1. Mang e pi’ apostal John e athamgil nga laniyan’ e pi Kristiano ni ngar lemnaged, ma mang fan?

 FAPI thin ni yog apostal John ni bay ko 1 John 3:1 e bay rogon ni ngari ga’ fan u wan’dad. I yog John fapi thin ni be gaar, “a mu guyed nga rogon fadad t’uf rok e en ni Chitamangiy” ni nge pi’ e athamgil nga laniyan’ e piin Kristiano ni ngar lemnaged rogon nge gelngin nri yad ba t’uf rok Got. Faan gad ra lemnag gelngin nri gad ba t’uf rok Jehovah ma rayog ni ngari gel e t’ufeg rodad ngak miki chugur e tha’ u thildad.

2. Mang fan ni bay boch e girdi’ nib mo’maw’ ni ngar nanged gelngin nri yad ba t’uf rok Got?

² Machane, bay boch e girdi’ nib mo’maw’ ni nge tamilang u wan’rad rogon ni ma t’ufegrad Got. Yad ma lemnag ni Got e ir be’ ni ngan rus ngak min fol rok. Maku reb e, bochan boch e machib ni kan fil ngorad nde puluw, ma aram fan ni yad ma lemnag ni Got e ir be’ nib kireb, maku dabiyog ni nge t’uf rodad. Ku bay boch e girdi’ ni yad ma lemnag ndariy e gin nra mus e t’ufeg rok Got riy. Ere, demtrug e n’en ni yad ra rin’, maku ra ur pared ni yad ba t’uf rok. Machane, nap’an nim fil e Bible, ma ga nang ni t’ufeg e aram e bin th’abi lingagil i fel’ngin Jehovah, ma bochan nri gad ba t’uf rok ma aram fan ni ke pi’ Fak ni nge biyuliydad. (John 3:16; 1 John 4:8) Machane, rayog ni nge  mo’maw’ ni ngam nang gelngin nri gab t’uf rok Got ni bochan e gin nim ilal riy nge rogon nni chuguliyem.

3. Mang e ra tamilang u wan’dad ma aram e fin rayog ni ngad nanged rogon gelngin nri gad ba t’uf rok Got?

³ Ere, mang boch e kanawo’ ni ma t’ufegdad Jehovah riy? Ra ngad nanged e fulweg ko re deer ney, ma som’on e thingari tamilang u wan’dad rogon e tha’ u thildad Jehovah Got. Gad manang ni Jehovah e ir e ke Sunmiy e girdi’. (Mu beeg e Psalm 100:3-5.) Aram fan ni be yog e Bible ni “Got e chitamangin” Adam, miki fil Jesus ngak pi gachalpen ni nga u rogned ni Got e ‘Chitamangirad ni bay u tharmiy.’ (Luke 3:38; Matt. 6:9) Bochan ni Jehovah e ir e Ke Pi’ e Yafas ngodad, ma aram fan ni ir e Chitamangidad, maku aram fan nrayog ni nga nog ni tha’ ni bay u thildad e bod rogon e tha’ u thilin ba matam nge pi fak. Ere, gad ba t’uf rok Jehovah ni bod rogon ba matam nib t’uf pi fak rok.

4. (a) Ba miti mang matam Jehovah? (b) Mang e gad ra weliy ko re article ney nge bin migid?

⁴ Bay boch e girdi’ nib mo’maw’ ni ngar taareb rogonnaged e chitamangirad ngak Jehovah nge rogon ni ma t’ufeg e girdi’ ni bochan e i gafgownagrad e chitamangirad u nap’an ni ka yad bbitir, ma pi n’ey e ke par u lanin’rad ndab ki chuw. Rib gel e kireban’ ko re n’ey. Machane, gad manang ni gathi aram rogon Jehovah. (Ps. 27:10) Ma faan gad ra nang rogon ni ma t’ufegdad nge rogon ni ma ayuwegdad, ma rayog ni nge ayuwegdad e re n’ey ni ngad chuchugurgad ngak. (Jas. 4:8) Re article ney e gad ra weliy riy aningeg e kanawo’ ni ma dag Jehovah riy nriyul’ ni gad ba t’uf rok. Ma bin migid e article e ku gad ra weliy riy aningeg e kanawo’ nrayog ni ngad daged riy ngak Jehovah nriyul’ nib t’uf rodad.

