1, 2. Mang e susun ni nge athamgil urngin e Kristiano ni ngar mon’oggad riy? Mu susunnag rogon.

 NAP’AN nra yan reb e matin nga market ni nge chuw’iy ba mit e wom’engin e gek’iy ni yima kay, ma der ma mel’eg e bin th’abi ga’ fa bin th’abi sobut’ puluwon. Ya ma yaliy e bin ni ke lol ni bochan e baadag ni nge mel’eg e bin nib fel’ lamen, ma kub fel’ bon, ma kub fel’ nga fithik’ i dowey. Baadag ni nge mel’eg reb ni ke fel’ rogon nrayog ni ngan kay.

² Tomuren nra ognag be’ ir ngak Got me un ko taufe, maku ra ulul ni nge mon’og i yan ko tirok Got ban’en. Ya n’en ni be nameg e aram e nge mang reb e tapigpig rok Got ni ke ilal ko tirok Got ban’en. I yol apostal Paul ngak e pi Kristiano nu Efesus me weliy ngorad feni ga’ fan ni ngar ilalgad ko tirok Got ban’en. I pi’ e athamgil nga lanin’rad ni ngar ‘bad nga taabang ngar taab girdi’gad u daken e michan’ rorad ngak Fak Got nge murung’agen ni kar nanged; ma aram mi yad ilal i yan nge mus rogorad ngar boded mam’ungun Kristus.’​—Efe. 4:13.

3. Mang e ba taareb rogon ko ulung nu Efesus nge ulung ko pi tapigpig rok Jehovah e ngiyal’ ney?

³ Nap’an ni yoloy Paul e re babyor ney, ma ke yan in e duw ni ke sum  fare ulung nu Efesus. Boor e walag ko re ulung nem ni kar ilalgad ko tirok Got ban’en. Machane, bay boch i yad ni kab t’uf ni ngar mon’oggad. Ku ireray e n’en ni be buch ko Pi Mich Rok Jehovah e ngiyal’ ney. Boor e walag ni ke n’uw nap’an ni kar pigpiggad ngak Got ni kar ilalgad ko tirok Got ban’en. Machane, ku bay boch e walag ndawor ra ilalgad ko tirok Got ban’en. Bod ni, bokum biyu’ e girdi’ ni yibe taufenagrad u gubin e duw, ma bay boch i yad ni kab t’uf ni ngar mon’oggad ko tirok Got ban’en. Me gur, kam ilal ko tirok Got ban’en fa dawor?​—Kol. 2:6, 7. 

4, 5. Mang boch e kanawo’ nib thilthil e pi Kristiano riy ni kar ilalgad ko tirok Got ban’en? Mang reb e ban’en nib taareb rogon rorad? (Mu guy e sasing ni bay u tabolngin e re article ney.)

⁴ Nap’an ni ga ra yan nga market nim yaliy ba mit e wom’engin e gek’iy ni ke lol, ma dariy l’agruw riy nri taareb rogon yaan. Machane, bay boch ban’en u rarogon e pi wom’engin e gek’iy nem ni ga ra guy ma ga ra nang ni ke lol. Ere, ku arrogon e piin Kristiano nra bagayad ma nam rok, nge rarogon e gin ni ke yib riy, nge rarogon fithik’ i dow ko m’ar, nge yangaren, nge pi magawon ni ma yib ngak. Kub thilthil rarogorad nge rogon e yalen rorad. Yugu aram rogon ma pi arorad ni ke ilal ko tirok Got ban’en e bay boch ban’en u rarogorad ni ma m’ug riy ni kar ilalgad ko tirok Got ban’en. Ni uw rogon?

⁵ Reb e tapigpig rok Jehovah ni ke ilal ko tirok Got ban’en e ma guy rogon ni nga i ‘lek luwan ay’ Jesus. (1 Pet. 2:21) Mang e n’en nth’abi ga’ fan ni yog Jesus ni ngad rin’ed? Thingari t’uf Jehovah rodad u polo’ i gum’ircha’dad, ngu polo’ i lanin’dad, ngu polo’ i lem rodad, me t’uf rodad e en ni ir e mmigid ngodad ni gowe gadad. (Matt. 22:37-39) Reb e Kristiano ni ke ilal ko tirok Got ban’en e ma athamgil ni nge fol ko re fonow ney. Kanawoen e yafas rok e thingari m’ug riy nib m’on e tha’ u thilrow Jehovah u wan’, maku ma pag fan ir nga i t’ufeg boch e girdi’.

