1. Mang fan ni ga baadag e girdi’ nib gum’an’?

 GAD gubin ni gad baadag e girdi’ nib gum’an’. Mang fan? Ya gad baadag e girdi’ nrayog ni nge sonnag ban’en ndabi kankanan’. Ku gad baadag ni ma gum’an’ e girdi’ u puluwdad u nap’an ni gad ra oloboch. Ku gad ba felfelan’ ngay ni i gum’an’ e en ni i fil e Bible ngodad u nap’an ni be mo’maw’ ni nge mit reb e machib u Bible ngodad, ara nge m’agan’dad ngay, ara da folgad riy. Ma bin th’abi ga’ fan riy e ri gad be felfelan’ ni be gum’an’ Jehovah Got u puluwdad!​—Rom. 2:4.

2. Mingiyal’ e rayog ni nge mo’maw’ ngodad ni ngaud gum’an’gad?

² Yugu aram rogon ni gad baadag ni nge gum’an’ yugu boch e girdi’ u puluwdad, machane gadad e gathi gubin ngiyal’ nib mom ni ngaud gum’an’gad. Bod nrayog ni nge mo’maw’ ni ngad gum’an’naged gadad u nap’an ni gad be gur ni nga darod nga bang ya kad sagaalgad, ma boor e karrow u kanawo’. Maku reb e rayog ni ngad damumuwgad nib gel u nap’an ni ke k’aring boch e girdi’ e kankanan’ ngodad. Ma yu ngiyal’ e rayog ni nge mo’maw’ ni ngad sonnaged e bin nib beech e fayleng ni ke micheg Jehovah. Ga baadag ni ngam mon’og boch u rogon e gum’an’ ni ga be tay, fa? Re article ney e gad ra weliy riy e n’en be yip’ fan ni ngaun gum’an’nagey nge feni ga’ fan e re n’ey. Ku gad ra weliy e n’en nrayog ni nge ayuwegdad ni ngad mon’oggad u rogon ni gad ma dag e re fel’ngin ney.

3. Faanra ba gum’an’ be’, ma mang e ma rin’ u nap’an nra rin’ be’ ban’en nra k’aring e damumuw ngak?

³ Am lemnag aningeg e kanawo’ nrayog ni ngaud gum’an’naged gadad riy. Bin som’on e, be’ nib gum’an’ e de papey e damumuw ngak. Nap’an nra rin’ be’ ban’en nra k’aring e damumuw ngak ara be mochuch, ma ma guy rogon ni nge par nib gapas ma dabi sulweg taban e kireb ni yibe rin’ ngak. Fare thin ni “gathi mmachreg ni ma yib e puwan’ ngak” e m’ug som’on u Bible u nap’an ni yibe weliy murung’agen Jehovah ni ir ba “Got nri ma runguy e girdi’  ma ma kireban’ ngorad, ni gathi mmachreg ni ma yib e puwan’ ngak, ma ma t’ufeg e girdi’ ma ma yul’yul’ ngorad.”​—Ex. 34:6.

4. Mang e ma rin’ be’ nib gum’an’ ni faanra ba t’uf ni nge son?

⁴ Bin migid e, be’ nib gum’an’ e rayog ni nge son. Be’ ni aray rogon e faanra ke pag nap’an ndawori buch e n’en be lemnag, ma ma guy rogon ndabi kankanan’. (Matt. 18:26, 27) Boor ban’en ni ma buch nib t’uf ni ngad songad riy. Bod nib t’uf ni ngad gum’an’naged gadad ngad motoyilgad u nap’an ni be non be’ ndab da th’abed e thin rok. (Job 36:2) Ku rayog nib t’uf ni ngad gum’an’naged gadad u nap’an ni gad be ayuweg be’ ni gad be fil e Bible ngak ni nge tamilang u wan’ reb e machib u Bible ara nge digey reb e ngongol nib kireb ni ke mecham ngay.

