Gur, Bay Ba Ngiyal’ Nra Tal e Sasalap?

I ILAL Panayiota u reb e donguch u lan e Mediterranean. Nap’an ni kab fel’ yangaren ma ri baadag ni ma un nga boch ban’en ko am. Boch nga tomuren ma aram me yan i par ni ir e en tayol ko reb e ulung ko am ko re binaw ni baaram ni ma par riy. Ku ma yan u mit e tabinaw i yan ni be rin’ boch ban’en ni nge yognag e salpiy ni fan ko re ulung nem ni ma un ngay. Machane, faani munmun me tamilangan’ Panayiota u rarogon e re ulung nem. I guy ni yugu aram rogon ni ma yog girdien e re ulung nem ni yad bogi fager, machane ba gel e laniyan’ u thilrad, nge fare lem ni ngari yag e n’en ni yibe nameg, nge awan’, maku der ma taareb lungurad.

Daniel e ilal u reb e tabinaw u Ireland nri yad ba m’ing ko teliw rorad. Machane, der ma pagtalin rarogon e ngongol ko padrey ko teliw rok. Ya ir be’ ni ma chingaw nib pag rogon, ma ma un nga boch e gosgos ni yima fek e salpiy riy, maku ma iring e salpiy ni yima kunuy u galesiya. Machane, ma yog ku Daniel ni faanra denen ma ra yan nga fithik’ e nifiy ni ngan gafgownag u rom.

Jeffery e ir be’ ni ma maruwel rok boch e girdi’ ni yad ma pi’ e barkow nni chuway’ ni bay e company rorad u United Kingdom nge Meriken. Ke yib ngan’ nnap’an ni i maruwel u rom ma boor yay ni bayi n’en ma pi cha’ ni baaram ni ma maruwel rorad nge ku boch e company ni ma tagenging ngorad e yad ma guy rogon ni ngar bannaged girdien e am u murung’agen e pi n’en ni yad be pi’ ni chuway’ ko am. I guy ni yugu demtrug e n’en ni yad ma yog ngak be’ ni fan e nge yag ni signnag facha’ babyoren e pi n’en ni yibe pi’ ni chuway’ ngak.

Biney e ngongol e ke garer u gubin yang. Gubin ban’en ni yima rin’ e ngiyal’ ney nib sug ngongolen e sasalap riy, ni bod rogon e pi n’en ni ma rin’ e am, nge pi yurba’ i teliw, nge pi siyobay. Fare bugithin ni “sasalap” ara be’ ni ma dake modingnag ir e ke yib u bbugithin ni Greek ni be yip’ fan be’ ni be non ara be yan u yaan ban’en ni ke upunguy ban’en nga owchen. Munmun, ma aram mu un fanay e re bugithin ney ni nge yip’ fan be’ ni ma rin’ boch ban’en ni nge bannag boch e girdi’ ara nge fel’ boch ban’en riy ngak.

Ngongol u fithik’ e sasalap e rayog ni nge yib wenegan nib kireb ni bochan e rayog ni nge aw nga laniyan’ e piin ni kan rin’ e biney e ngongol ngorad, ara k’aring e damumuw ngorad, ara ra lemnaged ni ngar sulweged taban e n’en ni kan rin’ ngorad. Maku rayog ni ngar fithed ni nge lungurad: “Gur, bay ba ngiyal’ nra tal e sasalap?” Machane, gad ba felfelan’ ni bochan e be micheg e Thin rok Got ngodad nra taw nga ba ngiyal’ ma ra tal e ngongol u fithik’ e sasalap.

ROGON E SASALAP U WAN’ GOT NGE FAK

Be yog e Bible ni tabab e biney e ngongol rok reb e kan u tharmiy ndabiyog ni ngan guy. Nap’an nni sunmiy e girdi’, me non Satan ni Moonyan’ u l’ugun reb e porchoyog nge bannag e bin som’on e ppin ni aram Efa. (Genesis 3:1-5) Ka aram nap’an i yib ni boor e girdi’ ni yad ma dake yad boch e girdi’ ni yad ba fel’ machane bin riyul’ riy e gathi aram rogorad. Ma yad ma rin’ e re n’ey ni bochan e ngar bannaged e girdi’ me yag boch ban’en riy ngorad.