5. Mang e yog apostal Paul ngak piyu Athens u murung’agen Got?

⁵ Nap’an ni immoy apostal Paul u Athens u Greece, me guy nre mach nem e rib sug ko liyos, ma ma lemnag e girdi’ u rom ni pi liyos nem e ra yognag e yafas ngorad nge tin nib t’uf ko par rorad. Bochan e re n’ey ma aram me yog Paul ngorad ni gaar: “I Got ni ir e sunumiy e fayleng nge urngin ban’en ni ba’ riy . . . e ke pi’ e yafos nge pogofan nge urngin ban’en ngak e girdi’. . . . Ya Fithik’ Got e gadad be par riy ma gadad be mithmith riy ma gadad ba’ riy.” (Acts 17:24, 25, 28) Arrogon, bochan ni gad ba t’uf rok Jehovah ma aram fan ni ma pi’ “urngin ban’en” nib t’uf rodad ya nge yag nda pared ni gad ba fas. Am fal’eg i lemnag e n’en ni be yip’ fan e re thin ney.

6. Uw rogon ni be m’ug gelngin nri gad ba t’uf rok Got u rogon ni ke sunmiy e fayleng? (Mu guy e sasing ni bay u tabolngin e re article ney.)

⁶ Am lemnag rogon e re fayleng ney ni ke Sunmiy Jehovah, “ke pi’ ngak e girdi’.” (Ps. 115:15, 16) Boor e salpiy ni ke fanay e piin llowan’ ni fan e ngar gayed boch e planet ara boch ban’en ni bay u lan e lang ni taareb rogon ko re fayleng ney ni gad be par riy. Yugu aram rogon ni bokum miriay e pi planet ney ni kan pirieg, machane ke yan i aw nib m’ay fan ni bochan e dariy reb nrayog ni nge par e girdi’ riy. Yigoo re fayleng ney ni gad be par riy e yugu ba thil u fithik’ urngin ban’en ni ke sunmiy Got. Ya kemus e gin nrayog ni nge par e girdi’ riy nib fel’ rogon, ma kun sunmiy nib fel’ rogon gubin ban’en riy, mab fel’ yaan, ma rayog ni nge par e girdi’ riy ndabi buch ban’en rorad ma yad ba felfelan’. (Isa. 45:18) Re n’ey e be dag gelngin nri gad ba t’uf rok Jehovah.​—Mu beeg e Job 38:4, 7; Psalm 8:3-5.

7. Uw rogon ni ma m’ug nriyul’ ni gad ba t’uf rok Got u rogon ni ke sunmiydad?

⁷ Yugu aram rogon ni ke pi’ Jehovah bang nrib manigil ni ngad pared riy, machane manang ni gathi kemus e n’en nib t’uf rodad. Faanra i guy reb e bitir ni be t’ufeg e gallabthir rok ma yow be tiyan’ ngak, ma aram e rayog ni nge par nib pagan’. I sunmiy Jehovah e girdi’ ni yad bod yaan, ngemu’ miki tayrad nrayog ni ngar nanged ni be t’ufegrad ma be ayuwegrad. (Gen. 1:27) Ki yog  Jesus ni gaar: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad.” (Matt. 5:3) Bochan ni Jehovah e ir e Chitamangidad ni gad ba t’uf rok, ma aram fan ni ma “pi’ urngin ban’en ngodad ni be fel’ rogodad riy” ni fan ko par rodad nge pigpig ni gad be tay ngak.​—1 Tim. 6:17; Ps. 145:16.