6, 7. (a) Mang boch e fel’ngin ni ma m’ug ko ngongol rok reb e Kristiano ni ke ilal ko tirok Got ban’en? (b) Mang e gad ra weliy?

⁶ Machane, gad manang ni t’ufeg e kemus ni bang u wom’engin gelngin Got nib thothup ni ma m’ug ko ngongol rok reb e Kristiano ni ke ilal ko tirok Got ban’en. (Gal. 5:22, 23) Ku bay boch e pi fel’ngin ney nib ga’ fan ni bod rogon e sumunguy, nge t’ar laniyan’, nge gum’an’. Pi fel’ngin ney e rayog ni nge ayuweg reb e Kristiano ni nge pithig boch e magawon nib mo’maw’ ndabi chalban ngay, miki yag ni nge k’adan’ u fithik’ boch ban’en ndabi mulan’. Reb e Kristiano ni ke ilal ko tirok Got ban’en e nap’an nra fil e Bible rok ni goo ir ma ma fal’eg i gay boch i kenggin e motochiyel nrayog ni nge ayuweg ni nge nang e n’en nib thil u thilin e tin nib fel’ nge tin nib kireb. Ma nap’an nra dugliy e n’en ni nge rin’, ma aram e be m’ug riy ni ke ilal ko tirok Got ban’en. Ku ma fol ko nangan’ rok ni kan skulnag ko thin nu Bible. Maku reb e, faanra ke ilal reb e Kristiano ko tirok Got ban’en ma manang ni kanawoen ni ma yog Jehovah ni ngan rin’ ban’en nge pi motochiyel rok e kab fel’ ko birok. * Ku ma machibnag fare thin nib fel’ u fithik’ e pasig ma ma guy rogon ni nga i par ni bay e taareban’ u lan e ulung.

⁷ Demtrug n’umngin nap’an ni kad pigpiggad ngak Jehovah, ma rayog ni nge bagadad me fith ir ni nge gaar, ‘Gur, ka bay boch e kanawo’ nrayog ni nggu folwok rok Jesus riy ya nge yag ni ngkug ilal boch i yan ko tirok Got ban’en, fa?’

8. Mang e rayog ni nga nog u murung’agen e tamilangan’ rok Jesus ko thin nu Bible?

⁸ Rib tamilangan’ Jesus Kristus ko Thin rok Got. Mus nga nap’an ni ka fini gaman 12 e duw rok me yag rok ni nge weliy e thin ni bay u lan fare  Babyor nib Thothup ngak e pi tamachib ni ur moyed u tempel. “Urngin e girdi’ ni ur motoyilgad ngak e ra gingad nga feni llowan’ ko thin ni ur fithed ngak ngi i fulweg.” (Luke 2:46, 47) Boch nga tomuren u nap’an ni ke tabab ko machib, ma i fanay e Thin rok Got ni nge fulweg lungun e piin ni ur togopuluwgad ngak.​—Matt. 22:41-46.

9. (a) Faanra baadag be’ ni nge ilal ko tirok Got ban’en, ma susun ni nge uw rogon e fol Bible ni nga i tay? (b) Mang fan ni gad ma fil e Bible rodad?

⁹ Reb e Kristiano ni baadag ni nge ilal ko tirok Got ban’en e de gaman ni kemus ni nge nang e pi kenggin e machib u Bible, ya thingari folwok rok Jesus. Gubin ngiyal’ nthingari fil e tin nib toar fan e machib u lan e Bible ni bochan e manang ni “ggan nib el e piilal e ngar ked.” (Heb. 5:14) Ere, ba tamilang nreb e Kristiano ni ke ilal ko tirok Got ban’en e baadag ni nge tamilangan’ u murung’agen “Fak Got.” (Efe. 4:13) Me gur, ga ma tay e tayim u gubin e rran ni ngam beeg e Bible rom, fa? Ga ma fil e Bible rom ni goo gur ni gubin ngiyal’, ma ga ma athamgil ni ngam tay e tayim u gubin e wik ni fan ko fol Bible ni tabinaw, fa? Nap’an ni ga be fil e Thin rok Got ma ngam yaliy boch e pi kenggin e motochiyel riy nrayog ni nge ayuwegem ni nge tamilang u wan’um rogon ni ma lem Jehovah. Ngkum gay rogon ni ngaum fol ko pi kenggin e motochiyel u Bible, mu um fanay u nap’an ni ngam dugliy ban’en, ya ireray e n’en nra chuchugurnagem ngak Jehovah.

