1-2. (a) Uw rogon u wan’ Jehovah e piin yad be rin’ reb e denen nib ubchiya’ ma darur kalgadngan’rad? (b) Mang e be athapeg Jehovah ni nge rin’ e piin kar denengad?

 GATHI gubin mit e ngongol nib m’agan’ Jehovah ngay, mab fanenikan e denen. (Ps. 5:​4-6) Baadag ni ngad folgad ko pi motochiyel rok ni bay u Bible. Machane der lemnag ni nge rin’ e girdi’ ndawor ra flontgad gubin ban’en nib fel’ rogon ndab kur olobochgad. (Ps. 130:​3, 4) Yugu aram rogon ma de fel’ u wan’ e piin “kar pingeged e thin rok Got nga bayang, ni murung’agen e runguy rok, ya nge yib e tawey rorad ko ngongolen e darngal ni yad be rin’.” (Jude 4) Be yog e Bible ni yira thang e “girdi’ nib kireb” u nap’an e mahl rok Got ni Armageddon.​—2 Pet. 3:7; Rev. 16:16.

² Machane dabun Jehovah ni ngan thang be’. Kad filed faram ni be tamilangnag e Bible ni “ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Pet. 3:9) Ere ma folwok e piin piilal rok u nap’an ni yad be gum’an’naged yad ni ngar ayuweged e piin kar denengad ni ngar thilyeged e ngongol rorad, mu kur fel’gad u wan’ Jehovah bayay. Machane gathi gubin e piin kar denengad ni ma kalngan’rad. (Isa. 6:9) Bay boch i yad ni ma ulul ni nge rin’ e ngongol nib kireb ni be rin’ ni yugu aram rogon ni boor yay ni ke guy e piin piilal rogon ni ngan ayuweg ni nge kalngan’. Ere mang e yira rin’ ngak be’ ni aray rogon?

 “MU CHUWEGED E EN NIB KIREB NGONGOLEN”

3. (a) Mang e be yog e Bible nsusun e ngan rin’ ngak e piin yad be denen ndarur kalgadngan’rad? (b) Faanra dabun be’ ni nge kalngan’, ma mang fan nrayog ni nga dogned ni ir e ke mel’eg ni ngan tharbog ko ulung?

³ Faanra bay be’ ni be rin’ reb e denen nder kalngan’, ma thingari fol e piin piilal ko fare fonow ni bay ko 1 Korinth 5:13 ni be gaar: “Mu chuweged e en nib kireb ngongolen u lan e ulung romed.” Bin riyul’ riy e ir e ke mel’eg ni nge buch e re n’ey rok; be t’ar wom’engin e n’en ke yung. (Gal. 6:7) Mang fan nrayog ni nga dogned e re n’ey? Ya yugu aram rogon ni boor yay ni ke guy e piin piilal rogon ni ngar ayuweged ni nge kalngan’, machane dabun ni nge thilyeg e ngongol rok. (2 Ki. 17:​12-15) Ere be m’ug ko ngongol rok ni ke mel’eg ndabi fol ko pi motochiyel rok Jehovah.​—Deut. 30:​19, 20.

4. Nap’an ni yira tharbog be’ ko ulung nder kalngan’, ma mang fan ni yima yog ko ulung ni ngar nanged?

⁴ Nap’an ni yira tharbog be’ ko ulung nder kalngan’, ma aram e yira yog ko ulung ni ngar nanged ni facha’ e gathi ka ir reb e Pi Mich Rok Jehovah. Re thin ney ni nga nog e gathi bochan e nge k’aring e tamra’ ngak facha’. Ya fan ni ka nog e bochan ni nge fol e ulung ko fare thin ni kan tay chilen ni aram e ‘dab kun chag’ ngak facha’ ni mus ni ngan ‘un ngak ko abich ma dab kun rin’.’ (1 Kor. 5:​9-11) Bay fan e re thin ney ni ka nog. I yoloy apostal Paul ni gaar: “Ri buchuuw e is me thownag ba flowa ni polo’.” (1 Kor. 5:6) Ere faanra dabin tharbog e piin yad be denen ndarur kalgadngan’rad, ma rayog ni nge lemnag yugu boch e girdi’ u lan e ulung nde t’uf ni ngar folgad ko pi motochiyel rok Jehovah.​—Prov. 13:20; 1 Kor. 15:33.

