1-2. Mang boch e magawon ni ma mada’nag boor e Pi Mich?

I PI’ apostal Paul e athamgil nga laniyan’ Timothy ni nge pi’ e tin th’abi fel’ rok ni fan ko fare maruwel ni machib, ni kub muun urngin e Kristiano ngay. (2 Tim. 4:5) Gad gubin ni gad ma fol ko fare fonow ni pi’ Paul. Machane yu ngiyal’ e ba mo’maw’. Boor e pi walagdad ni yad ma rus ni ngar machibgad. (2 Tim. 4:2) Am lemnag boch e walag ni ma par u boch e nam ni bay boch ban’en u rogon e maruwel rodad nrayog ni ngan rin’ riy ma boch e dabiyog, nge boch ni ka rin taleg e machib rodad riy. Yad ma machib ni yugu aram rogon ni yad manang ni yira kalbusnagrad!

² Boor e magawon ni ma mada’nag e girdi’ rok Jehovah nrayog ni nge k’aringrad ni nge mulan’rad. Bod ni boor i yad e ba t’uf ni nge maruwel u lan boor e awa ya nge yognag e tin nib t’uf ko tabinaw rok. Yad baadag ni ngar yoornaged e tayim rorad ni fan ko machib, machane ra yan i taw nga tungun e wik ma ke aw parowrad. Ku bay boch e walag ni buchuuw ban’en nrayog ni ngar rin’ed ni fan ko pigpig rorad ni bochan e yad ba m’ar ara kar pilibthirgad, fa reb e yad be par u taferad ndabkiyog ni nga ranod nga bang. Ku boch e walag e gubin ngiyal’ ni yad ma lemnag nde ga’ farad u wan’ Jehovah. Mary * nreb e walag nib pin ni ma par u Middle East e yog ni gaar: “Bayi n’en mug thamiy ni ke aw parwog ni bochan e yug gu be guy rogon ndab kug lemnag boch ban’en nde puluw u nap’an ke mulan’ug. Ere ma kireban’ug ni bochan e gu be fanay e tayim rog nge gelngig ni gu be guy rogon ndab kug lem ni aray rogon ko bin ni nggu fanay ni fan ko machib.”

3. Mang e gad ra weliy ko re article ney?

³ Demtrug e magawon ni gad be mada’nag, ma rayog ni nge pi’ Jehovah gelngidad ni ngad ululgad ko pigpig ni gad be tay ngak u rogon nrayog rodad. U m’on ni ngad weliyed rogon nrayog ni nge ayuwegdad Jehovah, ma som’on e ngad weliyed rogon  ni ayuweg Paul nge Timothy ni ngar machibgow nib fel’ rogon ni yugu aram rogon ni yow be mada’nag e magawon.

4. Mang boch e magawon ni mada’nag Paul?

⁴ Boor e magawon ni i mada’nag Paul. Machane ngiyal’ nri t’uf ni ngan pi’ gelngin e nap’an ni chel e pi toogor rok ngar toyed, mar kalbusnaged, mu kur guyed rogon ni ngar thanged e fan rok. (2 Kor. 11:23-25) De tamra’ Paul ni nge yog ni bay yu ngiyal’ ni i mulan’. (Rom. 7:18, 19, 24) Ki yib ‘ba liliy ngak nib gel e amith riy’ nri baadag ni nge chuweg Got.​—2 Kor. 12:7, 8. 

