1. Mang e be yip’ fan ni nge ‘yog Got ngodad’? Mang rogon e re n’ey ko felfelan’ rodad?

 BIN riyul’ e felfelan’ e gathi ban’en ni gad ma thamiy u taaboch ngiyal’ me munmun me m’ay. Ya biney e felfelan’ e rayog ni nge par u n’umngin nap’an e yafos rok be’. Ni uw rogon? I weliy Jesus u lan fare Welthin Rok u Daken e Burey ni gaar: “Nge felan’ e piin ni kar pirieged u lanin’rad ni kar gafgowgad ndabi siy ni nge yog Got ngorad.” (Matt. 5:3) Manang Jesus ni kan sunmiy e girdi’ nri yad baadag ni ngar nanged Jehovah Got ni En Ke Sunmiyrad mar liyorgad ngak. Ireray e n’en be yip’ fan ni nge ‘yog Got ngodad.’ Ma bochan ni Jehovah e ir “fare Got nib felfelan’,” ma aram fan ni piin yad ra liyor ngak e ku yad ra felfelan’.​—1 Tim. 1:11, NW.

2-3. (a) Mini’ e piin ni yog Jesus ni ku rayog ni ngar felfelan’gad? (b) Mang e gad ra weliy ko re article ney, ma mang fan nib t’uf ni ngad nanged e pi n’ey?

² Gur, fin ngiyal’ nra m’ay e magawon rodad e rayog ni ngad pared ni gad ba felfelan’, fa? Danga’, ya bay ban’en ni yog Jesus u lan e re welthin rok ney ni yira ngat ngay. I yog ni “piin ni be kireban’rad” ndemtrug ko bochan e be magawon lanin’rad ko denen ni kar rin’ed, ara bochan e yad be mada’nag boch e magawon nib gel e rayog ni ngar felfelan’gad. Ku aram e n’en ni yog u murung’agen e “piin ni yibe gafgownagrad ni bochan e yad be rin’ e tin nib m’agan’ Got ngay,” ara piin yibe yog e “thin nib tagan” ngorad ni bochan e yad boch i gachalpen Kristus. (Matt. 5:4, 10, 11) Machane uw rogon ni ngari par be’ nib felfelan’ ni faanra ireray e n’en be buch rok?

³ Be fil Jesus ngodad u roy nra yag e felfelan’ ngodad ni faan gad ra rin’ e n’en nib t’uf ni fan ko tha’ u thildad Got ma gad chugur ngak, ma gathi ngad pared ndariy e magawon rodad. (Jas. 4:8) Uw rogon ni ngad rin’ed e re n’ey? Gad ra weliy dalip ban’en ko re article ney nra ayuwegdad ni nge yag e bin riyul’ e felfelan’ ngodad.

4. Mang e n’en nsom’on nthingar da rin’ed me yag e bin riyul’ e felfelan’ ngodad? (Psalm 1:1-3)

⁴ BIN 1: Ra nge yag e bin riyul’ e felfelan’ ngodad ma thingar ud beeged ma gad be fil e Thin rok Got. I taarebrogonnag Jesus e Thin rok Got ko ggan. Girdi’ nge gamanman e ba t’uf ni ngar ked e ggan ya nge yag nra pared ni yad ba fos. Machane kemus ni yigoo girdi’ e rayog ni ngar beeged e Thin rok Got, ma aram e n’en nib t’uf ni ngar rin’ed. Aram fan ni gaar Jesus: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matt. 4:4) Ere susun e dab da paged reb e rran nge yan ndab da beeged e Thin rok Got ni aram e Bible. I yog e en ni yoloy e Psalm ni gaar: ‘Ba felan’ e cha’ ni ma beeg e motochiyel rok Somol ma ma yib e felfelan’ riy ngak, ma ku ma beeg ni rran nge nep’.’​—Mu beeg e Psalm 1:1-3.

5-6. (a) Mang e rayog ni ngad filed u Bible? (b) Faanra ud beeged e Bible, ma mang boch ban’en nrayog ni nge ayuwegdad riy?

