1. Uw feni ga’ fan e michan’? (Mu guy e sasing ni bay u tabolngin e re article ney.)

 BAY ba ngiyal’ ni kam fith ni ke lungum, ‘Gur, ra ayuwegeg Jehovah ni nggu magey ni gub fas u nap’an fare gafgow nib ga’ me yag ni nggu thap nga lan e bin nib beech e fayleng?’ Boor ban’en nib t’uf ni ngad rin’ed ya nge yag nda mageygad ni gad ba fas. Machane, bay taab n’en ni tamilangnag apostal Paul nrib t’uf ni nge yag ngodad. I yog ni gaar: “Dariy be’ nra fel’ u wan’ Got ni faanra de mich Got u wan’.” (Heb. 11:6) Sana gad be lemnag nib mom ni nge yag e re n’ey ngodad, machane bin riyul’ riy e, ‘gathi urngin e girdi’ ni ma mich u wun’rad e thin rok Somol.’ (2 Thess. 3:2) Gal thin nu Bible ney e be ayuwegdad ni ngad nanged feni ga’ fan ni nge yag e michan’ nib gel ngodad.

2, 3. (a) Mang e kad filed rok Peter u murung’agen feni ga’ fan ni nge yag e michan’ ngodad? (b) Mang boch e deer ni gad ra weliy e fulweg riy?

² I tamilangnag apostal Peter feni ga’ fan ni nge yag e michan’ ngodad u nap’an ni be weliy murung’agen e michan’ ni kan “skengnag” ya nge yag ni nga ‘nog e sorok ngodad, me yog e flaab ngodad min ta’ fadad ko Chirofen nra yib i m’ug Jesus Kristus riy.’ (Mu beeg e 1 Peter 1:7.) Bochan ni kari chugur fare gafgow nib ga’, ma dariy e maruwar riy ni gad baadag ni nge yag ngodad e re miti michan’ ni bay rok e piin ni yira pining e sorok ngorad ko chirofen nra yib i m’ug e Pilung rodad riy. Arrogon, gad baadag ni ngad pared ni “ke michan’dad ngak Kristus kad thapgad ngak Got.” (Heb. 10:39) Bochan e re n’ey, ma rayog ni ngad weniggad ni bod fare moon ni faani gaar: “Mu ayuwegneg nge gel e michan’ rog!” (Mark 9:24, BT) Fa reb e gad ra yog fapi thin ni yog e pi apostal rok Jesus ni  faani lungurad: “Mu gelnag e michan’ romad.”​—Luke 17:5.

³ Machane, bay boch e deer ni ke sum ni bochan e re n’ey. Uw rogon ni nge gel e michan’ rodad? Uw rogon ni nge m’ug nib gel e michan’ rodad? Mang fan nrayog ni nge pagan’dad nra fulweg Got taban e meybil rodad u nap’an ni gad ra meybil ngak ni nge ayuwegdad ni nge gel e michan’ rodad?

4. Mini’ e piin ni gad ra beeg murung’agrad ma rayog ni nge ayuwegdad ni nge gel e michan’ rodad?

⁴ Bochan ni “urngin ban’en nni yoloy nga lan e babyor nib thothup e ni yoloy ni nge fonownagdad,” ma aram fan nrayog ni ngad filed ban’en ko piin ni be weliy e Bible murung’agrad nib gel e michan’ rorad. (Rom. 15:4) Nap’an ni gad ra beeg murung’agen boch e girdi’ ni bod rogon Abraham, Sarah, Isak, Jakob, Moses, Rahab, Gideon, Barak, nge ku boch e girdi’, ma rayog ni nge ayuwegdad e pi n’ey ni ngad fal’eged i yaliy rogon e michan’ rodad. (Heb. 11:32-35) Maku reb e, nap’an ni gad ra beeg murung’agen boch i walagdad e ngiyal’ ney nrib gel e michan’ rorad, ma rayog ni nge ayuwegdad e re n’ey ni ngad guyed rogon ni ngki gel e michan’ rodad.

