ARTICLE NI NGAN FIL 33
Ma Yaliy Jehovah e Girdi’ Rok
“I Somol e ma yaliy e piin bay madgun u wan’rad.”—PS. 33:18, BT.
TANG 4 Jehovah e “Be Gafaliyeg”
TIN YIRA WELIY *
1. Mang fan ni wenig Jesus ngak Jehovah ni nge ayuweg pi gachalpen?
FARE nep’ u m’on ni yim’ Jesus, me wenignag ban’en ngak e Chitamangin ni bay u tharmiy. I wenig ngak ni nge ayuweg pi gachalpen. (John 17:15, 20) Riyul’ ni kab kafram i yib ni ma yaliy Jehovah e girdi’ rok ara ma ayuwegrad ma be yororiyrad. Machane manang Jesus nib gel e togopuluw nra tay Satan ngak pi gachalpen. Ku manang nib t’uf ni nge ayuwegrad Jehovah ni ngar gelgad ko togopuluw nra tay Moonyan’ ngorad.
2. Mang fan ndariy rogon ni ngad rusgad u nap’an ni gad ra mada’nag e magawon nrogon ni be yog e Psalm 33:18-20?
2 Boor e magawon ni ma mada’nag e tin riyul’ e Kristiano e ngiyal’ ney u lan e re fayleng rok Satan ney. Gad ma mada’nag boch e magawon nrayog ni nge muleg lanin’dad me skengnag e yul’yul’ rodad ngak Jehovah. Machane gad ra fil ko re article ney ndariy rogon ni ngad rusgad. Be guydad Jehovah ma manang e pi magawon ni gad be mada’nag, ma baadag ni nge ayuwegdad. Ere ngad weliyed murung’agen l’agruw ni’ u Bible ni be tamilangnag rogon ni ma yaliy Jehovah e “piin bay madgun u wan’rad.”—Mu beeg e Psalm 33:18-20, BT.
NAP’AN NI GAD RA LEMNAG NI YIGOO GADAD
3. Mingiyal’ e rayog ni ngad lemnaged ni yigoo gadad?
3 Yugu aram rogon ni boor e pi walagdad u lan e ulung, machane bay yu ngiyal’ nrayog ni ngad lemnaged ni yigoo gadad. Bod ni piin fel’ yangaren e rayog ni ngar lemnaged ndariy be’ ni nge ayuwegrad u nap’an ni ngar weliyed e tin ke michan’rad ngay u p’eowchen e piin yad nga skul, ara nap’an ni ka ranod nga reb e ulung nib beech. Ma boch i gadad e rayog ni be kireban’ ara be mulan’ ma be lemnag ndariy be’ nra ayuweg u fithik’ e pi n’ey. Rayog ndubdad ni ngad weliyed lanin’dad ngak yugu boch e girdi’ ni bochan e sana gad be lemnag ndariy be’ nra nang fan rogon lanin’dad. Ma yu ngiyal’ e rayog ni ngaud lemnaged ko ri bay be’ ni be lemnag rogon lanin’dad fa dariy. Demtrug fan ni gad be lemnag ni yigoo gadad, ma rayog ni nge k’aringdad e re n’ey ni ngad lemnaged ndariy ban’en nrayog ni ngad rin’ed miki magafan’dad. Dabun Jehovah ni ngad lemgad ni aray rogon. Mang fan nrayog ni nga dogned e re n’ey?
