1. Mang e baadag Jehovah ni ngad rin’ed?

 REB e ban’en nri ma yibnag e felfelan’ ngak ba wu’ e mabgol e nap’an ni yow ra fakay e bitir. Yugu aram rogon nib t’uf fare tir rorow, machane yow baadag ni nge ilal. Bin riyul’ riy e ra magafan’row ni faanra der ilal fare tir. Ku arrogon Jehovah ni ma felfelan’ u nap’an ni gad ra tabab ni ngad filed murung’agen, machane dabun ni ngad talgad u rom. (1 Kor. 3:1) Ya baadag ni ngad manged boch e Kristiano ni kad ‘piilalgad.’​—1 Kor. 14:20.

2. Mang e gad ra weliy ko re article ney?

² Mang e be yip’ fan ni nge ilal reb e Kristiano ko tirok Got ban’en? Uw rogon ni ngad ilalgad ko tirok Got ban’en? Faan gad ra fil e pi machib u Bible nib toar fan, ma uw rogon nra ayuweg e tha’ u thildad Jehovah ni nge chugur? Ma mang fan nsusun e yugu dabi pag rogon e pagan’ rodad? Gad ra weliy e fulweg ko pi deer ney u lan e re article ney.

MANG E BE YIP’ FAN NI NGE ILAL REB E KRISTIANO KO TIROK GOT BAN’EN?

3. Mang e be yip’ fan ni nge ilal reb e Kristiano ko tirok Got ban’en?

³ Fare bugithin ni Greek ni kan pilyeg u Bible ni “piilal” e ku rayog ni nge yip’ fan ban’en ni “ke taw nga nap’an,” nge ban’en ni “ke mus nga rogon.” a (1 Kor. 2:6) Gad ra mang boch e Kristiano ni kad ilalgad ko tirok Got ban’en u nap’an ni gad ra chugurnag e tha’ u thildad Jehovah ni bod rogon reb e bitir ni be ilal i yan nge taw ko ngiyal’ ni ke piilal. Bin riyul’ riy e mus ni faanra kad ilalgad ko tirok Got ban’en ma susun e dab da talgad u rom. (1 Tim. 4:15) Gad gubin nrayog ni ngad ilalgad ko tirok Got ban’en nib muun  ngay e piin ka yad bbitir. Machane mang e ra dag ni ke ilal reb e Kristiano ko tirok Got ban’en?

4. Uw rogon reb e Kristiano ni ke ilal ko tirok Got ban’en?

⁴ Reb e Kristiano ni ke ilal ko tirok Got ban’en e ma fol u gubin e motochiyel rok Got ma der ma mel’eg e tin baadag ni nge fol riy. Machane ku ra i oloboch ni bochan e dawori flont. Yugu aram rogon ma ma dag ko pi n’en ma rin’ u reb e rran ngu reb nib puluw e lem nge ngongol rok ko pi n’en nib m’agan’ Got ngay. Ir be’ ni ke yon’ nga daken e bin nib beech e pangin ma gubin ngiyal’ ni ma guy rogon ni nga i lem ni bod Got. (Efe. 4:​22-24) Ke fil rogon ni nga i dugliy boch ban’en nib fel’ rogon nib puluw ko pi motochiyel nge pi kenggin e motochiyel rok Jehovah. Ere de t’uf boch e motochiyel ni boor ni nge gagiyegnag e ngongol rok. Nap’an nra dugliy ban’en, ma ma athamgil u rogon nrayog rok ni nge rin’ e n’en ke dugliy.​—1 Kor. 9:​26, 27.

5. Mang e rayog ni nge buch rok reb e Kristiano ndawori ilal ko tirok Got ban’en? (Efesus 4:​14, 15)

⁵ Machane piin ndawor ra ilalgad ko tirok Got ban’en e ba mom ni nge bannagrad e pi “machib rok e girdi’ ni yad be bannag e girdi’” nge pi “ban ni kar ngongliyed rogon,” mar awgad ko pi ban rok e piin yad ma garereg boch e thin ndariy e mich riy nge piin kar digeyed e tin riyul’ ma kar chelgad yad be togopuluw ngay. b (Mu beeg e Efesus 4:​14, 15.) Rayog ni ma awan’ ko girdi’, ara yad ma luag e girdi’ e thin, ara ba mom ni ma aw ban’en nga laniyan’, ara ma pag ir ko pi lumel ni ma yib ngak.​—1 Kor. 3:3.