5. Uw rogon ni dag Elijah nrib mich Jehovah u wan’? Mang e ma k’aringdad e re n’ey ni ngad lemnaged?

⁵ Elijah e ir be’ ni be weliy e Bible murung’agen ni kub gel e michan’ rok. Am lemnag e n’en ni buch rok ni be dag nrib gel e pagan’ rok ngak Jehovah. Nap’an ni yog Elijah ngak Ahab ni Pilung ni ke dugliy Jehovah ndab ki aw e n’uw, me non u fithik’ e pagan’ ni gaar: “U fithingan Somol ni fare Got . . . ni be par nib fos, . . . e nggog ngom ni bayi par ndakuriy e waangachal nge n’uw u lan l’agruw ara dalip e duw, nge mada’ ko ngiyal’ ni bay fin gog.” (1 Ki. 17:1) Ba mich u wan’ Elijah nra pi’ Jehovah e tin nib t’uf rorad e tin ni ka bay e tapigpig rok u nap’an e re ngiyal’ i n’em ndab ki aw e n’uw. (1 Ki. 17:4, 5, 13, 14) Ki dag nib pagan’ ngay nrayog rok Jehovah ni nge faseg ba bitir ni ke yim’. (1 Ki. 17:21) Kub mich u wan’ nra pag Jehovah e nifiy u lang nge yib i urfiy e maligach rok ni pi’ u daken fare Burey nu Karmel. (1 Ki. 18:24, 37) Nap’an ni dugliy Jehovah ni nge aw e n’uw bayay, ma u m’on riy me gaar Elijah ngak Ahab: “Mman e chiney ngam abich, ya kug rung’ag lingan e n’uw ni nge yib.” (1 Ki. 18:41) Nap’an ni gad ra beeg e pi thin ney, ma dariy e maruwar riy ni ma k’aringdad ni ngad adaged ni ngad fal’eged i yaliy rogon e michan’ rodad ko ba gel fa danga’.

6. Faanra nge gel e michan’ rodad, ma mang e ba t’uf ni nge pi’ Jehovah ngodad?

⁶ Dabiyog ni ngad gelnaged e michan’ rodad u gelngidad. Ya michan’ e aram bang u wom’engin gelngin Got nib thothup. Ere, gad ba gonop ni faan gad ra fol ko fonow ni pi’ Jesus ni aram e ngad yibilayed gelngin Got nib thothup ni nge yag ngodad ni bochan e ke micheg Jesus nra pi’ e en Chitamangiy gelngin nib thothup “ngak e piin ni yad ra ning ngak!”​—Luke 11:13.

7. Mu weliy rogon nrayog ni nga i par e michan’ rodad nib gel.

⁷ Nap’an nra gel e michan’ rodad, ma thingar da guyed rogon ndab ki war. Michan’ rodad e rayog ni ngan taarebrogonnag nga reb e nifiy. Nap’an ni gad ra abweg reb e nifiy ni ab nib fel’ rogon, ma rib ga’ e daramram riy. Faanra dab ni tay e l’ud ko fare nifiy, ma ra munmun ma ra math nge yan i par ni yigoo awat e ka bay u but’. Machane, faanra un par ni yibe tay e l’ud ko fare nifiy, ma rayog ni nge par ni be daramram. Ere, ku arrogon e michan’ rodad nrayog ni nga i par nib gel ni faanra ud pared ma gad be fil e Thin rok Got ni gubin e rran. Faanra ud rin’ed ni aray rogon ma rayog ni ngari gel feni t’uf e Thin rok Got u wan’dad miki t’uf rodad e en nri Ir e thin rok. Ma angin nra yib riy e ra gel e michan’ rodad.

8. Mang e ra ayuwegdad ni nga i par nib gel e michan’ rodad?

⁸ Mang e ku rayog ni ngam rin’ me yag ni nga i par nib gel e michan’ rom? Dab mu lemnag nib gaman e pi n’en ni kam fil ke yan i mada’ ko ngiyal’ ni kam un ko taufe. (Heb. 6:1, 2) Ya kub t’uf ni ngam fal’eg i fil murung’agen boch e yiiy u Bible ni ke lebug ni  bochan e rayog ni nge ayuwegem e re n’ey ni nge gel e michan’ rom. Ku rayog ni ngam fanay e Thin rok Got ni nge ayuwegem ni ngam nang ko rriyul’ nrib gel e michan’ rom fa danga’.​—Mu beeg e James 1:25; 2:24, 26.