⁵ Bochan ni gad ba t’uf rok Jehovah, ma bay boch ban’en nib ga’ fan ni ke yog ngodad u lan e Bible ni be weliy rogon ni ngad pared ni gad ba felfelan’. Gad ra fil riy e n’en nib m’agan’ ngay ni fan ko yafos rodad, nge rogon ni ngad chugurgad ngak me n’ag fan e denen rodad, nge n’en nib manigil ni ke micheg ni fan ngodad boch nga m’on. (Jer. 29:11) Pi n’ey nib riyul’ ni gad ma fil u Bible e ma yibnag e felfelan’ ngodad!

⁶ Ku gad manang ni boor e fonow u lan e Bible nra yib angin ko par rodad u reb e rran ngu reb. Faan gad ra fol riy, ma rayog ni ngad pirieged e felfelan’. Ere nap’an nra mulan’um ni  bochan e pi magawon ni ga be mada’nag, mag yoornag e tayim ni ga be beeg e Thin rok Jehovah riy ma ga be fal’eg i lemnag. I gaar Jesus: “Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

7. Mang e rayog ni nge ayuwegem ni ngari yib angin ngom e tayim ni ga ma beeg e Thin rok Got riy?

⁷ Nap’an ni ga be beeg e Thin rok Got, mag fek e tayim rom ni ngarim tiyan’um ko n’en ga be beeg. Rayog ni ngan susunnag e re n’ey nga ba ngiyal’ ni ke lith be’ ba mit e ggan nri ga baadag lamen, mag kay nib papey nde yag ni ngarim nang lamen nib fel’ rogon nreb e sana bochan ni ga be gurgur fa reb e bay lanin’um u bang. Nap’an nim mu’ ko abich, mag nang ni kaygi papey ni kam abich me kalngan’um ndam kay fapi ggan nib sagaal ya nge yag nim nang lamen nib fel’ rogon. Ku rayog ni ngan taarebrogonnag e re n’ey ko ngiyal’ ni gad ma beeg e Bible. Yu ngiyal’ e rayog ni ngad beeged ni kaygi papey ndabiyog ni ngad tedan’dad ko n’en be fil e pi thin riy ngodad. Ere mu fek e tayim rom ni ngam tiyan’um ko n’en ga be beeg ko Thin rok Got. Mu susunnag u lanin’um e pi n’en ga be beeg, nge laman e girdi’ ni be non, mag fal’eg i lemnag e n’en kam beeg. Ga ra rin’ e re n’ey, ma aram e ra gel e felfelan’ rom.

8. Uw rogon ni be rin’ “fare tapigpig nib yul’yul’ ma ba gonop” e maruwel ni kan pi’ ngak? (Kum guy e footnote.)

⁸ Ke tay Jesus “fare tapigpig nib yul’yul’ ma ba gonop” ni nge pi’ e ggan ngodad ni fan ko tirok Got ban’en ko ngiyal’ ni nge pi’ riy, ma rib gaman urngin e ggan ni yibe pi’ ngodad ni fan ko tirok Got ban’en. b (Matt. 24:45) Thin nu Bible ni kan thagthagnag e aram e n’en th’abi ga’ fan ni ma fanay fare tapigpig nib yul’yul’ u gubin ban’en ni ma ngongliy. (1 Thess. 2:13) Re ggan ney ni fan ko tirok Got ban’en e ma ayuwegdad ni ngad nanged e lem rok Jehovah nrogon ni ke tamilangnag u lan e Bible. Aram fan ni gad ma beeg fare Wulyang ko Damit nge Awake! nge pi article ni bay ko jw.org. Gad ma fal’eg rogodad ni fan ko muulung ni gad ma tay u lan e wik ngu tungun e wik. Ku gad ma yaliy fare JW Broadcasting^® ni yima ngongliy ni gubin e pul. Faanra ud beeged ma gad be fil e Bible, ma aram e rayog ni ngad rin’ed e n’en ni migid nthingar da rin’ed me yag e bin riyul’ e felfelan’ ngodad.

