“FAANRA siyeg bigimed ni nge cham ngak yu France ara England, ma gimed gubin nthingar mm’ad!” Ireray e pi thin ni tolulnag ba salthaw ko Nazi nga daken ba ulung i Mich Rok Jehovah u nap’an e Bin L’agruw e Mahl ko Fayleng. Yugu aram rogon ni bay e pi salthaw ko Nazi ni kar feked talin e cham ni yad be son u tooben e pi walag nem, machane dariy taa bagayad ni m’agan’ ngay ni nge rin’ e n’en ka nog ngorad. Re n’ey nrin’ed e be m’ug riy ndarur rusgad! N’en ni rin’ e pi walag ney e be tamilangnag rogon e lem rok e Pi Mich Rok Jehovah u murung’agen e mahl ni yima tay ni aram e: Gad ma siyeg ndab da uned ko pi mahl ni yima tay u roy u fayleng. Gad ma par u mathilin ngongolen e am ni yugu aram rogon ni yibe yog ni yira thang e fan rodad.

1. GIRDI’ ROK GOT E YAD GIRDIEN TAAB NAM

Kakrom e mel’eg Jehovah taareb e nam ni ngar manged girdien, ni aram fare nam nu Israel. I yog ni piyu Israel e ‘kar manged e girdi’ rok.’ (Ex. 19:5) Ki pi’ Got bang e binaw ni ngar tafnayed. Ere nap’an ni yog Got ngorad ni nga ranod ra chamgad ko girdi’ u yugu boch e nam, ma gathi aram e ku yad be cham ngaur lied boch i yad. a

Ngiyal’ ney e pi tapigpig rok Jehovah e kar bad u “gubin e nam, nge ganong, nge gubin mit e girdi’, ngu gubin e thin.” (Rev. 7:9) Ere faan yad ra un  ko mahl, ma aram e rayog ni ngaur chamgad ngorad mu kur lied boch i yad.

2. I YOG JEHOVAH NGAK PIYU ISRAEL NI NGA RANOD KO MAHL

Kakrom e Jehovah e ir e i dugliy e ngiyal’ nge fan nib t’uf ni nge yan piyu Israel ko mahl. Bod ni yog Got ngak piyu Israel ni ngar chamgad ngak piyu Kanaan ni bochan e ke dugliy nib kireb e rorad ko liyor ni yad be tay ni bay rogon nga ngongolen e moonyan’, nge ngongol ndarngal ni yad be rin’ nib gel e sonogor riy, nge bitir ni yad be pi’ ni maligach. I yog ngak piyu Israel ni ngar chuweged e mit ney e ngongol nib kireb ko re nam nem ni ke micheg ni nge pi’ ngorad. (Lev. 18:24, 25) Tomuren nranod ra pared ko fare Nam ni Kan Micheg, maku bay yu ngiyal’ ni i yog Got ngorad ni nga ranod ko mahl ya ngar ayuweged yad ko pi toogor rorad. (2 Sam. 5:17-25) Machane dariy ba ngiyal’ ni pag Jehovah piyu Israel ni ngar dugliyed rorad ni nga ranod ko mahl. Bin riyul’ riy e nap’an ni u ranod ko mahl ni yad rorad, mab ga’ ni i buch boch ban’en rorad nib kireb.​—Num. 14:41-45; 2 Kron. 35:20-24.

Ngiyal’ ney e der ma yog Jehovah ko girdi’ ni nga ranod ko mahl. Pi nam e yad ma cham ni fan ko n’en baadag e girdi’, ma gathi fan ko n’en baadag Got. Yad ma tababnag e mahl ni bochan e yad baadag ni nge ga’ e binaw ni taferad, ara nge yoor e salpiy rorad, ara yad be tay tanggin boch ban’en ni be lemnag e am rorad nib fel’ ni ngan rin’. Machane uw rogon e piin yad ma yog ni yad be cham ni fan ngak Got ya ngar ayuweged e liyor rorad, ara ngar lied e pi toogor rok Got? Ra ayuweg Jehovah e tin riyul’ e tapigpig rok me thang e pi toogor rok u nap’an reb e mahl ni yira tay boch nga m’on ni aram fare mahl ni Armageddon. (Rev. 16:14, 16) Pi salthaw rok Got u tharmiy e yad e yad ra cham u nap’an e re mahl ney, ma gathi girdi’ ni yad be pigpig ngak.​—Rev. 19:11-15.

3. I AYUWEG PIYU ISRAEL E YAFOS ROK E PIIN KAR DAGED NIB MICH GOT U WAN’RAD

Kakrom e ba ga’ ni i runguy e pi salthaw nu Israel e piin kar daged nib mich Got u wan’rad, ma kemus ni yigoo piin ke yog Jehovah ni bay rogon ni ngan thang e fan rorad e yad ma li’rad ngar m’ad. Am lemnag l’agruw ban’en ni buch. Yugu aram rogon ni  yog Jehovah ni ngan gothey yu Jeriko, machane de thang piyu Israel e fan rok Rahab nge chon e tabinaw rok ni bochan e michan’ rok. (Josh. 2:9-16; 6:16, 17) Boch nga tomuren ma dan thang piyu Gibeon u tomuren nra daged ni yad be tayfan Got.​—Josh. 9:3-9, 17-19.

