Raay e Duw ni Ke Gagiyeg Gil’ilungun Got Riy!

“I Got ni ir e Got ko gapas e nge pi’ ngomed urngin e tin nib fel’ ni nge yog ngomed nge yog ni mu rin’ed e tin nib m’agan’ ngay.”​—HEB. 13:21.

TANG: 136, 14

NAP’AN FA 100 I DUW NI KE YAN MA . . .

mang boch e talin e maruwel ni kad fanayed ya nge yag nda machibnaged fare thin nib fel’ ko girdi’?

mang boch e kanawo’ ni kad machibnaged fare thin nib fel’ riy?

mang boch e skul ni be un e pi walag ngay?

1. Uw feni ga’ fan fare maruwel ni machib u wan’ Jesus? Mu tamilangnag.

 RI BAADAG Jesus ni ma weliy murung’agen Gil’ilungun Got. Be tamilangnag e Bible ni Gil’ilungun Got e aram e n’en nib ga’ ni i weliy murung’agen, mab pag 100 yay ni i weliy murung’agen u nap’an e machib ni i tay. Ere, ba tamilang nrib ga’ fan Gil’ilungun Got u wan’ Jesus.​—Mu beeg e Matthew 12:34.

2. Uw urngin e piin ni sana ur moyed u nap’an nnog fapi thin ni bay ko Matthew 28:19, 20? Mang fan nrayog ni nga dogned ni aray rogon?

² De n’uw nap’an u tomuren ni fas Jesus ko yam’, me m’ug ngak ba ulung i girdi’ ni yad 500 u gubin. (1 Kor. 15:6) Dabisiy ni aram e ngiyal’ ni tay chilen ngorad ni ngar machibnaged fare thin nib fel’ ni murung’agen Gil’ilungun Got ngak “girdien e pi nam u gubin yang.” Machane, re maruwel nem ni ngar rin’ed e gathi ba maruwel nib mom! * Re maruwel nem ni yog Jesus ngorad ni ngar rin’ed e yad ra rin’ nge yan i mada’ ko “ngiyal’ ni ke  chugur nga tomuren e re m’ag ney.” Ma riyul’ ni aram rogon. Ere, dariy e maruwar riy ni ga be un i lebguy e re thin ney ni yiiynag Jesus.​—Matt. 28:19, 20, NW.

3. Mang dalip ban’en ni ke ayuwegdad u rogon ni ngad wereged fare thin nib fel’?

³ Tomuren ni tay Jesus chilen ngak pi gachalpen ni ngar machibgad, me micheg ngorad ni gaar: “Gu ba’ romed.” (Matt. 28:20) Ere, Jesus e ir e ra pow’iy rogon ni yira rin’ e re maruwel ni machib ney. Ma ke pi’ Got “urngin e tin nib fel’” ban’en ngodad nra ayuwegdad ni ngad lebguyed e re maruwel nem. (Heb. 13:21) Gad ra weliy dalip ko pi n’ey u lan e re article ney: (1) pi talin e maruwel ni kan pi’ ngodad, (2) pi kanawo’ ni gad be wereg fare thin nib fel’ riy, nge (3) rogon e skul ni yibe tay ngodad. Bin som’on e ngad weliyed murung’agen boch e pi talin e maruwel ni kad fanayed u lan fa 100 i duw ni ke yan.

