1. Mang e be rin’ boch e walag ya nge yag nra yoornaged e tin yad be rin’ ni fan ko pigpig rorad ngak Jehovah?

 CHINEY ni be chugur ni ngan thang e re m’ag ney e boor e maruwel ni ngad rin’ed. (Matt. 24:14; Luke 10:2; 1 Pet. 5:2) Gad gubin ni gad baadag ni ngad yoornaged e tin gad be rin’ ni fan ko pigpig rodad ngak Jehovah. Boor e walag e yad be machib u boor e kanawo’. Ma boch e yad be athapeg ni ngar manged boch e pioneer. Ma boch e yad be athapeg ni ngar pigpiggad u Bethel ara ngar uned i toy boch e naun rodad. Ku boor e walag ni pumoon ni yad be nameg ni ngar manged ministerial servant ara piilal. (1 Tim. 3:1, 8) Ba mudugil nri ma felfelan’ Jehovah u nap’an nra guy e girdi’ rok ni yad baadag ni ngar pigpiggad ngak!​—Ps. 110:3; Isa. 6:8.

2. Mang e rayog ni ngad lemnaged ni faanra de yag ni ngad rin’ed ban’en ni gad be nameg ni fan ko pigpig rodad ngak Jehovah?

² Machane rayog ni nge mulan’dad ni faanra ke n’uw nap’an ma der yag ni ngad rin’ed boch ban’en ni gad be nameg ni fan ko pigpig rodad ngak Jehovah. Fa reb e dabiyog ni ngad rin’ed boch ban’en u lan e ulung rok Jehovah ni bochan yangardad, ara bochan yugu boch ban’en. (Prov. 13:12) Ireray e n’en ni buch rok Melissa. * Baadag ni nge pigpig u Bethel ara nge un ko fare School for Kingdom Evangelizers, machane i yog ni gaar: “Dabiyog ni nggu rin’ e gali n’ey ni bochan e ke pag e duw rog. Ere yu ngiyal’ e ma mulan’ug.”

3. Mang boch ban’en nrayog nib t’uf ni nge rin’ boch e walag u m’on ni ngan pi’ boch e maruwel ngorad?

³ Boch e walag ni kab fel’ yangarrad nge fithik’ i dowrad e sana ba t’uf ni ngar guyed rogon ni nge yag boch e fel’ngin ngorad u m’on ni ngan pag fan boch ban’en ngorad. Bod nsana boch i yad  e ba llowan’ mab papey ni yad ma dugliy ban’en, ma kub m’agan’rad ngay ni ngar rin’ed boch e maruwel. Machane sana rayog nib t’uf ni ngar filed rogon ni ngaur gum’an’gad, mar rin’ed e maruwel rorad u reb e kanawo’ nra yan i aw nib manigil, mu kur ted fan yugu boch e girdi’. Faan ga ra guy rogon ni nge yag e pi fel’ngin nib t’uf ni nge yag ngom, ma dabisiy ni yira pi’ reb e maruwel ngom u ba ngiyal’ ndam lemnag ni yira pi’ riy. Am lemnag e n’en ni buch rok Nick. Nap’an ni gaman 20 e duw rok, mi ri kireban’ ni bochan e dan dugliy ni nge mang reb e ministerial servant. I gaar, “Gu lemnag ni bay ban’en nib buch rog.” Machane de mulan’ Nick. I rin’ e tin rayog rok u lan e ulung ngu nap’an e machib. Ma chiney e ir girdien reb e Branch Committee.

4. Mang e gad ra weliy ko re article ney?

⁴ Gur, ke mulan’um ni bochan e dawori yag ni ngam rin’ ban’en ni ga be nameg ni fan ko pigpig rom ngak Jehovah? Faanra arrogon, mag weliy lanin’um ngak. (Ps. 37:5-7) Ku rayog ni nga mog ngak boch e walag ni pumoon ni kar ilalgad ko tirok Got ban’en ni nga rogned ngom rogon nrayog ni ngam mon’og ko pigpig ni ga be tay ngak Got, mag guy rogon ni ngam fol ko n’en ka rogned. Ga ra rin’ e re n’ey, ma aram e sana rayog ni ngam rin’ e n’en ga be nameg. Machane sana dabiyog ni ngam rin’ e n’en ga baadag ni ngam rin’ ni fan ngak Jehovah e chiney ni bod Melissa. Ere uw rogon nrayog ni ngam par ni gab felfelan’? Ra ngad nanged e fulweg ko re deer ney, ma aram e gad ra weliy ko re article ney e (1) n’en nra yibnag e felfelan’ ngom, (2) rogon ni nge gel e felfelan’ rom, nge (3) boch ban’en nrayog ni ngam nameg nra gelnag e felfelan’ rom.