6. Uw rogon nrayog ni ngan susunnag rogon ni be ilal be’ i yan ko tirok Got ban’en? (Kum guy e sasing.)

⁶ Kad weliyed faram ni be taarebrogonnag e Bible be’ ni be ilal i yan ko tirok Got ban’en ngak reb e bitir ni be ilal. Bitir e boor ban’en ndawori tamilang u wan’, ere ba t’uf be’ nib ilal ni nga i ayuweg ma be pow’iy. Rayog ni ngan susunnag ngak reb e matin ni ke yog ngak bochi buliyel ni fak ni nge kol pa’ u nap’an ni yow be th’ab e kanawo’ nga barba’. Nap’an nra ilal boch fare tir, ma sana ra pag e chitiningin ni nge th’ab e kanawo’ nga barba’ ni yigoo ir, machane ku ra i puguran ngak ni nge yaliy e karrow ni be yib u m’on ni nge th’ab e kanawo’ nga barba’. Nap’an nra ilal fare tir, ma ir rok e ra i siyeg boch ban’en ni bay e riya’ riy ni bod e re n’ey. Piin Kristiano ndawor ra ilalgad ko tirok Got ban’en e ba ga’ nib t’uf ni nge ayuwegrad e pi Kristiano ni kar ilalgad ko tirok Got ban’en ya ngar siyeged e pi n’en  nrayog ni nge kirebnag e tha’ u thilrad Jehovah mar dugliyed boch ban’en nib fel’ rogon, ni bod rogon e bitir ni kab achig nib t’uf ni nge ayuwegrad e piin piilal ni ngar siyeged boch ban’en ni bay e riya’ riy. Machane pi Kristiano ni kar ilalgad ko tirok Got ban’en e nap’an nra t’uf ni ngar dugliyed ban’en, ma yad ma fal’eg i lemnag e pi kenggin e motochiyel u Bible ya nge yag nra nanged rogon laniyan’ Jehovah ko fare n’em mar folgad riy.

7. Ba t’uf ni nge ning reb e Kristiano ni ke ilal ko tirok Got ban’en e ayuw ngak yugu boch e girdi’, fa?

⁷ Ere gur, re n’ey e be yip’ fan nde t’uf ni nge ning reb e Kristiano ni ke ilal ko tirok Got ban’en e ayuw ngak be’, fa? Danga’, ya bay yu ngiyal’ ni kub t’uf ni ngar ninged e ayuw. Machane be’ ndawori ilal ko tirok Got ban’en e rayog ni baadag ni nge yog yugu boch e girdi’ e n’en nge rin’ ara ra dugliyed ban’en nsusun e ir e nge dugliy. Ma reb e Kristiano ni ke ilal ko tirok Got ban’en e ra ning e ayuw ngak e piin kab ga’ e gonop rorad ma boor ban’en ni yad manang, ma manang ni baadag Jehovah ni nge be’ me fek “gilban.”​—Gal. 6:5.

8. Mang boch e kanawo’ nib thilthil rarogon e piin kar ilalgad ko tirok Got ban’en riy?

⁸ Gathi gubin e Kristiano ni kar ilalgad ko tirok Got ban’en ni taareb rogon e pi fel’ngin ni bay rorad, ni bod rogon ni gathi gubin e girdi’ ni kar ilalgad ni taareb rogon yaarad. Ya rayog ni bay boch i yad nrib ga’ e gonop rok, ma boch i yad e ri der ma rus, ma boch i yad e rib gol, ma boch i yad e ri manang rogon laniyan’ yugu boch e girdi’. Maku reb e faanra taa ban’en e ke buch rok l’agruw e Kristiano ni kar ilalgow ko tirok Got ban’en ma rayog nib thil e n’en yow ra dugliy ni ngar rin’ew, machane yow l’agruw nib puluw e n’en kar dugliyew ko n’en be yog e Bible. Re n’ey e ba ga’ ni ma buch u nap’an nthingari dugliy reb e Kristiano e n’en nge rin’ nib puluw ko nangan’ rok. Ere aram fan nra bagayow ma der turguy rarogon bagayow u laniyan’. Ya yow ma guy rogon ni ngar parew nib taareban’row.​—Rom. 14:10; 1 Kor. 1:10.

UW ROGON NI NGAD MANGED BOCH E KRISTIANO NI KE ILAL KO TIROK GOT BAN’EN?