4. Mang fan ni gaar Elijah ni profet: “Ke mus ni gag e kug magey”?
4 Am lemnag e n’en ni buch rok Elijah ni ir be’ nib yul’yul’. Ke pag 40 e rran ni be milnag e pogofan rok ni bochan e ke yog Jezebel ni nge thang e fan rok. (1 Ki. 19:1-9) Nap’an ni yigoo ir u lan ba yiy, me gaar ngak Jehovah: “Ke mus ni gag e [profet ni] kug magey.” (1 Ki. 19:10) Machane ka bay yugu boch e profet ko re nam nem, ya ke yag ni nge ayuweg Obadiah 100 e profet nde thang Jezebel e fan rorad. (1 Ki. 18:7, 13) Ere mang fan ni lemnag Elijah ni yigoo ir e ke magey? Gur, i lemnag ni ke yim’ fapi profet ni ayuwegrad Obadiah? Fa gur, i lemnag ni yigoo ir ni bochan e dariy be’ ni un ngak ko pigpig ngak Jehovah u tomuren ni micheg ni ir e bin riyul’ e Got u daken e Burey ni Karmel? Gur, i lemnag ndariy be’ ni manang gelngin ni ke par e yafos rok nga thatharen e riya’ ara dariy be’ ni be lemnag? Der tamilangnag e Bible rogon laniyan’ Elijah. Machane ba pagan’dad ni manang Jehovah fan ni i lemnag Elijah ni yigoo ir e ke magey, maku manang rogon ni nge ayuweg.
Mang e rayog ni ngad filed u rogon ni ayuweg Jehovah Elijah nra fal’eg lanin’dad u nap’an ni gad be lemnag ni yigoo gadad? (Mu guy e paragraph 5-6)
5. Uw rogon ni micheg Jehovah ngak Elijah ni gathi yigoo ir e ka bay?
5 Boor e kanawo’ ni ayuweg Jehovah Elijah riy. I pi’ e athamgil ngak ni nge weliy laniyan’. L’agruw yay ni fith ngak Elijah ni gaar: “Mang e ga be rin’ u roy?” (1 Ki. 19:9, 13) Ma l’agruw yay ni motoyil ngak Elijah u nap’an ni be weliy urngin ban’en ni bay u laniyan’. I fulweg Jehovah lungun Elijah ni aram e dag ngak ni bay u rom ma rib gel gelngin. Ki micheg ngak Elijah ni ka boor e girdi’ ni yad be pigpig ngak. (1 Ki. 19:11, 12, 18) Dariy e maruwar riy ni baud laniyan’ Elijah u tomuren ni weliy urngin ban’en ni bay u laniyan’ ngak Jehovah me rung’ag ni ke fulweg lungun. Bay in e maruwel nib ga’ fan ni pi’ Jehovah ngak ni nge rin’. I yog ngak ni nge mel’eg Hazael ni nge mang pilung u Syria, me mel’eg Jehu ni nge mang pilung u Israel, me mel’eg Elisha ni nge mang profet. (1 Ki. 19:15, 16) Nap’an ni pi’ Jehovah e pi maruwel ney ngak Elijah, ma aram me ayuweg ni nge lemnag boch ban’en nib manigil. Ki pi’ be’ ni ngar maruwelgow u taabang ni aram Elisha. Ere uw rogon nrayog ni nge ayuwegem Jehovah u nap’an ni ga be lemnag ni yigoo gur?
6. Mang e rayog ni ngam yibilay murung’agen u nap’an ni ga be lemnag ni yigoo gur? (Psalm 62:8)
6 Baadag Jehovah ni ngam meybil ngak. Be guy e magawon ni ga be mada’nag, ma ke micheg ndemtrug e ngiyal’ nra motoyil ko meybil rom. (1 Thess. 5:17) Baadag ni ma motoyil ko pi tapigpig rok. (Prov. 15:8) Ere mang e rayog ni ngam yibilay murung’agen u nap’an ni ga be lemnag ni yigoo gur? Mu weliy urngin ban’en ni bay u lanin’um ngak Jehovah ni bod ni rin’ Elijah. (Mu beeg e Psalm 62:8.) Mu weliy ngak e pi n’en be magafan’um ngay nge rogon e pi n’em u wan’um. Mog ngak ni nge ayuwegem ni ngam nang e n’en ngam rin’ u nap’an ni be kireban’um ara ga be lemnag ni yigoo gur. Bod ni faanra ga be rus ma ga be lemnag ndariy be’ ni nge ayuwegem u nap’an ni ga be weliy e michan’ rom u skul, ma gog ngak Jehovah ni nge ayuwegem ndab kum rus ni ngam weliy e michan’ rom. Ku rayog ni ngam ning e gonop ngak ya nge yag nim weliy e michan’ rom u reb e kanawo’ ndabi k’aring e damumuw ngak yugu boch e girdi’. (Luke 21:14, 15) Faanra be kireban’um ara ke mulan’um, ma gog ngak Jehovah ni nge ayuwegem ya nge yag nim weliy e magawon rom ngak reb e Kristiano ni ke ilal ko tirok Got ban’en. Rayog ni nga mog ngak ni nge ayuweg facha’ ni nge nang rogon lanin’um. Mu weliy urngin ban’en ni bay u lanin’um ngak Jehovah, mag guy rogon ni be fulweg taban e meybil rom, mag pag yugu boch e girdi’ ni ngar ayuweged gur. Ga ra rin’ e re n’ey, ma aram e rayog ni nge dab kum par ni ga be lemnag ni yigoo gur.