5. Susun e nge uw rogon u wan’dad be’ ni kan tharbog ko ulung, ma mang fan?

⁵ Ere susun e nge uw rogon u wan’dad reb e walag ni kan tharbog ko ulung? Yugu aram rogon ndarud chaggad ngak, machane susun e dab da lemnaged ndakuriy e athap rok ya ngaud ted ni bod ba saf ni ke malog. Ba saf ni ke malog e rayog ni ngki sul bayay. Dab mu pagtalin ni facha’ e ke ognag ir ngak Jehovah. Machane dakir tay u gil’ e n’en ni micheg u nap’an ni ognag ir, ere bay u bang e chiney nib tayoyowol. (Ezek. 18:31) Machane chiney ni ka bay e tayim riy ma kab m’agan’ Jehovah ngay ni nge dag e runguy ngak e gad be athapeg ni nge sul. Ere uw rogon nrayog ni nge ayuweg e piin piilal be’ ni kan tharbog ko ulung?

ROGON NI MA AYUWEG E PIIN PIILAL E PIIN KAN THARBOGRAD

6. Mang boch ban’en nra rin’ e piin piilal ni ngar ayuweged be’ ni kan tharbog ko ulung?

⁶ Ere gur, faen kan tharbog e aram e kan pag ndab kun ayuweg ni nge sul ngak Jehovah? Danga’! Nap’an nra yog e piin piilal ngak ni aram e ngan tharbog ko ulung, ma yad ra weliy ngak boch ban’en nrayog ni nge rin’ ya nge yag ni ngki sul ko ulung bayay. Machane gathi kemus e n’en nra rin’ e piin piilal. Ya yad ra yog ngak ni yad baadag ni ngar mada’gad bayay u tomuren in e pul ya ngar nanged ko ke thil e lem rok fa dawor. Faanra m’agan’ facha’ ngay ni ngkur mada’gad bayay, ma nap’an ni yad ra mada’ ma ra pi’ e piin piilal e athamgil nga laniyan’ ni nge kalngan’ miki sul bayay. Mus ni faanra dawori thilyeg e lem rok u nap’an ni kar mada’gad, ma ka ra guy e piin piilal rogon ni ngar mada’gad bayay boch nga tomuren ni ngkur pied e athamgil nga laniyan’ ni nge kalngan’.

7. Nap’an ni yira tharbog be’ ko ulung, ma uw rogon nrayog ni nge folwok e piin piilal u rogon ni ma dag Jehovah e runguy? (Jeremiah 3:12)

⁷ Ma guy e piin piilal rogon ni ngar folwokgad rok Jehovah ni ma runguy e piin kan tharbograd ko ulung. Bod nde sonnag e girdi’ rok u Israel kakrom nda kur folgad rok ni ngar kalgadngan’rad mfini ayuwegrad. Ya ir e som’on ni rin’ ban’en ni nge ayuwegrad u m’on ni ngar  daged ni kar kalgadngan’rad. Kad weliyed ko bin l’agruw e article u lan e re ke babyor ney ni dag Jehovah rogon e runguy rok ngorad ni aram e yog ngak Hosea ni profet ni nge n’ag fan e denen ni be rin’ leengin, me sulweg ni yugu aram rogon ni ka be rin’ e kireb. (Hos. 3:1; Mal. 3:7) Ku arrogon e piin piilal u lan e ulung ni yad ma folwok rok Jehovah, ma riyul’ ni yad baadag ni nge sul faen ke denen ko ulung, maku darur mo’maw’naged ngak ni nge rin’ e re n’ey.​—Mu beeg e Jeremiah 3:12.

8. Uw rogon ni be ayuwegdad fare fanathin rok Jesus ni murung’agen fare pagel ni malog ni ngki tamilang boch u wan’dad rogon e runguy ni ma dag Jehovah? (Luke 15:7)

⁸ Am lemnag fare fanathin rok Jesus ni murung’agen fare pagel ni malog ni faan kad weliyed ko bin l’agruw e article. Nap’an ni guy fare matam fak ni be sul i yib nga tabinaw, me yan ni be “mil, me yan i gumuchmuch ngak e chi cha’nem ni fak, nge faray owchen.” (Luke 15:20) Mu tay fanam i yan riy nde son fare matam ni nge wenig fak ngak ni nge n’ag fan e kireb rok. Ya ir e mil i yan ngak fak ni bochan e ba t’uf rok. Ku aram rogon ni ma lemnag e piin piilal e piin kar maloggad. Yad baadag ni piin kar digeyed Jehovah e ngar sulod ngak. (Luke 15:​22-24, 32) Nap’an nra sul reb e tadenen, mab gel e felfelan’ ni yima tay u tharmiy ngu fayleng!​—Mu beeg e Luke 15:7.

