1-2. Uw rogon nrayog ni ngad leked luwan ay Jesus? Mu weliy rogon ni kan susunnag.

MU SUSUNNAG ni gimed boch e girdi’ ni gimed be yan u fithik’ bangi garger nib ga’ yang ni ke el e ayis riy. Bay be’ ni manang fan e gin’em ni ir e be pow’iymed. Nap’an ni be yan u but’, ma be aw lon ay u daken e ayis. Machane bay bang nim tawgad ngay, ma da kum guyed facha’ ni be pow’iymed. Machane dam rusgad, ya kam gayed lon ay ni ke mit u daken e ayis, ma aram mi gimed lek u rogon nrayog romed!

² Gadad e tin riyul’ e Kristiano e bod ni gad be yan u fithik’ bangi garger ni bay e riya’ riy ni be yip’ fan e re fayleng nib kireb ney. Machane gad ba felfelan’ ni ke pi’ Jehovah e en th’abi fel’ ni nge Pow’iydad, ni aram Jesus Kristus ni Fak ni ir e en nrayog ni ngad leked luwan ay nib fel’ rogon. (1 Pet. 2:21) I yog reb e babyor ni be weliy murung’agen e Bible ni be taarebrogonnag Peter Jesus ngak be’ ni ma pow’iyey ko gin ngan sor ngay. Ere bay boch ban’en ni i rin’ Jesus nrayog ni ngad folwokgad riy ni bod rogon be’ ni be pow’iy be’ ko gin nge sor ngay, ma be aw lon ay u but’ nrayog ni ngan lek. Chiney e ngad weliyed dalip e deer u murung’agen rogon ni ngad leked luwan ay Jesus, ni aram e: Mang e be yip’ fan ni ngad leked luwan ay Jesus? Mang fan nsusun e ngad rin’ed e re n’ey? Ma uw rogon ni ngad rin’ed?

3. Mang e be yip’ fan ni ngan lek luwan ay be’?

³ Mang e be yip’ fan ni ngan lek luwan ay be’? Re n’ey e be yip’ fan rogon e pi n’en ni i rin’ facha’ u lan e yafos rok. (Gen. 6:9, 10; Prov. 4:26) Rogon e n’en ni i rin’ be’ u lan e yafos rok e rayog ni ngan taarebrogonnag nga luwan ay ni ke aw u but’. Ere ra ngan lek luwan ay be’, ma be yip’ fan ni ngan folwok ko tin ni i rin’.

4. Mang e be yip’ fan ni ngad leked luwan ay Jesus?

 ⁴ Ere mang e be yip’ fan ni ngad leked luwan ay Jesus? Be yip’ fan ni ngad folwokgad ko tin ni i rin’. Fare kenggin e thin nu Bible ni fan ko re article ney e tamilangnag apostal Peter riy murung’agen e kanawo’ nib fel’ ni dag Jesus u rogon ni k’adan’ u fithik’ e gafgow ni un tay ngak. Machane, ku bay boch e kanawo’ nrayog ni ngad folwokgad rok Jesus riy. (1 Pet. 2:18-25) Riyul’ ni gubin ban’en ni i yog Jesus ma be rin’ u lan e yafos rok nrayog ni ngad folwokgad riy.

5. Rayog ni nge folwok e girdi’ ndawor ra flontgad rok Jesus, fa? Mu tamilangnag.

⁵ Ere gur, rayog ni ngad folwokgad rok Jesus ni yugu aram rogon ndawor da flontgad, fa? Arrogon. Dab mu pagtalin nde yog Peter nthingar da leked luwan ay Jesus nrib fel’ rogon ndab da olobochgad, ya n’en ni ke pi’ e athamgil ngodad ni ngad rin’ed e aram e ‘nguud leked luwan ay Jesus u rogon feni chugur nrayog rodad.’ Faan gad ra lek luwan ay u rogon feni chugur nrayog rodad ni yugu aram rogon ndawor da flontgad, ma aram e gad be fol ko fapi thin ni yog apostal John ni faani gaar: “Ngi i par e wok [rom] ni bod rogon ni i rin’ Jesus.”​—1 John 2:6.

6-7. Mang fan nrayog ni nga dogned ni faan gad ra lek luwan ay Jesus ma gad ra chugur ngak Jehovah?

