pi’ ngak. (Prov. 3:9) Mang boch e kanawo’ nrayog ni ngad rin’ed e re n’ey riy? Rayog ni ngad fanayed boch ban’en ni bay rodad ara da pied boch e salpiy ni ayuw ni fan ko fare maruwel ni machib ni yibe rin’ ko gin ni gad be par riy nge ga’ngin yang e fayleng. Ireray reb kanawo’ nrayog ni ngad daged riy ngak Jehovah nriyul’ nib t’uf rodad, ndemtrug ko boor ban’en rodad fa danga’. (2 Kor. 8:12) Machane, ku bay boch e kanawo’ nrayog ni ngad daged riy ngak Jehovah nriyul’ nib t’uf rodad.

8, 9. Uw rogon ma pagan’ rodad ko pi n’en ni ke micheg Jehovah e ku bay rogon ko t’ufeg rodad ngak? Mu weliy ban’en ni ke buch.

⁸ Am lemnag e n’en ni puguran Jesus ngak pi gachalpen ni aram e ngar m’oneged Gil’ilungun Got u wan’rad, ma dabi magafan’rad ko n’en ni ngar ked nge mad ni nga ron’ed. I yog ngorad ni  en Chitamangiy e manang ni pi n’ey e bogi ban’en nib t’uf rodad. (Matt. 6:31-33) Rogon ni gad ma dag gelngin nib pagan’dad ko re thin ney e be dag gelngin feni t’uf Jehovah rodad, ni bochan ni t’ufeg nge pagan’ e l’agruw i ban’en ni ma maruwel u taabang. Dabiyog ni nge t’uf be’ rom ni faanra der pagan’um ngak. (Ps. 143:8) Ere, rayog ni ngad fithed gadad ni nge lungudad: ‘Be m’ug ko pi n’en ni gu be nameg nge pi n’en ni gu be rin’ nriyul’ nib t’uf Jehovah rog, fa? Gubin e rran ni gu ma taga’ ngak Jehovah ni nge pi’ e tin nib t’uf rog, fa?’

⁹ Immoy reb e walag ni ka nog Mike ngak ni dag nib t’uf Jehovah rok ma be pagan’ ngak. Nap’an ni kab bitir ma baadag ni nge yan nga yugu reb e nam ni nge machib u rom. Mus nga tomuren ni un ko mabgol nge fakay l’agruw e bitir, ma ka baadag ni nge rin’ e re n’ey. Ere, nap’an nra beeged chon e tabinaw rok boch e article nge boch e babyor rodad ni be weliy murung’agen boch e walag ni ka ranod ko yungi n’en nib t’uf e ayuw riy ko machib ni ngar pied e ayuw, ma aram mar dugliyed ni ngar momnaged e par rorad. Ere, ra pied e naun rorad ni chuway’ ngemu’ mi yad chuw nga ranod ra pired nga reb e naun nib achig. Ma aram me achignag Mike e siyobay rok, me fil rogon ni nge rin’ boch e maruwel riy ko Internet u nap’an ni bay u yugu reb e nam. Tomuren e re n’ey ma aram me chuw Mike nge chon e tabinaw rok nga ranod ra pired nga yugu reb e nam ni ngar pied e ayuw ko machib. L’agruw e duw nga tomuren me yog Mike ni gaar: “Kug guyed nriyul’ fapi thin ni yog Jesus ni bay ko Matthew 6:33.”

10. Mang fan nib fel’ ni ngaud fal’eged i lemnag e pi n’en ni gad ma fil u murung’agen Jehovah ni bod ni rin’ David ni Pilung?