9. Rayog ni nga yugu da ilalgad ko tirok Got ban’en ndariy ban’en ni ngad rin’ed, fa? Mu tamilangnag.

⁹ Bitir e yugu ma ilal i yan, machane gadad e dabiyog ni nga yigi chugur e tha’ u thildad Jehovah ndariy ban’en ni ngad rin’ed. Bod ni pi walag u Korinth e m’agan’rad ko fare thin nib fel’, min taufenagrad, me yag gelngin Got nib thothup ngorad, miki yib angin e fonow ni i pi’ apostal Paul ngorad. (Acts 18:​8-11) Machane boch e duw nga tomuren ni kar uned ko taufe, ma ka boor i yad e dawori ilal ko tirok Got ban’en. (1 Kor. 3:2) Ere uw rogon ni nge dabi buch e re n’ey rodad?

10. Mang e thingar da rin’ed ya nge yag nda ilalgad ko tirok Got ban’en? (Jude 20)

¹⁰ Faanra ngad ilalgad ko tirok Got ban’en, ma som’on e thingar da adaged ni ngad rin’ed e re n’ey. Piin “balyang” ni yad baadag ni ngar pared ndab ra ilalgad ko tirok Got ban’en e dabiyog ni ngar mon’oggad. (Prov. 1:22) Dubdad ni ngad boded e piin kar ilalgad machane ka yad be ulul ni ngaur taga’gad ko gallabthir rorad ni ngar dugliyed boch ban’en ni fan ngorad. Ya gad baadag ni ngad rin’ed e n’en nib milfan ngodad ni ngad rin’ed ya nge yag nda ilalgad ko tirok Got ban’en. (Mu beeg e Jude 20.) Faanra ka ga be guy rogon ni ngam ilal ko tirok Got ban’en, ma aram e ngam meybil ngak Jehovah ni nge pingeg lanin’um ni ‘nge m’agan’um ngay ni ngam fol ko tin ni be finey.’​—Fil. 2:13.

11. Mang e ke pi’ Jehovah ngodad ya nge yag nda ilalgad ko tirok ban’en? (Efesus 4:​11-13)

¹¹ Der lemnag Jehovah ni ngad ilalgad ko tirok ban’en ni gadad rodad. Ke pi’ e piin piilal nge boch e walag ni yad ma fil e thin rok ngodad u lan e ulung ni Kristiano ni ngar ayuweged gadad ni ngad ‘piilalgad’ ko tirok Got ban’en ya nge yag ni chugur e tha’ u thildad Jehovah ma gad “ilal i yan nge mus rogodad ngad boded mam’ungun Kristus.” (Mu beeg e Efesus 4:​11-13.) Kki pi’ gelngin nib thothup ni nge ayuwegdad ni nge yag “laniyan’ Kristus” ngodad. (1 Kor. 2:​14-16) Maku  reb e ke pi’ Got fa aningeg i Gospel ni nge dag ngodad rogon e lem ni i tay Jesus, nge rogon ni i non ma be ngongol ko girdi’ u nap’an ni immoy u fayleng. Ere faan ga ra folwok u rogon e lem nge ngongol ni i tay Jesus, ma aram e rayog ni ngam mang reb e Kristiano ni ke ilal ko tirok Got ban’en.

ROGON NI MA AYUWEGEY E PI MACHIB U BIBLE NIB TOAR FAN

12. Mang e “tin som’on e machib ni kad filed u murung’agen Kristus”?

¹² Faanra ngad ilalgad ko tirok Got ban’en, ma kub t’uf ni nge “ga’ e tamilangan’ rodad ko tin som’on e machib ni kad filed u murung’agen Kristus” ni aram e pi kenggin e machib u Bible. Boch ko pi machib ney e ba muun ngay e machib u murung’agen ni ngan kalngan’uy, nge michan’, nge taufe, nge fos ko yam’. (Heb. 6:​1, 2, NW) Ireray boch e machib ni urngin e Kristiano nib mich u wan’rad. Aram fan ni ireray e pi n’en ni i weliy apostal Peter murung’agen u nap’an ni be machibnag fapi girdi’ ni kar muulunggad u nap’an e Pentekost. (Acts 2:​32-35, 38) Faanra ngad manged reb i gachalpen Jesus, ma thingari m’agan’dad ko pi machib ney. Bod ni yog Paul ni en nde mich e fos ko yam’ u wan’ e dabiyog ni nge mang reb i gachalpen Kristus. (1 Kor. 15:​12-14) Machane faanra ngad ilalgad ko tirok Got ban’en, ma de gaman ni kemus ni ngad filed e pi kenggin e machib u Bible.

