1. Mang angin ni ma yib ngodad u nap’an ni gad ra weliy rogon nda nanged e “tin riyul’”?

 “UW ROGON nim nang e tin riyul’?” Dariy e maruwar riy ni boor yay ni kan fith e re deer ney ngom. Ireray reb e tin som’on e deer ni ma fith reb e walag ngodad u nap’an ni be guy rogon ni nge nang boch ban’en u murung’agdad. Ri gad baadag ni gad ma rung’ag rogon ni nang pi walagdad Jehovah me t’uf rorad, maku gad baadag ni gad ma weliy ngorad feni ga’ fan e tin riyul’ u wan’dad. (Rom. 1:11) Pi n’ey ni gad ma weliy u taabang e ma puguran ngodad feni ga’ fan e tin riyul’. Re n’ey e ku ma k’aringdad ni ngad dugliyed u wan’dad ni ngaud ‘folgad ko tin riyul’,’ ni aram e ngaud ngongolgad u reb e kanawo’ nra tow’athnagdad Jehovah riy ma gad fel’ u wan’.​—3 John 4.

2. Mang e gad ra weliy ko re article ney?

² Gad ra weliy ko re article ney boch i fan nib ga’ fan e tin riyul’ u wan’dad. Ngemu’ ma gad weliy rogon nrayog ni ngaud daged nib ga’ fan e re tow’ath ney u wan’dad. Dariy e maruwar riy ni n’en gad ra weliy e ra ayuwegdad ni ngari ga’ fan u wan’dad ni ke pow’iydad Jehovah ko tin riyul’. (John 6:44) Ku ra k’aringdad ni ngad adaged ni ngad weliyed e tin riyul’ ko girdi’.

3. Mang e bin th’abi ga’ i fan nib ga’ fan e tin riyul’ u wan’dad?

³ Boor fan nib ga’ fan e tin riyul’ u wan’dad. Bin th’abi ga’ i fan e bochan nib t’uf Jehovah Got rodad ni Ir e Ke Yib e tin riyul’ rok. Gathi kemus ni kad filed ko Thin rok ni aram e Bible ni Ir e Ke Sunmiy e tharmiy nge fayleng nib gel gelngin, ya  kud filed ni ir e Chitamangidad ni bay u tharmiy ni gad ba t’uf rok ma ri ma lemnagdad. (1 Pet. 5:7) Gad manang ni Got rodad e “ma runguy e girdi’ ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.” (Ex. 34:6) Baadag e tin nib mat’aw ban’en. (Isa. 61:8) Ma kireban’ u nap’an nra guy ni gad be gafgow, ma be sonnag e ngiyal’ nra chuweg urngin e gafgow. (Jer. 29:11) Rib manigil e re n’ey! Ireray reb i fan nrib t’uf Jehovah rodad!

4-5. Mang fan ni taarebrogonnag apostal Paul e pi n’en be l’agan’dad ngay ngab angkar?

⁴ Ku mang reb i fan nib ga’ fan e tin riyul’ u wan’dad? Ya boor angin ni ma yib ngodad. Am lemnag reb riy. Tin riyul’ u Bible e ba muun ngay e pi n’en be l’agan’dad ngay ni ka bay nga m’on. I weliy apostal Paul ba fanathin ni nge tamilangnag feni ga’ fan e re l’agan’ ney ni gaar: “Re l’agan’ nem e ke mang angkar rok lanin’dad, ya be par nib mudugil.” (Heb. 6:19) Pi n’en be l’agan’dad ngay ni bay u Bible e ma ayuwegdad ni ngad pared ni gad ba mudugil u nap’an ni kad mada’naged e magawon ni bod e angkar ni ma tay e bowoch nib dugil ndabi man’.

⁵ Be weliy Paul u roy murung’agen e athap ko pi Kristiano ni kan dugliyrad ni aram e nga ranod nga tharmiy ni ban’en nib ga’ fan u wan’rad. Machane thin ni yog e ku bay rogon ngak e pi Kristiano ni yad be athapeg e yafos ni manemus u paradis u fayleng. (John 3:16) Arrogon, bochan ni kad nanged murung’agen e athap rodad ko yafos ni manemus ma ke yib fan e yafos rodad.

6-7. Mang angin ni ke yib ngak Yvonne ni bochan e ke fil e tin riyul’ u murung’agen e n’en nra buch boch nga m’on?