¹⁰ Sogonap’an 3,000 e duw ni ke yan me yoloy David ni Pilung ni gaar: “Lan e lang e rib gagiyel ni be gilnag buguwan Got! Rib gagiyel ni be dag e n’en ni ke sunumeg!” Miki yog ni gaar: “Motochiyel rok Somol e rib yal’uw; ra pasignag lanin’uy me pi’ gelngin; ma tin ni be yog ni murung’agen Somol e ba riyul’ ma ma pi’ e gonop ngak e piin ndariy rorad.” Mang angin ni yib ngak David ni bochan ni i fal’eg i lemnag e pi motochiyel rok Got ni bay e gonop riy nge pi n’en ni ke sunmiy? I ulul ngay ni gaar: “Mang e gu par nib fel’ u wun’um e thin ni be yib u l’ugunag nge pi n’en ni gu be lemnag. A Somol, ni gur e gu be naf nga tan paam mi gur e Tabiyul rog!” Bochan e re n’ey ma aram mi ri chugur e tha’ u thilin David nge Jehovah.​—Ps. 19:1, 7, 14.

11. Uw rogon ni ngad fanayed e tamilangan’ ni ke pi’ Jehovah ngodad ni ngad daged nriyul’ nib t’uf rodad? (Mu guy e sasing ni bay u tabolngin e re article ney.)

¹¹ Ngiyal’ ney e gad ba tow’ath ni bochan e boor ban’en ni ke fil Jehovah ngodad u murung’agen e pi n’en ni ke sunmiy nge rogon ni be lebug e n’en nib m’agan’ ngay. Re fayleng ney e ba ga’ ni ma pi’ e athamgil nga laniyan’ e girdi’ ni ngar nameged e skul nib tolang. Machane, kad guyed ni boor e girdi’ ni kar nameged e pi skul ney e daki mich Got u wan’rad maku daki t’uf rorad. Machane, Bible e gathi kemus ni ma pi’ e athamgil nga lanin’dad ni nge yag e tamilangan’ ngodad, ya ku ma ayuwegdad ni nge yag e gonop ngodad ma gad nang fan e pi n’en ni gad be fil. Re n’ey e be yip’ fan nib t’uf ni ngad filed rogon ni ngad maruwelgad ko tamilangan’ ni ke pi’ Got ngodad, ya nge yag ni yib angin ngodad nge ku boch e girdi’. (Prov. 4:5-7) Ba m’agan’ Got ngay ni nge “urngin e girdi’ [mar] thapgad ngak [mar] nanged e tin nib riyul’.” (1 Tim. 2:4) Faan gad ra athamgil u rogon nrayog rodad ni ngad machibnaged fare thin nib fel’ ni murung’agen Gil’ilungun Got, ma gad ayuweg e girdi’ ni ngar nanged e n’en nib m’agan’ Got ngay ni fan ko girdi’, ma aram e gad be dag nriyul’ nib t’uf Jehovah rodad.​—Mu beeg e Psalm 66:16, 17.

12. Uw rogon ni dag reb e fel’ yangaren nib ga’ fan u wan’ e pi n’en ni ma pi’ Jehovah ni fan ngodad?

¹² Mus ngak e piin fel’ yangaren nrayog ni ngar daged nriyul’ nib t’uf Jehovah rorad. Rayog ni ngar daged nib ga’ fan u wan’rad e pi n’en ni ke pi’  Jehovah ngorad nge pi n’en ni ke fil ngorad. I yog Shannon nap’an ni ke gaman 11 e duw rok, mar uned reb e ppin ni walagen nib ilal ngak, nge gallabthir rorow ko fare District Convention nni tay u reb e duw ni kenggin e “Mu Yul’yul’ ngak Got.” Nap’an e re convention nem, mi nog ko pi fel’ yangaren ni nga ranod ra pared nga boch e chiya ni kan tay ni fan ngorad. Ke rus Shannon, machane me rin’ e n’en ni ka nog. Kari gin u nap’an nni pi’ fare ke babyor ni kenggin e Questions Young People Ask​—Answers That Work ngak urngin e fel’ yangaren ni kar pared ko pi chiya nem. Bochan e re n’ey, ma mang e lemnag Shannon u rarogon Jehovah Got? I yog ni gaar: “Aram e ngiyal’ ni fini tamilang u wan’ug nriyul’ ni bay Jehovah, ma ri gub t’uf rok.” Ki yog Shannon ni gaar: “Ri gad ba felfelan’ ni ma pi’ Jehovah Got boch e tow’ath ngodad ni aram feni fel’!”

13, 14. Mang e susun ni ngad rin’ed u nap’an nra fonownagdad Jehovah?