5. Ku mang reb e kanawo’ ni ngad gum’an’gad riy?

⁵ Bin dalip e, be’ nib gum’an’ e ma lem u m’on ni nge rin’ ban’en. Bin riyul’ riy e bay boch ban’en ni ma buch nib t’uf ni ngad rin’ed ban’en ngay ni ka chingiyal’ nem. Machane be’ nib gum’an’ e faanra bay ban’en nib ga’ fan ni nge rin’, ma der ma ab’ab ara gurnag ir nge mu’nag fare n’em. Ya ma tay ba ngiyal’ ni nge tanomnag e n’en nge rin’. Ngemu’ me fek e tayim rok nge rin’ fare n’em nib fel’ rogon.

6. Mang e ma rin’ be’ nib gum’an’ u nap’an ni be mada’nag e magawon?

⁶ Bin aningeg e, be’ nib gum’an’ e ma k’adan’ u fithik’ e magawon nder gun’gun’. Ireray reb e kanawo’ nib chugur fan e gum’an’ ko k’adan’. Riyul’ nde kireb ni ngad nonad ngak reb e fager rodad nib chugur thildad ngad weliyed ngak rogon lanin’dad ko n’en be buch rodad. Machane be’ nib gum’an’ e ra ulul ni nge k’adan’ u fithik’ e magawon rok ma be guy rogon ni nge par nib felfelan’. (Kol. 1:11, 12) Gadad e piin Kristiano e ba t’uf ni ngad gum’an’naged gadad u gubin e pi kanawo’ ney. Mang fan? Ngad weliyed in riy.

7. Mang nrib ga’ fan e gum’an’ nrogon nib puluw ko James 5:7, 8? (Kum guy e sasing.)

⁷ Faanra nge yag e yafos ni manemus ngodad,  mab t’uf ni ngad gum’an’naged gadad. Ba t’uf ni ngad gum’an’naged gadad ngad sonnaged Got ni nge lebguy e tin ke micheg ni bod e pi tapigpig rok nib yul’yul’. (Heb. 6:11, 12) Ke taareb rogonnagdad e Bible ngak be’ nib tamilay’. (Mu beeg e James 5:7, 8.) Be’ nib tamilay’ e ba gel e maruwel ni ma tay ni nge yung e woldug rok ma be rannag, machane de nang e ngiyal’ nra tugul. Ere ma gum’an’nag ir nge son ya ba pagan’ ngay nra t’ar wom’engin e woldug rok. Ere ku arrogodad ni gad ma fanay e tayim rodad ni ngad rin’ed boch ban’en ni fan ko tirok Got ban’en ni yugu aram rogon ‘ndad nanged e chirofen ni bay yib e Somol rodad riy.’ (Matt. 24:42) Gad ma gum’an’naged gadad ngad songad ya ba pagan’dad nra lebguy Jehovah gubin ban’en ni ke micheg ko ngiyal’ ni ke dugliy riy. Faanra dab da gum’an’naged gadad, ma rayog ni nge chalbadad ko son ma gad tabab ni ngad man’gad nga orel ko tin riyul’. Ku rayog ni ngad tababgad ni ngad nameged boch ban’en ni gad be lemnag nra yibnag e felfelan’ ngodad e chiney. Machane faanra gad ba gum’an’, ma aram e rayog ni ngad athamgilgad nge mada’ ko tomur me yag e yafos ngodad.​—Mik. 7:7; Matt. 24:13.

8. Faanra gad ba gum’an’, ma uw rogon nra ayuweg e tha’ u thildad yugu boch e girdi’? (Kolose 3:12, 13)

⁸ Faanra gad ba gum’an’ ma ra ayuweg e tha’ u thildad yugu boch e girdi’. Ma ayuwegdad ni ngad fal’eged e motoyil u nap’an ni be non yugu boch e girdi’. (Jas. 1:19) Gum’an’ e ku ma ayuwegdad ni nge gapas thildad yugu boch e girdi’. Ra ayuwegdad ndab da damumuwgad nib papey ma gad yog ban’en nra kirebnag laniyan’ be’ u nap’an ni gad be mochuch. Ma faanra gad ba gum’an’, ma dab da gurgad ngad damumuwgad u nap’an ni ke kirebnag be’ lanin’dad. Ku ra ‘bagadad mi i ayuweg bagadad ko meewar rok u fithik’ e runguy, mi i n’ag fan u wan’ e n’en ni manga ke kirebnag bagadad u laniyan’ bagadad,’ ko bin nge sulweg taban e kireb ni kan rin’ ngak.​—Mu beeg e Kolose 3:12, 13.