⁶ Am lemnag e n’en ni buch rok reb e walag nib pin ni ka nog Yvonne ngak. Dan chuguliy ko tin riyul’, ma nap’an ni kab bitir ma ma rus ni nge yim’. I yib ngan’ ban’en ni beeg nder ma pagtalin ni be gaar: “Ra yan i borran ma dakuriy e gabul.” I gaar: “Pi thin ney e i k’aringeg ni nge da ku ug mol nnep’ nug be lemnag rarogog boch nga m’on. Ma lungug u wan’ug: ‘Ba mudugil ni gathi kemus chi rogon e yafos aray. Mang fan ni gu bay?’ Dabug ni nggum’!”

⁷ Boch nga tomuren u nap’an ni ke fel’ yangaren, mar mada’gad e Pi Mich Rok Jehovah. I gaar: “Aram e ngiyal’ ni tabab ni nge mich u wan’ug nrayog ni nge yag e athap ngog ko yafos ni manemus u Paradis u fayleng.” Mang angin ni ke yib ko re walag ney ni bochan e ke fil e tin riyul’? Ki ulul ngay ni gaar: “Chiney e dakugur ma od nnep’ nga i magafan’ug ko pi n’en nra buch rog boch nga m’on ara ug rus nri gum’.” Ba tamilang nrib ga’ fan e tin riyul’ u wan’ Yvonne, ma ri ma felfelan’ ngay ni nge weliy murung’agen e athap rok ko girdi’.​—1 Tim. 4:16.

8-9. (a) Uw feni ga’ fan u wan’ be’ nib moon ba machaf nib tolang puluwon ni pirieg ni weliy Jesus murung’agen u lan reb e fanathin rok? (b) Uw feni ga’ fan e tin riyul’ u wan’um?

⁸ Tin riyul’ u Bible e kub muun ngay fare thin nib fel’ ni murung’agen Gil’ilungun Got. I taarebrogonnag Jesus e tin riyul’ u murung’agen Gil’ilungun Got ngab machaf nib tolang puluwon ni kan mithag. I yog Jesus ko Matthew 13:44 ni gaar: “Gagiyeg nu tharmiy e bod ban’en nrib t’uf ma rib tolang puluwon nni k’eyag u daken bangi milay’ ni aram e kan mithag. Me pirieg be’ nib moon, mi ki tharey bayay. Me ri gel e felfelan’ ngak me yan nge pi’ ni chuway’ urngin ban’en ni ba’ rok, me sul nge chuw’iy fa gi milay’.” Mu tay fanam i yan riy ni fare moon e der gay e re machaf nem. Machane nap’an ni pirieg ma boor ban’en ni pag fan ya nge yag fare machaf ngak. Bin riyul’ riy e, yan i pi’ nchuway’ urngin ban’en ni bay rok. Mang fan? Ya manang feni tolang  puluwon e re machaf nem. Kab pag feni ga’ fan ko pi n’en ke pag fan.

⁹ Aray rogon e tin riyul’ u wan’um, fa? Ba mudugil ni arrogon! Gad manang ndariy ban’en nrayog ni nge ognag e re fayleng ney ngodad nra chugur ni nge taareb rogon ko felfelan’ ni bay rodad ko pigpig ni gad be tay ngak Jehovah e chiney, nge athap rodad ko yafos ni manemus u tan Gil’ilungun. Tha’ u thildad Jehovah nrib chugur e kab ga’ fan ko pi n’en kad paged fan. Ma n’en nri ma yibnag e felfelan’ ngodad e aram e ngad “rin’ed e tin nib m’agan’ ngay ni gubin ngiyal’.”​—Kol. 1:10.

10-11. Mang e k’aring Michael ni nge thilyeg boch ban’en u lan e yafos rok nib mo’maw’ ngak ni nge thilyeg?

¹⁰ Boor i gadad e ke pag fan boch ban’en nib mo’maw’ ni nge digey ya nge yag ni fel’ u wan’ Jehovah. Boch e girdi’ e kar digeyed boch e maruwel nib tolang nge boch ban’en ni yima rin’ ni ma yag e salpiy riy ni boor. Ma boch e girdi’ e kar talgad i nameg ni nge yoor e salpiy rorad. Ma boch e girdi’ e kar thilyeged e ngongol rorad u nap’an nra filed murung’agen Jehovah. Aram e n’en ni rin’ Michael. Dan chuguliy ko tin riyul’. Ere nap’an ni kab pagel min fil rogon e karate ngak. I gaar: “Rib ga’ fan u wan’ug ni ngaug par nib fel’ ga’ngig ma gub gel. Yu ngiyal’ e gu ma lemnag ndariy ban’en nrayog ni nge buch rog.” Machane nap’an ni tabab ni nge fil e Bible, me nang rogon e cham u wan’ Jehovah. (Prov. 6:16-19) I weliy Michael murung’agen e re wu’ i mabgol ni baaram nra filew e Bible ngak ni gaar, “Da rognew ngog ni nggu tal ndab kug un ko karate, ya kemus nra ululgow i fil e tin riyul’ u Bible ngog.”