KE PI’ GOT BOCH E TALIN E MARUWEL KO PI TAPIGPIG ROK NRA AYUWEGRAD NI NGAR MACHIBGAD

4. Mang fan ni kad fanayed boor mit e talin e maruwel u nap’an ni gad be rin’ fare maruwel ni machib?

⁴ I taarebrogonnag Jesus e “thin rok Got ni murung’agen e gagiyeg rok” ko awoch ni kan wereg nga daken e but’ nib thilthil. (Matt. 13:18, 19) Be’ nib tamilay’ e ma fanay boor mit e talin e maruwel ni nge gi’ e but’ u milay’ rok ni nge yung e awoch ngay. Ere, ku arrogon ni kab kafram i yib ni ke pi’ Jehovah boor mit e talin e maruwel ngodad ni nge ayuwegdad u rogon ni ngad ayuweged e girdi’ ni ngar adaged ni ngar motoyilgad ko n’en ni gad be machibnag. Bay boch e pi talin e maruwel nem nde n’uw nap’an nda fanayed, ma bay boch ni kad fanayed ke mada’ ko chiney. Machane, gubin e pi talin e maruwel ney ni ke ayuwegdad u rogon ni ngad mon’ognaged e salap rodad ni gad boch e tamachib.

5. Mang fa yungi babyor ni un fanay u nap’an e machib kafram ni ka nog e testimony card ngay, ma uw rogon ni un fanay?

⁵ Reb e pi talin e maruwel nem ni ayuweg boor e walag ni ngar tababgad ko machib e aram yungi babyor ni bay e thin riy ni ka nog e testimony card ngay ni tabab e pi walag i fanay u nap’an e duw ni 1933. Ba achig e noch yang i babyor nem ma bay e thin nu Bible riy. Ma bayi n’en mu kun ngongliy bang nib beech ni ngan puthuy ngay ni bay boch e thin nib beech riy. Rib mom ni ngan nang fan e thin ni bay ko yungi babyor nem! Nap’an ni ke gaman ragag e duw rok C.  W. Erlenmeyer me tabab ni nge un ko mit ney e machib. I yog ni gaar: “Ba ga’ ni ma lungumad, ‘Wenig ngom, rayog ni ngam beeg e gi babyor ney?’ Tomuren ni ke beeg facha’ fagi babyor, ma aram mug pied reb e babyor ngak ma gamad yan.”

6. Uw rogon ni i ayuweg e pi testimony card e pi walag u nap’an e machib?

⁶ Boor e kanawo’ ni i ayuweg e yungi card nem e pi tamachib riy. Bay boch i yad ni baadag ni nge un ko machib, machane yad ba tatamra’ maku dar nanged e n’en ni nga rogned. Ma boch i yad e boor ban’en ni baadag ni nge weliy ko girdi’. Ere, nap’an ni bay ra mada’naged be’ mar weliyed urngin ban’en ni yad manang ngak u lan in e minit, machane bayi n’en ma darur gonopiyed rogon e pi n’en ni yad be weliy ko girdi’! Machane, yungi babyor nem ni un fanay ni ka nog e testimony card ngay e kan mel’eg in e thin kan yoloy ngay, ma bod ni ir e “ma non ni pa’” fare walag ni be yan ko machib.

7. Mang boch e magawon ni i mada’nag boch e walag u nap’an ni yad be fanay fa yungi testimony card u nap’an e machib?

⁷ Machane, bay boch e magawon ni i mada’nag e pi walag u nap’an ni yad be fanay e yungi card nem. Grace A. Estep nreb e walag ni ke n’uw nap’an ni ke pigpig ngak Got e yog ni gaar: “Bay yu ngiyal’ ni bayi n’en me fithmad be’ ni gaar, ‘Mang e be yog? Dabiyog ni kemus ni ngam weliy ngog e n’en ni bay riy?’” Maku reb e, bay boch e girdi’ ndabiyog ni ngar beeged e n’en ni bay u daken e yungi babyor nem. Maku bay boch e girdi’ nnap’an ni bay ni pi’ fa yungi babyor ngorad ni ngar beeged, mar lemnaged ni aram e kan pi’ ni ngar fanayed, ma aram mar feked fa yungi babyor mar sulod ngar ninged e mab rorad. Ma bay boch e girdi’ ni yima yan nga taferad nri dubrad e machib ni yad ma guchthiy e yungi babyor nem. Yugu aram rogon, ma yungi babyor nem ni ka nog e testimony card ngay e i ayuweg e pi walag u rogon ni ngar machibnaged e girdi’ miki gagiyelnagrad ni yad boch  e tamachib ni yad be machibnag murung’agen Gil’ilungun Got.