9. Faanra gad ba gum’an’, ma uw rogon nra ayuwegdad u nap’an nra t’uf ni ngad dugliyed boch ban’en? (Proverbs 21:5)

⁹ Gum’an’ e ku rayog ni nge ayuwegdad ni ngad dugliyed boch ban’en nib fel’ rogon. Ra ayuwegdad ni ngad ted e tayim ni ngad fal’eged i gay murung’agen e pi n’en nrayog ni ngad mel’eged ma gad dugliy e bin th’abi fel’ riy ko bin ngad ab’abgad. (Mu beeg e Proverbs 21:5.) Bod ni faanra gad be magow maruwel, ma sana gad ra adag ni ngad uned ko bin som’on e maruwel ni kad pirieged ni yugu aram rogon nra magawonnag e liyor rodad ngak Jehovah. Machane faanra gad ba gum’an’, ma gad ra tay e tayim ni ngad fal’eged i lemnag boch ban’en ni bod e gin bay fare maruwel riy, nge urngin e awa ni ngad maruwelgad riy, nge n’en nra rin’ fare maruwel ko tabinaw rodad nge tha’ u thildad Jehovah. Faanra gad ba gum’an’, ma dab da dugliyed ban’en nra yib wenegan ngodad.

10. Uw rogon ni nge yag e gum’an’ ngak reb e Kristiano mi i dag e re fel’ngin ney?

¹⁰ Um yibilay ni ngan pi’ e gum’an’ ngom. Gum’an’ e bang u wom’engin gelngin Got nib thothup. (Gal. 5:22, 23) Ere rayog ni ngad yibilayed gelngin Jehovah nib thothup ma gad yog ngak ni nge ayuwegdad ni ngad maruweliyed e re fel’ngin ney. Faanra gad be mada’nag reb e magawon ni be skengnag e gum’an’ rodad, ma rayog ni ngad ululgad ni ngad “ninged” gelngin Got nib thothup ni nge ayuwegdad ni ngad gum’an’gad. (Luke 11:9, 13) Ku rayog ni nga dogned ngak Jehovah ni nge ayuwegdad ni ngad lemnaged boch ban’en ni bod rogon ni ma lemnag. Ma tomuren ni kad meybilgad, mab t’uf ni ngad athamgilgad u rogon nrayog rodad ni ngad gum’an’gad ni gubin e rran. Faanra ud yibilayed ni ngan pi’ e gum’an’ ngodad maku gad be gay rogon ni ngaud gum’an’gad, ma aram e ra yag e re fel’ngin ney ngodad me mang bang u rarogodad.

11-12. Uw rogon ni be gum’an’nag Jehovah ir?

 ¹¹ Mu fal’eg i lemnag murung’agen boch e girdi’ ni bay u Bible. Boor e girdi’ ni bay murung’agrad u Bible ni yad ba gum’an’. Faan gad ra fal’eg i lemnag murung’agrad, ma aram e gad ra nang boch e kanawo’ nrayog ni ngad daged e gum’an’ riy. U m’on ni ngad weliyed murung’agen boch i yad, ma ngad weliyed murung’agen e en ke dag e bin th’abi fel’ e kanawo’ nrayog ni ngad folwokgad riy u rogon ni ngad gum’an’gad ni aram Jehovah.