⁶ Faan gad ra lek luwan ay Jesus, ma aram e rayog ni ngad chugurgad ngak Jehovah. Mang fan nrayog ni nga dogned e re n’ey? Bin som’on e, ke dag Jesus e bin th’abi fel’ e kanawo’ u rogon e ngongol ni ngan rin’ nib m’agan’ Got ngay. (John 8:29) Ere faan gad ra lek luwan ay Jesus, ma aram e gad ra felfelan’nag Jehovah. Ku rayog ni nge pagan’dad ni Chitamangidad ni bay u tharmiy e ra chugurnag ir ngak e piin nri yad be athamgil ni ngar manged fager rok.​—Jas. 4:8.

⁷ Bin migid e, rib fel’ rogon ni folwok Jesus rok e Chitamangin. Aram fan nrayog ni nge gaar: “Cha’ ni ke guyeg e ke guy e en ni Chitamangiy.” (John 14:9) Ere rayog ni ngad folwokgad ko pi fel’ngin Jesus nge rogon e ngongol rok ko girdi’. Bod ni dag e runguy ngak be’ nib daraw, miki dag  ni be lemnag rogon laniyan’ be’ nib pin ni ke yib ba mit e m’ar ngak nib ubchiya’, miki runguy e piin ke yim’ be’ nib t’uf rorad. Nap’an ni gad ra folwok rok Jesus, ma aram e ku gad be folwok rok Jehovah. (Mark 1:40, 41; 5:25-34; John 11:33-35) Ma faanra ud pared ni gad be folwok rok Jehovah, ma aram e rayog ni nge gel boch e chugur u thildad.

8. Mu weliy fan ni faan gad ra lek luwan ay Jesus, ma aram e rayog ni ngad ‘gelgad’ ko fayleng.

⁸ Faan gad ra lek luwan ay Jesus, ma aram e dab da paged e re fayleng nib kireb ney ni nge talegdad ndab kud tedan’dad ko pigpig rodad ngak Jehovah. Nap’an e bin tomur e nep’ ko yafos rok Jesus u fayleng, ma rayog ni nge gaar: “Kug gel ko fayleng!” (John 16:33) Re n’ey ni yog e be yip’ fan nde pag e lem, nge pi n’en ma nameg e girdi’ ko re fayleng ney, nge ngongol rorad ni nge gagiyegnag. Dariy ba ngiyal’ ni pag Jesus talin fan ni kan l’og nga fayleng, ni aram e nge micheg nib riyul’ urngin ban’en ni ke yog Jehovah. Ma uw rogodad? Boor ban’en ko re fayleng ney nrayog ni nge magawonnag rogon e pigpig rodad ngak Jehovah. Machane faan gad ra tedan’dad ngaud rin’ed e tin nib m’agan’ Jehovah ngay ni bod rogon Jesus, ma aram e gad ra “gel” ko fayleng.​—1 John 5:5.

9. Mang e thingar da rin’ed me yag e yafos ni manemus ngodad?

⁹ Gad ra lek luwan ay Jesus, ma ra yag e yafos ni manemus ngodad. Nap’an ni yib be’ nib moon ni boor ban’en rok i fith ngak Jesus e n’en nib t’uf ni nge rin’ me yag e yafos ni manemus ngak, me fulweg Jesus ngak ni gaar: “[Moy] ngam un ngog.” (Matt. 19:16-21) Ki yog Jesus ngak boch e Jew nde mich u wan’rad ni ir Kristus ni gaar: “Saf rog e . . . yad ma lekeg. Kug pi’ e yafos ni dariy n’umngin nap’an ngorad.” (John 10:24-29) Nikodemus nreb i girdien e Sanhedrin ni baadag ni ngki nang boch ban’en u murung’agen e pi n’en ni i machibnag Jesus e ki yog Jesus ngak ni piin nra “michan’rad ngak [“maruweliyed e michan’ rorad ngak,” NW]” e ra “yog e yafos ndariy n’umngin nap’an ngorad.” (John 3:16) Ra m’ug nib mich Jesus u wan’dad ni faan gad ra fol ko tin ni i fil ma gad folwok rok. Faan gad ra rin’ ni aray rogon, ma aram e ra yag e yafos ni manemus ngodad.​—Matt. 7:14.

10. Mang e thingar da rin’ed me yag nda ‘nanged’ Jesus nib fel’ rogon? (John 17:3)

¹⁰ U m’on ni nge yag nda leked luwan ay Jesus u rogon feni chugur nrayog rodad, ma thingar da nanged nib fel’ rogon. (Mu beeg e John 17:3.) Re n’ey ni ngad ‘nanged’ Jesus e ban’en nib t’uf ni ngad ululgad ngad maruweliyed. Thingar da ululgad i fil murung’agen ni aram e ngad filed murung’agen pi fel’ngin, nge rogon ni ma lem, nge rogon laniyan’ ko tin nib fel’ nge tin nib kireb. Demtrug n’umngin nap’an ni kad uned ko tin riyul’, ma thingar da ululgad i maruweliy rogon ni ngad nanged Jehovah nge Fak nib fel’ rogon.

