1. Mang boch ban’en nib manigil ni ke yag ni nge rin’ boor e fel’ yangaren?

 BOKUM biyu’ e Kristiano ni kab fel’ yangarrad ni yad ma un ko taufe u gubin e duw. Me gur, kam un ko taufe, fa? Faanra kam un, mab felfelan’ e pi walag ngom ko n’en kam rin’ maku arrogon Jehovah! (Prov. 27:11) Kum lemnag urngin ban’en nib manigil ni ke yag ni ngam rin’. Rayog ni ke yan in e duw ni ga ma fil e Bible u fithik’ e pasig, ma ke mich u wan’um ni Bible e aram e Thin rok Got. Machane gathi kemus aram ya kum nang e En Thin Rok e bay riy, ma kki t’uf rom. Ma bochan ni kari t’uf Jehovah rom, ma aram fan ni kam ognagem ngak kam un ko taufe. Rib manigil e n’en kam dugliy!

2. Mang e gad ra weliy ko re article ney?

 ² Dariy e maruwar riy nu m’on ni ngam un ko taufe, ma boor e magawon ni um mada’nag ni mo’maw’nag ngom ni ngam par ni gab yul’yul’ ngak Jehovah. Machane nap’an ni ga ra ilal boch, maku bay boch e skeng ni ga ra mada’nag. Ra guy Satan rogon ni nge warnag e t’ufeg rom ngak Jehovah, miki guy rogon ni ngam tal ndab kum pigpig ngak. (Efe. 4:14) Thingar dab mu pag e re n’ey ni nge buch. Ere mang e rayog ni nge ayuwegem ni ngam par ni gab yul’yul’ ngak Jehovah mag tay u gil’ e n’en nim micheg u nap’an nim ognag e yafos rom ngak? Thingar mu ulul i guy rogon ni ngam mang reb e Kristiano ni ke ilal ko tirok Got ban’en. (Heb. 6:1) Machane uw rogon nrayog ni ngam rin’ e re n’ey?

3. Mang e ba t’uf ni nge rin’ urngin e Kristiano u tomuren ni kar uned ko taufe?

³ Tomuren ni kad uned ko taufe, ma gad gubin nib t’uf ni ngad folgad ko fare fonow ni pi’ apostal Paul ngak e pi Kristiano u Efesus.  I pi’ e athamgil nga lanin’rad ni ngar manged boch e Kristiano ni kar ‘ilalgad i yan ke mus rogorad.’ (Efe. 4:13) Re n’ey e be yip’ fan nib t’uf ni ngar ‘ululgad ni ngar mon’oggad.’ Rayog ni ngad nanged fan e n’en ni yog Paul u nap’an ni taarebrogonnag rogon ni ma mon’og reb e Kristiano ko tirok Got ban’en nga rogon ni ma ilal reb e bitir. Reb e bitir ni ka fin ni gargeleg e rib t’uf ko gallabthir rok ma ri yow ba uf ngak. Machane dabiyog ni nge par fare tir ni aray rogon, ya ra munmun mab t’uf ni nge dabki “ngongol nrogon e bitir.” (1 Kor. 13:11) Ku arrogodad e piin Kristiano. Tomuren ni kad uned ko taufe, ma thingar kud ululgad ni ngad mon’oggad. Ere chiney e ngad weliyed boch ban’en nra ayuwegdad ni ngad rin’ed e re n’ey.

4. Mang fel’ngin e rayog ni nge ayuwegem ni ngam mon’og ko tirok Got ban’en? Mu tamilangnag. (Filippi 1:9)

⁴ Mu gelnag e t’ufeg rom ngak Jehovah. Yugu aram rogon nrib t’uf Jehovah rom, machane ku rayog ni nge gel boch e t’ufeg rom ngak. Ni uw rogon? I yog apostal Paul reb e kanawo’ nrayog ni ngam rin’ e re n’ey riy ko Filippi 1:9. (Mu beeg.) I meybil ni “ngi i gel feni t’uf Got nge girdi’” rok piyu Filippi. Ere ku arrogodad nrayog ni ngad rin’ed e re n’ey ni aram e ngad nanged e ‘bin riyul’ i fan e thin rok Got nge yog ni ngad nanged e tin nib mat’aw ko tin nde mat’aw.’ Ra yoor ban’en nda nanged u murung’agen Jehovah, ma aram e ra gel feni t’uf rodad me ga’ fan pi fel’ngin u wan’dad nge rogon ni ma rin’ boch ban’en. Ku gad ra adag ni ngad felfelan’naged maku gad ra dabuy ni ngad rin’ed ban’en nra kirebnag laniyan’. Ku gad ra athamgil u rogon nrayog rodad ni ngad nanged e n’en nib m’agan’ ngay nge rogon nrayog ni ngad rin’ed e pi n’em.