¹² I t’ar Satan e thin nga daken Jehovah u lan fare milay’ nu Eden, me guy rogon ni nge k’aring Efa ni nge lemnag ni ir reb e Pilung nib laniyan’ ma der ma dag e t’ufeg. I gum’an’nag Jehovah ir me t’ar laniyan’ ko bin nge thang Satan ni ka chingiyal’ nem, ya manang nib t’uf ba ngiyal’ ni nge micheg riy ni gagiyeg rok e aram e bin th’abi fel’. Ma nap’an ni be son, maku be k’adan’ ni yugu aram rogon ni yibe darifannag fithingan. Maku reb e, ke n’uw nap’an ni be gum’an’nag Jehovah ir be son ya nge yag ni yoor e girdi’ ni mab e kanawo’ ngorad ni nge yag e yafos ni manemus ngorad. (2 Pet. 3:9, 15) Ere angin ni ke yib riy e bokum milyon e girdi’ ni ke yag ni ngar nanged murung’agen. Faan gad ra lemnag angin e gum’an’ ni be tay Jehovah, ma dabisiy nra mom ngodad ni ngad sonnaged e ngiyal’ ni ke dugliy ni nge yib e tomur.

13. Uw rogon ni ke folwok Jesus ko gum’an’ ni ma dag e Chitamangin? (Kum guy e sasing.)

¹³ Rib fel’ rogon ni i folwok Jesus ko gum’an’ ni ma dag e Chitamangin, miki dag e re fel’ngin ney u nap’an ni immoy u fayleng. Gathi gubin ngiyal’ nib mom ni nga i gum’an’nag ir, nib ga’ ni pi tamachib ko motochiyel nge pi Farise e ba mo’maw’ ni nge gum’an’ u puluwrad. (John 8:25-27) Machane Jesus e bod e Chitamangin nde papey e damumuw ngak. Nap’an ni unog e thin nib kireb ngak ara yibe guy rogon ni ngan k’aring e  damumuw ngak, ma de guy rogon ni nge sulweg taban. (1 Pet. 2:23) I k’adan’ u fithik’ e magawon rok nder gun’gun’. Aram fan ni be yog e Bible ngodad ni ngad “tafinayniged gelngin e gafgow ni tay, nge rogon ni k’adan’, nge gelngin e fanenikan ni tay e piin ntadenen ngak!” (Heb. 12:2, 3) Ere ku arrogodad nrayog ni nge ayuwegdad Jehovah ni ngad k’adedan’dad u fithik’ urngin mit e magawon nra yib ngodad.

14. Mang e rayog ni ngad filed ko gum’an’ ni i tay Abraham? (Hebrews 6:15) (Kum guy e sasing.)

¹⁴ Machane uw rogon ni faanra dawori yib e tomur ni bod rogon ni gad be lemnag? Sana rayog ni ke n’uw nap’an ni kad lemnaged ni bayi yib e tomur. Ma sana gad be magar nri de yib u nap’an ni ka gad ba fos. Ere mang e rayog ni nge ayuwegdad ni ngaud gum’an’naged gadad ngaud songad? Am lemnag e n’en ni buch rok Abraham. Nap’an ni ke gaman 75 e duw rok ma dawori fakay e bitir, ma aram me micheg Jehovah ngak ni gaar: “Bay gu gagiyeg nge yib owchem ni pire’ ni pire’, ni yad e bay ra manged girdien ba nam ni pire’ girdien.” (Gen. 12:1-4) Gur, i yag ni nge guy Abraham ni ke lebug e re n’ey nni micheg ngak, fa? Gathi gubin yang riy ni guy ni ke lebug. Tomuren ni th’ab fare Lul’ ni Eufrates nga barba’ me son u lan 25 e duw ma aram me guy Isak ni fak ni kan gargeleg, ma 60 e duw nga tomuren mu kun gargeleg Esau nge Jakob ni tungin. (Mu beeg e Hebrews 6:15.) Machane de guy e piin owchen nra yoorgad mar tafnayed fare Nam ni Kan Micheg. Yugu aram rogon ma re pumoon ney ni ir be’ nib yul’yul’ e ba chugur e tha’ u thilrow e En ni Sunmiy. (Jas. 2:23) Nap’an ni yira faseg Abraham ko yam’ ma rra felfelan’ u nap’an nra nang ni urngin e nam ni kan tow’athnagrad ni bochan e michan’ rok nge gum’an’ ni tay! (Gen. 22:18) Ere mang e gad be fil riy? Sana dab da guyed urngin ban’en ni ke micheg Jehovah ni ke lebug e chiney. Machane faanra da gum’an’naged  gadad ni bod Abraham, ma aram e rayog ni nge pagan’dad ngay nra tow’athnagdad Jehovah e chiney maku boor e tow’ath nra pi’ ngodad u lan e bin nib beech e fayleng rok ni ke micheg.​—Mark 10:29, 30.