5. Mang e susun ni ngaud lemnaged ya nge yag nda pared ni gad ba felfelan’? (Eklesiastes 6:9)

⁵ Be weliy e Eklesiastes 6:9 e n’en nra yibnag e felfelan’ ngodad. (Mu beeg.) Be’ nib fel’ u wan’ e tin bay rok e ba ‘fel’ u wan’’ e tin be yag ni nge rin’ e chiney. Machane be’ ni yugu ma finey e tin dariy rok e dabi fel’ u wan’ e tin bay rok. Ere mang e gad be fil ko re n’ey? Ra ngad felfelan’gad ma susun e ngaud lemnaged e tin bay rodad, ma gathi tin ndabiyog ni nge yag ngodad.

6. Mang fanathin e ngad weliyed e chiney, ma mang e gad ra fil riy?

⁶ Gur, rayog ni ngari fel’ u wan’um e tin bay rom e chiney? Boor e girdi’ ni yad ma lemnag ndabiyog ni bochan e gubin ngiyal’ ni gad baadag ni ngad filed boch ban’en ni kab beech. Machane bin riyul’ riy e, rayog ni ngad felfelan’gad ko tin bay rodad e chiney. Ni uw rogon? Ra ngad nanged ma ngad weliyed e n’en ni yog Jesus u lan fare fanathin rok u murung’agen fapi talent * ni bay ko Matthew 25:14-30. Gad ra fil riy rogon ni ngad felfelan’gad, miki fel’ u wan’dad e tin be yag ni ngad rin’ed e chiney.

7. Mu weliy e n’en ni buch ko fare fanathin rok Jesus ni murung’agen fapi talent.

⁷ Fare fanathin e be weliy murung’agen be’ nib moon ni nge digey e tabinaw rok nge yan ko milekag. U m’on ni nge chuw, ma aram me pining e pi tapigpig rok me pi’ bogi salpiy ngorad ni ngar maruwelgad ngay. * Ra bagayad me pi’ e salpiy ngak nrogon e maruwel nrayog rok. I pi’ lal e talent ngak bagayad, ma bagayad e pi’ l’agruw e talent ngak, ma bagayad e taareb e talent ni pi’ ngak. Fa gal nsom’on e tapigpig e ba fel’ rogon nra maruwelgow ko salpiy rorow. Machane fa bin dalip e tapigpig e dariy ban’en ni rin’ ko salpiy rok, ma aram min n’ag ko maruwel rok.

8. Mang fan nrayog ni nge felfelan’ e bin som’on e tapigpig ni kan weliy murung’agen ko fare fanathin?

 ⁸ Ri felfelan’ e bin som’on e tapigpig ni ke pi’ e masta rok lal e talent ngak. Rib ga’ e re salpiy nem, ma be m’ug riy nri be pagan’ e masta rok ngak! Machane uw rogon e bin ni migid e tapigpig? Rayog ni nge mulan’ ni bochan e dan pi’ e salpiy ngak ni bod rogon urngin e tin nni pi’ ko bin som’on e tapigpig. Machane mang e rin’?

9. Mang e de yog Jesus u murung’agen fa bin ni migid e tapigpig? (Matthew 25:22, 23)

⁹ Mu beeg e Matthew 25:22, 23. De yog Jesus ni damumuw e bin ni migid e tapigpig ni bochan e kemus ni l’agruw e talent nni pi’ ngak. Ku de yog Jesus ni gun’gun’ fare tapigpig ni gaar: ‘Kemus chi urngin ni ngan pi’ ngog? Ya taab gelngin e maruwel ni kug tay ko bin baaram e tapigpig ni kan pi’ lal e talent ngak! Faanra der lemnag e masta rog nib fel’ rogon e maruwel ni gu be tay, me ere sana kab fel’ ni nggu wan gu mithag e salpiy rog nga fithik’ e but’ mug sul nggu maruwel rog ko bin ni nggu maruwel rok.’