9. Mang e n’en ni migid ni gad ra rin’ me yag e bin riyul’ e felfelan’ ngodad?

⁹ BIN 2: Ra nge yag e bin riyul’ e felfelan’ ngodad mab t’uf ni ngad folgad ko pi motochiyel rok Jehovah. I yog e en ni yoloy e Psalm ni gaar: “Ba felan’ e piin yad ma fol rok Somol, ni yad ma par nrogon ni ke yog.” (Ps. 128:1, BT) Ra bay madgun Jehovah u wan’dad ma be yip’ fan ndab da rin’ed ban’en nde m’agan’ ngay ni bochan e ri gad be tayfan. (Prov. 8:13) Ere aram fan ni gad ma athamgil u rogon nrayog rodad ni ngaud folgad ko pi motochiyel rok Got u murung’agen e tin nib fel’ nge tin nib kireb nrogon ni kan weliy u Bible. (2 Kor. 7:1) Ra gel e felfelan’ rodad ni faanra ud rin’ed e tin baadag Jehovah ma gad siyeg e tin ma fanenikan.​—Ps. 37:27; 97:10; Rom. 12:9.

10. Mang e ba milfan ngodad nrogon ni be yog e Roma 12:2?

¹⁰ Mu beeg e Roma 12:2. Rayog ni manang be’ ni Jehovah e bay mat’awun ni nge dugliy ko mang e ba fel’ ma mang e ba kireb, machane thingar ki dugliy u wan’ ni nge fol ko pi motochiyel nem. Bod nrayog ni manang be’ ni bay mat’awun e am ni nge dugliy payngin ni ngan yan u karrow. Machane rayog ndabun ni nge fol riy, ma aram me yan u karrow nge thum’ nga wuru’ payngin nsusun e ngan yan riy. Gad ma dag u daken e ngongol rodad nriyul’ nib mich u  wan’dad ni faanra ud folgad ko pi motochiyel rok Jehovah, ma aram e bin th’abi fel’ e kanawo’ nrayog ni ngad pared riy. (Prov. 11:19) Aram rogon e lem rok David. Aram fan ni weliy murung’agen Jehovah ni gaar: “Bay mu dag ngog fare pa’ i wo’ ni yan ko yafos; i gur e kam suguyeg ko felfelan’, ya ga ba’ rog, ma ayuw ni ga be tay ngog e bay i pi’ e felfelan’ ngog ndariy n’umngin nap’an.”​—Ps. 16:11.

11-12. (a) Mang e thingar da kol ayuwgad riy u nap’an nra magafan’dad ara mulan’dad? (b) Uw rogon nrayog ni nge ayuwegdad fapi thin ni bay ko Filippi 4:8 u nap’an ni gad be mel’eg e pi n’en ngad chuweged e chalban rodad ngay?

¹¹ Nap’an nra magafan’dad ara mulan’dad, ma rayog ni ngad lemnaged nib t’uf ni ngad rin’ed ban’en ya nge dab kud lemnaged e magawon rodad. Re n’ey e ban’en ni ka yima rin’, machane thingar da kol ayuwgad ndab da rin’ed ban’en ni be fanenikan Jehovah.​—Efe. 5:10-12, 15-17.

¹² Nap’an ni yol apostal Paul ngak e pi Kristiano u Filippi, me tay ir ngorad ni ngar ululgad i suguy lanin’rad ko pi n’en nib ‘mat’aw, ma mmachalbog, ma mmanigil, nge tin ndariy thibngin.’ (Mu beeg e Filippi 4:8.) Yugu aram rogon nder weliy Paul murung’agen e pi n’en yima chuweg e chalban ngay, machane n’en ni yoloy e susun ni nge gagiyegnag e pi n’en gad ma mel’eg ni ngad chuweged e chalban rodad ngay. Mu guy rogon ni ngam thilyeg boch e thin ko re verse ney u lanin’um. Rayog ni ngam “lemnag ko ba machalbog e pi tang ni ga ma motoyil ngay, ma dariy thibngin e pi kachido ni ga ma yaliy nge yu ken e babyor ni ga ma beeg, ma yira yog e fel’ ko pi video game ni ga ma fafel ngay fa danga’.” Ga ra rin’ e re n’ey ma rayog ni ngam nang e n’en nib m’agan’ Got ngay nge n’en nde m’agan’ ngay. Gad baadag ni ngad folgad ko pi motochiyel rok Jehovah. (Ps. 119:1-3) Ma faanra bbeech e nangan’ rodad, ma aram e rayog ni ngad rin’ed e n’en ni migid nthingar da rin’ed miki yag e bin riyul’ e felfelan’ ngodad.​—Acts 23:1.

