1. Mang e athap rodad ni ke pi’ Jehovah?

 KE PI’ Jehovah e athap ko yafos ni manemus ngodad nrib manigil. Bay boch i gadad ni be athapeg e yafos ni manemus u tharmiy ni kan pi’ reb e dowef ngorad ni gathi downgin e girdi’ ndab kur m’ad biid. (1 Kor. 15:50, 53) Machane yooren i gadad e be athapeg e yafos ni manemus u fayleng ni ke fel’ fithik’ i dowdad ma gad ba felfelan’. (Rev. 21:3, 4) Demtrug ko gad be athapeg e yafos ni manemus u tharmiy ara u fayleng, mab ga’ fan u wan’dad e athap rodad.

2. Mang e be tor e l’agan’ ara athap rodad nga daken, ma mang fan nrayog ni nga dogned e re n’ey?

² Fare bugithin ni “l’agan’” ara athap nrogon ni kan fanay u Bible e be yip’ fan “ni ngaun lemnag ni bay boch ban’en nib fel’ nra buch.” Ba mudugil e athap rodad boch nga m’on ni bochan e Jehovah e ir e ke yib rok. (Rom. 15:13) Gad manang e n’en ke micheg maku gad manang ndariy ba ngiyal’ nra thilyeg. (Num. 23:19) Ba mich u wan’dad ni baadag Jehovah ni nge lebguy urngin ban’en ni ke yog nra rin’ maku bay gelngin ni nge rin’ e re n’ey. Ere athap rodad e gathi kemus ni ban’en ni yug gad be susunnag u lanin’dad ara yugu ban’en ni gad baadag ni nge buch, ya be tor nga daken boch ban’en ni gad manang nib riyul’.

3. Mang e gad ra weliy ko re article ney? (Psalm 27:14)

³ Gad ba t’uf rok e Chitamangidad ni bay u tharmiy, ma baadag ni nge pagan’dad ngak. (Mu beeg e Psalm 27:14. b) Faanra ri be l’agan’dad ngak Jehovah, ma rayog ni ngad athamgilgad u fithik’ e pi skeng ni gad be mada’nag, ma demtrug e n’en nra buch rodad boch nga m’on ma gad ra par ndab da rusgad ma gad ba felfelan’. Ere ngad weliyed rogon nrayog ni nge ayuwegdad e athap rodad. Machane som’on e ngad weliyed rogon ni kan taarebrogonnag e l’agan’ ara athap rodad nga ba angkar nge ba urwach. Ngemu’ ma gad weliy rogon ni ngari l’agan’dad ko pi n’en bay nga m’on.

4. Uw rogon ni kan taarebrogonnag e l’agan’ rodad nga ba angkar? (Hebrews 6:19)

⁴ Nap’an ni yol apostal Paul ngak e pi Hebrew me taarebrogonnag e l’agan’ rodad nga ba angkar. (Mu beeg e Hebrews 6:19.) Ba ga’ ni ma milekag Paul u maday, ere manang ni angkar e aram e n’en ma tay e barkow u gil’ ndabi man’. Immoy bayay ni be milekag u reb e barkow, me cham bangi lang nga dakenrad u maday. Me guy e pi sala ni kar paged e angkar nga maday ya nge dabi yan e re barkow nem nga daken e malang u maday. (Acts 27:29, 39-41) Pi n’en be l’agan’dad ngay e ma ayuwegdad ni ngad pared ni gad ba mudugil ndab da man’gad nga orel rok Jehovah u nap’an ni kad mada’naged e magawon nib gel ni bod ba angkar ni ma tay ba barkow u gil’ ndabi man’. Ireray e n’en ni ma taydad nib gapas lanin’dad u nap’an ni gad ra mada’nag e magawon ni bochan e ba mich u wan’dad nra fel’ boch ban’en u puluwdad boch nga m’on. Dab mu pagtalin ni yog Jesus ni yira gafgownagdad. (John 15:20) Ere faanra ud fal’eged i lemnag e pi n’en ke micheg Jehovah ngodad, ma aram e ra ayuwegdad ni ngad ululgad ko pigpig ni gad be tay ngak.

5. Nap’an ni mudugil ni nge yim’ Jesus, ma uw rogon ni ayuweg e pi n’en be l’agan’ ngay ni nge par nib mudugil?

⁵ Am lemnag rogon ni par Jesus nib mudugil ni bochan e pi n’en be l’agan’ ngay ni yugu aram rogon ni manang nib gel e amith ko yam’ nra tay. Nap’an e Pentekost ko duw ni 33 C.E., me sul apostal Peter u daken ba yiiy ni bay ko fare babyor ni Psalm ni be weliy rogon ni par Jesus nib gapas laniyan’ mab pagan’. Be gaar: “Bay ug par ni ke pagan’ug u fithik’ e l’agan’, ya dabiyog ni ngam n’igeg nggu par u tafen e yam’, ya dabiyog ni ga ra pag e tapigpig rom nib yul’yul’ nge mel. . . . Ma bay mfelfelan’nigeg ni bochan e ga ba’ rog.” (Acts 2:25-28; Ps. 16:8-11) Yugu aram rogon ni manang Jesus nra yim’, machane rib pagan’ ngay nra faseg Got ko yam’ miki sul ngak e Chitamangin nga tharmiy.​—Heb. 12:2, 3.