10. Mang e rin’ fa bin ni migid e tapigpig ko tirok e salpiy?

¹⁰ Fa bin ni migid e tapigpig e manang nib ga’ fan e maruwel ni ke pi’ e masta rok ngak, ma aram me maruwel nib gel ni fan ko masta rok ni bod e bin som’on e tapigpig. Angin ni yib riy e yag ni nge maruwel ko fapi salpiy ni kan pi’ ngak ngki yognag l’agruw e talent riy. I tow’athnag fare masta fare tapigpig ko maruwel nib gel ni rin’. Gathi kemus ni felfelan’ fare masta, ya ki pi’ yugu boch e maruwel ngak ni nge rin’!

11. Uw rogon ni ngad gelnaged e felfelan’ rodad?

¹¹ Ku arrogodad nrayog ni nge gel e felfelan’ rodad ni faan gad ra tedan’dad ngad rin’ed e maruwel ni kan pi’ ni ngad rin’ed ni fan ko pigpig rodad ngak Jehovah. Ere um “par” ni ga be rin’  fare maruwel ni machib, ma ga be tiyan’um ko pi maruwel ni ga be rin’ u lan e ulung. (Acts 18:5; Heb. 10:24, 25) Mu fal’eg rogom nib fel’ rogon ni fan ko muulung ya nge yag nim pi’ e fulweg nra pi’ e athamgil nga laniyan’ yugu boch e girdi’. Mu tiyan’um ngam ngongliy e welthin rom nib fel’ rogon ni ga ra pi’ u nap’an e muulung u lan e wik. Faanra ka nog ngom ni ngam rin’ reb e maruwel u lan e ulung, mag yib ko ngiyal’ nsusun e nga mub riy mag dag nrayog ni ngan taga’ ngom. Dab mu lemnag nde ga’ fan e maruwel ni kan pi’ ngom ma de t’uf ni ngam tay e tayim rom ni fan ngay. Ma ngkum guy rogon ni ngam mon’ognag e salap rom. (Prov. 22:29) Faan ga ra maruwel nib gel ni fan ngak Jehovah, ma rra chugur e tha’ u thilmew miki gel e felfelan’ rom. (Gal. 6:4) Ku ra mom ngom ni ngam felfelan’ ngak yugu boch e walag u nap’an ni yira pi’ reb e maruwel ngorad ni ga baadag ni ngan pi’ ngom.​—Rom. 12:15; Gal. 5:26.

12. Mang e ayuweg Melissa nge Nick ni nge gel boch e felfelan’ rorow?

¹² Ka be yib ngan’um Melissa ni fare walag nib pin ni baadag ni nge un ko pigpig u Bethel ara un ko fare School for Kingdom Evangelizers, fa? Yugu aram rogon ndabiyog ni nge rin’ e re n’ey, machane me yog ni gaar: “Gu ma tiyan’ug ko pioneer nug be tay, ma gu ma guy rogon ni nggu machib u boch e kanawo’ nib thilthil. Rib gel e felfelan’ ni kug tay ni bochan e re n’ey.” Uw rogon ni yag ni nge fel’ laniyan’ Nick u nap’an ndan dugliy ni nge mang reb e ministerial servant? I gaar: “Gu tiyan’ug ko tin rayog ni nggu rin’ ni bod e machib, nge fulweg nug ma pi’ u nap’an e muulung nrayog ni nge pi’ e athamgil nga laniyan’ yugu boch e girdi’. Ngemu’ mu kug fal’eg e babyor rog ni nggu un ko pigpig u Bethel, me yan i bin migid e duw nga tomuren min fekeg ni nggu pigpig u rom.”