Ga ma gay boch e kanawo’ nrayog ni ngam yoornag e tayim rom riy ni fan ko machib, ma ka ga ma un ngak yugu boch e walag ko machib, fa? (Mu guy e paragraph 7)
7. Mang e kam fil ko n’en ni rin’ Mauricio?
7 Gad gubin ni ke pi’ Jehovah e maruwel ni ngad rin’ed nib ga’ fan. Rayog ni nge pagan’um ngay ni ma guy mab ga’ fan u wan’ urngin ban’en ni ga ma rin’ u lan e ulung ngu nap’an e machib. (Ps. 110:3) Faanra um fanay e tayim rom ni fan ko re maruwel ney, ma uw rogon nra ayuwegem u nap’an ni ga be lemnag ni yigoo gur? Am lemnag e n’en ni buch rok reb e walag ni kab pagel ni ka nog Mauricio ngak. * De n’uw nap’an nga tomuren ni un Mauricio ko taufe, ma bay reb e fager rok nri yow ba chugur ni munmun me digey e tin riyul’. I gaar: “Nap’an nug guy ni ke digey e tin riyul’, ma aram e daki pagan’ug ngog. Ug lemnag ko rayog ni nggu tay u gil’ e n’en nug micheg u nap’an nug ognageg ngak Jehovah mug par u lan e tabinaw rok fa dabiyog. Ug lemnag ni yigoo gag ma dariy be’ nra nang fan rogon lanin’ug.” Ere mang e ayuweg Mauricio? I gaar: “Gu yoornag e tayim rog ni fan ko machib. Re n’ey e ayuwegeg ni nge dab kug par ni yigoo gag e gu be lemnageg, nge pi n’en nde puluw nug be lemnag. Nap’an ni gamad ra machib yugu boch e girdi’ u taabang, ma gu ma felfelan’ ma dakugur par nug be lemnag ni yigoo gag.” Arrogon, mus ni faanra dabiyog ni ngad mada’gad e pi walag nga taabang nga darod ko machib, machane ma yib e athamgil nga lanin’dad u nap’an ni gad ra un ngorad ko machib u telefon ara da yoloyed e babyor ngad pied ko girdi’. Mang e ki ayuweg Mauricio? I ulul ngay ni gaar: “Kug yoornag e maruwel nug be rin’ u lan e ulung. Faanra bay e welthin rog ma gu ma athamgil u rogon nrayog rog ni nggu fal’eg rogog mug pi’ nib fel’ rogon. Pi maruwel ney e k’aringeg ni nggu nang nib ga’ fag u wan’ Jehovah nge pi walag.”
NAP’AN NRA MULAN’DAD NI BOCHAN E MAGAWON NIB GEL
8. Mang e rayog ni nge buch rodad u nap’an ni gad ra mada’nag e magawon nib gel?
8 Gad manang nra ud mada’naged e magawon e ngiyal’ ney ko tin tomuren e rran. (2 Tim. 3:1) Yugu aram rogon ma rayog ni ngad gingad u nap’an ni gad ra mada’nag reb e magawon, ara kud gingad ko re miti magawon ni ke yib ngodad. Rayog ni ngad magawongad ko salpiy nib tomgin, ara yib ba mit e m’ar ngodad, ara yim’ be’ nib t’uf rodad. Nap’an nra buch e pi n’ey, ma rayog ni ngad pared ni gad be mochuch me mulan’dad nib ga’ ni faanra chuw reb e magawon me yib reb ara be buch ni gubin taab yay. Machane dab mu pagtalin ni be yaliydad Jehovah, ma ra ayuwegdad ni ngad athamgilgad u fithik’ urngin mit e magawon nra yib ngodad nib pagan’dad.