8. Mu weliy rogon ni un fanay fare masin ni ka nog e portable phonograph ngay. (Mu guy e sasing ni bay u tabolngin e re article ney.)

⁸ Ku reb e talin e maruwel ni un fanay u tomuren e duw ni 1930 e reb e masin ni ka nog e portable phonograph ngay ara reb e masin ni yima recordnag lunguy ngay muun cheleg ni ngan rung’ag. Bay boch e walag nra tunguyed fithingan e re masin nem ni Aron ni bochan e aram e n’en ni ma non ni pa’rad u nap’an e machib. (Mu beeg e Exodus 4:14-16.) Nap’an nra mada’nag reb e walag be’ ni ke m’agan’ ngay ni ngan cheleg e re phonograph nem ni nge rung’ag e thin riy, ma aram me cheleg fare walag reb e welthin nib puluw e thin riy ko Bible ni kan recordnag ngay ni aningeg nge baley e minit n’umngin nap’an, ma tomuren ma aram me pi’ fare walag ba ken e babyor ngak facha’. Bay yu ngiyal’ ni ma muulung girdien reb e tabinaw nga taabang ni ngar motoyilgad nga reb e welthin ni kan recordnag ko re phonograph nem nib puluw e thin riy ko Bible! Ma nap’an e duw ni 1934 ma aram me tabab fare Watch Tower Society i ngongliy boch e pi masin ney ni ngaun fanay u nap’an e machib. Munmun ma aram me recordnag e pi walag 92 e welthin ko pi masin nem ni ngaun rung’ag.

9. Mang angin fare masin ni un fanay ni ka nog e phonograph ngay?

⁹ Nap’an ni cheleg reb e walag reb e pi welthin nem nge rung’ag be’ ni ka nog Hillary Goslin ngak, ma aram me ning reb e pi masin nem ngak fare walag ni nge cheleg nge rung’ag e girdi’ ko gin ni ma par riy. Nap’an ni sul fare walag bayay ni nge guy fare pumoon maku bay boch e girdi’ ni yad be sonnag. Munmun ma aram me un boch i yad ko taufe, miki un l’agruw e ppin ni fak Hillary ko fare skul ni ka nog e Gilead School ngay, ma tomuren ma aram min pi’row nga yugu reb e nam ni ngar machibgow. Fare masin ni ka nog e phonograph ngay e ku bod fare testimony card ni un fanay ya ki ayuweg boor e walag u rogon ni ngar machibgad. Boch nga tomuren, ma aram me tabab Jehovah i skulnag e girdi’ rok u rogon ni ngar machibgad u daken fare Theocratic Ministry Skul.

GAD BE FANAY URNGIN E KANAWO’ NRAYOG NI NGAD WEREGED FARE THIN NIB FEL’ RIY

10, 11. Uw rogon ni un fanay e shimbung nge radio ni ngan wereg fare thin nib fel’ riy? Mang fan ni i yib angin e pi kanawo’ nem ni un fanay ni ngan machibnag fare thin nib fel’ riy?

¹⁰ Boor e kanawo’ ni ke wereg e girdi’ rok Got fare thin nib fel’ riy. Ma rib ga’ fan e re n’ey ni bochan e “ba lich” girdien e maruwel. (Mu beeg e Matthew 9:37.) U tabolngin e bin ni 20 e chibog ma un fanay e pi shimbung ni ngan wereg fare thin nib fel’ riy nge yan i mada’ ko yungi n’en ni buchuuw e pi tapigpig rok Jehovah riy. Gubin e wik ni ma pi’ Charles Taze Russell reb e welthin nib puluw e thin riy ko Bible nge yan nga reb e ulung ni yad ma ngongliy e shimbung. Ma aram me pi’ e re ulung nem fare welthin ngki yan nga yugu boch e ulung ni yad ma ngongliy e shimbung u Meriken, nge Canada, nge Europe. Nap’an ni yan i taw ko duw ni 1913, ma ke beeg 15,000,000 e girdi’ e welthin rok Brother Russell ni kan tay nga 2,000 e pi shimbung nem!