13. Mang angin nra yib riy ni faan ga ra tiyan’um ko maruwel ni ga be rin’ e chiney? (Eklesiastes 2:24)

¹³ Faan ga ra tiyan’um ko maruwel ni ga be rin’ e chiney ma gur, rayog ni ngkun pi’ yugu boch e maruwel ngom boch nga m’on, fa? Rayog ni nge buch e re n’ey rom ni bod e n’en ni buch rok Nick. Machane faanra de buch ni aram rogon, ma rayog ni nge gel boch e felfelan’ rom miki fel’ u wan’um e tin ga be rin’ ni fan ngak Jehovah ni bod Melissa. (Mu beeg e Eklesiastes 2:24.) Ku ra gel e felfelan’ rom ni bochan e ga manang ni ga be felfelan’nag Jesus Kristus ni Masta rodad.

14. Mang e susun ndab da paged talin u nap’an ni gad be nameg boch ban’en ni fan ko pigpig rodad ngak Jehovah?

¹⁴ Faanra ngad tedan’dad ko maruwel ni gad be rin’ e chiney, ma aram e gur, be yip’ fan ndab kud guyed rogon ni ngad yoornaged e tin gad be rin’ ni fan ko pigpig rodad ngak Jehovah, fa? Danga’! Ya susun e ngad nameged boch ban’en nra ayuwegdad ni ngad salapgad ko machib nge rogon ni gad ma fil e tin riyul’ ko girdi’, miki yag ni ngad ayuweged pi walagdad. Rayog ni ngad rin’ed e re n’ey ni faan gad ra lemnag rogon ni ngad rin’ed boch ban’en ni fan ngak yugu boch e girdi’ ko bin ni yigoo gadad e ngaud lemnaged gadad.​—Prov. 11:2; Acts 20:35.

15. Mang boch ban’en nrayog ni ngam nameg nra gelnag e felfelan’ rom?

¹⁵ Mang boch ban’en nrayog ni ngam nameg? Mog ngak Jehovah ni nge ayuwegem ni ngam nang e pi n’en ga ra nameg ma rayog ni ngam rin’. (Prov. 16:3; Jas. 1:5) Rayog ni ngam nameg reb fapi n’em ni kad  weliyed ko bin som’on e paragraph ko re article ney ni bod ni ngam un ko auxiliary ara regular pioneer, ara ngam pigpig u Bethel, ara ngam un i toy reb e naun rodad. Fa reb e ngam fil yugu reb e thin nib beech, ara mman mu machib u yugu bang nib thil. Ga ra beeg e guruy ni 10 ko fare ke babyor ni Organized to Do Jehovah’s Will, mag non ko piin piilal u lan e ulung rom, ma aram e rayog ni ngkum  nang boch ban’en u murung’agen e re n’ey. * Nap’an ni ga ra guy rogon ni ngam rin’ e pi n’ey ni ga be nameg, ma aram e ra guy e tin ka bay e girdi’ ni ga be mon’og i yan me gel e felfelan’ rom.

16. Mang e rayog ni ngam rin’ ni faanra bay reb e ban’en ni ga be nameg ndabiyog ni ngam rin’ e chiney?

¹⁶ Machane uw rogon ni faanra bay reb fapi n’em ni kad weliyed ndabiyog ni ngam rin’? Faanra aram rogon, mag nameg yugu reb e ban’en nrayog ni ngam rin’. Baaray boch e pi n’em.

17. Uw rogon nrayog ni nge mon’og reb e walag ni pumoon u rogon ni ma fil ban’en ko girdi’ nrogon ni bay ko 1 Timothy 4:13, 15?