5-6. Uw rogon ni ngari gel feni t’uf Jehovah rodad? Mu tamilangnag.

⁵ Rayog ni ngari gel feni t’uf Jehovah rodad ni faan gad ra guy rogon ni ngad nanged Fak nib fel’ rogon ni bochan e ir e ri m’ug rarogon e Chitamangin rok nib fel’ rogon. (Heb. 1:3) Bin th’abi fel’ e kanawo’ nrayog ni ngad nanged Jesus riy e aram e ngad filed fa aningeg i Gospel. Faanra dawori mecham ngom ni ngaum beeg e Bible rom ni gubin e rran, ma mang ndab mu tabab e chiney? Nap’an ni ga be beeg murung’agen Jesus, mag tiyan’um ko pi fel’ngin ni i m’ug rok. Baadag e girdi’ ni yad ma chag ngak mar nonad ngak, ma ma kunuy e bitir ngak. (Mark 10:13-16) Ba gol mab sumunguy, ma der ma rus pi gachalpen ni ngar weliyed rogon lanin’rad ngak. (Matt. 16:22) Aray rogon ni i folwok Jesus rok e Chitamangin ni bay u tharmiy. Ku arrogon Jehovah nrib mom ni ngan non ngak. Rayog ni ngad meybilgad ngak ma gad weliy urngin ban’en ni bay u lanin’dad. Ba pagan’dad ngay ndabi puwan’ ngodad, ya gad ba t’uf rok ma ma lemnagdad.​—1 Pet. 5:7.

⁶ Ma runguy Jesus e girdi’. I yoloy apostal Matthew ni gaar: “Faani guy e pi girdi’ nem ni aram urngirad, me taganan’ ngorad, ya kar pired ni ke magafan’rad ndar nanged e n’en ni ngar rin’ed, ya yad bod e saf nde moy rorad e en ni ma gafaliyrad.” (Matt. 9:36) Me Jehovah e uw rogon e girdi’ u wan’? I gaar Jesus: “Ku er rogon e Chitamangimed nu tharmiy nde adag bagayad e nochi tir ney ni nge malog.” (Matt. 18:14) Re n’ey e ri be k’aring e felfelan’ ngodad! Ra yoor ban’en nda nanged u murung’agen Jesus, ma ra gel feni t’uf Jehovah rodad.

7. Faanra um chag ko pi Kristiano ni kar ilalgad ko tirok Got ban’en, ma uw rogon nra yib angin ngom?

⁷ Ku rayog ni ngam fil rogon ni nge gel boch e t’ufeg rom mag mang reb e Kristiano ni kam ilal ko tirok Got ban’en ni faanra mu guy rogon ni ngam nang boch e walag u lan e ulung ni kar ilalgad ko tirok Got ban’en. Mu guy rogon ni yad be par ni yad ba felfelan’. Darur kalgadngan’rad ni kar dugliyed ni ngar pigpiggad ngak Jehovah. Mog ngorad ni ngar weliyed ngom boch ban’en nib manigil ni ke buch rorad u nap’an ni yad be pigpig ngak Jehovah. Ra bay ban’en nib ga’ fan  ni ngam dugliy, mag ning e fonow ngorad. Ya bin riyul’ riy e, “faanra yoor e pi tafonow” ma ra fel’ rogon e tin yibe rin’.​—Prov. 11:14, BT.