11. Mang e bay u lan fare aningeg i Gospel?

¹¹ Bochan ni gad ba t’uf rok Jehovah ma ke uneg fa aningeg i Gospel nga lan e Thin rok ni nge ayuwegdad ni ngad nanged Fak nib fel’ rogon. Pi  Gospel ney e be weliy rogon e pi n’en ni i buch u lan e yafos rok Jesus nge machib ni i tay. Pi babyor ney e be weliy ngodad e n’en ni i yog Jesus, ma be dag ngodad e pi n’en ni i rin’, nge rogon e lem rok. Ku be ayuwegdad ni ngad “tafinayniged” nib fel’ rogon e kanawo’ ni dag. (Heb. 12:3) Bay riy e pi n’en ni i rin’ nrayog ni ngad folwokgad riy ni bod rogon luwan ay nrayog ni ngad leked. Ere faanra ud filed fapi Gospel, ma aram e rayog ni ngar da nanged Jesus nib fel’ rogon. Ma angin nra yib riy e aram e rayog ni ngad leked luwan ay u rogon feni chugur nrayog rodad.

12. Uw rogon nrayog ni ngari yib angin fapi Gospel ngodad?

¹² Ra ngari yib angin fapi Gospel ngodad, ma gathi kemus ni ngaud beeged. Ya ba t’uf ni ngad ted e tayim ngad filed e thin riy nib fel’ rogon ma gad fal’eg i lemnag. (Mu taarebrogonnag ko Psalm 143:5.) Ngad weliyed l’agruw ban’en nrayog ni nge ayuwegdad ni ngad fal’eged i lemnag e pi n’en ni gad ma beeg ko pi Gospel ney ma gad fol riy.

13. Uw rogon ni ngam beeg fapi Gospel u reb e kanawo’ nra riyul’ e thin riy u wan’um?

¹³ Som’on e, ngam beeg e pi Gospel ney u reb e kanawo’ nra riyul’ e thin riy u wan’um. Mu susunnag u lanin’um boch ban’en ni ga be guy, ma ga be rung’ag, ma ga be thamiy ko n’en ni ga be beeg murung’agen. Mu fal’eg i gay murung’agen boch ban’en u lan yu ken e babyor ni ke ngongliy e ulung rok Jehovah nra ayuwegem ni ngam rin’ e re n’ey. Mu yaliy e n’en ni buch u m’on ngu tomuren e n’en ni ga be beeg murung’agen. Mu gay boch ban’en u murung’agen e girdi’ nge binaw ni ga be beeg murung’agen. Mu taarebrogonnag e n’en ni bay ko fare thin ni ga be beeg ko n’en ni bay u yugu reb e Gospel. Bay yu ngiyal’ ni ma tamilangnag reb e Gospel boch ban’en ndan tamilangnag u lan yugu reb e Gospel.

14-15. Uw rogon nrayog ni ngad folgad ko n’en kad filed u lan reb fapi Gospel?

¹⁴ Bin migid e, ngam fol ko pi n’en kam fil u lan fapi Gospel. (John 13:17) Tomuren ni kam fal’eg i fil e n’en bay u lan reb e Gospel, mag fithem ni nge lungum: ‘Bay ban’en ko re thin ney ni kug fil nrayog ni nggu fol riy, fa? Uw rogon nrayog ni nggu fanay e n’en ni kug fil ko re Gospel ney ni nggu ayuweg be’ ngay?’ Mu guy rogon ni ngam lemnag be’ ni ga manang, mag gay ba ngiyal’ nib puluw  nrayog ni ngam weliy ngak boch ban’en ni kam fil ko fare Gospel u fithik’ e t’ufeg nge gonop.

¹⁵ Ngad weliyed ban’en ni be dag rogon nrayog ni ngad rin’ed e gali n’ey ni ka fin nda weliyed murung’agen. Chiney e ngad weliyed murung’agen fare pin nib gafgow ni ke yim’ figirngin ni faani guy Jesus e n’en ni rin’ u nap’an ni bay u tempel.