¹⁷ Mu beeg e 1 Timothy 4:13, 15. Faanra gur reb e walag ni pumoon, ma rayog ni ngam guy rogon ni ngam mon’og u rogon ni ga ma pi’ e welthin nge rogon ni ga ma fil ban’en ko girdi’. Mang fan? Bochan ni faan ga ra guy rogon ni ngam salap ko beeg babyor, nge welthin ni ga ma pi’, nge rogon ni ga ma fil ban’en ko girdi’, ma aram e rayog ni ngam ayuweg e piin yad ra motoyil ngom. Mu nameg ni ngam fil, mag fol ko n’en ni kan weliy ko fare brochure ni kenggin e Mmon’og u Rogon ni Ngam Skulnag Be’. Mu fil nreb nge reb, mag yan u daken u nap’an ni ga bay u tabinaw, mag guy rogon ni ngam rin’ e pi n’ey u nap’an ni ga be pi’ e welthin rom. Mu ning e ayuw ngak fare piilal ni ir e auxiliary counselor, ara yugu boch e piilal “nrib gel e machib ni yad be tay nge thin rok Got ni yad be fil ngak e girdi’.” * (1 Tim. 5:17) Gathi kemus ni ngam lemnag rogon ni ngam fol ko pi n’en bay ko re brochure ney, ya ngkum lemnag rogon ni ngam ayuweg e piin yad ra motoyil ngom ni ngar gelnaged  e michan’ rorad, ara rogon ni ngam pi’ e athamgil nga lanin’rad ni ngar folgad ko tin yad be fil. Faan ga ra rin’ e re n’ey, ma aram e ga ra gelnag e felfelan’ rom, nge piin yad be motoyil ngom.

18. Mang e ra ayuwegdad ni ngad rin’ed boch ban’en ni gad be nameg ni fan ko machib ni gad ma tay?

¹⁸ Gad gubin ni kan pi’ fare maruwel ngodad ni ngad machibgad ma gad ayuweg e girdi’ ni ngar manged boch i gachalpen Jesus. (Matt. 28:19, 20; Rom. 10:14) Ere ga baadag ni ngam salap u rogon ni ga be rin’ e re maruwel ney nib ga’ fan, fa? Nap’an ni ga be fil fare brochure ni Ngam Skulnag Be’, mag nameg boch ban’en nra ayuwegem ni ngam fol ko n’en ga be fil. Rayog ni nge ayuwegem e n’en bay ko fare babyor ni Tin Ma Rin’ e Piin Kristiano nge Machib ni Yad Ma Tay, nge n’en bay ko fapi video ni yima pag u nap’an e muulung u lan e wik ni be dag e n’en nrayog ni nga nog u nap’an e machib. Mu rin’ boch ko pi n’ey ya nge yag nim guy e bin nib mom ngom. Ga ra fol ko pi n’ey, ma aram e rayog ni ngam mon’og ko machib ni ga ma tay me gel boch e felfelan’ rom.​—2 Tim. 4:5.

19. Uw rogon ni nge yag e pi fel’ngin ngom nib m’agan’ Got ngay?

¹⁹ Dab mu pagtalin nreb e ban’en nib ga’ fan nrayog ni ngam nameg e aram e rogon ni nge yag e pi fel’ngin ngom nib m’agan’ Got ngay. (Gal. 5:22, 23; Kol. 3:12; 2 Pet. 1:5-8) Uw rogon nrayog ni ngam rin’ e re n’ey? Bod nsana ga baadag ni nge gel boch e michan’ rom. Ere rayog ni ngam beeg boch e article u lan e pi babyor rodad ni be weliy rogon nrayog ni ngam gelnag e michan’ rom. Ku ra yib angin ngom e pi video ni bay ko JW Broadcasting^® ni be dag yaan boch e walag ni kar pared nib gel e michan’ rorad ni yugu aram rogon ni yad be mada’nag boch e skeng nib thilthil, ngemu’ mag lemnag rogon nrayog ni ngam folwok ko michan’ rorad.

20. Uw rogon ni nge gel e felfelan’ rodad ma dabki mulan’dad?

²⁰ Dabisiy ni gad gubin ni gad baadag ni ngad yoornaged e tin gad be rin’ ni fan ngak Jehovah e chiney. Nap’an ni gad ra yan nga lan e bin nib beech e fayleng ma rayog ni ngad pigpiggad ngak nib fel’ rogon. Ere chiney ni gad be sonnag e ngiyal’ nem e faan gad ra rin’ e tin rayog rodad u rogon feni fel’ nrayog rodad, ma aram e rayog ni nge gel e felfelan’ rodad ma dabki mulan’dad. Ma bin th’abi ga’ fan riy e, gad ra pining e sorok ngak Jehovah ni Got rodad “nib felfelan’.” (1 Tim. 1:11, NW) Ere ngaud felfelan’gad ko tin be yag ni ngad rin’ed e chiney!