9. Mu weliy boch e magawon ni yib ngak Job.
9 Am lemnag rogon ni ayuweg Jehovah Job ni ir be’ nib yul’yul’. Bay in i magawon nib gel ni yib ngak u lan ba ngiyal’ nde n’uw nap’an nri k’aring e mochuch ngak. U lan taa borran, mi nog ngak ni kan iring ara ke yim’ gubin e gamanman rok, ma pi tapigpig rok nge pi fak e goo kar m’ad. (Job 1:13-19) Ma de n’uw nap’an nga tomuren u nap’an ni ka be kireban’ ko n’en ke buch rok, me yib ba mit e m’ar ngak nib ubchiya’. (Job 2:7) Bochan gelngin e gafgow ni tay, me yog ni gaar: “Ke mulan’ug; ke chuwan’ug ko yafos rog.”—Job 7:16, BT.
I weliy Jehovah ngak Job urngin e kanawo’ ni ma ayuweg e tin ke sunmiy riy, ya nge mich u wan’ Job nib t’uf rok ma ra ayuweg (Mu guy e paragraph 10)
10. Uw rogon ni ayuweg Jehovah Job ni nge athamgil u fithik’ e magawon ni ke yib ngak? (Mu guy e sasing ni bay u wuru’ e re ke babyor ney.)
10 Ngiyal’ nem e be yaliy Jehovah Job. Bochan nib t’uf Job rok, ma aram me ayuweg ni nge athamgil u fithik’ e magawon ni ke yib ngak me par nib yul’yul’. I non ngak Job me puguran ngak ni gonop rok e dariy e gin nra mus riy, miki puguran ngak rogon ni ma ayuweg e tin ke sunmiy. Boor e gamanman ni yira ngat ngay ni weliy murung’agen. (Job 38:1, 2; 39:9, 13, 19, 27; 40:15; 41:1, 2) Ki fanay Elihu ni ir be’ nib yul’yul’ ni nge pi’ e athamgil ngak Job me fal’eg laniyan’. I micheg Elihu ngak ni Jehovah e gubin ngiyal’ ni ma tow’athnag e pi tapigpig rok ko athamgil ni yad ma tay. Machane ki fanay Jehovah Elihu ni nge fonownag Job u fithik’ e t’ufeg. I puguran ngak Job ni gadad e girdi’ e dabi chugur ni nge taareb rogodad ngak Jehovah ni Ir e Ke Sunmiy e palpalth’ib, ya nge ayuweg ni nge dabki par ni yigoo ir e be lemnag ir. (Job 37:14) Ki pi’ Jehovah e maruwel ni nge rin’ Job ni aram e nge yibilay fa dalip i tafager rok ni kar denengad. (Job 42:8-10) Ere uw rogon ni ma ayuwegdad Jehovah u nap’an ni gad ra mada’nag boch e magawon nib mo’maw’ e ngiyal’ ney?
11. Uw rogon ni ma ayuwegdad e Bible u nap’an nra yib e magawon ngodad?
11 Der ma non Jehovah ngodad ni bod ni non ngak Job, machane ma non ngodad u daken e Thin rok ni aram e Bible. (Rom. 15:4) Ke pi’ e athap ngodad ni fan ko gabul nge langlath nra fal’eg lanin’dad. Baaray in e thin nu Bible nra fal’eg lanin’dad u nap’an ni gad be mada’nag boch e magawon. Ke micheg Jehovah ngodad u lan e Bible ndariy ban’en nrayog ni nge “daregdad u rogon ni gadad ba t’uf rok” nib muun ngay e pi magawon nrib gel e mo’maw’ riy. (Rom. 8:38, 39) Ki micheg ngodad nib “chugur ngak urngin e piin ni yad ma non ngak” u daken e meybil. (Ps. 145:18) Be yog Jehovah ngodad ni faan gad ra taga’ ngak, ma demtrug e re miti magawon nra yib ngodad nrayog ni ngad athamgilgad u fithik’, maku gad ra par ni gad ba felfelan’ ni yugu aram rogon ni gad be gafgow. (1 Kor. 10:13; Jas. 1:2, 12) Ku be puguran e Thin rok Got ngodad ni pi magawon ni gad be mada’nag e bay n’umngin nap’an me chuw maku dabi n’uw nap’an nra par, ni faanra ngan taarebrogonnag ko tow’ath nra pi’ Got ngodad nra par ndariy n’umngin nap’an. (2 Kor. 4:16-18) Ke micheg Jehovah nra chuweg urngin e piin yad be k’aring e magawon ngodad, ni aram Satan ni Moonyan’ nge piin yad ba kireb ni bod ir. (Ps. 37:10) Kam fil ke mit ngom boch e thin nu Bible nra ayuwegem ni ngam athamgil u fithik’ e pi magawon nra yib ngom boch nga m’on, fa?