9, 10. Uw rogon nra ayuwegdad e pi n’ey ni nge gel e michan’ rodad: (a) piin ni gad ma chag ngorad nib fel’ e ngongol rorad? (b) pi muulung ni gad ma un ngay? (c) machib?

⁹ I yog apostal Paul ngak e pi Kristiano ni taareb e michan’ rorad nrayog ni nge ‘fel’ rogorad ko michan’ rok ma [rayog ni nge] fel’ rogon ko michan’ rorad.’ (Rom. 1:12) Faanra ud chaggad ngak e piin taareb e michan’ rodad, ma rayog ni nge bagadad me gelnag e michan’ rok bagadad, nib ga’ nu nap’an ni gad be chag ngak e piin ni kan ‘skengnag’ e michan’ rorad. (Jas. 1:3) Faanra ud chaggad ngak e piin nib kireb e ngongol rorad, ma rayog ni nge war e michan’ rodad, machane faanra ud chaggad ngak e piin nib fel’ e ngongol rorad ma rayog ni nge gel e michan’ rodad. (1 Kor. 15:33) Aram reb i fan ni kan fonownagdad ndab ud “paged e muulung rodad,” ma nga i “bagadad me pi’ e athamgil nga laniyan’ bagadad.” (Mu beeg e Hebrews 10:24, 25.) Reb i fan e bochan ni boor ban’en ni gad ma fil u nap’an e pi muulung rodad ni ma gelnag e michan’ rodad. Ba puluw e re n’ey ko n’en ni yog Paul ni faani gaar: “Thin rok Got ni yibe machibnag yibe rung’ag e be yognag e michan’ ngak e girdi’.” (Rom. 10:17) Ere gur, gad ma athamgil ni ngaud uned ko muulung ni gubin ngiyal’, fa?

¹⁰ Nap’an ni gad ra un ko machib, ma gathi kemus ni gad be ayuweg boch e girdi’ ni nge gel e michan’ rorad, ya ku gad be ayuweg e michan’ rodad ni nge par nib gel. Maku reb e, gad be fil rogon ni nga i pagan’dad ngak Jehovah nge rogon ndab da rusgad ni ngad weliyed e michan’ rodad ndemtrug e miti n’en ni kad mada’naged ni bod rogon ni i rin’ e tin som’on e Kristiano.​—Acts 4:17-20; 13:46.

11. Mang fan nib gel e michan’ rok Kaleb nge Joshua, ma uw rogon ni ngad folwokgad rorow?

¹¹ Nap’an ni gad ra guy rogon ni ma ayuwegdad Jehovah nge rogon ni ma fulweg taban e meybil rodad, ma ra gel e michan’ rodad. Aram e n’en ni buch rok Kaleb nge Joshua. I m’ug nib mich Jehovah u wan’row u nap’an nranow ni ngar damitnagew fare Nam ni Kan Micheg. Machane, nap’an nra guyew rogon ni i ayuwegrow Jehovah ko pi n’en ni i buch rorow, ma aram mi ri gel boch e michan’ rorow. Dariy e maruwar riy ni aram fan ni non Joshua ngak piyu Israel ni gaar: “Urngin e tin ni micheg [Got] e goo ke rin’ ni rogon; dariy reb ni pag.” Boch nga tomuren, miki ulul ngay ni gaar: “Ere mu tiyed fan Somol mi gimed meybil ngak, mi gimed pigpig ngak u fithik’ e tiyan’ nge yul’yul’ . . . Gag nge girdi’ ko birog e tabinaw e nguug pigpiggad ngak Somol.” (Josh. 23:14, BT; 24:14, 15) Faanra pagan’dad ngak Jehovah ma gad guy rogon ni be ayuwegdad, ma rayog ni ngari gel e michan’ rodad.​—Ps. 34:8.