8. Faanra be maruwar u wan’um e n’en be yog e Bible, ma mang e rayog ni ngam rin’?

⁸ Mu guy rogon ndab ki maruwar boch ban’en u wan’um. Kad weliyed ko  paragraph 2 ni ma guy Satan rogon ni nge talegem ndab mmon’og ko tirok Got ban’en. Reb e kanawo’ ni ma rin’ e re n’ey riy e aram e ma guy rogon ni nge maruwar boch e machib u Bible u wan’um. Bod nrayog ni nge guy boch e girdi’ rogon ni nge mich u wan’um fare machib ni be darifannag Got ni aram e ke sum e girdi’ ko gamanman. Nap’an ni ka gab bitir boch ma sana gathi ri ga ma lemnag e re n’ey, machane chiney ni kam ilal boch e sana yima fil u skul. Sana ba puluw u wan’um e n’en ma yog e sensey rom u murung’agen e re n’ey. Machane rayog ndariy ba ngiyal’ ni kar guyed rogon ni ngar nanged ko bay be’ ni Ke Sunmiydad fa dariy. Dab mu pagtalin fare kenggin e motochiyel ni bay ko Proverbs 18:17, (BT) ni be gaar: “Cha’ ni som’on nra non u tafen e puf oloboch e yira lemnag nib puluw e tin be yog, nge mada’ ko ngiyal’ ni ke tabab e en be togopuluw ngak i fith u boch ban’en.” Mu fal’eg i fil e tin riyul’ ni bay ko Thin rok Got ni aram e Bible, ko bin nge mich u wan’um urngin ban’en ni kam fil u skul. Mu gay murung’agen e re n’ey u lan e pi babyor rodad, mag non ngak boch e walag ni immoy nib mich e re machib ney u wan’rad kafram. Mu fith ngorad ko mang e micheg nga lanin’rad ni bay Be’ ni Ke Sunmiydad ni gad ba t’uf rok. Yira weliy murung’agen e pi n’ey, ma rayog ni nge ayuwegem ni ngam gay e mich riy ni bay Be’ ni Ke Sunmiydad.

9. Mang e ga be fil ko n’en ni buch rok Melissa?

⁹ Bay reb e walag nib pin ni ka nog Melissa ngak nri ayuweg e n’en ni pirieg u nap’an ni be gay murung’agen e tin kan sunmiy. * I gaar: “Yima weliy murung’agen fare machib ni ke sum e girdi’ ko gamanman u skul u reb e kanawo’ nib mom ni nge mich u wan’uy. Som’on e dabug ni nggu gay murung’agen e re n’ey ni bochan e gu be magar nrug pirieg nriyul’ ni ke sum e girdi’ ko gamanman. Machane gu wan gu nang ndabun Jehovah ni ngad pigpiggad ngak ni yugu aram rogon ni bay boch ban’en ndawori tamilang u wan’dad. Ere gu tabab ni nggu gay murung’agen e re n’ey. Gu beeg fare ke babyor ni Is There a Creator Who Cares About You? nge fa gal ke brochure ni Was Life Created? nge The Origin  of Life​—Five Questions Worth Asking. Ma ireray e n’en nib t’uf rog. Faan gomanga gu rin’ nib papey boch mab fel’.”

10-11. Mang e rayog ni nge ayuwegem ni ngam par nib beech e ngongol rom? (1 Thessalonika 4:3, 4)

¹⁰ Mu siyeg e ngongol nib kireb. Ra kab fel’ yangarem ma aram e ngiyal’ ni kab gel e ar’ar rom ko par ko pumoon nge ppin, ma rayog ni ngaun towasariyem ni ngam un ko ngongol ndarngal. Baadag Satan ni ngam pagem ko ar’ar rom. Ere mang e rayog ni nge ayuwegem ni ngam par nib beech e ngongol rom? (Mu beeg e 1 Thessalonika 4:3, 4. *) Mu weliy lanin’um ngak Jehovah u nap’an ni ga be meybil ngak, ma gog ngak ni nge pi’ gelngim. (Matt. 6:13) Dab mu pagtalin ni baadag Jehovah ni nge ayuwegem, ma gathi nge gechignagem. (Ps. 103:13, 14) Ku rayog ni nge ayuwegem e Thin rok Got. Melissa ni faan kan weliy murung’agen e i mo’maw’ ngak ni nge siyeg ndab ki lemnag boch e ngongol nib alit. I gaar: “Bible nug ma beeg ni gubin e rran e ke ayuwegeg ni nge dabi mulan’ug. Ma puguran ngog nib milfag ngak Jehovah ma gu baadag ni nggu pigpig ngak.”​—Ps. 119:9.

¹¹ Dab mu guy rogon ni ngam pithig e magawon rom ni yigoo gur. Mu weliy e magawon rom ngak e gallabthir rom. De mom ni ngan weliy murung’agen boch ban’en ni aray rogon, machane ban’en nib t’uf ni ngan rin’. I gaar Melissa: “Gu meybil ni ngan ayuwegeg ndab kug rus, ma aram mug wan gu weliy e magawon rog ngak e chitamag. Tomuren mug thamiy ni ke baud lanin’ug, ma kug nang nib felfelan’ Jehovah ko n’en kug rin’.”