10. Uw rogon e pi fonow rok Got nge pi kenggin e motochiyel rok u wan’ reb e Kristiano ni ke ilal ko tirok Got ban’en?

¹⁰ Reb e Kristiano ni ke ilal ko tirok Got ban’en e manang ni gathi kemus ni nge tamilang e thin rok Got u wan’, ya ku bay boch ban’en nib t’uf ni nge rin’. Thingari t’uf rok e pi fonow rok Got nge pi kenggin e motochiyel rok. Reb e kanawo’ nrayog ni nge m’ug e re t’ufeg ney riy e aram e nga i m’oneg e tin nib m’agan’ Jehovah ngay u lan e yafas  rok, ma gathi tin nib m’agan’ ngay. Maku reb e, ngki athamgil ni nge ‘n’ag’ e bin kakrom e lem nge pangin ni immoy riy. Nap’an nra thilyeg e pi n’ey u rarogon, ma aram e ngiyal’ nra yon’ e bin nib beech e pangin nga daken ni ma ‘gagiyel u daken e bin riyul’ e wok nib yal’uw ma mmat’aw ni ke yog ngak.’ (Mu beeg e Efesus 4:22-24.) Ni yoloy e Bible u daken gelngin Got nib thothup. Ere, faanra guy reb e Kristiano rogon ni nge toar e tamilangan’ rok u murung’agen e pi motochiyel u Bible mi ri t’uf rok, ma aram e be pag gelngin Got nib thothup ni nge pow’iy laniyan’ nge tafinay rok. Ma aram e n’en nra ayuweg ni nge ilal ko tirok Got ban’en.

11. Mang e ke guy Jesus u rarogon chon e tabinaw rok nge pi gachalpen?

¹¹ Nap’an ni immoy Jesus u fayleng ni ir be’ nib flont, ma i par u fithik’ e girdi’ ndawor ra flontgad. Gallabthir rok e dawor ra flontgow, maku boor e duw ni i par u fithik’ e pi chon e tabinaw rok ndawor ra flontgad. Mus ngak pi gachalpen nri yad ba chugur ngak ni ki af boch e lem ngorad ni i tay e girdi’ ni yad baadag ni nge ga’ lungurad u puluwon boch e girdi’ mar gagiyegniged yad. Bod ni, fare nep’ u m’on ni ngan li’ Jesus ngem’, me “maluag thin pi gachalpen . . . ko mini’ e arorad ni ir e ngar tiyed nib tolang u fithik’rad.” (Luke 22:24) Machane, manang Jesus ni yugu aram rogon ndawori flont pi gachalpen ma rayog ni ngar mon’oggad ko tirok Got ban’en mar sunmiyed reb e ulung nib taareban’ e girdi’ riy. Re nep’ nem e ki meybil Jesus ngak e Chitamangin ni bay u tharmiy ni nge ayuweg pi gachalpen ni ngar pared nib taareban’rad u fithik’ e t’ufeg ni gaar: “Gu be wenignag ngom ni ngam ayuwegrad ngar pired ni yad gubin ni kar taarebgad. Mu ayuwegrad ngar pired u fithik’dow ni bod rogon ni ga ba’ u fithik’ag ma gu ba’ u fithik’am. . . . nge yog nra pired ni kar taarebgad ni bod rogodow ni gadow ba taareb.”​—John 17:21, 22.

12, 13. (a) Uw rogon ni ke tamilangnag e Efesus 4:15, 16 feni ga’ fan ni ngad guyed rogon ni nga i par e ulung rodad nib taareban’ e girdi’ riy? (b) Uw rogon ni fil reb e walag ni pumoon rogon ni nge ayuweg e girdi’ u lan e ulung ni ngaur pared nib taareban’rad?