9. Mang e baadag Jehovah ni nge rin’ e piin yad be denen?

⁹ Ba tamilang ko n’en kad filed nder ma pag Jehovah e piin yad be denen ndarur kalgadngan’rad ni ngar pared u lan e ulung. Machane dabi pi’ keru’ ngorad, ya baadag ni ngar sulod ngak. Kan tamilangnag rogon ni ma lemnag Jehovah e piin yad be denen ni kar kalgadngan’rad ko Hosea 14:4 ni be gaar: “Bay gu fulweg e girdi’ rog ngog. Ma bay ra pired nri yad ba t’uf rog, ya dakugur damumuw ngorad.” Bochan ni manang e piin piilal rogon laniyan’ Jehovah ko re n’ey, ma aram fan ni yad ma guy rogon ni ngar nanged boch ban’en ni ke thil u rarogon facha’ ni be m’ug riy ni aram e ke tabab ni nge kalngan’. Ku be micheg e pi thin ney ngak e piin kar digeyed Jehovah ni ka yad ba t’uf rok, ma baadag ni ngar sulod ngak.

10-11. Uw rogon nra guy e piin piilal rogon ni ngar ayuweged e piin kan tharbograd ko ulung kafram?

¹⁰ Machane uw rogon e piin nsana ke yan boor e duw ni kan tharbograd ko ulung? Pi girdi’ ney e sana rayog ni kar talgad i rin’ e denen ni ir e k’aring ni ngan tharbograd ko ulung. Sana bay boch i yad ndaki nang fan nni tharbog ko ulung. Demtrug rogon, ma ra guy e piin piilal rogon ni ngar gayed e pi girdi’ ney ma u ranod ra guyed yad. Nap’an ni yad ra yan ra guyed yad, ma yad ra yog ngorad ni ngar meybilgad u taabang mar pied e athamgil nga lanin’rad ni ngar sulod ko ulung. Riyul’ ni faanra ke yoor e duw ni kan tharbog be’ ko ulung, ma dariy e maruwar riy nra t’uf ni ngki nang Jehovah nge tin riyul’ u Bible bayay. Ere faanra ke yog facha’ ni baadag ni nge sul, ma aram e rayog ni nge yarmiy e piin piilal ni nge yan be’ i guy ni ngar filew e Bible u taabang ni yugu aram rogon ndawor ni sulweg ko ulung. Machane piin piilal e yad e ngar yarmiyed rogon ni ngan tay fare fol Bible.

¹¹ Ma guy e piin piilal rogon ni ngar folwokgad rok Jehovah ni ma runguy e girdi’. Ere yad ra guy rogon ni ngar gayed urngin e piin kar digeyed Jehovah mar pied e athamgil nga lanin’rad ni ngar sulod ngak. Nap’an nra dag be’ ni ke kalngan’ me digey e ngongol nib kireb ni be rin’, ma aram e rayog ni ngan sulweg ko ulung.​—2 Kor. 2:​6-8.

12. (a) Mingiyal’ e ba t’uf ni ngari kol ayuw e piin piilal? (b) Mang fan nsusun e dab da lemnaged ni bay boch e girdi’ ni kar rin’ed boch e denen ndabiyog ni nge runguyrad Jehovah? (Kum guy e footnote.)

¹² Bay yu ngiyal’ nib t’uf ni ngari kol ayuw e piin piilal u m’on ni ngar sulweged be’ ko ulung.  Bod ni faanra facha’ e ir be’ ni ke kol reb e bitir u gelngin, ara ir bagayad e piin ke digey e tin riyul’ ma ke chel ke togopuluw ngay, ara ke yan u thaan e mabgol rok ni nge dar, ma aram e rib t’uf ni nge guy e piin piilal e mich riy nriyul’ ni ke kal facha’ ngan’. (Mal. 2:14; 2 Tim. 3:6) Thingari ayuweg e piin piilal e pi walag u lan e ulung ndabi buch ban’en rorad. Machane kub t’uf ni ngad nanged ni piin nriyul’ ni kar kalgadngan’rad ma kar talgad i rin’ e ngongol nib kireb ni yad be rin’ e ra pagrad Jehovah ni ngar sulod ngak. Ere yugu aram rogon ni baadag e piin piilal ni nge m’ug riy nriyul’ ni ke kalngan’ be’ ni ke bannag yugu boch e girdi’, machane  susun e ku dab ra lemnaged ndabiyog ni nge runguy Jehovah be’ ni aray rogon. a​—1 Pet. 2:10.

N’EN NRAYOG NI NGE RIN’ E ULUNG

13. Mang e ba thil u rogon e ngongol ni gad ma dag ngak be’ ni ke ginang e piin piilal nge be’ ni kan tharbog ko ulung?

¹³ Kad weliyed ko fa binem e article ni bay yu ngiyal’ ni yira yog ko ulung ni kan ginang be’. Machane ka rayog ni ngad chaggad ngak ni bochan e gad manang ni ke kalngan’ ma ke thilyeg e ngongol rok. (1 Tim. 5:20) Ka ir bang ko ulung mab t’uf ni nge pi’ e pi walag e athamgil nga laniyan’. (Heb. 10:​24, 25) Machane ba thil e re n’ey ngak be’ ni kan tharbog ko ulung. Ya be’ ni aram rogon e ‘dab kun chag’ ngak ni mus ni ngan ‘un ngak ko abich ma dab kun rin’.’​—1 Kor. 5:11.