12. Uw rogon ni ngam dugliy boch ban’en nib fel’ rogon?

¹² Mu pag e pi kenggin e motochiyel u Bible ni nge pow’iyem. Ra munmun ma ra puf rogom ni ngam dugliy boch ban’en ni ngam rin’. Machane ka boor ban’en ndawor mu nang. Ere uw rogon ni ngam siyeg ndab mu rin’ ban’en nra kirebnag e tha’ u thilmew Jehovah? (Prov. 22:3) Bay reb e walag nib pin ni ka nog Kari ngak ni weliy e n’en ni ayuweg ni nge mon’og u rogon ni nge dugliy boch ban’en. I nang ni pi Kristiano ni kar ilalgad ko tirok Got ban’en e de t’uf ni gubin ban’en ni ngar rin’ed ma bay e motochiyel riy. I gaar: “Ba t’uf ni nge tamilang e pi kenggin e motochiyel u Bible u wan’ug ko bin ni kemus ni nggu nang e motochiyel.” Nap’an ni ga be beeg e Bible, mag fithem ni nge lungum: ‘Mang e be fil e pi thin ney ngog u murung’agen rogon ni ma lem Jehovah? Bay e pi kenggin e motochiyel riy nrayog ni nge pow’iy rogon e ngongol rog, fa? Faanra bay, ma mang angin nra yib ngog ni faan gu ra fol riy?’ (Ps. 19:7; Isa. 48:17, 18) Ra um beeg e Bible ma ga be fal’eg i lemnag e pi kenggin e motochiyel riy, ma ra mom ni ngam dugliy boch ban’en nib m’agan’ Jehovah ngay. Nap’an ni ga be mon’og i yan, ma ga ra nang nde t’uf ni gubin ban’en ni ngam rin’ ma bay e motochiyel riy, ya ga ra nang rogon laniyan’ Jehovah u boch ban’en.

13. Faanra bay e fager rom nib manigil, ma uw rogon nrayog ni ngar ayuweged gur? (Proverbs 13:20)

¹³ Mmel’eg boch e fager nib t’uf Jehovah rorad. Kad weliyed faram ni piin ga ma mel’eg ni ngar manged fager rom e ra rin’ ban’en nga rogon e mon’og ni ga be tay ni gur reb e Kristiano. (Mu beeg e Proverbs 13:20.) Bay reb e walag nib pin ni ka nog Sara ngak ni immoy ba ngiyal’ ndaki yag ni nge felfelan’. Machane bay ban’en ni buch ni ayuweg ni nge thilyeg rogon e lem rok. I gaar: “Ba puluw e ngiyal’ nug pirieg boch e fager riy nib manigil. Bay reb e walag nib pin ni kab rugod ni gamow ma mada’ nga taabang ni gubin e wik ni nggu filew e Wulyang ko Damit romow. Ku bay reb e fager rog ni ayuwegeg ni nggu tabab i pi’ e fulweg u nap’an e muulung. Bochan e ayuw ni pi’ e pi fager rog ngog, ma  aram mug tabab ni nggu tiyan’ug ko fol Bible nug ma tay ni yigoo gag nge meybil. I tabab ni nge chugur e tha’ u thilmow Jehovah, me yag ni nggu pirieg bayay e felfelan’.”

14. Uw rogon ni yag boch e fager nib manigil ngak Julien?

¹⁴ Uw rogon ni ngam m’ag fager ko piin yad ra ayuwegem? Julien ni ir reb e piilal e chiney e yog ni gaar: “Nap’an ni ku gub pagel boch me yag boch e fager nib manigil ngog u nap’an ni ug un ko machib. Pi fager ney e yad ba pasig, mu kur ayuweged gag ni nggu nang gelngin e felfelan’ nrayog ni nggu tay ni faanra ug un ko machib. Ere gu tabab ni nggu nameg ni nggu un ko machib u polo’ e tayim rog. Maku reb e, kug nang nda i yag boch e fager nib manigil ngog kafram ni bochan e kemus ni yigoo pi taab yangar rog e gu ma chag ngorad. Boch nga tomuren miki yag boch e fager nib manigil ngog u Bethel. Ngongol rorad nib manigil e ayuwegeg ni nggu mel’eg boch ban’en nib fel’ ni nggu chuweg e chalban rog ngay, miki chugurnag boch e tha’ u thilmow Jehovah.”

15. Mang e ginang Paul Timothy riy u murung’agen e piin nga i chag ngorad? (2 Timothy 2:20-22)

¹⁵ Uw rogon ni faanra kam nang ni bay be’ u lan e ulung nde fel’ ni ngam chag ngak? Manang Paul ni bay boch e girdi’ u lan e ulung ni Kristiano ko bin som’on e chibog nda ur lemgad ara ur ngongolgad ni bod rogon e piin Kristiano, ere aram fan ni yog ngak Timothy ni nge palognag ir rorad. (Mu beeg e 2 Timothy 2:20-22.) Rib ga’ fan e tha’ u thildad Jehovah. Ere susun e dab da paged be’ ni nge kirebnag e tha’ u thildad e Chitamangidad ni bay u tharmiy nib gel e maruwel ni kad ted riy ya nge yag ni chugur.​—Ps. 26:4.