Nap’an ni i un piyu Israel ko liyor ni googsur maku yad  be dake yad be liyor ngak Got, ma boor yay ni i yog Got ngorad ni bay wenegan nra yib ngorad. I non Jehovah Got u daken Isaiah ni profet ni gaar: “Pi girdi’ ney e yad be yog ni yad be liyor ngog, machane thin rorad e ba m’ay fan, ya lanin’rad e ba sap nga bang.” (Isaiah 29:13, BT) Nap’an nde fol piyu Israel, me pag Got e pilung u boch e binaw ni ngar gotheyed tagil’ e liyor rorad. Som’on e buch e re n’ey u nap’an e duw ni 607 B.C.E. u nap’an ni yib piyu Babylon ra gotheyed yu Jerusalem nge tempel riy, ma nap’an e duw ni 70 C.E. miki yib e pi salthaw nu Roma ra gotheyed yu Jerusalem. Ere, ba tamilang ni dabun Got e sasalap nge piin ni yad ma dake modingnaged yad.

Maku reb e, ri baadag Got nge Jesus ni Fak e piin ni yad ba yul’yul’. Bod nnap’an ni ka fini tabab Jesus ko machib, me yib be’ nib moon ngak ni ka nog Nathanael ngak. Nap’an ni guy Jesus Nathanael me non ni gaar: “Cha’ney e riyul’ ni ir be’ u Israel, ni be’ nrib yul’yul’!” (John 1:47) Cha’nem i Nathanael e ku yima yog Bartholomew ngak, ma ir reb fa 12 i apostal rok Jesus.​—Luke 6:13-16.

I tay Jesus e tayim ni fan ngak pi gachalpen, ma i fil ngorad e pi n’en nib m’agan’ Got ngay. Ki yog ngorad nthingar dab ur dake modingnaged yad. I yog Jesus nib kireb e ngongol rok e pi tayugang’ ko teliw e ngiyal’ nem ni yad ma dake modingnaged yad. Baaray boch ban’en ni yad ma rin’.

Yad ma rin’ boch ban’en nib “fel’” ni fan e nge guy e girdi’. I yog Jesus ngak e piin ni ur motoyilgad ngak ni gaar: “Mu guyed rogomed ni nge dab mu ngongliyed e ngongol nib fel’ u fithik’ e girdi’ ni fan e nge guy e girdi’ e n’en ni gimed be rin’ . . . ni bod ni ma rin’ e piin ni ma madag girdi’.” Ki yog ngorad nnap’an ni yad ra pi’ ban’en nib tow’ath ngak be’ ma ngar guyed rogon ‘ndabi nang e girdi’.’ Susun ni ngkur meybilgad ni goo yad, ma gathi kemus nu nap’an ni be guyrad e girdi’. Faan yad ra rin’ ni aray rogon ma aram e ra m’ug nib riyul’ e liyor ni yad be tay ma ra m’agan’ e Chitamangin ngay.​—Matthew 6:1-6.

Yad ma par nib sap owcherad ko girdi’. I gaar Jesus: “Gur e cha’ ni ga be dake modingnigem! Som’on e ngam chuweg fare ley i gek’iy u lan owchem, nge mu’ ma aram me yog ni mu guy ban’en ngam chuweg fare tabyu’ u lan mit walagem.” (Matthew 7:5) Faanra yig i par be’ ni ke yip’ owchen ko oloboch rok be’ ma bay ban’en ni be rin’ ni kab gel e kireb riy, ma aram e be dake modingnag ir ni bochan e be dake ba fel’ e ngongol rok ma bin riyul’ riy e danga’. Ya gad manang ni “ke denen urngin e girdi’, kar pired ni yad mmal’af rok Got ke mul e flaab rok u pa’rad.”​—Roma 3:23.