13. Mang e bin dalip e n’en ni gad ra rin’ me yag e bin riyul’ e felfelan’ ngodad? (John 4:23, 24)

¹³ BIN 3: Mu guy rogon ni nga i par nib m’on u wan’um e liyor ni ga be tay ngak Jehovah. Bochan ni Jehovah e Ke Sunmiydad, ma ir e bay rogon ni ngad liyorgad ngak. (Rev. 4:11; 14:6, 7) Aram fan ni n’en nthingari m’on u wan’dad e aram e ngad liyorgad ngak u rogon nib m’agan’ ngay, ni aram e u daken e “Kan ni Thothup [“gelngin Got nib thothup,” NW] ngu fithik’ e yul’yul’” ara tin riyul’. (Mu beeg e John 4:23, 24.) Gad baadag ni nge pow’iy gelngin Got nib thothup e liyor ni gad be tay ngak Got ya nge yag ni puluw ko tin riyul’ ni bay ko Thin rok. Mus ni faanra gad be par u reb e nam ni kan taleg boch ban’en ko maruwel rodad riy ara kan taleg e machib rodad riy, ma thingar ki m’on u wan’dad e liyor rodad. Chiney e ba pag 100 e pi walagdad ni kan kalbusnagrad ni bochan e yad boch e Pi Mich Rok Jehovah. c Yugu aram rogon ma yad be rin’ e tin rayog rorad ni ngaur meybilgad, ma yad be fil e Bible rorad, ma yad be weliy murung’agen e Got rodad nge Gil’ilungun ngak yugu boch e girdi’ ni yad ba felfelan’. Nap’an ni yira gathibthibnagdad ara ni gafgownagdad, ma rayog ni ngad felfelan’gad ya gad manang ni bay Jehovah rodad ma ra tow’athnagdad.​—Jas. 1:12; 1 Pet. 4:14.

14. Mang e buch rok reb e walag ni kab pagel u Tajikistan, ma mang fan?

¹⁴ Pi n’en ke buch rok boch e girdi’ e be micheg ni fa dalip i n’en ni kad weliyed murung’agen e ma yibnag e bin riyul’ e felfelan’ ngodad  ni yugu demtrug e n’en be buch rodad. Am lemnag e n’en ni buch rok Jovidon Bobojonov ni be’ nu Tajikistan ni 19 e duw rok ni bochan e siyeg ni nge un ko salthaw. Nap’an e October 4, 2019, min yan nni kol u tafen ngan kalbusnag u lan in e pul, mu un tay ni gowa ir be’ nib kireb. Re n’ey ni buch rok nde mat’aw e aw ko news. Nog ko news ni un pirdiiy ni bochan e yibe guy rogon ni ngan towasariy ni nge micheg boch ban’en ni ma micheg e girdi’ ni yad ma un ko salthaw, miki chuw nga madan e salthaw. Tomuren me turguy reb e tagil’ e puf oloboch nib kireb e rok min pi’ nge yan nga reb e kalbus me par u rom nge mada’ ko ngiyal’ ni yog e president ko re nam nem nrayog ni ngan pag. N’umngin nap’an ni i buch e pi n’ey rok Jovidon me par nib yul’yul’ mab felfelan’. Ni uw rogon? Gubin ngiyal’ ni i par ni be tiyan’ ko tin nib t’uf rok ni fan ko tirok Got ban’en.