¹¹ Tomuren ni yim’ Brother Russell, ma aram mu kun tabab i wereg fare thin nib fel’ u yugu reb e kanawo’. Nap’an e April 16 ko duw ni 1922, me pi’ Joseph F. Rutherford e bin som’on e welthin rok u radio, ma sogonap’an 50,000 e girdi’ nra rung’aged e re welthin nem. Munmun ma aram me tababnag e ulung rodad reb e radio station ni ka nog e WBBR ngay. Me yan i nap’an e February 24 ko duw ni 1924, ma aram min cheleg e bin th’abi som’on e program ko re station nem ni nge rung’ag e girdi’. Baaray e n’en ni yog Fare Wulyang ko Damit ko December 1, 1924 u murung’agen e re kanawo’ ney ni un machibnag e girdi’ riy. I yog ni gaar: “Ba mich u wan’mad ni buchuuw e salpiy ni yira fanay maku boor e girdi’ nrayog ni ngar rung’aged fare thin nib fel’ ko radio ni yibe fanay e chiney.” Radio ni un fanay e ku taareb rogon ko shimbung, ya ayuweg e pi tamachib u rogon ni ngar wereged fare thin nib fel’ nge yan i taw ko yungi n’en ni buchuuw e pi walag ni bay riy.

12. (a) Mang boch kanawoen e machib ni yima tay ko yungi n’en ni ma muulung e girdi’ ni yoor ngay ni kam guy ni ga baadag? (b) Mang e rayog ni nge ayuwegdad ni nge dab kud rusgad ni ngad uned ko machib ko yungi n’en ni ma muulung e girdi’ ni yoor ngay?

¹² Chiney e gad be athamgil ni ngaud machibgad ko  yungi n’en ni ma muulung e girdi’ ni yoor ngay ni bod rogon e: gin ni ma tal e bus riy, nge train, nge parking lot, nge yungi n’en ni ma muulung e girdi’ ni yoor ngay, ngu market. Faanra ga be rus ni ngam machib ko yungi n’ey, ma rayog ni ngam fal’eg i lemnag e pi thin ni baaray ni yog be’ ni ke n’uw nap’an ni ma lekag e pi ulung i yan ni ka nog Angelo Manera, Jr. ngak. I yog ni gaar: “Nap’an ni yira tababnag reb e kanawoen e machib ni kab beech, ma gamow ma tay ni aram reb e kanawo’ nrayog ni nggu pigpiggow riy ngak Jehovah, ma gamow micheg ni gamow ba yul’yul’ ngak, min skengnag e yul’yul’ romow. Machane, demtrug rogon mab m’agan’mow ngay ni nggu pigpiggow ngak Got ko re miti kanawo’ ni baadag ni nggu rin’ew riy.” Faan gad ra un i rin’ e re maruwel ney u reb e kanawo’ ni yugu ba thil ndad mechamgad ngay, ma ra ayuwegdad ni nge gel e michan’ rodad ngak Jehovah mi ri pagan’dad ngak. Ma re n’ey e ra ayuwegdad ni ngad ilalgad ko tirok Got ban’en.​—Mu beeg e 2 Korinth 12:9, 10.

13. Mang fan nib ga’ angin fare website rodad ni jw.org? Mang boch i angin ni ke yib u nap’an ni kam fanay e re website ney?

¹³ Boor e walag ni yad baadag ni yad ma weliy murung’agen fare website rodad ko girdi’ ni jw.org, ya aram e gin nrayog ni ngan beeg boch e babyor riy nib puluw e thin riy ko Bible mu kun downloadnag boch ni kan pilyeg nga boor ko 700 mit e thin. Ra reb e rran mab pag 1.6 milyon e girdi’ ni yad ma yan ko re website rodad nem. Re website rodad ney e ku bod e radio ni un fanay kafram ya be yag ni ngan wereg fare thin nib fel’ riy ngak e piin ni yad ma par u boch e binaw nib palog.