Yad ma lemnag boch ban’en nde fel’. Immoy bayay ni yib boch i gachalpen e pi Farise nge Herod ra fithed reb e deer ngak Jesus u murung’agen e tax ni yima pi’. I lungurad ngak Jesus: “Tamachib, gamad manang ni gur reb e girdi’ nib riyul’ e tin ni ga ma yog nge tin ni ga ma rin’, ma ga be fil ngak e girdi’ e tin nib riyul’ ni murung’agen e tin nib m’agan’ Got ngay ni nge rin’ e girdi’.” Ma aram mar fithed reb e deer ngak Jesus ni yad be guy rogon ni ngar ninged e kanawo’ ngak ko thin. Ra fithed ni lungurad: “Gur ba togopluw ko Motochiyel rodad ni ngan pi’ e tax ni yibe pi’ ngak e pilung nu Roma fa danga’?” Me fulweg Jesus ni gaar: “Gimed e pi tadake moding nir! Mang ni gimed be guy rogon ni nggu aw ko wup romed?” Ba puluw e n’en ni yog Jesus ya pi girdi’ nem e gathi riyul’ ni yad baadag ni ngar nanged e fulweg ko pi deer nem ni ur fithed, ya kemus ni yad baadag ni ngar “ninged e kanawo’ ngak Jesus ko thin.”​—Matthew 22:15-22.

Nap’an ni tabab e ulung ni Kristiano ko Pentekost ko duw ni 33 C.E., ma gubin e girdi’ u lan e ulung ni yad ma yog e tin riyul’ ma yad ba yul’yul’. I athamgil e tin riyul’ e Kristiano ni nge dab kur boded e piin ni yad ma dake modingnaged yad. Bod ni, Peter nreb fa 12 i apostal rok Jesus e pi’ e athamgil nga laniyan’ e pi Kristiano ni ngar ‘folgad ko tin nib riyul’, ma yad be par nrib t’uf rorad e piin ni yad ni ke mich Kristus u wun’rad ni bod yad.’ (1 Peter 1:22) Ki pi’ apostal Paul e athamgil nga laniyan’ e piin ni ur maruwelgad u taabang ni ngar daged e “t’ufeg ni ma yib ko gum’ircha’ nib machalbog, ma ma yib u lanin’uy ni der yog ngom gur be’ ni kam rin’ ban’en nib kireb, ma ma yib ko bin nib riyul’ i rogon nib mich Kristus u wun’uy.”​—1 Timothy 1:5.

GELNGIN E THIN ROK GOT

Kab ga’ angin e pi n’en ni i fil Jesus nge pi apostal rok ko ngiyal’ ney ni bod rogon u nap’an e bin som’on e chibog. I yoloy apostal Paul murung’agen e re n’ey ni gaar: “Thin rok Got e ba fos ma ba’ gelngin ni ma maruwel. Ya kab m’uth nga bangi sayden ni ruw raba’ ma mm’uth. Ya ma yan nge yan i taw nga fithik’ i lanin’dad ko n’en ni gadad be lemnag, nge fithik’ e ulul nge yil, ma ma pufthinnag e n’en ni yima yim’ ni bochan nge tin ni yima lemnag.” (Hebrews 4:12) Boor e girdi’ ni kar filed e thin nu Bible ma kar gayed rogon ni ngar folgad riy, ma angin ni ke yib riy e dakur boded e  piin ni yad ma dake modingnaged yad ma ke yag ni ngar ngongolgad u fithik’ e yul’yul’. Am lemnag e n’en ni buch ko fapi cha’ ni kad weliyed murung’agrad u tabolngin e re article ney.

I thil e yafas rok Panayiota u nap’an ni m’agan’ ngay ni nge un ko muulung ni yima tay u Kingdom Hall ko Pi Mich Rok Jehovah. I guy ni girdi’ u rom e darur rin’ed boch ban’en nib fel’ ni bochan e nge guy e girdi’. I yog ni gaar: “Aram e gin ni gguy e bin riyul’ e t’ufeg riy mu kug guy ni girdi’ u rom e riyul’ ni yad ma lemnag e girdi’. Ma aram ban’en ndawor gguy u n’umngin nap’an ni ug un nga ngongolen e am.”