16. Mu weliy e n’en ni buch ni bay ko Mark 12:41.

¹⁶ Mu beeg u reb e kanawo’ nra riyul’ e thin riy u wan’um. (Mu beeg e Mark 12:41.) Mu lemnag e n’en be buch. Ngiyal’ nem e Nisan 11 ko duw ni 33 C.E. Ka in e rran nga tomuren ma bay yim’ Jesus. Rofen nem e ba chugur ni nge polo’ reb e rran ni i machib Jesus u tempel. Machane fapi tayugang’ ko teliw e yad be togopuluw ngak. U m’on riy ma immoy boch i yad ni ur fithed ngak Jesus ko mini’ e ke pi’ mat’awun ni nge rin’ e maruwel rok. Ku bay boch i yad ni ur guyed rogon ni ngar fithed boch e deer ngak ni yad be lemnag ndabiyog ni nge pi’ e fulweg riy. (Mark 11:27-33; 12:13-34) Ma ngiyal’ nem e ke chuw Jesus ke yan nga yugu bang u lan e tempel. Nap’an ni yan ko gin’em nsana aram e gin yima yog e Gin Ma Yan e Piin nib Pin Ngay ni Ngar Liyorgad, ma rayog ni nge guy fapi kahol ni yima yon’ e salpiy ngay u dow e rungrung ko gin’em. Ere yan i par nga but’ nga i yaliy e piin yad be yib nga u ron’ed e salpiy rorad nga lan e pi kahol ko salpiy nem. I guy boor e girdi’ ni yad ba flaab ni yad be yon’ boor e salpiy nga lan fapi kahol. Sana rayog nib chugur ko pi kahol nem nrayog ni nge rung’ag lingan fapi salpiy ni wasey ni be yan i aw nga t’ay e kahol.

17. Mang e rin’ fare pin nib gafgow ni ke yim’ figirngin ni kan weliy murung’agen ko Mark 12:42?

¹⁷ Mu beeg e Mark 12:42. Boch nga tomuren, me guy Jesus be’ nib pin. Re ppin nem e ‘rib gafgow ya ke yim’ figirngin.’ (Luke 21:2) Rib mo’maw’ rogon e par rok, ma sana rayog nde gaman e salpiy rok ni nge chuw’iy e tin nib t’uf ko par rok. Yugu aram rogon me yan nga reb fapi kahol, ma aram me yon’ l’agruw chi kobre’ nrow nib achig nga lan ni be guy rogon ndabi guy be’. Sana rayog nde yan lingan e gal salpiy nem ni yon’ nga lan e re kahol nem. Machane manang Jesus urngin e salpiy ni ke yon’ nga lan fare kahol. Ke yon’ l’agruw chi salpiy ni wasey ni ka nog e lepta ngay, ni aram e gal nth’abi achig e salpiy ni un fanay e ngiyal’ nem. Gal salpiy nem e de gaman ni ngan chuw’iy reb e arche’ ni sparrow ngay ni aram e tin th’abi sobut’ puluwon e arche’ ni yima chuw’iy ni ngan longuy.

18. Mang e yog Jesus u murung’agen fare salpiy ni pi’ fare pin ni ke yim’ figirngin nrogon ni bay ko Mark 12:43, 44?

¹⁸ Mu beeg e Mark 12:43, 44. Ri ngat Jesus ko n’en ni rin’ e re ppin ney ni ke yim’ figirngin. Ere pining pi gachalpen ngar bad ngak me weliy ngorad murung’agen fare pin ni gaar: “[Re] pin ney nib gafgow ya ke yim’ figirngin e ir e boor e salpiy ni ke yin’ ko tin ni ke yin’ urngin e girdi’.” Ngemu’ me tamilangnag ngorad ni gaar: “Yad [nib ga’ ni piin boor ban’en rorad] e kar pied e salpiy ni kar feked ko salpiy ni ba’ rorad ni pire’; mi ir e aram feni gafgow ma ke pi’ urngin e chi salpiy ni ba’ rok, ni ir e nge abich riy.” Nap’an ni pi’ e re ppin nem ni ke yim’ figirngin ni ir be’ nib yul’yul’ e gal nth’abi tomur e salpiy ni immoy rok, ma aram e be dag ni be pagan’ ngak Jehovah nra ayuweg.​—Ps. 26:3.

19. Mang ban’en nib ga’ fan nrayog ni ngad filed ko fapi thin ni yog Jesus u murung’agen fare pin nib gafgow ni ke yim’ figirngin?