¹² Reb e tapigpig rok Jehovah ni ke ilal ko tirok Got ban’en e ma guy rogon ni nga i par e ulung rok Got nib taareban’ e girdi’ riy. (Mu beeg e Efesus 4:1-6, 15, 16.) Bochan ni gadad boch e Kristiano, ma aram fan ni gad ma nameg ni nga i par e girdi’ rok Got ni yad ba “peth nga taabang,” ma yad be maruwel u taabang nib taareban’rad. Machane, be yog e Thin rok Jehovah ni faanra nge yag e mit ney e taareban’ ngodad ma thingari sobut’an’dad. Reb e walag ni ke ilal ko tirok Got ban’en e ma guy rogon ni nga i par e ulung rok Got nib taareban’ e girdi’ riy ni ki mada’ ko ngiyal’ ni ke rin’ reb e walag ban’en ni dabun ni bochan e dawor da flontgad. Mang e ga ma rin’ u nap’an nra rin’ reb e walag u lan e ulung ban’en ni dabum? Ma uw rogon ni faanra ke rin’ ban’en ngom ni ke kirebnag lanin’um? Ga ma tal ndab kum non ngak facha’, fa ga ma guy rogon ni ngam pithig e magawon u thilmew? Reb e Kristiano ni ke ilal ko tirok Got ban’en e ra guy rogon ni nge pithig fare magawon ko bin ni nge par ni ir e ke mang magawon ngak boch e girdi’.

¹³ Am lemnag e n’en ni buch rok Uwe. Kafram e ma pag e pi meewar ko girdi’ ni nge magawonnag. Ma aram me dugliy ni nge fanay e Bible nge fare babyor ni ka nog e Insight on the Scriptures ngay ni nge fil murung’agen David. Mang fan ni ke fil murung’agen David? I yog Uwe ni gaar: “Bay boch e magawon ni sum u thilin David nge boch e girdi’ ni taareb e michan’ rorad. I guy Saul ni Pilung rogon ni nge li’ David ngem’, maku immoy boch e girdi’ ni yad baadag ni ngar malangniged nge yim’, ma mus ngak leengin ni ki chel nga i moningnag. (1 Sam. 19:9-11; 30:1-6; 2 Sam. 6:14-22) Machane, da i pag David e ngongol rok boch e girdi’ ni nge k’aring ni nge war e t’ufeg rok ngak Jehovah. Maku reb e, David e ir be’ ni ma runguy e girdi’, ma aram reb e ban’en ni gu baadag ni nga i m’ug ko ngongol rog. Pi n’en ni kug fil e ke ayuwegeg ni  nggu nang nib t’uf ni nggu thilyeg rogon ni gu ma lemnag e pi meewar rok boch e walag. Chiney e dakugur ma tay e kireb rok boch e girdi’ u lanin’ug. Ya gu ma guy rogon ni nga i par e girdi’ u lan e ulung nib taareban’rad.” Ireray e n’en ni ga be nameg ni ngam rin’, fa?

14. Ba miti mang girdi’ e i mel’eg Jesus ni ngar manged fager rok?

¹⁴ Jesus Kristus e ir be’ nib gol ngak urngin e girdi’. Gubin mit e girdi’ nib mom ni ngar nonad ngak. Machane, ri ma kol ayuw ko piin ni ma mel’egrad ni ngar manged fager rok. I yog ngak e pi apostal rok nra pared ni yad ba yul’yul’ ngak ni gaar: “Gimed e pi tafager rog, ni faan gimed ra rin’ e tin ni kug ning chilen ngomed.” (John 15:14) I mel’eg Jesus e piin ni ur pared ni yad ba yul’yul’ ngak nge piin ni ur pigpiggad ngak Jehovah u polo’ i gum’ircha’rad ni ngar manged fager rok. Me gur, ireray e miti girdi’ ni ga ma mel’eg ni ngar manged fager rom, fa? Mang nib ga’ fan e re n’ey?

15. Faanra i chag e piin fel’ yangaren ngak e pi Kristiano ni kar ilalgad ko tirok Got ban’en, ma mang angin nra yib riy ngorad?