13. Mang e thingar da rin’ed ya nge yib angin ngodad e pi machib u Bible nib toar fan nrogon ni be yog e Hebrews 5:14? (Kum guy e sasing.)

¹³ Pi machib u Bible nib toar fan e ba thil ko pi kenggin e machib u Bible ya gathi kemus nib muun ngay e pi motochiyel rok Jehovah ya kub muun e pi kenggin e motochiyel rok ngay nra ayuwegdad ni ngad nanged rogon laniyan’. Ra nge yib angin e pi n’ey ngodad, mab t’uf ni ngad filed e Thin rok Got, ma gad fal’eg i lemnag, ma gad fol riy u rogon nrayog rodad. Gad ra rin’ e re n’ey, ma aram e gad ra nang rogon ni ngad dugliyed boch ban’en nra m’agan’ Jehovah ngay. c​—Mu beeg e Hebrews 5:14.

14. Uw rogon ni ayuweg Paul piyu Korinth ni ngar ilalgad ko tirok Got ban’en?

¹⁴ Pi Kristiano ndawor ra ilalgad ko tirok Got ban’en e ba ga’ nib mo’maw’ ngorad ni ngar dugliyed e n’en nib fel’ ni ngar rin’ed ni faanra dariy reb e motochiyel u Bible nri be tamilangnag e n’en ngar rin’ed. Bay boch i yad nsana ma lemnag nrayog ni nge rin’ e n’en baadag ni faanra  dariy reb e motochiyel u Bible ni be tamilangnag e n’en nge rin’. Ma boch i yad e ma yog ni ngan ngongliy reb e motochiyel ni ngan fol riy ni yugu aram rogon nde t’uf ni ngan rin’ e re n’ey. Pi Kristiano nu Korinth e sana rogned ngak Paul ni nge ngongliy reb e motochiyel ni be yog ko rayog ni ngar ked e ggan ni kan pi’ ko liyos fa dabiyog. I tamilangnag Paul ngorad nra bagayad ma bay mat’awun ni nge mel’eg e n’en nge rin’ nib puluw ko n’en be yog e nangan’ rok ko bin ir e nge yog e n’en ngar rin’ed. I tamilangnag ngorad boch i kenggin e motochiyel u Bible nra ayuwegrad ni ngar dugliyed ban’en ndabi magawonnag e nangan’ rorad maku dabi magawonnag laniyan’ yugu boch e girdi’. (1 Kor. 8:​4, 7-9) Ere n’en be rin’ Paul e be ayuweg piyu Korinth ni ngar ilalgad ko tirok Got ban’en ya nge yag nra filed rogon ni ngar nanged e tin nib fel’ ko tin nib kireb ko bin ngaur taga’gad ngak be’ ara ur gayed yugu boch e motochiyel nga bang ni ngar folgad riy.

15. Uw rogon ni ayuweg Paul e pi Kristiano ni Hebrew ni ngar mon’oggad ko tirok Got ban’en?

¹⁵ Bay ban’en nib ga’ fan ni gad be fil ko n’en ni yoloy Paul ngak e pi Kristiano ni Hebrew. Bay boch i yad ndakir ulul ni nge ilal ko tirok Got ban’en, ya susun e ngar ‘ked e ggan nib el [ni fan ko tirok Got ban’en], machane dabi siy ni milik e ngar unumed.’ (Heb. 5:12) Dakurur filed me m’agan’rad ko tin riyul’ ni yibe tamilangnag u daken e ulung. (Prov. 4:18) Bod ni boor e pi Jew ni ka yad be fol ko fare Motochiyel rok Moses ni yugu aram rogon ni ke yan sogonap’an 30 e duw ndaki t’uf ni ngan fol riy ni bochan e maligach ni pi’ Kristus. (Rom. 10:4; Titus 1:10) Ba gaman e tayim u lan e re 30 i duw nem ni nge tamilang u wan’ e pi Kristiano nem ni yad boch e Jew ndaki t’uf ni ngar folgad ko fare Motochiyel! En ke beeg fagi babyor nni thagthagnag nga laniyan’ Paul ni nge yoloy nge pi’ ngak e pi Hebrew e rayog ni nge yog nre ke babyor ney e bay e pi machib u Bible riy nib toar fan. Ireray e n’en nib t’uf ko pi Kristiano ney ya ngari mich u wan’rad ni kab fel’ e biney e yaram u rogon ni nge liyor e piin Kristiano miki pi’ gelngirad ni nge dab kur rusgad ni ngar machibgad ni yugu aram rogon ni be togopuluw e pi Jew ngorad.​—Heb. 10:​19-23.