¹¹ Nap’an ni yoor ban’en ni nang Michael u murung’agen Jehovah, ma aram mi ri gel feni t’uf rok. Rib fel’ u wan’ rogon ni ma runguy Jehovah e pi tapigpig rok. Munmun me nang ni bay ban’en nib t’uf ni nge dugliy nra thilyeg rogon e par rok. I gaar: “Gu manang nrib mo’maw’ ngog ni nggu tal ndab kug un ko karate. Machane ku gu manang nra felfelan’ Jehovah, mab mich u wan’ug ni pigpig nug ra tay ngak e kab ga’ fan ko pi n’en nug ra pag fan.” Ba ga’ fan u wan’ Michael e tin riyul’ ni ke pirieg, ma aram e n’en ni k’aring ni nge thilyeg boch ban’en u lan e yafos rok nib mo’maw’ ngak ni nge thilyeg.​—Jas. 1:25.

12-13. Uw rogon ni ayuweg Mayli e tin riyul’ u Bible?

¹² Ke taarebrogonnag e Bible e tin riyul’ ngab magal ni be gal’ bang nib lumor ni nge dag feni ga’ fan e tin riyul’. (Ps. 119:105; Efe. 5:8) Mayli ni be’ nu Azerbaijan e rib ga’ fan u wan’ e ayuw ni ke pi’ e Thin rok Got ngak. Gallabthir rok e ra bagayow ma barba’ e teliw ni ma un ngay. Chitamangin e ba Muslim ma chitiningin e ba Jew. I gaar: “Yugu aram rogon nib mich u wan’ug ni bay Got, machane boor e deer ni ug lemnag. Ma lungug u wan’ug, ‘Mang fan ni ke sunmiy Got e girdi’, ma mang fan ni nge gafgow be’ u n’umngin nap’an e yafos rok ma nga tomuren mu kun gafgownag u infierno ndariy n’umngin nap’an?’ Bochan ni ma yog e girdi’ ni gubin ban’en ni ma buch e aram e n’en nib m’agan’ Got ngay, ma aram mi i lungug u wan’ug, ‘Gur, Got e ma gagiyegnag urngin ban’en ni ma rin’ e girdi’ ma baadag ni nga i guyrad ni yad be gafgow, fa?’”

¹³ I ulul Mayli ni nge gay e fulweg ko pi deer rok. Munmun me m’agan’ ngay ni nge fil e Bible me yib ko tin riyul’. I gaar: “Pi n’en nib puluw nug fil u Bible e ayuwegeg ni nggu par ni gub felfelan’. Pi n’en nug pirieg u lan e Thin rok Got nib tamilang mab puluw u wan’ug e yibnag e gapas nga lanin’ug.” Gad gubin ni gad be n’uf Jehovah ‘ni ir e piningdad u fithik’ e lumor ngad bad nga fithik’ e tamilang rok nrib fel’’ ni bod ni rin’ Mayli.​—1 Pet. 2:9.

14. Uw rogon ni ngari ga’ fan e tin riyul’ u wan’dad? (Kum guy fare kahol ni “ Boch Ban’en Nrayog ni Ngkun Taarebrogonnag Ngay.”)

 ¹⁴ Kemus ni in ban’en e kad weliyed ni be tamilangnag feni ga’ fan e tin riyul’. Machane dariy e maruwar riy nrayog ni ngkum lemnag yugu boch ban’en. Ere mang ndab mu tay ba ngiyal’ ni fan ko fol Bible ni ga ma tay ni yigoo gur ni ngam gay yugu boch i fan nsusun e nge ga’ fan e tin riyul’ u wan’dad? Ra gel feni ga’ fan e tin riyul’ u wan’dad, ma aram e ra k’aringdad ni ngad gayed yugu boch e kanawo’ nrayog ni ngad daged riy feni ga’ fan u wan’dad.