8. Mang fan nrayog ni ngad sapgad ngak fare ‘Got nib yul’yul’’ ni nge t’ufegdad?

⁸ Pi matam e ba t’uf pi fakrad rorad ma yad baadag ni ngar ayuweged yad ndab ni bannagrad. Machane, boor e gallabthir nder yag ni ngar pow’iyed pi fakrad nib fel’ rogon ni bochan e mus ngorad ma darur folgad ko pi motochiyel ni bay u lan e Thin rok Got. Ere, aram fan nder yag ni ngar pirieged e felfelan’ maku yad be par ni ke balyangan’rad ko n’en ni ngar rin’ed. (Prov. 14:12) Machane, Jehovah e ir ba ‘Got nib yul’yul’.’ (Ps. 31:5) Ba t’uf pi fak rok ma baadag ni nge fil e tin riyul’ ngorad me pow’iyrad ko pi n’en ni yad ma rin’ u lan e yafas rorad, nib ga’ ni pi n’en ni bay rogon ko liyor ni yad ma tay ngak. (Mu beeg e Psalm 43:3.) Mang boch ban’en nib riyul’ ni ke fil Jehovah ngodad, ma uw rogon ni be m’ug ko re n’ey nriyul’ ni gad ba t’uf rok?

9, 10. Uw rogon ni ke dag Jehovah ni gad ba t’uf rok u rogon ni ke ayuwegdad ni ngad nanged e tin riyul’ u (a) murung’agen? (b) murung’agdad?

⁹ Bin som’on e, ke fil Jehovah e tin riyul’ ngodad u murung’agen. Ke yog fithingan ngodad, ma re ngachal ney e kemus e re ngachal ni boor yay ni ke m’ug u lan e Bible. Aray rogon ni ma chugurnag Jehovah ir ngodad, ma be ayuwegdad ni ngad nanged rarogon nrib fel’ rogon. (Jas. 4:8) Ku ma weliy Jehovah ngodad murung’agen pi fel’ngin nge boch ban’en u rarogon. Nap’an ni gad ra yaliy e pi n’en ni ke sunmiy, ma ma m’ug riy feni gel gelngin nge feni ga’ e gonop rok. Machane, ku nap’an ni gad ra beeg e Bible ma rayog ni ngad filed riy murung’agen rogon feni mat’aw nge rogon ni ma rin’ boch ban’en u fithik’ e t’ufeg. (Rom. 1:20) Jehovah e bod ba matam nib gel gelngin, mab gonop, ma gubin ban’en ni ma rin’ nib mat’aw, ma ma t’ufegey, mab mom rok pi fak ni ngar chugurgad ngak.

¹⁰ Ku ma fil Jehovah e tin riyul’ ngodad u murung’agen e n’en nib m’agan’ ngay ni fan ngodad. Re n’ey e ma ayuweg urngin e pi n’en ni ke sunmiy ni yad bay u tan pa’ ni ngar pared ni yad ba gapas ma yad ba yaram. Kad filed u Bible ni dan sunmiy e girdi’ ni yad e ngar dugliyed e n’en ni ngar rin’ed. Ma faanra dab da folgad ko re n’ey, ma ra yib wenegan nib kireb ngodad. (Jer. 10:23) Manang Jehovah e tin nib fel’ ni fan ngodad. Ma faanra m’agan’dad ngay ni nge par ni ir e nga i gagiyegnagdad, ma aram e rayog ni ngad pared u fithik’ e gapas nge taareban’. Ke weliy Jehovah e pi n’ey ngodad ni bochan e ri gad ba t’uf rok!

11. Mang e ke micheg Jehovah ngodad ni be dag nriyul’ ni gad ba t’uf rok ma ma lemnagdad?

¹¹ Reb e matam ni ma t’ufeg pi fak e ri ma lemnag rarogorad ko gabul nge langlath ya baadag ni ngar pared nib fel’ e par rorad. Machane, ba gel e kireban’ riy ni bochan e yooren e girdi’ e dar nanged e n’en nra buch boch nga m’on, ara yad ma fanay e tayim rorad ni ngar nameged boch ban’en ndabi par angin nib n’uw nap’an. (Ps. 90:10) Machane, gadad e gad ba felfelan’ ni bochan e ke micheg Jehovah ni Chitamangidad ni bay u tharmiy boch ban’en nib fel’ ni fan ngodad boch nga m’on nra yibnag fan e yafas rodad.