¹⁵ Boor mit e wom’engin e gek’iy ni ma lol nib fel’ rogon u nap’an e yal’. Ere, ku arrogon ni t’ufeg ni bay u thildad pi walagdad e aram e n’en nrayog ni nge ayuwegdad ni ngad ilalgad ko tirok Got ban’en. Sana gur reb e fel’ yangaren ni ga be guy rogon ni ngam dugliy e n’en ni ngam rin’ ko yafas rom. Gab gonop ni faanra um chag ngak e piin ni ke n’uw nap’an ni kar pigpiggad ngak Jehovah, maku yad ma guy rogon ni nga i par e girdi’ u lan e ulung nib taareban’rad! Dabisiy ni bay boch e magawon ni ka i yib ngorad kafram nge ku boch ni kar mada’naged u nap’an ni yad be pigpig ngak Jehovah. Ireray e pi cha’ nrayog ni ngar ayuweged gur ni ngam mel’eg e bin th’abi fel’ kanawoen e yafas. Faanra um chag ngak e pi walag ney ma rayog ni ngar ayuweged gur ni ngam mel’eg boch ban’en u fithik’ e gonop mag ilal ko tirok Got ban’en.​—Mu beeg e Hebrews 5:14.

16. Uw rogon ni ke ayuweg boch e walag ni ke n’uw nap’rad u lan e ulung reb e walag nib pin ni kab fel’ yangaren?

¹⁶ Ke yib ngan’ Helga nnap’an e bin tomur e duw rok ko skul, ma yooren e piin ni yad nga skul e ur weliyed murung’agen e pi n’en ni yad be nameg ni ngar rin’ed. Yooren i yad e i nameg boch e skul nib tolang ni bochan e yad baadag ni nge yag boch e maruwel nib fel’ ngorad. Ere, weliy Helga e re n’ey ngak boch e fager rok u lan e ulung ni kar ilalgad ko tirok Got ban’en. I yog ni gaar: “Boor ko pi walag nem e yad ba ilal ngog, mab ga’ e ayuw ni ur pied ngog. Ra pied e athamgil nga lanin’ug ni nggu un ko machib u polo’ e tayim rog. Ma nga tomuren ma aram mug un ko pioneer u lan lal e duw. Ma chiney u tomuren ni ke yan in e duw e gub felfelan’ ni kug m’oneg e pigpig ni gu ma tay ngak Jehovah u nap’an ni kab fel’ yangareg. Da gur kalngan’ug ko n’en ni kug dugliy ni nggu rin’.”

17, 18. Faanra kad ilalgad ko tirok Got ban’en, ma uw rogon nrayog ni nge ayuwegdad ni ngad pigpiggad ngak Jehovah nib fel’ rogon?

¹⁷ Faan gad ra guy rogon ni ngad folwokgad rok Jesus, ma aram e gad ra mang boch e Kristiano ni kad ilalgad ko tirok Got ban’en. Ra gel e chugur ko tha’ u thildad Jehovah, ma gad ra adag ni ngad pigpiggad ngak u rogon nrayog rodad. Nap’an nra ilal reb e Kristiano ko tirok Got ban’en, ma aram e ngiyal’ nrayog ni nge pigpig ngak Jehovah nrib fel’ rogon. I pi’ Jesus e athamgil nga laniyan’ pi gachalpen ni gaar: “Nge gal raamed u p’eowchen e girdi’, ya ngar guyed e tin nib fel’ ni gimed be rin’ mi yad yog e sorok ngak e Chitamangimed ni bay u tharmiy.”​—Matt. 5:16.

¹⁸ Ere, kad filed ni faanra ke ilal reb e Kristiano ko tirok Got ban’en ma boor ban’en nrayog ni nge rin’ nra yib angin ko ulung. Ma m’ug e re n’ey u rogon ni ma maruwel ko nangan’ rok. Uw rogon nrayog ni nge ayuwegdad e nangan’ rodad ni ngad dugliyed boch ban’en u fithik’ e gonop? Ma uw rogon nrayog ni ngad ted fan e pi n’en ni ke dugliy pi walagdad nrogon nib puluw ko nangan’ rorad? Ireray e n’en ni gad ra weliy ko bin migid e article.