I tabab Panayiota ko fol Bible me mon’og i yan nge un ko taufe. Pi n’ey ni buch rok e ke pag 30 e duw ni ke yan. I yog ni gaar: “Nap’an ni gu tabab i machibnag murung’agen Gil’ilungun Got, ni aram e re am nra fek e tin nib mat’aw nga fayleng, mug guy ni ke yib fan e yafas rog. Da ug guy e re n’ey u nap’an ni gu be yan u mit e tabinaw i yan ni gu be rin’ boch ban’en ni fan ko re ulung ko am ni baaram ni ug un ngay.”

I mon’og Daniel u lan e ulung ni Kristiano ma aram min pag fan boch e maruwel ngak ni nge rin’ u lan e ulung. Boch e duw nga tomuren me rin’ reb e oloboch ma aram me magawon e nangan’ rok. I yog ni gaar: “Bochan ndawor gu pagtalin rogon e ngongol ni ug guy ni un rin’ ko teliw ni ug un ngay kafram, ma aram fan ni gu dugliy ni nggu tal i rin’ e pi maruwel ni baaram ni kan pag fan ngog u lan e ulung. Dabiyog ni ngaug dag ko pi walageg ni Kristiano ni gag be’ ni gub fel’, machane bin riyul’ riy e danga’.”

Tomuren ni thilyeg Daniel boch ban’en ko ngongol rok me yag ni ngki sul ngki pigpig bayay ni ke beech e nangan’ rok, mu kun sul ngan pi’ boch e maruwel ngak u lan e ulung. Aray rogon e piin ni yad ma pigpig ngak Got u fithik’ e yul’yul’ ndar boded e piin ni yad ma dake modingnaged yad. Kar filed rogon ni ngar ‘chuweged fare ley i gek’iy u lan owcherad’ u m’on ni ngar ‘chuweged fare tabyu’’ u lan mit walagrad.

Jeffery ni faan i un ko siyobay e yog ni gaar: “Nap’an ni yoor ban’en ni gu fil u lan e Bible, ma aram mug nang ndabkiyog ni nggu un i rin’ e pi n’en ni ug rin’ kafram. Dabkiyog ni nggu bod e piin ni ug maruwelgad u taabang ni yad ma ban u murung’agen boch ban’en ya nge yag nra k’aringed boch e girdi’ ni ngar chuw’iyed e chugum ni yad be pi’ ni chuway’. Ke thilyeg boch e thin nu Bible rogon ni gu ma lem ni bod rogon fare thin nu Bible ni bay ko Proverbs 11:1 (BT) ni faan be yog ni Jehovah e ‘ba fanenikay e girdi’ ni ma maruwel ko thabthabel nde puluw.’” Arrogon, ke fil Jeffery rogon ni nge ngongol u fithik’ e yul’yul’ ngak e pi Kristiano ni taareb e michan’ rorad nge piin nde taareb e michan’ rorad, ma dab ki bod fapi girdi’ u nap’an Jesus ni faan ra fithed ngak reb e deer u murung’agen e tax ni yima pi’.

Ma athamgil e Pi Mich Rok Jehovah u ga’ngin yang e fayleng ni ngar folgad ko pi n’en ni kar filed u lan e Bible. Yad ma athamgil u rogon nrayog rorad ni nga ‘ron’ed nga dakenrad e bin nib beech i yad ni bod rogon e munmad, ni bin nib beech i yad ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmat’aw ni ke yag ngorad.’ (Efesus 4:24) Gamad be pi’ e athamgil nga lanin’um ni ngkum fil boch ban’en u murung’agen e Pi Mich Rok Jehovah, nge n’en ni ke mich u wan’rad, nge rogon nrayog ni ngar ayuweged gur ni ngam fil murung’agen e bin nib beech e fayleng ni ke micheg Got, ya aram e gin nra par e “tin nib mat’aw” riy ma dariy e piin ni yad ba sasalap riy ara piin ni yad ma dake modingnaged yad.​—2 Peter 3:13.

[Blurb ko page 29]

Tin riyul’ e Kristiano e yad ma dag e “t’ufeg ni ma yib ko gum’ircha’ nib machalbog, ma ma yib u lanin’uy ni der yog ngom gur be’ ni kam rin’ ban’en nib kireb, ma ma yib ko bin nib riyul’ i rogon nib mich Kristus u wun’uy.”​—1 TIMOTHY 1:5