¹³ Be puguran e Bible ngodad ni gaar: “Somol e ma yal’uweg e piin ni yad ba t’uf rok, ni bod rogon ba matam ni ma yal’uweg be’ ni fak ni ba felfelan’ ngak.” (Prov. 3:12) Ere, nap’an nra yal’uwegdad Jehovah ma mang e susun ni ngad rin’ed? I yoloy apostal Paul ni gaar: “Faan bayi gechignagdad Got, ma gadad finey e ngiyal’ i n’em nre n’em ni ke yib ngodad e ban’en ni nge kireban’dad ngay.” Nap’an ni yog Paul e pi thin ney, ma gathi be darifannag feni ga’ fan e fonow ni yima pi’ ngodad, ya ki ulul ngay ni gaar: “Machane faani tomur riy ma fa piin ni mit nem e gechig e ke yal’uwegrad e ke yib wenegan ngorad ni aram e ke gapas lanin’rad ma ke yal’uw pangirad u mit Got.” (Heb. 12:11) Faanra ba t’uf Jehovah rodad, ma thingar da kol ayuwgad ndab da siyeged e fonow rok ara da damumuwgad u nap’an nra fonownagdad. Machane, bay boch e girdi’ nib mo’maw’ rorad ni ngar rin’ed e re n’ey. Machane, rayog rodad ni faanra riyul’ nrib t’uf Got rodad.

¹⁴ Boor e girdi’ u nap’an Malaki ni ur darifannaged e pi fonow ni i pi’ Got ngorad. Yad manang e n’en ni be yog e Motochiyel u murung’agen rogon ni ngaun ognag e maligach. Machane da ur folgad riy, ere aram fan ni fonownagrad Jehovah. (Mu beeg e Malaki 1:12, 13.) Bin riyul’ riy e, boor yay ni fonownagrad Jehovah machane dar motoyilgad ngak. Ere, baaray e n’en ni yog ngorad: “Bay gu bucheg waathmed. Ma bay gu gagiyegnag nge dab ki fel’ rogomed ko pi n’en nib fel’ ni be yog ngomed ni bochan e gimed e prist. Kug mu’ i gagiyegnag ni nge kireb, ya damur tiyed ngan’med e tin ni ku gog ni ngam rin’ed.” (Mal. 2:1, 2) Ere, faanra dab ud folgad ko fonow rok Jehovah ni ma pi’ ngodad u fithik’ e t’ufeg ma rayog ni nge yib wenegan nib kireb ngodad.

15. Mang reb e lem ni ke garer e ngiyal’ ney nthingar da siyeged?

¹⁵ Ngiyal’ ney nra be’ ma yigoo ir e ma lemnag ir e de mom ni ngan weliy murung’agen e fonow ara ngan fol ko fonow ni yima pi’. Boor e girdi’ ndubrad ni ngan yal’uwegrad ara nog ngorad e n’en ni ngar rin’ed. Ku bay boch i yad ni ma motoyil ko fonow ni bochan e ban’en nthingari rin’. Machane, piin Kristiano e kan fonownagrad ni  thingar dab ra “folgad ko ngongol ni yibe rin’ u roy u fayleng.” Thingar ra nanged mar rin’ed e “tin nib m’agan’ Got ngay.” (Rom. 12:2) Ma fanay Jehovah e ulung rok ni nge fonownagdad u murung’agen boch ban’en ni gad ma rin’ ni bod rogon e ngongol nsusun e nga i dag e piin pumoon nge piin nib pin ngorad, nge piin ni gad ma chag ngorad, nge pi n’en ni gad ma chuweg e chalban rodad ngay. Faanra m’agan’dad ko pi fonow ney ma gad fol riy, ma aram e gad be dag ni gad be pining e magar ngak Jehovah ko pi fonow ney ni ma pi’ ngodad maku gad be dag ngak nib t’uf rodad u polo’ i gum’ircha’dad.​—John 14:31; Rom. 6:17.

16, 17. (a) Mang fan ni ngaud lemnaged e n’en nib m’agan’ Jehovah ngay u m’on ni ngad dugliyed ban’en ni ngad rin’ed? (b) Uw rogon ni dag piyu Israel nde t’uf Jehovah rorad ma der pagan’rad ngak?