YUGU DABI PAG ROGON E PAGAN’ ROM

16. Mang e thingar kud rin’ed u nap’an ni gad be ilal i yan ko tirok Got ban’en?

¹⁶ Gathi kemus ni ngad athamgilgad u rogon nrayog rodad ni ngad ilalgad ko tirok Got ban’en, ya thingar kud guyed rogon ni ngad pared ni aram rogodad. Ra ngad rin’ed e re n’ey, ma  aram e be yip’ fan ni ngad guyed rogon ni yugu dabi pag rogon e pagan’ rodad. (1 Kor. 10:12) Susun e ngaud “changargad” ngodad ya nge yag nda ululgad ni ngad mon’oggad.​—2 Kor. 13:5.

17. Uw rogon ni tamilangnag fagi babyor ni yoloy Paul ngak piyu Kolose fan nib t’uf ni ngad pared ni gadad boch e Kristiano ni kad ilalgad ko tirok Got ban’en?

¹⁷ I tamilangnag Paul u lan fagi babyor ni yoloy ngak piyu Kolose fan nib t’uf ni ngad pared ni gadad boch e Kristiano ni kad ilalgad ko tirok Got ban’en. Yugu aram rogon ni kar ilalgad ko tirok Got ban’en, machane ki yog Paul ngorad ni ngar kol ayuwgad ndabi af e lem nu fayleng ngorad. (Kol. 2:​6-10) Epafras e ri manang rarogon e pi walag u lan e re ulung nem. Ere gubin ngiyal’ ni i meybil ni ngar ‘pired ni yad mmudugil’ ara kar ilalgad ko tirok Got ban’en. (Kol. 4:12) Mang e rayog ni ngad filed ko re n’ey? Manang Paul nge Epafras ni faanra ngad pared ni gadad boch e Kristiano ni kad ilalgad ko tirok Got ban’en mab t’uf ni ngad athamgilgad me ayuwegdad Got. Yow baadag ni nge par piyu Kolose ni yad boch e Kristiano ni kar ilalgad ko tirok Got ban’en ni yugu demtrug e re miti magawon ni yad be mada’nag.

18. Mang e rayog ni nge buch rok reb e Kristiano ni ke ilal ko tirok Got ban’en? (Kum guy e sasing.)

¹⁸ I yog Paul ngak e pi Hebrew nreb e Kristiano ni ke ilal ko tirok Got ban’en e rayog ni nge dabki fel’ u wan’ Got ndariy n’umngin nap’an. Faanra dabi motoyil ngak Jehovah, ma rayog ni nge palog rok ma dabki kalngan’ ko kireb ni be rin’ ma dabki n’ag Got fan. Machane pi Hebrew e dawori buch e re n’ey rorad. (Heb. 6:​4-9) Ere uw rogon e piin kar talgad ko muulung nge machib e ngiyal’ ney ara kan tharbograd ko ulung me yan i boch nga tomuren mar kalgadngan’rad? Faan yad ra sobut’nag lanin’rad ngar kalgadngan’rad ko kireb rorad, ma aram e yad be dag ni yad ba thil ko piin ni yoloy Paul murung’agrad. Machane nap’an ni yad ra sul ngak Jehovah mab t’uf ni nge ayuwegrad. (Ezek. 34:​15, 16) Rayog ni nge yog e piin piilal ngak reb e Pi Mich ni ke ilal ko tirok Got ban’en ni nge ayuwegrad ni ngki fel’ bayay e tha’ u thilrad Jehovah.

19. Mang e susun ni ngad nameged?

¹⁹ Faanra ga be athamgil ni ngam mang reb e Kristiano ni ke ilal ko tirok Got ban’en, ma rayog ni ngam rin’ e n’en ga be nameg! Mu ulul i fil e pi machib u Bible nib toar fan mag guy rogon ni ngaum lem ni bod Jehovah. Ma faanra kam mang reb e Kristiano ni ke ilal ko tirok Got ban’en, mag guy rogon ni ngam par ni arrogom e chiney i yan ngaram ndariy n’umngin nap’an.