Ngiyal’ ney e pi nam ni yad ma cham e darur ayuweged e yafos rok e piin bay e michan’ rorad. Maku yu ngiyal’ e yima thang e fan rok e girdi’ ndariy ban’en ni kar bucheged.

4. PIYU ISRAEL E THINGAR RA FOLGAD KO PI MOTOCHIYEL NI KE NGONGLIY GOT U ROGON NI NGAUN MAHL

Kakrom e baadag Jehovah ni nge mahl e pi salthaw nu Israel nib puluw nga rogon ni ke yog ngorad. Bod ni yu ngiyal’ e i yog Got ngorad nnap’an ni yad ra yan ni ngar mahlgad nga reb e binaw, ma som’on e ngar paged e girdi’ ko fare binaw ni “ngar weniggad ndab ni mahl ngorad.” (Deut. 20:10, BT) Kub m’agan’ Jehovah ngay ni nge par e pi salthaw nu Israel ni yad bbeech maku dab ra uned ko ngongol ndarngal. (Deut. 23:9-14) Yugu aram rogon ni salthaw ko pi nam u toobrad e nap’an ni yad ra cham nga reb e binaw ngar gelgad mar koled e pi ppin riy u gelngirad, machane Jehovah e da i pag piyu Israel ni ngar rin’ed e re n’ey. Bin riyul’ riy e, dabiyog ni nge leay bagayad reb e ppin ni kar feked u reb e binaw ni kar gelgad ngay nge yan i gaman reb e pul nga tomuren ni kar gelgad ko fare binaw.​—Deut. 21:10-13.

Ngiyal’ ney e yooren e nam e ke m’agan’rad ngay ni ngar mahlgad nrogon nib puluw ko pi motochiyel ni kan ngongliy ni fan ko mahl ni yibe tay. Yugu aram rogon ni kan ngongliy e pi motochiyel ney ni nge ayuweg e girdi’ ni gathi yad e salthaw, machane ba ga’ ndanir fol riy.

5. I CHAM GOT NI PA’ E GIRDI’ ROK

Kakrom e i cham Jehovah ni pa’ piyu Israel, mab ga’ ni i ayuwegrad ngaur gelgad ko mahl u daken e maang’ang. Bod ni uw rogon ni ayuweg Jehovah piyu Israel ni ngar gelgad ko fare mach nu Jeriko? Nap’an ni tolul piyu Israel “ni ba ga’ lamrad, me muchubu’ fare yoror nga but’ nib liyeg fare binaw” ni bod rogon ni yog Jehovah, ma aram me mom ngorad ni ngar koled e re mach nem. (Josh. 6:20) Ma uw rogon nra gelgad ngak e pi Amorite? I “yin’ Somol e ayis ni gang’ yang u lang nga dakenrad . . . Pire’ e tin ni yim’ ko re ayis nem ko tin ni li’ piyu Israel.”​—Josh. 10:6-11.

TIN RIYUL’ E KRISTIANO E YAD MA AWNAG E GAPAS

Ba tamilang ko n’en kad weliyed nrib gel e thil ko n’en be buch rodad e ngiyal’ ney ko n’en ni i buch rok piyu Israel kakrom. Machane gathi kemus fan ndarud uned ko mahl, ya ku bay boch i fan. Bod ni yog Got u m’on riy nra taw ko tin tomuren e rran ma piin be skulnagrad e “dab kur fal’eged rogorad bayay ni fan ko mahl” ara ra uned ko mahl. (Isa. 2:2-4) Maku reb e yog Kristus ni pi gachalpen e gathi yad bang ko re “fayleng” ney. Ere ra ur pared u mathilin ngongolen e am ko re fayleng ney.​—John 15:19.

Ku bay ban’en ni pi’ Kristus e athamgil nga laniyan’ pi gachalpen ni ngar rin’ed. I yog ngorad ni ngar siyeged boch e lem ni ma k’aringey ni ngaun tay e kireb u lanin’uy, ma yibe damumuw, ma yibe mahl. (Matt. 5:21, 22) Ki yog ngorad ni ngar ‘muruwliyed ni nge aw e gapas u thilrad e girdi’’ mu kur t’ufeged e pi toogor rorad.​—Matt. 5:9, 44.

Ma uw rogodad ni be’ nge be’? Dabisiy ndubdad ni ngad uned ko mahl, machane gur, bay be’ u lan e ulung ni toogor rodad? Ngad ululgad ngad athamgilgad u rogon nrayog rodad ni ngad chuweged boch e lem ni aray rogon ni bay rodad.​—Jas. 4:1, 11.

Darud uned ko mahl ni ma tay e pi nam, ya gad ma athamgil u rogon nrayog rodad ni ngad pared ni bay e gapas nge t’ufeg u thildad. (John 13:34, 35) Ere manga yu gud dugliyed u wan’dad ni ngaud pared u mathilin ngongolen e am ma gad be sonnag e ngiyal’ nra taleg Jehovah e mahl ndariy n’umngin nap’an.​—Ps. 46:9.