6. Mang e yog reb e walag ni pumoon u murung’agen e l’agan’?

⁶ Athap rodad e piin Kristiano e ke ayuweg boor e walag ni ngaur athamgilgad. Am lemnag e n’en ni buch rok Leonard Chinn nreb e walag ni pumoon nib yul’yul’ ni i par u England. Nap’an e Bin Som’on e Mahl ko Fayleng min kalbusnag ni bochan e siyeg ni nge un ko salthaw. L’agruw e pul nni tay u lan bochi singgil ni yigoo ir, ma nga tomuren mu un maruwel ngak nib elmerin. Boch nga tomuren me yoloy ni gaar: “N’en ni buch rog e ayuwegeg ni nggu nang feni t’uf e l’agan’ rodad ya nge yag nda athamgilgad. N’en ni rin’ Jesus, nge pi apostal, nge pi profet, nge pi n’en nib manigil ni kan micheg u Bible e be ayuwegdad ni nge l’agan’dad ko pi n’en bay nga m’on ma be pi’ gelngidad ni ngad athamgilgad.” L’agan’ e bod ba angkar ngak Leonard, maku rayog ni nge mang angkar rodad.

7. Uw rogon ni ma ayuwegdad e pi skeng ni gad ma mada’nag ni ngari l’agan’dad ko pi n’en bay nga m’on? (Roma 5:3-5; James 1:12)

⁷ Tomuren ni kad athamgilgad u fithik’ e pi skeng ni gad be mada’nag ma kad guyed rogon ni ke ayuwegdad Jehovah ma kad pared ni gad ba fel’ u wan’, ma aram e rra l’agan’dad ko pi n’en bay nga m’on. (Mu beeg e Roma 5:3-5; James 1:12.) L’agan’ ni bay rodad e ra gel ko l’agan’ ni immoy rodad ko ngiyal’ ni baaram ni ka fini m’agan’dad ko fare thin nib fel’. Baadag Satan ni nge mulan’dad ko pi skeng ni gad be mada’nag, machane ra ayuwegdad Jehovah ni ngad athamgilgad u fithik’ e pi skeng nem.

8. Uw rogon ni kan taarebrogonnag e l’agan’ rodad nga ba urwach? (1 Thessalonika 5:8)

⁸ Ku be taarebrogonnag e Bible e l’agan’ rodad nga ba urwach. (Mu beeg e 1 Thessalonika 5:8.) Ma tay e salthaw e urwach ya nge ayuweg lolugen ndabi aw ban’en ngay u nap’an ni be cham ko pi toogor rok. Ku arrogodad nib t’uf ni ngad ayuweged lanin’dad ko cham ni be tay  Satan ngodad. Boor ban’en ni ma fanay ni nge mang wal ngodad me alitnag lanin’dad. Ere pi n’en be l’agan’dad ngay e ma ayuweg lanin’dad ya nge yag nda pared ni gad ba yul’yul’ ngak Jehovah ni bod rogon e urwach ni ma ayuweg lolugen reb e salthaw.

9. Mang e ma buch ko girdi’ ni faanra dariy ban’en ni yad be athapeg boch nga m’on?

⁹ Athap ko yafos ni manemus ni bay rodad e ra ayuwegdad ni ngad ngongolgad u fithik’ e gonop nge tamilangan’. Machane faanra maruwar u wan’dad e athap rodad mu ud pared ni pi n’en gad be ar’arnag e gad be lemnag, ma aram e gad ra pagtalin e athap rodad ko yafos ni manemus. Am lemnag e n’en ni buch rok boch e Kristiano ni ur pared u Korinth kakrom. Daki mich u wan’rad e athap ko fos ko yam’ ni aram reb e ban’en nib ga’ fan ni micheg Got. (1 Kor. 15:12) I yog Paul ni piin ndarur athapeged boch ban’en nga m’on e kemus ni yigoo par rorad e chiney e ir e yad be lemnag. (1 Kor. 15:32) Boor e girdi’ e ngiyal’ ney nder l’agan’rad ko pi n’en ke micheg Got ni yad ma rin’ e tin rayog rorad ya nge yag nra felfelan’gad ko par rorad e chiney. Machane gadad e be l’agan’dad ko pi n’en ke micheg Got boch nga m’on. L’agan’ rodad e bod ba urwach ni ma ayuweg lanin’dad miki ayuwegdad ndab da pared ni yigoo gadad e gad be lemnagdad me kireb e tha’ u thildad Jehovah.​—1 Kor. 15:33, 34.