5. Mang e yag ni nge rin’ Paul ni yugu aram rogon ni i mada’nag e magawon?

⁵ Yugu aram rogon urngin e magawon ni yib ngak Paul, machane i pi’ Jehovah gelngin ni nge ulul ko machib. Am lemnag e n’en ni yag ni nge rin’. Nap’an ni immoy u reb e naun u Roma nib kalbus, ma boor e girdi’ ni machibnagrad ni kub muun ngay e pi tayugang’ ko am. (Acts 28:17; Fil. 4:21, 22) Ki machibnag e pi Matanag u Tafen e En Pilung nge piin ur bad ra guyed. (Acts 28:30, 31; Fil. 1:13) Ki yoloy boch e babyor ko Bible ni ke ayuweg e tin riyul’ e Kristiano ke mada’ ko chiney. N’en ni rin’ e pi’ gelngin e pi walag ko ulung nu Roma, ma angin ni yib riy e yag ni ngar machibnaged e “thin rok Got ngak e girdi’ ndakurir tuntungad ma dakurir tamdaggad.” (Fil. 1:14) Yugu aram rogon ni yu ngiyal’ e boor ban’en ndabiyog ni nge rin’ Paul, machane i rin’ e tin rayog rok ma aram me yag ni nge “wereg e Thin Nib Fel’ ni yib rok Got.”​—Fil. 1:12.

6. Mang e ayuweg Paul ni nge machib nib fel’ rogon nrogon ni bay ko 2 Korinth 12:9, 10?

⁶ Manang Paul ni Jehovah e ir e be pi’ gelngin be yag ni nge pigpig ngak ma gathi be rin’ u gelngin. I yog nib gel gelngin Got ni be ayuweg ko ‘ngiyal’ nib meewar.’ (Mu beeg e 2 Korinth 12:9, 10.) I pi’ Jehovah gelngin nib thothup ni nge ayuweg Paul ni nge machib nib fel’ rogon ni yugu aram rogon ni yibe gafgownag, ma yibe kalbusnag, maku be mada’nag yugu boch e magawon.

7. Mang boch e magawon ni yib ngak Timothy nrayog ni nge mo’maw’nag rogon ni nge rin’ e maruwel ni kan pi’ ngak?

⁷ Timothy ni ur machibgow Paul u taabang e kub t’uf ni nge taga’ nga gelngin Got u nap’an ni i machib. I un ngak Paul ngaur milekaggow nga boch e binaw nib palog ni yow be machib. Ki yog Paul ngak ni nge milekag nga boch  e ulung ni nge pi’ e athamgil nga lanin’rad. (1 Kor. 4:17) Sana lemnag Timothy ndabiyog rok e re maruwel ney. Ere rayog ni aram fan ni gaar Paul ngak: “Dab mu pag be’ nge darifannigem ni bochan e ka gab pagel.” (1 Tim. 4:12) Ku rayog ni ngiyal’ nem e “yugu ma yib e m’ar” ngak Timothy. (1 Tim. 5:23) Machane manang nra pi’ Jehovah gelngin nib thothup ni nge ayuweg ni nge machibnag fare thin nib fel’ ma be ayuweg pi walagen.​—2 Tim. 1:7.

8. Uw rogon ni ma pi’ Jehovah gelngin e girdi’ rok e ngiyal’ ney?

⁸ Ma pi’ Jehovah gelngin ni “ir e ba th’abi gel” ko girdi’ rok e ngiyal’ ney, ya nge yag nra ululgad ko pigpig ni yad be tay ngak u fithik’ e yul’yul’. (2 Kor. 4:7) Chiney e ngad weliyed aningeg e kanawo’ ni ma pi’ Jehovah gelngidad riy me ayuwegdad ni ngad pared ni gad ba yul’yul’ ngak. Pi n’ey e aram e meybil, nge Bible, nge pi walag ni gad ma chag ngorad, nge machib.