15. Uw rogon ni ulul Jovidon ni nge fil murung’agen Jehovah u nap’an ni immoy u kalbus?

¹⁵ Nap’an ni immoy Jovidon u kalbus, me ulul ni nge fil murung’agen Jehovah ni yugu aram rogon ndariy e Bible rok ara yugu ba ken e babyor rodad. Uw rogon ni yag ni nge rin’ e re n’ey? Nap’an nra yib e pi walag ra pied e ggan rok ma kar yoloyed e thin nu Bible ni fan ko yu rran ko brif ni bay e chugum rok u langgin. Aray rogon ni yag ni nga i beeg e Bible ni gubin e rran ma be fal’eg i lemnag. Tomuren nni pag  u kalbus, ma baaray ba fonow ni pi’ ni fan ngak e piin ndawor ra mada’naged e skeng ni aray rogon feni mo’maw’ ni gaar: “Rib ga’ fan ni ngam fanayed e puf rogon romed nib fel’ rogon ni ngaum beeged e Thin rok Jehovah nge pi babyor rodad, ya nge yag ni yoor ban’en nim nanged u murung’agen Jehovah.”

16. Mang e i par Jovidon ni be lemnag?

¹⁶ I par ni be fol ko pi motochiyel rok Jehovah. I par ni be lemnag Jehovah nge n’en nib ga’ fan u wan’ ko bin nga i lemnag boch ban’en nib kireb ni yima ar’arnag me un nga boch e ngongol nib kireb. Ma par nga i yaliy e pi n’en ke sunmiy Got nib fel’ yaan. Gubin e kadbul ni ma od nga laman e arche’ ni be non. Ma ra nep’ mi i par nga i yaliy e pul nge pi t’uf. I gaar: “Pi tow’ath nem ni yib rok Jehovah e yibnag e felfelan’ ngog me pi’ e athamgil nga lanin’ug.” Ra ud pininged e magar ngak Jehovah ko pi n’en be pi’ ni fan ko tirok ban’en nge tin ke sunmiy, ma aram e rayog ni ngad pared ni gad ba felfelan’, ma re felfelan’ nem e ra pi’ gelngidad ni ngad athamgilgad.

17. Mang rogon fapi thin ni bay ko 1 Peter 1:6, 7 ngak be’ ni be mada’nag reb e magawon ni bod e n’en ni buch rok Jovidon?

¹⁷ Ki m’oneg Jovidon u wan’ e liyor ni be tay ngak Jehovah. Manang feni ga’ fan ni nge par nib yul’yul’ ngak e bin riyul’ e Got. I gaar Jesus: “Mu siro’ ma ga meybil ngak Somol ni Got rom ma yigo ir e ngam pigpig ngak!” (Luke 4:8) Baadag e pi ga’ ko salthaw nge tin ka bay e salthaw ni nge digey Jovidon e teliw rok. Machane i par ni be meybil ngak Jehovah ni rran nge nep’ ni nge ayuweg ni nge par nib yul’yul’. Yugu aram rogon gelngin e gafgow ni un tay ngak, me par nib yul’yul’. Bochan e re n’ey, ma rayog ni ngari felfelan’ e chiney ni bochan e ke yag ban’en ngak nda immoy rok u m’on ni ngan yan nni kol u tafen, min pirdiiy, min kalbusnag. Re n’em e aram e ke gel e michan’ rok ni bochan e kan skengnag.​—Mu beeg e 1 Peter 1:6, 7. 

18. Uw rogon nrayog ni ngad pared ni gad ba felfelan’?

¹⁸ Manang Jehovah e n’en nib t’uf rodad ya nge yag e bin riyul’ e felfelan’ ngodad. Faan ga ra rin’ fa dalip i n’em nra ayuwegdad ni nge yag e bin riyul’ e felfelan’ ngodad, ma aram e rayog ni ngam par ni gab felfelan’ ni yugu aram rogon ni ga be mada’nag boch e magawon nib mo’maw’. Ga ra rin’ e re n’ey, ma aram e ku rayog ni nga mog fapi thin ni be gaar: “Nge felan’ e pi girdi’ ni Got rorad e Somol.”​—Ps. 144:15, BT.