12. Uw rogon ni m’ug ko fonow ni pi’ Jehovah ngak Kain nge Baruk nriyul’ ni yow ba t’uf rok ma i lemnagrow?

¹² “Mang ni kam damumuw? Mang ni kam tagannag owchem? Faan mang e mu ngongliy e tin nib fel’, ma be m’ug u owchem ni gab felfelan’. . . . Thingar mu gel ngak [e denen].” (Gen. 4:6, 7) Ba puluw e fonow ni pi’ Jehovah miki pi’ ko ngiyal’ nthingari pi’ riy. Nap’an ni guy ni bay e riya’ ko n’en ni be lemnag Kain ni nge rin’, ma aram me  ginang u m’on riy. Machane, rib gel e kireban’ riy ni bochan e de fol Kain ko ginang nni pi’ ngak ma aram me yib wenegan nib kireb ngak. (Gen. 4:11-13) Nap’an ni guy Jehovah ni ke aw parwon Baruk ni ir e tayol rok Jeremiah ma be par nib kireban’, ma aram me fonownag ni bochan e nge yag ni ayuweg ni nge guy tapgin e magawon rok. Machane, Baruk e ba thil ngak Kain, ni bochan e fol ko fonow ni pi’ Jehovah ngak me yag ni nge ayuweg e yafas rok.​—Jer. 45:2-5.

13. Mang fan ni i pag Jehovah e pi tapigpig rok ni nga u ranod u fithik’ boch e skeng?

¹³ I yoloy Paul ni gaar: “Somol e ma gechignag e en nib t’uf rok, ma ma toy e en ni ke ta’ ni fak.” (Heb. 12:6) Ra ngan yal’uweg be’ ma gathi kemus ni ngan gechignag. Ya boor rogon ni yima yal’uweg be’ riy. Boor e thin nu Bible ni be weliy murung’agen boch e tapigpig rok Got ni yad ba yul’yul’ ni u ranod u fithik’ boch e skeng nib mo’maw’, ma pi skeng nem ni u ranod u fithik’ e i skulnagrad Jehovah riy ma be yal’uwegrad. Am lemnag Josef, nge Moses, nge David. Boor ban’en u murung’agrad ni ke tamilangnag e Bible. Ere, faan gad ra beeg murung’agen rogon ni i ayuwegrad Jehovah u fithik’ e pi skeng nem nge rogon ni i fanayrad ni ngar rin’ed boch e maruwel rok, ma rayog ni ngad nanged nriyul’ ni ma lemnag Jehovah e pi tapigpig rok ma yad ba t’uf rok.​—Mu beeg e Proverbs 3:11, 12.

14. Uw rogon ni ma dag Jehovah nriyul’ ni gad ba t’uf rok u nap’an nra yal’uwegdad?

¹⁴ Rogon ni ma yal’uwegdad Jehovah e ku ma dag ban’en u rarogon e t’ufeg rok. Faanra yal’uweg Jehovah be’ ni ke oloboch me kalngan’, ma ra ‘n’ag fan u wan’’ e n’en ni ke rin’ faanem nib kireb. (Isa. 55:7) Mang e be yip’ fan e re n’ey? I tamilangnag David rogon ni ma n’ag Jehovah fan e kireb ni gaar: “Ma n’ag fan u wan’ urngin e denen rog ma ma faseg urngin e liliy ni ke yib ngog; ke ayuwegeg ya ke gagiyegnag nda gu wan nga lan e  low ko yam’, ma ke dag ngog nri gub t’uf rok ma be runguyeg; Rogon feni mal’af thilin e ngek nge ngal, e aram rogon nra chuweg e denen rodad nge mal’afnag rodad.” (Ps. 103:3, 4, 12) Manga yugu da motoyilgad ko pi fonow rok Jehovah, ma gad fol rok u nap’an nra yal’uwegdad ni bochan e aram reb e kanawo’ ni ma dag riy ngodad ni gad ba t’uf rok.​—Ps. 30:5.

15. Mang e be dag nrib ga’ fan e pi tapigpig rok Jehovah u wan’?

¹⁵ Reb e ban’en nrib ga’ fan u wan’ ba matam ni ma t’ufeg pi fak e aram e nge ayuweg chon e tabinaw rok ma be yoror rorad ya nge dabi buch ban’en rorad. Ku aram e n’en ni ma rin’ Jehovah ni ir e Chitamangidad ni bay u tharmiy. I weliy fare psalmist murung’agen Jehovah ni gaar: “Ma ayuweg e yafas rok e girdi’ rok; ma chuwegrad u lan pa’ e piin kireb.” (Ps. 97:10, BT) Am lemnag reb e kanawo’ ni ma rin’ e re n’ey riy. Bod rogon lan owchem nrib ga’ fan u wan’um! Ere, ku aram rogon ni ma lemnag Jehovah e pi tapigpig rok. (Mu beeg e Zekariah 2:8. *) Rriyul’ nrib ga’ fan e pi tapigpig rok u wan’!