9. Uw rogon nra ayuwegdad e meybil?

⁹ Ma pi’ gelngidad u daken e meybil. I pi’ Paul e athamgil nga lanin’dad ko Efesus 6:18 ni ngaud meybilgad ngak Got ni “gubin ngiyal’.” Ra fulweg taban e meybil rodad ni aram e nge ayuwegdad. Jonnie ni ma par u Bolivia e guy rogon ni ayuweg Jehovah u nap’an ni mada’nag boch e magawon. Taa bangiyal’ ni m’ar leengin nge gallabthir rok. Ba mo’maw’ ngak Jonnie ni nge ayuwegrad ni yad dalip taab yay. I yim’ e chitiningin mab n’uw nap’an mfini gol leengin nge chitamangin ko m’ar rorow. I sul Jonnie nge lemnag e ngiyal’ nem me gaar, “Nap’an nra magafan’ug nib gel, ma n’en ma ayuwegeg e aram e nggu meybil ngak Jehovah nggu weliy lanin’ug ngak.” I pi’ Jehovah gelngin Jonnie ni nge athamgil u fithik’ e magawon rok. Ronald nreb e piilal u Bolivia e rung’ag ni ke cancer e chitiningin. Reb e pul nga tomuren me yim’. Ere mang e ayuweg Ronald ni nge athamgil? I gaar: “Nap’an nug ra meybil ngak Jehovah, ma gu ma weliy ngak urngin ban’en ni bay u lanin’ug. Gu manang ndariy be’ nri manangeg nib fel’ rogon ni bod rogon Jehovah. Mus ngog ma bay boch ban’en u rarogog ndag nang ni bod rogon ir.” Yu ngiyal’ e rayog ni ngad lemnaged ndabkiyog ni ngad athamgilgad u fithik’ e magawon rodad, ma da kud nanged e n’en ni nga dogned u lan e meybil rodad. Yugu aram rogon, ma be pi’ Jehovah e athamgil nga lanin’dad ni ngad meybilgad ngak ni mus ni faanra ba mo’maw’ ngodad ni ngad weliyed ngak e n’en bay u lanin’dad.​—Rom. 8:26, 27.

10. Mang nib ga’ fan ni ngaud beeged e Bible ma gad be fal’eg i lemnag nrogon ni bay ko Hebrews 4:12?

¹⁰ Ma pi’ gelngidad u daken e Bible. I beeg Paul e thin ni bay ko fare Babyor nib Thothup ya nge pi’ gelngin me fal’eg laniyan’. Ere ku aram e n’en nib t’uf ni ngad rin’ed. (Rom. 15:4) Nap’an ni gad ra beeg e Thin rok Got ma gad fal’eg i lemnag, ma rayog ni nge ayuwegdad Jehovah ni ngad nanged rogon nra ayuwegdad e thin riy. (Mu beeg e Hebrews 4:12.) Ronald ni faan kan weliy murung’agen e yog ni gaar: “Kug felfelan’ ni kug guy rogon ni nge mecham ngog ni ngaug beeg bang ko Bible ni gubin e blayal’. Rug ma fal’eg i lemnag pi fel’ngin Jehovah nge rogon ni ma ayuweg e girdi’ rok. Re n’ey e ma pi’ gelngig.”

11. Uw rogon ni ayuweg e Bible reb e walag nib pin ni ke kireban’?

¹¹ Nap’an ni gad ra fal’eg i lemnag e Thin rok Got, ma ra ayuwegdad ni nge puluw rogon ni ngad lemnaged e magawon rodad. Am lemnag rogon ni ayuweg e Bible reb e walag nib pin ni ke kireban’ ya ke yim’ e pumoon rok. I yog reb  e piilal ngak ni faanra beeg fare babyor rok Job, ma boor ban’en riy nra fil nrayog ni nge ayuweg. Nap’an ni beeg me lemnag nde puluw rogon e lem ni tay Job. I gaar u wan’: “Job! Gathi goo magawon rom e ngaum lemnag!” Machane me yan i nang ni taareb rogon e lem rorow Job. Ireray e n’en ni ayuweg ni nge thilyeg rogon e lem ni be tay miki pi’ gelngin ni nge athamgil u fithik’ e kireban’ ni be tay ni bochan e ke yim’ e pumoon rok.