12. Mang e baadag Jehovah ni ngad rin’ed ni faanra ngari yib angin e Thin rok ngodad?
12 Baadag Jehovah ni ngad ted e tayim ni ngaud filed e Bible rodad ni gubin ngiyal’, ma gad be fal’eg i lemnag e n’en gad be beeg riy. Gad ra fol ko n’en gad be fil, ma ra gel boch e michan’ rodad miki chugur boch e tha’ u thildad e Chitamangidad ni bay u tharmiy. Angin nra yib riy e ra yib gelngidad ni ngad athamgilgad u fithik’ e pi magawon ni gad be mada’nag. Ku ma pi’ Jehovah gelngin nib thothup ngak e piin yad ma taga’ ko Thin rok. Ma re n’em e rayog ni nge pi’ ngodad fare gelngin ni “ir e ba th’abi gel” nra ayuwegdad ni ngad athamgilgad u fithik’ urngin mit e magawon ni ma yib ngodad.—2 Kor. 4:7-10.
13. Uw rogon ni ma ayuwegdad e ggan ni fan ko tirok Got ban’en ni ma pi’ “fare tapigpig nib yul’yul’ ma ba gonop” ni ngad athamgilgad u fithik’ e pi magawon ni ma yib ngodad?
13 Bochan ni be ayuweg Jehovah “fare tapigpig nib yul’yul’ ma ba gonop” ma be yag ni nge ngongliy boor e article, nge video, nge musik nrayog ni nge gelnag e michan’ rodad me ayuwegdad ni ngad pared ni gad ba chugur ngak. (Matt. 24:45) Ba t’uf ni ngad fanayed urngin ban’en ni yibe pi’ ngodad nib puluw ko ngiyal’ ney ni gad be par riy. Dawori n’uw nap’an ni ke yog reb e walag nib pin u Meriken nib ga’ fan u wan’ urngin e pi ggan ney ni yibe ngongliy ni fan ko tirok Got ban’en. I gaar: “Boor yay ni kan skengnag e yul’yul’ rog u lan 40 e duw ni kug pigpig ngak Jehovah.” Boor e skeng nib gel e mo’maw’ riy ni mada’nag ya yib be’ nib ching i pag e karrow ko karrow ko tutuw rok ni bay u langgin nge yim’, me m’ar e gallabthir rok ngar m’ow, ma l’agruw yay ni yib e cancer ngak. Mang e ayuweg ni nge athamgil? I gaar: “Kab kafram i yib ni ma ayuwegeg Jehovah. Ggan ni fan ko tirok ban’en ni ma pi’ fare tapigpig nib yul’yul’ mab gonop e ke ayuwegeg ni nggu athamgil. Bochan e re ney, ma rayog ni nggog fapi thin ni yog Job ni gaar: ‘Gu ra par ni gub yul’yul’ nge mada’ ko ngiyal’ ni ku gum’!’”—Job 27:5, NW.