12. Mang e yog James nib t’uf ni ngad rin’ed ni faanra nge par nib gel e michan’ rodad?

¹² Uw rogon ni nge m’ug nib gel e michan’ rodad? I pi’ James nreb i gachalpen Jesus e fulweg ko re deer ney u nap’an ni gaar: “Gu [ra] dag ngom e michan’ rog ngak Got ko ngongol rog.” (Jas. 2:18) Ngongol rodad e aram e n’en nra i dag nib gel e michan’ rodad. Ngad weliyed boch ban’en ni be dag nriyul’ e re n’ey.

13. Mang boch e kanawo’ nrayog ni nge m’ug riy nib gel e michan’ rodad u daken fare maruwel ni machib ni gad ma tay?

¹³ Machib ni gad ma un ngay e aram reb e kanawo’ nrayog ni nga i m’ug riy nib gel e michan’ rodad. Mang fan? Ya nap’an ni gad ra machib, ma aram e gad be dag nib mich u wan’dad ni ke chugur e tomur, ma “dabi sowath.” (Hab. 2:3) Reb e kanawo’ nrayog ni ngad nanged ko rriyul’ nrib gel e michan’ rodad fa danga’ e ngad lemnaged ko uw feni ga’ fan fare maruwel ni machib u wan’dad ma ka gad guy ko gad be athamgil u rogon nrayog rodad ni ngad weliyed murung’agen Got ko girdi’ fa danga’. Gad ma gay rogon boch e kanawo’ nrayog ni ngad yoornaged boch ban’en riy ni gad be rin’ ni fan ngak Jehovah, fa? (2 Kor. 13:5) Arrogon, faan gad ra yog fare thin nib fel’ “nga dap’i l’ugundad” ma aram reb e kanawo’ nrayog ni nge m’ug riy nrib gel e michan’ rodad.​—Mu beeg e Roma 10:10.

14, 15. (a) Uw rogon nrayog ni nge m’ug nib gel e michan’ rodad ko pi n’en ni gad ma rin’ u reb e rran ngu reb? (b) Mu weliy ban’en ni ke buch rok be’ ni be dag nib gel e michan’ rok.

 ¹⁴ Ku rayog ni nge m’ug nib gel e michan’ rodad u nap’an ni gad be yan u fithik’ boch e magawon ni gad ma mada’nag u lan e re fayleng ney. Demtrug ko kad m’argad, ara ke mulan’dad, ara ke kireban’dad, ara gad be gafgow ko par, ara gad be mada’nag yugu boch e magawon, mab pagan’dad nra ayuwegdad Jehovah nge Fak ko “ngiyal’ ndabi siy ni ngar ni ayuwegdad” riy. (Heb. 4:16) Ku ra m’ug ni be pagan’dad ngak Jehovah u nap’an ni gad ra ning e ayuw ngak. I yog Jesus nrayog ni ngad ninged e tin nib t’uf rodad ngak Jehovah ni kub muun ngay e ‘ggan ni nge yog ngodad’ u reb e rran ngu reb. (Luke 11:3) Boor e thin nu Bible ni be micheg ngodad nrayog rok Jehovah ni nge pi’ e tin nib t’uf rodad. Nap’an ni par ba ngiyal’ ndaki aw e n’uw u Israel, me pi’ Jehovah e ggan ni nge kay Elijah nge ran ni nge unum. ‘I unum e ran ko lul’, mi i fek e arche’ ni raven e flowa nge ufin i yib ngak ni gubin e kadbul nge blayal’’ ni bod rogon ni yog Jehovah. (1 Ki. 17:3-6) Ba mich u wan’dad nrayog rok Jehovah ni nge pi’ e tin nib t’uf rodad.