12. Uw rogon ni ma pi’ Jehovah gelngidad u daken e pi walag?

¹² Ma pi’ gelngidad u daken e pi walag ni gad ma chag ngorad. Ku reb e kanawo’ ni ma pi’ Jehovah gelngidad riy e u daken e piin taareb e michan’ rodad. I yoloy Paul ni baadag ni nge ‘fel’ rogon ko michan’ rok e pi walagen miki fel’ rogon pi walagen ko michan’ rok.’ (Rom. 1:11, 12) Mary ni faan kan weliy murung’agen e baadag ni ma chag ko pi walagen u lan e ulung. I gaar: “Ke ayuwegeg Jehovah u daken boch e walag ndar nanged e magawon rog. Bayi n’en ma rogned boch e thin nra pi’ e athamgil nga lanin’uy ara ra yoloyed boch yang i babyor ngar pied ngog, ma aram e n’en nrib t’uf rog. Kub ga’ angin nug ma non ngak boch e walag nib pin ni ka ur mada’naged boch e magawon ni taareb rogon ko magawon rog, mug fil ban’en ko n’en ke buch rorad. Ku ma dag e piin piilal ngog nib ga’ fag u lan e ulung.”

13. Uw rogon ni ngad pied e athamgil ngodad u nap’an e muulung?

¹³ Muulung ni gad ma tay e aram bang nib fel’ ni ngaud pied e athamgil riy nga lanin’dad. Nap’an ni ga ra yan ko muulung, mag guy rogon ni nga mog ko pi walag ni yad ba t’uf rom, mag pining e magar ngorad ko tin yad be rin’ ya nge yag nim pi’ e athamgil nga lanin’rad. Bod ni bay bayay u m’on ko muulung me gaar Peter nreb e piilal ngak reb e matin nder ma un figirngin ko tin riyul’: “Ri ma yib e athamgil nga lanin’ug u nap’an nra gguyem ni ka mub ko muulung. Yugu aram rogon ni nel’ e bitir rom, machane gubin ngiyal’ ni gimed ra yib ma kam fal’eg rogorad maku yad ma pi’ e fulweg.” Ri sugsug e lu’ nga owchen e re walag ney me gaar: “Dam nang gelngin e athamgil ni kam pi’ nga lanin’ug ko re bugithin nir ni ka mog ngog.”

14. Uw rogon ni ma ayuwegdad e machib?

¹⁴ Ma pi’ gelngidad u daken e machib. Ba gel e felfelan’ ni gad ma tay u nap’an ni gad ra machibnag e girdi’ ndemtrug ko yad ra motoyil fa danga’. Bay reb e walag nib pin ni ka nog Stacy ngak nri guy rogon ni ma pi’ Jehovah gelngidad u daken e machib. Ri kireban’ nib gel u nap’an nni tharbog reb i girdien e tabinaw rok, mi i par ni be fith ir ni be gaar, ‘Gur, ka bay ban’en nsusun e nggu rin’ ni nggu ayuweg ma dag rin’?’ Ba mo’maw’ ngak ni nge tal ndab ki lemnag e re n’ey. Ere mang e ayuweg? Machib ni i tay! Nap’an nra un ko machib, ma girdi’ ko gin be machib riy nib t’uf e ayuw rorad e ir e be lemnagrad. I gaar: “Nap’an e ngiyal’ nem, me pi’ Jehovah be’ ni nggu fil e Bible ngak nib papey ni mon’og. Re n’ey e ri pi’ e athamgil ngog. Machib e aram e n’en ni kari ayuwegeg.”