10. Uw rogon nra ayuwegdad e l’agan’ rodad ni ngad siyeged boch e lem nde puluw?

¹⁰ L’agan’ rodad e ku rayog ni nge ayuwegdad ndab ud lemnaged ndabiyog ni ngad rin’ed e n’en nib m’agan’ Jehovah ngay. Bod nrayog ni nge gaar boch e girdi’ u wan’rad: ‘Dariy e n’en nra rin’ mug mang bagayad e piin nra par ndariy n’umngin nap’an, ya kaygi gel e kireb rog. Dabiyog ni nggu rin’ e n’en baadag Got ni nggu rin’.’ Dab mu pagtalin ni ku ireray e n’en ni yog Elifaz u nap’an ni be non ngak Job. I gaar: “Rayog ni nge par ba girdi’ nib machalbog?” Ngemu’ me weliy murung’agen Got ni gaar: “Got e mus ko pi engel rok maku der pagan’ ngorad; mus ngorad maku dar machalboggad u p’eowchen.” (Job 15:14, 15, BT) Rib kireb e tiney e ban! Dab mu pagtalin ni Satan e ir e baadag ni ngam lem ni aray rogon. Manang ni faanra um lem ni aray rogon, ma ra maruwar u wan’um e athap rom. Ere mu siyeg e tiney e ban mag yiluy e lem rom ko pi n’en ke micheg Jehovah. Gubin ngiyal’ ni ngaum par nib mich u wan’um ni baadag ni ngam par ndariy n’umngin nap’an, ma ra ayuwegem ni nge yag e re athap ney ngom.​—1 Tim. 2:3, 4.

11. Mang fan nsusun e ngad gum’an’naged gadad u nap’an ni gad be son ni nge lebug e pi n’en gad be athapeg?

¹¹ Gathi gubin ngiyal’ nib mom ni nga i par ni be l’agan’dad ko pi n’en bay nga m’on. Rayog ni nge chalbadad u nap’an ni gad be sonnag Got ni nge lebguy e n’en ke micheg. Machane Jehovah e de sum ma dariy e rofen nra mus, mab thil rogon ni ma lemnag e tayim nga rogon ni gad ma lemnag. (2 Pet. 3:8, 9) Ra rin’ e n’en ke micheg ko bin th’abi fel’ e kanawo’ nrayog ni nge rin’ riy, machane sana dabi rin’ ko ngiyal’ ni gad be lemnag. Mang e rayog ni nge ayuwegdad ni nga i par ni be l’agan’dad ko pi n’en bay nga m’on mad gum’an’naged gadad ngad sonnaged Got ni nge lebguy e pi n’en ke micheg?​—Jas. 5:7, 8.

12. Mang rogon e l’agan’ rodad ko michan’ ni bay rodad nrogon ni be yog e Hebrews 11:1, 6?

¹² Faan gad ra par ni gad ba chugur ngak Jehovah ni ir e en nra lebguy e pi n’en gad be athapeg, ma aram e rayog ni nga i par ni be l’agan’dad ko pi n’en bay nga m’on. Bin riyul’ riy e, be yog e Bible nra nge yag e l’agan’ ngodad ma thingari mich u wan’dad ni bay Jehovah ma ir e “ra tow’athnag e piin ni yad be gayiy.” (Mu beeg e Hebrews 11:1, 6.) Ra ri be riyul’ Jehovah u wan’dad, ma aram e rayog ni ngari pagan’dad nra rin’ urngin e tin ke micheg. Ere chiney e ngad weliyed boch e kanawo’ nrayog ni nge chugur  e tha’ u thildad Jehovah riy, me par ni be l’agan’dad ko pi n’en bay nga m’on.

13. Uw rogon ni ngad chugurgad ngak Got?

¹³ Mmeybil ngak Jehovah, mag beeg e Thin rok. Yugu aram rogon ndabiyog ni ngad guyed Jehovah, machane rayog ni ngad chugurgad ngak. Rayog ni ngad nonad ngak u daken e meybil, ya ba pagan’dad nra motoyil ngodad. (Jer. 29:11, 12) Rayog ni ngad motoyilgad ngak Got u nap’an ni gad be beeg e Thin rok, ma gad be fal’eg i lemnag. Nap’an ni gad ra beeg rogon ni i ayuweg e piin yad ba yul’yul’ ngak kakrom, ma aram e rra l’agan’dad ko pi n’en bay nga m’on. Urngin ban’en nni yoloy nga lan e Thin rok Got e “ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.”​—Rom. 15:4.