16, 17. Mu weliy boch e kanawo’ ni ma ayuweg Jehovah e pi tapigpig rok riy ni ki mada’ ko ngiyal’ ney.

¹⁶ Reb e kanawo’ ni ma ayuweg Jehovah e pi tapigpig rok riy e, u daken e pi engel rok. (Ps. 91:11) Taareb e engel ni ayuweg yu Jerusalem u pa’ piyu Assyria, me li’ 185,000 e salthaw rorad u lan taareb e nep’. (2 Ki. 19:35) Ki chuweg e engel apostal Peter, nge apostal Paul, nge ku boch e tapigpig rok Got u kalbus. (Acts 5:18-20; 12:6-11) Ku arrogon e ngiyal’ ney ni ku ma ayuwegdad Jehovah. Immoy reb e walag ni ma maruwel ko tochuch rodad ni yan i guy reb e branch ofis u Africa me yog nrib gel e cham ni yibe tay ko re nam nem. Kari wagey urngin ban’en ko re nam nem ni bochan e cham, nge moro’ro’, nge ppin ni yibe kol u gelngiy, nge girdi’ ni yibe li’rad ngar m’ad. Yugu aram rogon, ma dariy bagayad e pi walagdad u rom ni yim’ u fithik’ e pi wagey ney. Machane, boor i yad e yan i par ndakuriy ban’en rok. Nap’an nni fith ko ke uw rogorad, ma yad gubin nra siminmingad me lungurad: “Kab fel’ rogomad, ke magar Jehovah!” Kar guyed gelngin nri yad ba t’uf rok Got.

¹⁷ Bay yu ngiyal’ ni ma pag Jehovah e pi toogor rok ni ngar lied reb e tapigpig rok nib yul’yul’ nge yim’, ni bod rogon e n’en ni buch rok Stephen. Yugu aram rogon, ma ma ayuweg e pi tapigpig rok ni aram e ma yog ngorad murung’agen e pi ban ni ma fanay Satan nib togopuluw ngorad. (Efe. 6:10-12) Ma fanay e Thin rok nge pi babyor ni ke ngongliy e ulung rok nib puluw e thin riy ko Bible ni nge ayuwegdad ni ngad nanged e tin riyul’ u murung’agen chogowen e salpiy, nge pi n’en ni yima chuweg e chalban ngay ni bay yaan e ngongol ndarngal riy nge cham, nge boch ban’en nib kireb ni bay ko Internet, nge ku boch ban’en. Ere, ba tamilang ni Jehovah e ir reb e Matam nib t’uf pi fak rok ni bochan e ma ayuweg e pi tapigpig rok ni nge dabi buch ban’en rorad ma ma yoror rorad.

18. Uw rogon u wan’um rogon ni be dag Jehovah gelngin e t’ufeg rok ngom?

¹⁸ Chiney ni kad weliyed boch ko pi kanawo’ ni ma dag Jehovah riy nriyul’ ni gad ba t’uf rok, e ba mudugil ni ke taareb rogon e lem rodad ngak Moses. Nap’an ni lemnag n’umngin nap’an ni ke pigpig ngak Jehovah, me yog ni gaar: “Mu suguymad ni yu kadbul nga rogon ni gamad ba t’uf rom, nge yog ni ug tanggad ma gamad be par nib felan’mad u n’umngin nap’an e yafos romad.” (Ps. 90:14) Ri gad ba tow’ath ni bochan e ke yag ni nge tamilang u wan’dad gelngin nri gad ba t’uf rok Jehovah. Taareb rogon lanin’dad ngak apostal John ni faani gaar: “A mu guyed nga rogon fadad t’uf rok e en ni Chitamangiy!”​—1 John 3:1.