YIBE SKULNAG E PI TAMACHIB U ROGON NI NGAR MACHIBNAGED FARE THIN NIB FEL’

14. Mang e ba t’uf ni ngan skulnag e pi walag riy, ma mang skul e ke ayuwegrad ni ngar manged boch e sensey nib manigil?

¹⁴ Kemus nri in e pi talin e maruwel nge kanawo’ ni yibe machib riy ni kad weliyed murung’agen. Machane, uw rogon e skul ni yibe tay ngodad? Susun e bay be’ ni dabun e n’en ni ke rung’ag ko fare phonograph, ara baadag ni ngki nang boch ban’en u murung’agen e pi n’en ni ke beeg ko fare testimony card. Faanra aram rogon ma aram e ba t’uf ni nge nang e pi walag rogon ni ngar fulweged lungun be’ ni dabun e machib nge rogon ni ngar skulnaged be’ ni baadag e machib nib fel’ rogon. Dariy e maruwar riy ni gelngin Got nib thothup e aram e n’en ni ayuweg Nathan H. Knorr ni nge guy nib t’uf ni ngan skulnag e pi walag u rogon ni ngar nonad ko girdi’ u nap’an e machib. Ere, mang e ni rin’? Nap’an e duw ni 1943 ma aram min tabab ni ngaun tay fare Theocratic Ministry Skul ko pi ulung i yan. Aram e re skul ni ke ayuwegdad ni nge yag nda manged boch e sensey nib manigil.

15. (a) Mang e buch rok boch e walag u nap’an nra uned i pi’ e welthin ko fare Theocratic Ministry Skul? (b) Uw rogon ni kam guy nriyul’ fapi thin ni ke micheg Jehovah ni bay ko Psalm 32:8?

¹⁵ Ku boor e walag ni kub mo’maw’ rorad ni ngar nonad u p’eowchen e girdi’ ni yoor. I weliy Julio S. Ramu murung’agen e bin som’on e welthin ni pi’ u nap’an e re skul nem ko duw ni 1944. Welthin rok e murung’agen Doeg, nreb e pumoon ni kari mus ni lal e thin nu Bible ni bay murung’agen riy. I yog Julio ni  gaar: “Gu wan gu sak’iy nga lang ni be chachafin bugug, ma be da’da’ paag, ma be chachafin nguweleg.” Miki yog nre welthin nem ni nge pi’ e kemus nre lal i thin nu Bible nem e rayog ni nge fanay riy. Ki ulul ngay ni gaar: “Gu pi’ e welthin rog u lan dalip e minit. Aram rogon e yay nth’abi som’on ni gu pi’ e welthin u p’eowchen e girdi’ ni yoor, machane de mulan’ug.” Mus ko piin bitir ni kur uned ko re skul nem ni yugu aram rogon ni bay boch i yad nde mom rok ni nge pi’ e welthin u lan e ulung. Angelo Manera ni faan kan weliy murung’agen e ki yog ni bay bochi pagel ni ka fini un nga skul nnog ngak ni nge pi’ e bin som’on e welthin ni yima pi’ u nap’an e re skul ney. I yog e re walag ney ni gaar: “Kari rus nib gel. Ere, nap’an ni tabab ni nge welthin ma aram me tabab ko meyor. Machane, kari dugliy u wan’ ni nge pi’ e re welthin rok nem. Ere, pi’ fare welthin nge yan i m’ay ni be yor.” Ba mo’maw’ rom ni ngam pi’ e fulweg ara ngam un ko pi n’en ni yima rin’ u nap’an e muulung ni bochan e ga be tamra’ ara bochan ni ga be lemnag ndabiyog rom, fa? Mog ngak Jehovah ni nge ayuwegem ni nge dab kum rus. Dariy e maruwar riy nra ayuwegem ni bod rogon ni ayuweg e piin ni ur uned ko fare Theocratic Ministry Skul kafram.​—Mu beeg e Psalm 32:8.