¹⁵ Ba pagan’dad ni faan gad ra fol ko pi kenggin e motochiyel u Bible, ma rayog ni nge ayuwegdad u rogon ni ngad yognaged e tin nib t’uf ko par rodad. Ireray e n’en ni buch ko tabinaw rok reb e walag nib pin ni ke un ko mabgol ni ma par u Asia ni ka nog Rebecca ngak. Kar folgad chon e tabinaw rok ko fa gal thin nu Bible ni bay ko Matthew 6:33 nge Proverbs 10:4, ma kar athamgilgad ni ngar m’oneged e tin nib m’agan’ Got ngay u lan e yafas rorad maku yad ma maruwel nib gel. I yog Rebecca ni taw nga ba ngiyal’ me guy e pumoon rok ni ke magawon e tha’ u thilin chon e tabinaw rok nge Jehovah ni bochan e maruwel rok, ma aram me tal. Machane, aningeg e bitir rorow nib t’uf ni ngar piew e tin nib t’uf rorad. Baaray e n’en ni yog Rebecca nra rin’ed: “Gu tababgad i ngongliy boch ban’en ni yima kay nib athibthib ngaug pied ni chuway’. Nap’an ni ug rin’ed e re maruwel ney ma dariy ba ngiyal’ ni gu lemnaged ni ke digeymad Jehovah. Maku dariy ba ngiyal’ ni gu pared nda gu abichgad.” Me gur, bay ban’en ni ke buch rom ni aray rogon ni ke gelnag e michan’ rom, fa?

16. Mang angin nra yib ngodad ni faanra pagan’dad ngak Got?

¹⁶ Dariy ba ngiyal’ ni nge maruwaran’dad ngaud  lemnaged ko ra ayuwegdad Got ni faan gad ra fol ko pi fonow rok fa danga’. I sul Paul u daken fapi thin ni yog Habakkuk ni faani gaar: “En ni ke mat’aw ngak Got ni bochan e mich Got u wan’ e ir e ra fos.” (Gal. 3:11; Hab. 2:4) Ere, rib ga’ fan ni ngari mich u wan’dad e En nrayog rok ni nge ayuwegdad. Ke puguran Paul ngodad ni Got e “ir e rayog rok ni nge maruwel nge pag rogon ko tin ni kad wenigniged ngak, ara ke taw e lem rodad ngay, ni ra muruwliy u daken fare n’en ni gelngin ni ku ir e be maruwel u fithik’dad.” (Efe. 3:20) Ma athamgil e pi tapigpig rok Jehovah ni ngar rin’ed e tin nib m’agan’ ngay. Machane yad manang ni bay boch ban’en ndabiyog rorad, ere aram fan nib pagan’rad ngak Jehovah nra tow’athnagrad. Ere, gathi gad ba felfelan’ ni gubin ngiyal’ ma bay Got rodad ni be ayuwegdad?

17. (a) Uw rogon nni fulweg taban e meybil rok e pi apostal u nap’an nra yibilayed ni nge gel e michan’ rorad? (b) Mang fan nrayog ni nge pagan’dad ni yira fulweg taban e meybil rodad ni faan gad ra yibilay ni nge gel e michan’ rodad?

¹⁷ Chiney ni kad weliyed e pi n’ey e dabisiy ni ga be lem ni bod fapi apostal ni faani lungurad ngak Jesus: “Mu gelnag e michan’ romad.” (Luke 17:5) Kan fulweg taban e meybil rorad u nap’an e Pentekost ko duw ni 33 C.E. u nap’an nni puog gelngin Got nib thothup nga dakenrad me yag ni nge tamilang u wan’rad e n’en nib m’agan’ Got ngay. Re n’ey e ayuwegrad ni nge gel e michan’ rorad. Ma angin ni yib riy e ra tababgad i wereg fare thin nib fel’ u boor e binaw e ngiyal’ nem. (Kol. 1:23) Ere uw rogodad, rayog ni nge pagan’dad ni yira fulweg taban e meybil rodad u nap’an ni gad ra yibilay ni nge gel e michan’ rodad, fa? Be micheg e Bible nrayog ni ngan fulweg taban e meybil rodad ni faan gad “ra ning ban’en ngak [Got] ni ban’en nib m’agan’ ngay.”​—1 John 5:14.

18. Uw rogon nra tow’athnag Jehovah e piin ni yad ra guy rogon ni nga i gel e michan’ rorad i yan?

¹⁸ Ba tamilang ni piin nrib pagan’rad ngak Jehovah e yad ra par ni yad ba fel’ u wan’. Gad ra meybil ngak Jehovah ni nge gelnag e michan’ rodad ma ra fulweg taban e meybil rodad, ma aram e ra i gel e michan’ rodad i yan, ma ra tomur riy ma ra ‘yib mat’awdad ni nga darod ko gin nsuwon’ Got.​—2 Thess. 1:3, 5.