¹⁹ Mu fol ko n’en ni kam fil riy. Mu fithem ni nge lungum, ‘Mang e rayog ni nggu fil ko fapi thin ni weliy Jesus u murung’agen fare pin nib gafgow ni ke yim’ figirngin?’ Am lemnag e re ppin nem. Dabisiy ni baadag ni ngki pi’ boch ban’en ni boor ni fan ngak Jehovah. Yugu aram rogon ma ke rin’ e tin rayog rok; ke pi’ e tin th’abi fel’ rok ngak Jehovah. Ma manang Jesus nib ga’ fan u wan’ e Chitamangin e re salpiy ni ayuw nem ni ke pi’. Baaray ban’en nib ga’ fan nrayog ni ngad filed ko re n’ey: Ma felfelan’ Jehovah u nap’an nra guy ni gad be  pi’ e tin th’abi fel’ rodad ngak, ni be yip’ fan e pigpig rodad ngak u polo’ i gum’ircha’dad nge gelngidad. (Matt. 22:37; Kol. 3:23) Ma felfelan’ Jehovah u nap’an ra guy ni gad be rin’ e tin nrayog rodad! Re n’ey e bay rogon nga urngin e tayim nge rogon gelngidad nrayog ni ngad fanayed ni fan ko liyor rodad, nib muun ngay e machib nge muulung rodad.

20. Uw rogon nrayog ni ngam fol ko n’en ni kam fil u murung’agen fare pin ni ke yim’ figirngin? Mu weliy reb e kanawo’.

²⁰ Uw rogon nrayog ni ngam fol ko n’en ni kam fil u murung’agen fare pin ni ke yim’ figirngin? Mu guy rogon ngam lemnag boch e girdi’ nsana ba t’uf ni ngan ayuwegrad ni nge pagan’rad ngay nib felfelan’ Jehovah ko athamgil ni yad be tay. Bod ni, ga manang reb e walag nib pin ni ke pilibthir nsana be magawon laniyan’ ara be lemnag ndakuriy ban’en nrayog ni nge un i rin’ ni bochan e ke m’ar ara ke meewar fithik’ i dow ndabkiyog ni nge machib ni bod rogon kafram, fa? Gur, rayog ni ngam lemnag reb e walag ni pumoon ni ke yib ba mit e m’ar ngak nib mo’maw’ ni nge chuw mab gel e amith riy ni ma mulan’ ni bochan e dabkiyog ni nga i yib nga Tagil’ e Liyor ni gubin ngiyal’ ni nge un ko muulung, fa? Mu ayuweg e pi girdi’ ney ni aram e nga mog boch e thin ngorad nra ‘ayuwegrad’ me pi’ e athamgil nga lanin’rad. (Efe. 4:29) Mu weliy ngorad e pi n’en nrayog ni ngad filed ko fare thin nu Bible ni murung’agen fare pin ni ke yim’ figirngin nrayog ni nge pi’ e athamgil nga lanin’uy. Thin ni ga ra yog nra pi’ e athamgil nga lanin’rad e rayog ni nge puguran ngorad nib felfelan’ Jehovah u nap’an nra guy ni gad be pi’ e tin th’abi fel’ rodad ngak. (Prov. 15:23; 1 Thess. 5:11) Nap’an ni ga ra yog fel’ngin e tin be rin’ yugu boch e walag u rogon ni yad be pi’ e tin th’abi fel’ rorad ngak Jehovah, ni yugu aram rogon ni yad be lemnag ni buchuuw, ma aram e ga be lek luwan ay Jesus u rogon feni chugur nrayog rom.

21. Mang e kam dugliy u wan’um ni ngam rin’?

²¹ Ri gad be pining e magar ni boor ban’en ni be weliy fapi Gospel u murung’agen e pi n’en ni i buch u lan e yafos rok Jesus, ya be ayuwegdad ni nge yag nda folwokgad rok ni bod rogon ni gad be lek luwan ay u rogon feni chugur nrayog rodad! Mang ndab mu yarmiy rogon e fol Bible ni ngam tay ni goo gur ara Fol Bible ni tabinaw ni ngam ted chon e tabinaw rom ni ngam filed murung’agen e n’en ni bay ko pi Gospel ney? Dab da paged talin ni faanra ngari yib angin ngodad e pi n’ey ni gad be fil, mab t’uf ni ngad beeged u reb e kanawo’ nra riyul’ e thin riy u wan’dad, ma gad fol ko n’en kad filed riy. Riyul’ nib t’uf ni ngad folwokgad ko tin i rin’ Jesus, machane kub t’uf ni ngad motoyilgad ko n’en ni i yog. Bin migid e article e gad ra weliy riy e n’en gad ra fil ko tin tomur e thin ni yog Jesus u m’on ni nge yim’.