16. Mang boch ban’en nsusun e ngam nameg?

¹⁶ Mu nameg boch ban’en nra yib angin ngom. Mu nameg boch ban’en nra gelnag e michan’ rom me ayuwegem ni ngam mon’og ko tirok Got ban’en. (Efe. 3:16) Bod nrayog ni ngam dugliy ni ngam mon’og u rogon e fol Bible nge beeg Bible ni ga ma tay ni yigoo gur. (Ps. 1:2, 3) Fa reb e rayog ni ga be guy nib t’uf ni ngam mon’ognag rogon e meybil ni ga ma tay nge urngin yay ni ga ma meybil. Sana kub t’uf ni ngam kol ayuw ko pi n’en ga ma chuweg e chalban rom ngay, mu kum gagiyegnag rogon ni ga ma fanay e tayim rom. (Efe. 5:15, 16) Ra guy Jehovah gelngin e athamgil  ni ga be tay ya nge yag nim mon’og, ma ra felfelan’.

17. Mang angin nra yib ngom ni faan ga ra ayuweg yugu boch e girdi’?

¹⁷ Ga ra ayuweg yugu boch e girdi’, ma ga ra mang reb e Kristiano ni ke ilal ko tirok Got ban’en. I gaar Jesus: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Faan ga ra fanay e tayim rom nge gelngim ni ngam ayuweg yugu boch e girdi’, ma rib ga’ angin nra yib ngom. Bod nrayog ni ngam ayuweg e piin pilibthir nge piin nib m’ar u lan e ulung rom. Sana rayog ni ngam man mu fek e chuway’ rorad ara mu ayuwegrad u rogon ni ngar fanayed e cellphone ara tablet rorad. Faanra gur reb e walag ni pumoon, mag nameg ni ngam mang reb e ministerial servant ya nge yag nim ayuweg e pi walag. (Fil. 2:4) Ku ra m’ug nib t’uf e girdi’ u wuru’ e ulung rom ni faan ga ra weliy fare thin nib fel’ ngorad ni murung’agen Gil’ilungun Got. (Matt. 9:36, 37) Ma faanra rayog, mag nameg ni ngam pigpig ngak Jehovah u polo’ e tayim rom.

18. Faan ga ra un ko machib u polo’ e tayim rom, ma uw rogon nra ayuwegem ni ngam mon’og ko tirok Got ban’en?

¹⁸ Faan ga ra un ko machib u polo’ tayim rom, ma boor ban’en nra mab e kanawo’ riy ngom nrayog ni ngam rin’ nra ayuwegem ni ngam mon’og ko tirok Got ban’en. Faan ga ra un ko pioneer, ma rayog ni nge mab e kanawo’ ngom ni ngam un ko fare School for Kingdom Evangelizers. Ku rayog ni ngam un ko pigpig u Bethel ara dimow naun ni yima tay. Bay reb e walag nib pin ni kab rugod ni ma pioneer ni ka nog Kaitlyn ngak ni gaar: “Machib ni ug ted e pi walag ni kar ilalgad ko tirok Got ban’en e ayuwegeg ni nggu chugur ngak Jehovah u tomuren ni kug un ko taufe. Ngongol rorad nib manigil e k’aringeg ni nggu ga’nag e tamilangan’ rog ko thin nu Bible, mug guy rogon ni nggu mon’og u rogon nug ma fil ban’en ko girdi’.”

19. Mang boch e tow’ath nra yag ngom u nap’an ni ga ra mon’og i yan ko tirok Got ban’en?

¹⁹ Nap’an ni ga ra mon’og i yan ko tirok Got ban’en, ma boor e tow’ath nra yag ngom. Ga ra siyeg boch ban’en ni ma nameg e piin fel’ yangaren ndariy gam’engin. (1 John 2:17) Dabi amith lanin’um ni bochan e dam dugliy boch ban’en nib fel’ rogon. Ya urngin ban’en ni ga ra rin’ nra yan i aw nib fel’ rogon ma ga ra pirieg e bin riyul’ e felfelan’. (Prov. 16:3) Ngongol rom nib manigil e ra pi’ e athamgil nga laniyan’ urngin e walag. (1 Tim. 4:12) Ma bin th’abi ga’ fan riy e ra yag e gapas nge felfelan’ ngom ni ma yag ngak e piin yad ma rin’ e tin nib m’agan’ Jehovah ngay mab chugur e tha’ u thilrad.​—Prov. 23:15, 16.