Uw rogon ni ngad ayuweged yugu boch e girdi’ u lan e ulung? (Mu guy e paragraph 14)
14. Uw rogon ni ma fanay Jehovah e pi walag ni ngar ayuweged gadad u nap’an ni gad be mada’nag e magawon? (1 Thessalonika 4:9)
14 Ke skulnag Jehovah e girdi’ rok ni ngar t’ufeged yad me bagayad me fal’eg laniyan’ bagayad u nap’an nra yib e magawon. (2 Kor. 1:3, 4; mu beeg e 1 Thessalonika 4:9.) Pi walagdad e yad baadag ni ngar ayuweged gadad ni ngad pared ni gad ba yul’yul’ u nap’an ni gad ra mada’nag e magawon ni bod e n’en ni rin’ Elihu. (Acts 14:22) Am lemnag rogon ni pi’ e ulung rok Diane e athamgil nga laniyan’ mar ayuweged ni nge par nib gel ko tirok Got ban’en u tomuren ni yib ba mit e m’ar ngak e pumoon rok nib ubchiya’. I gaar: “Ba mo’maw’ e par romow u lan e pi pul nem, machane gguyew rogon ni ayuwegmow Jehovah u fithik’ e t’ufeg. Boor ban’en ni rin’ e ulung romow ni ngan ayuwegmow. Yima yib nga tabinaw romow ngan guymow, ma yima callnagmow, maku yima yib ni gumuchmuch ngomow. Pi n’ey e ayuwegmow ni nggu athamgilgow. Bochan nda gur ma yan u karrow, ma ma guy e pi walag rogon ni nggu un ko muulung nge machib ko ngiyal’ nrayog rog.” Ri gad ba felfelan’ ni gad bang u reb e tabinaw nib gel e t’ufeg riy!
NGE GA’ FAN U WAN’UM ROGON NI BE AYUWEGEM JEHOVAH
15. Mang fan nib mich u wan’dad nrayog ni ngad athamgilgad u fithik’ e pi magawon ni ma yib ngodad?
15 Gad gubin ni gad ra mada’nag e magawon. Machane kad filed ndariy ba mit e magawon ni gad ra yan u fithik’ ni yigoo gadad, ya gubin ngiyal’ ni be yaliydad Jehovah ni bod reb e matam ni ma t’ufeg pi fak. Bay u toobdad ni ke fal’eg rogon ni nge motoyil ngodad u nap’an ni gad ra ning e ayuw ngak, ma baadag ni nge ayuwegdad. (Isa. 43:2) Ba mich u wan’dad nrayog ni ngad athamgilgad u fithik’ e pi magawon ni ma yib ngodad ni bochan e ke pi’ urngin ban’en nib t’uf ni nge ayuwegdad. Rayog ni ngad meybilgad ngak, ma ke pi’ e Bible ngodad, ma boor e ggan ni fan ko tirok ban’en ni ke pi’, nge pi walagdad ni ngar ayuweged gadad u nap’an ni ke t’uf e ayuw rodad.
16. Uw rogon ni ngad pared u tan e ayuw rok Jehovah?
16 Ri gad ba felfelan’ ni bay e Chitamangidad u tharmiy ni ma yaliydad! “Ke felan’dad ni bochan.” (Ps. 33:21) Rayog ni ngad daged ngak Jehovah nib ga’ fan u wan’dad rogon ni be ayuwegdad ni aram e ngad maruwelgad nga urngin ban’en ni be pi’ ni nge ayuwegdad. Kub t’uf ni ngad rin’ed e n’en nib milfan ngodad ya nge yag nda pared u tan e ayuw rok. Re n’ey e be yip’ fan ni faan gad ra ulul ni ngad athamgilgad u rogon nrayog rodad ni ngad folgad rok Jehovah ma gad rin’ e tin nib m’agan’ ngay, ma ra ayuwegdad ndariy n’umngin nap’an!—1 Pet. 3:12.
TANG 30 Chitamag, Got Rog, nge Fager Rog
^ Ba t’uf ni nge ayuwegdad Jehovah ni ngad gelgad ko pi magawon ni gad ma mada’nag e ngiyal’ ney. Re article ney e be puguran ngodad ni ma yaliy Jehovah e girdi’ rok. Manang e magawon ni gad ma mada’nag ni be’ nge be’, ma ma pi’ e n’en nib t’uf rodad ya nge yag nda gelgad ko pi magawon nem.
^ Kan thilyeg fithingan boch e girdi’ u roy.