15. Mang e kam fil ko n’en ni yog Mary?

¹⁵ Bay boch e girdi’ nrayog ni ngar lemnaged ni boor ban’en ndabiyog ni ngar rin’ed ni fan ko machib ni bochan rarogorad. Faanra arrogon e lem rom, ma dab mu pagtalin ni faan ga ra pi’ e tin th’abi fel’ rom ngak Jehovah ma ra felfelan’. Am lemnag Mary ni faan kan weliy murung’agen. Nap’an ni yan i par nga bang nib thil e thin ko girdi’ riy, me lemnag ni boor ban’en ndabiyog ni nge rin’. I gaar, “Ba n’uw nap’an nra un yan ko machib, ma kemus nug be yog buchuuw e thin, ara gu beeg reb e thin  nu Bible, ara gu pi’ bang e tract.” Re n’ey e k’aring ni nge lemnag nde bung rogon ni nge rin’ boch ban’en ni be rin’ e piin yad ba salap ko binem e thin. Machane, me guy rogon ni nge thilyeg rogon e lem ni be tay. I tabab ni nge nang ni yugu aram rogon ni bay boch ban’en ndabiyog rok, machane rayog ni nge fanay Jehovah ni nge rin’ boch ban’en. I gaar, “Ba mom ni ngan nang fan e n’en be yog e Bible ma rayog ni nge thilyeg e yafos ko girdi’.”

16. Mang e ra pi’ gelngin e piin dabiyog ni ngar chuwgad u taferad machane yad baadag ni ngar uned ko machib?

¹⁶ Mus ni faanra dabiyog ni ngad chuwgad u tafedad, ma manang Jehovah ni gad baadag ni ngad uned ko machib. Ere rayog ni nge bing e kanawo’ ngodad ni ngad machibnaged e togta ara kangof ni be ayuwegdad. Faanra ud taareb rogonnaged e tin gad be rin’ e chiney ko tin ni i yag ni ngad rin’ed kafram, ma rayog ni nge mulan’dad. Machane faan gad ra nang ni be ayuwegdad Jehovah e chiney, ma ra yib gelngidad ni ngad athamgilgad u fithik’ urngin mit e magawon ni be yib ngodad ni gad ba felfelan’.

17. Mang fan nsusun e ngad ululgad ko machib ni yugu aram rogon nder yib angin nib papey nrogon ni bay ko Eklesiastes 11:6?

¹⁷ Dad nanged ko tin ngan i awochngin e tin riyul’ ni kad yunged e ra tugul me ilal i yan. (Mu beeg e Eklesiastes 11:6.) Barbara nreb e walag nib pin ni ke pag 80 e duw rok e gubin ngiyal’ ni ma machib u telefon ma be yoloy e babyor nga i pi’ ko girdi’. Bay bang ko pi babyor nem ni yoloy, me tay ba ken Fare Wulyang ko Damit ngay ko March 1, 2014 ni bay riy fare article ni kenggin e “N’en ni Ke Rin’ Got ni Fan Ngom.” De nang nre gi babyor nem e ke yan ngak ba wu’ i mabgol ni ur moyew kafram ni yow l’agruw e Pi Mich Rok Jehovah. Boor yay nra beegew e re ke babyor ney. I lemnag fare pumoon ni be non Jehovah ngak. Ere ra tababgow ni ngaur unew ko muulung bayay me munmun mar sulow ko tin riyul’. Ke pag 27 e duw ni kar talgow ko muulung nge machib. Rib gel e athamgil ni yib nga laniyan’ Barbara u nap’an ni guy ni ke yib angin fa taagi babyor ni ke yoloy!

18. Mang e thingar da rin’ed me pi’ Got gelngidad?

¹⁸ Boor ban’en ni ke pi’ Jehovah ni nge pi’ gelngidad ni bod rogon e meybil, nge Bible, nge pi walagdad, nge fare maruwel ni machib. Gad ra fanay e pi n’ey, ma aram e gad be dag nib pagan’dad ngak nrayog rok, maku baadag ni nge ayuwegdad. Ere gubin ngiyal’ ni nga i pagan’dad ko Chitamangidad ni bay u tharmiy ni baadag ni “nge pi’ gelngin e piin yad ba yul’yul’ ngak u gum’ircha’rad.”​—2 Kron. 16:9, BT.