14. Mang fan ni ngaud lemnaged e n’en ke rin’ Jehovah ni fan ngak yugu boch e girdi’?

¹⁴ Mu fal’eg i lemnag rogon nde thilyeg Jehovah e tin ke micheg. Am lemnag e n’en ni rin’ Got ni fan ngak Abraham nge Sarah. Ngiyal’ nem e kar pilibthirgow ndabkiyog ni ngar fakayew e bitir. Yugu aram rogon me micheg Got ngorow ni yow ra fakay bochi tir. (Gen. 18:10) Ere mang e rin’ Abraham? Be gaar e Bible: “Par Abraham ni kab mich Got u wan’ ma be l’agan’ ko tin ni ke yog Got ngak, . . . ni [bayi] mang ‘chitamangin boor e nam.’” (Rom. 4:18) Yugu aram rogon nde nang Abraham rogon nra riyul’ e n’en ke micheg Jehovah, machane ba pagan’ ngay nra lebguy Jehovah e n’en ke micheg. Ma aram e n’en ni buch rok e re moon ney nib yul’yul’. (Rom. 4:19-21) Pi n’ey ni bay u Bible e be fil ngodad ni gubin ngiyal’ nrayog ni nge pagan’dad ngay nra lebguy Jehovah e tin ke micheg ni yugu aram rogon ni gad be lemnag ni pi n’em e bogi ban’en ndabiyog ni nge buch.

15. Mang fan nsusun e ngaud lemnaged e pi n’en ke rin’ Got ni fan ngodad?

¹⁵ Mu lemnag e pi n’en ke rin’ Jehovah ni fan  ngom. Am lemnag rogon ni ke yib angin ngom e pi n’en kan micheg u lan e Thin rok Got ni ke lebug. Bod ni ke micheg Jesus nra pi’ e Chitamangin e tin nib t’uf ko par rom. (Matt. 6:32, 33) Ki micheg nra pi’ Jehovah gelngin nib thothup ngom u nap’an ni ga ra ning ngak. (Luke 11:13) Gubin e pi n’ey ni ke micheg Jehovah ndariy reb riy ni ke thilyeg. Dabisiy ni ku rayog ni nge yib ngan’um boch ban’en ni ke micheg ni fan ngom nde thilyeg. Bod ni ke micheg nra n’ag fan e kireb rom, me fal’eg lanin’um, me ayuwegem ni ngam par ni gab chugur ngak. (Matt. 6:14; 24:45; 2 Kor. 1:3) Nap’an ni ga ra fal’eg i lemnag e pi n’en ke rin’ Got ni fan ngom, ma aram e rayog ni ngari l’agan’um ko pi n’en nra rin’ ni fan ngom boch nga m’on.

16. Mang fan ni athap rodad e aram reb e tow’ath nib manigil ni bay rodad?

¹⁶ Athap rodad ko yafos ni manemus e aram reb e tow’ath nib manigil ni ke yib rok Got. Gad be athapeg boch ban’en nib manigil nra buch boch nga m’on, ma re n’ey e ban’en nrayog ni nge pagan’dad ngay nra buch. Re n’ey e bod ba angkar ni ma taydad ni gad ba mudugil ya nge yag nda athamgilgad u fithik’ e pi skeng ni gad ma mada’nag, nge gafgow ni yibe tay ngodad, ni kub muun ngay e yam’. Ku bod ba urwach ni ma ayuweg rogon e lem ni gad ma tay ya nge yag nda siyeged e tin nib kireb ma gad chichiiy pa’dad ko tin nib fel’. Pi n’en be l’agan’dad ngay ni bay u Bible e ma chugurnagdad ngak Got, maku be m’ug riy gelngin nri gad ba t’uf rok. Rib ga’ angin nra yib ngodad ni faanra ud pared ni be l’agan’dad ko pi n’en bay nga m’on.

17. Mang fan ni pi n’en be l’agan’dad ngay e ra taydad ni gad ba felfelan’?

¹⁷ I pi’ apostal Paul e athamgil nga lanin’dad u lan fagi babyor ni yoloy ngak piyu Roma ni ngad ‘pired ni be l’agan’dad ngak Got nge mang ir e i ta’dad ni gadad ba felfelan’.’ (Rom. 12:12) Rayog ni nge felfelan’ Paul ni bochan e ba mich u wan’ ni faanra par nib yul’yul’, ma ra yag e yafos ni manemus ngak u tharmiy. Ku arrogodad nrayog ni ngad felfelan’gad ko pi n’en be l’agan’dad ngay ni bochan e ba mich u wan’dad ndabi thilyeg Jehovah e tin ke micheg. Re n’ey e bod e n’en ni yog e en ni yoloy e Psalm ni “ba felan’ e piin . . . yad ma tor ngak Somol ni Got rorad . . . Gubin ngiyal’ ni ma tay e tin ke micheg nga tagil’.”​—Ps. 146:5, 6, BT.