16. Mang fan ni kan tay fare skul u Gilead (a) kafram (b) ni ka nap’an e duw ni 2011?

¹⁶ Gathi kemus ni yigoo Theocratic Ministry Skul e aram e skul ni ma un e pi tapigpig rok Jehovah ngay. Boor e missionary nge ku boch e walag ni ke yib angin fare skul ngorad ni ka nog e Gilead School ngay. I yog reb e walag ni ir reb e sensey ko re skul nem ni fan ni yima tay e re skul nem e bochan ni “nge ayuweg e pi walag ni ngar ra adaged ni ngar machibgad.” Nni tababnag e re skul nem u nap’an e duw ni 1943, ma keb i mada’ ko chiney ma ke pag 8,500 e walag ni kar uned ngay, ma ke gaman 170 e binaw ni kan pi’ e pi walag ngay ni kar uned ko re skul nem. Ka nap’an e duw ni 2011, ma kemus ni yigoo pi special pioneer, nge pi walag ni yad ma lekag e ulung, nge piin ni yad ma maruwel u Bethel, nge pi missionary ndawor ra uned ko re skul nem u Gilead e ir e yibe pi’rad ni nga ranod ngay.

17. Mang angin fare skul u Gilead?

¹⁷ Mang angin e re skul ney? Am lemnag e n’en ni buch u Sapan. Nap’an e August ko duw ni 1949 mab lich ko ragag e walag ni bay u rom. Faani taw nga tungun e re duw nem, ma kan pi’ 13 e missionary ni kan skulnagrad u Gilead e ngaram ni ngar machibgad. Chiney e sogonap’an 216,000 e pi walag ni yad ma machib u Sapan, mab chugur ko 42 e pasent e yad boch e pioneer!

18. Mang boch e skul ni ku be ayuweg e pi walag ni ngar ilalgad ko tirok Got ban’en?

¹⁸ Ku bay boch e skul ni ku be ayuweg e pi walag ni ngar ilalgad ko tirok Got ban’en mar salapgad ko machib ni bod rogon fare skul ni ka nog e Kingdom Ministry Skul ngay, nge Skul ni Fan ko Piin Pioneer, nge fare skul ni yima yog e School for Kingdom Evangelizers ngay, nge Skul ni Fan ko Piin ni Yad Ma Lekag e Ulung nge Ppin Rorad, nge Skul ni Fan ko Branch Committee nge Ppin Rorad. Dariy e maruwar riy ni ka be skulnag Jesus e girdi’ rok!

19. Mang e yog Charles Taze Russell u murung’agen fare maruwel ni machib, ma uw rogon ni ke m’ug nib puluw e pi thin ney?

¹⁹ Ke pag 100 e duw ni ke tabab Gil’ilungun Got ko gagiyeg. Ma ka be ulul Jesus ni ir e Pilung rodad ni nge skulnagdad. U m’on ni nge yim’ Charles Taze Russell me yog nib mich u wan’ nre maruwel ni machib ney e ra garer nga ga’ngin yang e fayleng. I yog ngak reb e walag ni gaar: “Rib papey ni be mon’og e re maruwel ney i yan, maku ra ulul ni nge mon’og i yan ya bay ba maruwel nthingar ni rin’ u ga’ngin yang e fayleng ni aram e ngan machibnag fare ‘gospel ni murung’agen gil’ilungun Got.’” (Faith on the March, by A. H. Macmillan, p. 69) Rib puluw e n’en ni yog! Ma ri gad be pining e magar ni ka be ulul Jehovah ni ir fare Got ko gapas ni nga i ayuwegdad u rogon ni ngad rin’ed e re maruwel ney! Ma dariy e maruwar riy ni be pi’ “urngin e tin nib fel’” ban’en nib t’uf rodad ya nge yag nda rin’ed e n’en nib m’agan’ ngay!

[Boch e thin nra tamilangnag murung’agen]

[Deer ni ngan pi’ e fulweg riy]