15. Mang e rayog ni ngad filed u nap’an e fol Bible ni gad ma tay ni yigoo gadad?

¹⁵ Ku boor e girdi’ ni bay murung’agrad u Bible ni yad ba gum’an’. (Jas. 5:10) Ere mang ndab mu tay ba ngiyal’ ni ngam fil murung’agrad u nap’an e fol Bible ni ga ma tay ni yigoo gur? b Bod ni yugu aram rogon ni kab bitir David min mel’eg ni nge mang pilung u Israel, machane boor e duw nthingari son riy u m’on ni nga fini mang pilung. Simeon nge Anna e ur pigpiggow ngak Jehovah u fithik’ e yul’yul’ u nap’an ni yow be sonnag fare Messiah ni kan micheg. (Luke 2:25, 36-38) Nap’an ni ga be fil murung’agen e pi cha’ney, mag gay e fulweg ko pi deer ni baaray ni be gaar: Mang e rayog ni ayuweg e cha’ney ni nge gum’an’nag ir? Mang angin ni yib ngak ni bochan e i gum’an’nag ir? Uw rogon nrayog ni nggu folwok rok? Ga ra fil murung’agen e piin nda ur gum’an’naged yad ma sana ku ra yib angin ngom. (1 Sam. 13:8-14) Rayog ni ngam fithem ni nge lungum: ‘Mang e k’aringrad ni nge dab kur gum’an’gad? Ma mang wenegan ni yib ngorad?’

16. Mang boch i angin nra yib ngodad ni faanra ud gum’an’naged gadad?

¹⁶ Mu lemnag angin nra yib riy ni faanra un gum’an’nagey. Faanra gad ba gum’an’, ma aram e gad ra felfelan’ mu kud pared ni gad ba gapas. Gum’an’ e rayog ni nge yib angin nga lanin’dad nge fithik’ i dowdad. Faanra ud gum’an’naged gadad u puluwon yugu boch e girdi’, ma aram e ra fel’ boch e tha’ u thildad. Ku ra gel boch e taareban’ u lan e ulung rodad. Faanra k’aring be’ e damumuw ngodad, ma rayog ni nge dab da gelnaged e ubchiya’ ko magawon ni ke sum ni bochan e de papey e damumuw ngodad. (Ps. 37:8; Prov. 14:29) Machane bin th’abi fel’ riy e faanra gad ba gum’an’, ma aram e gad be folwok rok e Chitamangidad ni bay u tharmiy ma be gel e chugur ko tha’ u thildad.

17. Mang e susun ni ngad dugliyed u wan’dad ni ngad rin’ed?

¹⁷ Riyul’ ni gum’an’ e reb e fel’ngin nrib manigil ma ra yib angin ngodad ni gad gubin! Yugu aram rogon ni gathi gubin ngiyal’ nib mom ni ngaud gum’an’gad, machane rayog ni ngad ululgad i maruweliy e re fel’ngin ney u daken e ayuw rok Jehovah. Ma nap’an ni gad be gum’an’naged gadad gad be sonnag e bin nib beech e fayleng, ma rayog ni nge pagan’dad ngay ni Jehovah e “ma yaliy e piin bay madgun u wan’rad, ni piin ke pagan’rad ko [“yad be sonnag e,” NW] t’ufeg rok ni dabi mus.” (Ps. 33:18, BT) Ere ngad dugliyed u wan’dad ni gad gubin ni ngaud gum’an’gad.