15. Mang reb e kanawo’ nrayog ni ngad daged riy nib ga’ fan e tin riyul’ u wan’dad?

¹⁵ Faanra ud filed e Bible nge pi babyor rodad nib puluw e thin riy ko Bible, ma aram e rayog ni ngad daged nib ga’ fan e tin riyul’ u wan’dad. Bin riyul’ riy e demtrug n’umngin nap’an ni kad uned ko tin riyul’, ma gubin ngiyal’ ni bay boch ban’en nib t’uf ni ngad filed. Baaray e n’en ni yog e ken th’abi som’on e re ke babyor ney ni gaar: “Tin riyul’ e bod rogon bochi floras u map’an. Chi floras nem e rib mo’maw’ ni ngan guy ni bochan e ke ing e pan.  Faanra ga baadag ni nge yag e chi floras nem ngom, ma thingar mu gay nib fel’ rogon. . . . Ma nap’an ni ga ra pirieg, ma thingar mu lumel nga but’ ngam t’ar. Ere, dab mu lemnag nib gaman ni kemus ni ngam nang taab n’en u murung’agen e tin riyul’. . . . Ya bod rogon fare floras nnap’an ni ga ra pirieg taareb, mab mudugil ni ga ra adag ni ngkum gay yugu boch ni boor. Ere, ba t’uf ni ngam guy rogon ni nge yoor ban’en ni ngam nang.” De mom ni ngaud filed e Bible ya boor ban’en nib t’uf ni ngad rin’ed ni fan ngay, machane dabi yan i aw nib m’ay fan e athamgil ni kad ted.

16. Mang reb e kanawo’ ni ga ma fil e Bible rom riy ni kam guy ni be yib angin ngom? (Proverbs 2:4-6)

¹⁶ Gathi gad gubin ni gad baadag ni ngaud beeged e babyor ma gad be fil boch ban’en. Machane be pi’ Jehovah e athamgil nga lanin’dad ni ngaud ‘changarnaged’ e tin nib toar e machib ya nge yag ni ngari tamilang e tin riyul’ u wan’dad. (Mu beeg e Proverbs 2:4-6.) Gad ra athamgil ni ngad rin’ed e re n’ey, ma gubin ngiyal’ nra yib angin ngodad. Corey e yog nnap’an nra beeg e Bible rok, ma ma guy rogon ni nge fil reb e verse nge m’ay me yan nga reb. I weliy ni gaar: “Gu ma beeg gubin e footnote nge thin nu Bible ni bay rogon ko fare verse, ngemu’ mu kug gay boch ban’en u murung’agen. . . . Re n’ey e ma ayuwegeg ni nggu fil boor ban’en!” Demtrug rogon ni gad ma fil e Bible rodad, ma rayog ni nge m’ug nib ga’ fan e tin riyul’ u wan’dad ni faanra ud ted e tayim ni ngad filed ma gad be athamgil u rogon nrayog rodad ni ngaud rin’ed e re n’ey.​—Ps. 1:1-3.

17. Mang e be yip’ fan ni ngad folgad ko tin gad be fil? (James 1:25)

¹⁷ Machane gad manang nde gaman ni kemus ni ngad filed e tin riyul’. Ya ra nge yib angin e tin riyul’ ngodad, ma thingar da folgad ko tin gad be fil. Kemus rogon me yibnag e tin riyul’ e bin riyul’ e felfelan’ ngodad. (Mu beeg e James 1:25.) Ere uw rogon nrayog ni nge m’ug nriyul’ ni gad be fol ko tin riyul’ ni gad be fil? I yog reb e walag ni pumoon nib fel’ ni ngad yaliyed rarogodad ngad guyed e tin gad be fol riy nge tin gad be guy nib t’uf ni ngkud mon’oggad riy. I gaar apostal Paul: “Nga darod i yan nga m’on ni bod rogon fapi motochiyel ni ud folgad riy ke yan i mada’ ko chiney.”​—Fil. 3:16.

18. Mang fan ni gad ma athamgil u rogon nrayog rodad ni ngaud ‘folgad ko tin riyul’’?

¹⁸ Am lemnag angin nra yib ngodad ni faan gad ra athamgil u rogon nrayog rodad ni ngaud ‘folgad ko tin riyul’’! Gathi kemus nra mon’og rogon e par rodad, ya ku gad ra felfelan’nag Jehovah nge pi walagdad. (Prov. 27:11; 3 John 4) Ireray e tin th’abi fel’ i fan ni nge ga’ fan e tin riyul’ u wan’dad ma gad fol riy!