14. Uw rogon nrayog ni nge fanay e piin Kristiano e nangan’ rorad ni kan skulnag ko thin nu Bible ni ngar dugliyed rogon e ngongol ni ngar daged ngak be’ ni kan tharbog ko ulung? (Kum guy e sasing.)

¹⁴ Ere gur, re n’ey e ri be yip’ fan ni aram e ri dab kud nonad ngak be’ ni kan tharbog ko ulung? Danga’. Riyul’ ndab kud chaggad ngak. Machane rayog ni nge fanay e piin Kristiano e nangan’ rorad ni kan skulnag ko thin nu Bible ni ngar dugliyed ko ngar pininged be’ ni kan tharbog ko ulung ni ir reb e girdi’ rorad ara be’ ni immoy ni fager rorad nib pach e thin rorad ni nge un nga reb e muulung fa danga’. Ere uw rogon ni faanra ke un ko muulung? Kafram e dab da nonad ngak. Machane ku ra reb e Kristiano mab t’uf ni nge fanay e nangan’ rok ni kan skulnag ko thin nu Bible ni nge dugliy e n’en nge rin’. Sana bay boch e walag nder magawon lanin’rad ngay ni ngar nonad ngak facha’ ara ra pininged e magar ngak ni ke yib ko muulung. Machane dabi yoor ban’en ni ngad weliyed ara da rin’ed boch ban’en u taabang.

15. Ba miti mang tadenen e kan weliy murung’agen ko 2 John 9-11? (Kum guy fare kahol ni kenggin e “ Taab Mit i Denen e Be Weliy John nge Paul Murung’agen, Fa?”)

¹⁵ Machane sana rayog ni nge gaar boch e girdi’ u wan’rad, ‘Gathi be yog e Bible nra non reb e Kristiano ngak be’ ni aray rogon, ma aram e kar mangew nga bang yow be rin’ e kireb ni be rin’ faanem?’ (Mu beeg e 2 John 9-11.) Thin ni bay u m’on ngu tomuren e pi thin ney e be dag nre fonow ney e fan ngak e piin kar digeyed  e bin riyul’ e liyor ma kar chelgad yad be togopuluw ngay, ara be’ ni be guy rogon ni nge k’aring yugu boch e girdi’ ni ngar rin’ed reb e ngongol nib kireb. (Rev. 2:20) Faanra ireray e n’en be rin’ be’, ma aram e dabi yarmiy e piin piilal ni nga ranod ra guyed. Yugu aram rogon, ma ka rayog ni nge kal facha’ ngan’. Machane n’umngin nap’an ndawori kalngan’, ma aram e dab da nonad ngak ara da pininged ni nge un nga reb e muulung.

NGAN FOLWOK U ROGON NI MA RUNGUYEY JEHOVAH

16-17. (a) Mang e baadag Jehovah ni nge rin’ e pi tadenen? (Ezekiel 18:32) (b) Uw rogon nrayog ni nge dag e piin piilal ni yad be maruwel Jehovah u taabang u nap’an ni yad be guy rogon ni ngar ayuweged e piin kar rin’ed reb e denen?

¹⁶ Mang e kad filed ko re lal i article ney? Dabun Jehovah ni ngan thang be’! (Mu beeg e Ezekiel 18:32.) Baadag ni nge thilyeg e pi tadenen e ngongol rorad ngar manged fager rok. (2 Kor. 5:20) Aram fan ni kab kafram i yib ni ma tay ir ko pi tapigpig rok ni kar digeyed ni ngar kalgadngan’rad ngar sulod ngak. Ba tow’ath e piin piilal u lan e ulung ni yad be maruwel Jehovah u taabang ni ngar ayuweged e pi girdi’ ney ni ngar kalgadngan’rad.​—Rom. 2:4; 1 Kor. 3:9.

¹⁷ Am lemnag gelngin e felfelan’ ni yima tay u tharmiy u nap’an nra kal e pi tadenen ngan’rad! Ba gel e felfelan’ ni ma tay Jehovah ni Chitamangidad ni bay u tharmiy u nap’an nra sul reb e saf rok ni ke malog ko ulung. Nap’an ni gad ra fal’eg i lemnag gelngin ni ma runguy Jehovah e girdi’ mab gol ngorad, ma ri ma gel feni t’uf rodad.​—Luke 1:78.