¹⁶ Nap’an nra nang reb e bitir ni ke yan nga bang ni bay e riya’ riy, me mil ni ka chingiyal’ nem ko gin ni bay e gallabthir rok riy. Nap’an nra ilal boch fare tir, ma aram me fil rogon ni nga i dugliy boch ban’en ni nge rin’ ni ir rok. Machane, piin nib chugur e tha’ u thilrad e gallabthir rorad e ba ga’ ni yad ma fith laniyan’ e gallabthir rorad u m’on ni ngar dugliyed ban’en ni ngar rin’ed. Ere, ku arrogodad. Ke pi’ Jehovah gelngin nib thothup ngodad ni ir e ma k’aringdad ni nge ‘m’agan’dad ngay ni ngad folgad ko tin ni be finey.’ Ere, faanra dab da lemnaged e n’en nib m’agan’ Jehovah ngay u m’on ni ngad dugliyed ban’en ma aram e be m’ug riy nde t’uf rodad ma der pagan’dad ngak.​—Fil. 2:13.

¹⁷ Immoy bayay u nap’an Samuel ni war piyu Israel ko cham nra ted piyu Filistia. Ngiyal’ nem e ke t’uf ni nge ayuweg Got e girdi’ rok, me yoror rorad. Ere, mang e ra rin’ed? I lungurad: “Nga darod nga Shiloh ngad feked fare kahol ko m’ag rok Somol nge un ngodad nge ayuwegdad u pa’ e pi toogor rodad.” Ere, mang e buch nga tomuren? I “war piyu Israel nga ranod nga taferad ni yad be mil. Ma pire’ e girdi’ ni yim’ ya 30,000 e salthaw nu Israel ni yim’. Me fek e pi Filistine fare kahol ko m’ag rok Somol.” (1 Sam. 4:2-4, 10, 11) Sana fek piyu Israel fare Kahol ko M’ag nga ranod ko mahl ni bochan e yad be lemnag nra ayuwegrad Jehovah me yoror rorad. Machane, bin riyul’ riy e dar ninged e ayuw ngak Jehovah, maku dar fithed laniyan’. Ya ra rin’ed e n’en ni yad be lemnag nib fel’ ni ngar rin’ed, ma aram me yib wenegan nib kireb ngorad.​—Mu beeg e Proverbs 14:12.

18. Mang e be yog e Bible u murung’agen rogon ni ma pagan’dad ngak Jehovah?

¹⁸ I dag fare psalmist nrib t’uf Jehovah rok ma be pagan’ ngak, ya yoloy ni gaar: “Bay ug par ni Got e be l’agan’ug ngak, ma aram e bay gu pining e sorok ngak, yi ir e Taayuw rog mi ir e Got rog. Kari kireban’ug, ere ke sulan’ug ngak.” (Ps. 42:5, 6) Ere, riyul’ nrib t’uf Jehovah rok! Me gur, rib t’uf Jehovah rom, ma gubin ngiyal’ ni ga ma taga’ ngak, fa? Mus ni faanra lungum arrogon, maku rayog ni ngkum gelnag boch e pagan’ rom ngak, ya be gaar e Bible: “Mu pagan’um ngak Somol u polo’ i lanin’um, ma ri dab mu tor ko tin ni ga be finey ni ga manang. Nguum lemnag Somol u fithik’ urngin ban’en ni ga be rin’, me dag ngom e bin nib mat’aw e kanawo’.”​—Prov. 3:5, 6.

19. Uw rogon ni ngad daged ngak Jehovah nriyul’ nib t’uf rodad?

¹⁹ Ke dag Jehovah ngodad rogon ni ngad t’ufeged ni bochan e ir e som’on ni at’ufegdad. Ere, dab da paged talin e re n’ey. Ma gad dag ngak nib t’uf rodad u ‘polo’ i gum’ircha’dad, ngu polo’ i lanin’dad, ngu polo’ i lem rodad, ngu polo’ i gelngidad.’​—Mark 12:30.