1. Mang e rayog ni nge buch u tomuren ni ke rin’ be’ reb e denen nib ubchiya’?

 FA BINEM e article e kad weliyed riy e n’en ni rin’ apostal Paul nga reb e denen nib ubchiya’ ni rin’ be’ nib moon u Korinth. De kalngan’, ma thingar ni tharbog ko ulung. Machane, be tamilangnag kenggin e thin nu Bible ni fan ko re article ney ni bay boch e girdi’ ni kar rin’ed reb e denen nib ubchiya’ ni ka rayog ni ngan ayuwegrad. Rayog ni ngan ayuwegrad ni ngar kalgadngan’rad. (Rom. 2:4) Uw rogon nrayog ni nge ayuwegrad e piin piilal ni ngar rin’ed e re n’ey?

2-3. Mang e susun ni ngad rin’ed ni faanra kad nanged ni bay reb e walag ni ke rin’ reb e denen nib ubchiya’, ma mang fan?

² Dabiyog ni nge pi’ e piin piilal e ayuw ni faanra dar nanged e n’en ke buch. Ere mang e susun ni ngad rin’ed ni faanra kad nanged ni bay reb e walag ni ke rin’ reb e denen nib ubchiya’ ni ban’en nrayog ni ngan tharbog riy? Susun e ngad pied e athamgil nga laniyan’ ni nge yan i ning e ayuw ko piin piilal.​—Isa. 1:18; Acts 20:28; 1 Pet. 5:2.

³ Machane uw rogon ni faanra siyeg facha’ ni nge yan i non ko piin piilal? Faanra arrogon, ma aram e gadad e nga darod da nonad ko piin piilal ya nge yag nni ayuweg facha’. Faan gad ra rin’ e re n’ey, ma aram e gad be t’ufeg walagdad ya gad manang nrayog ni nge ayuweg e piin piilal. Faanra dabi tal facha’ i rin’ fare  kireb, ma aram e ra gelnag e kireb ko tha’ u thilrow Jehovah. Ku rayog ni nge kirebnag thin e ulung. Ere darud rusgad ni ngad rin’ed ban’en ni bochan e ba t’uf Jehovah nge facha’ rodad.​—Ps. 27:14.

ROGON NI MA AYUWEG E PIIN PIILAL E PIIN KAR RIN’ED REB E DENEN NIB UBCHIYA’

4. Mang e ma nameg e piin piilal u nap’an ni yad ra mada’ be’ ni ke rin’ reb e denen nib ubchiya’?

⁴ Nap’an nra rin’ be’ u lan e ulung reb e denen nib ubchiya’, ma aram e ra mel’eg e piin piilal dalip e piilal ni ngar mada’gad facha’. a Pi pumoon ney e ba t’uf ni ngar nanged e gin ngar musgad riy, ma yad boch e girdi’ ni yad ba sobut’an’. Yugu aram rogon ni yad be guy rogon ni ngar ayuweged facha’ ni nge kalngan’, machane yad manang ndabiyog ni ngar towasariyed be’ ni nge thil. (Deut. 30:19) Manang e piin piilal ni gathi gubin e girdi’ ni kar denengad ni yad ra kalngan’rad ni bod e n’en ni rin’ David ni Pilung. (2 Sam. 12:13) Bay boch i yad nrayog ni ngar mel’eged ndab ra folgad ko fonow rok Jehovah. (Gen. 4:​6-8) Yugu aram rogon, ma n’en be nameg e piin piilal e ngar ayuweged facha’ ni nge kalngan’ ni faanra rayog. Ere mang boch i kenggin e motochiyel ni yad ma fol riy u nap’an ni yad be mada’ facha’?

5. Mang fonow e dabi pagtalin e piin piilal u nap’an ni yad ra mada’ be’ ni ke rin’ reb e denen? (2 Timothy 2:​24-26) (Kum guy e sasing.)

⁵ Ma sap e piin piilal ngak faen ke denen ni bod reb e saf ni ke malog ni kab t’uf rok Jehovah. (Luke 15:​4, 6) Ere nap’an ni yad ra mada’ facha’, ma dab ra nonad ngak nib gel e thin rorad ara dab ra daged e sumunguy ngak; fa reb e ra lemnaged ni kemus nib t’uf ni ngar fithed boch e deer ni ngar nanged e n’en ke buch. Ya n’en ngar rin’ed e ngar daged fapi fel’ngin ni bay ko 2 Timothy 2:​24-26. (Mu beeg.) Ngar daged e sumunguy nge gol u nap’an ni yad be ayuweg facha’ ni nge thilyeg e lem rok.

6. Mang e ra rin’ e piin piilal u m’on ni ngar mada’gad be’ ni ke denen ya nge yag nra lemgad ni bod rogon ni be lem Jehovah? (Roma 2:4)

⁶ Ra guy e piin piilal rogon ni ngar lemgad ni bod rogon ni be lem Jehovah. Yad ra guy rogon ni ngar folwokgad rok Jehovah u rogon e ngongol ni ngar daged ngak faen ke denen, ya darur paged talin fapi thin ni yog Paul ni gaar: “Got e ba gol ya be guy rogon ni nge pow’iyem ngam kolngan’um ko kireb ni ga be rin’.” (Mu beeg e Roma 2:4.) Thingar dabi pagtalin e piin piilal ni yad be ayuweg e pi saf rok Got ni Kristus e be pow’iyrad. (Isa. 11:​3, 4; Matt. 18:​18-20) Ere u m’on ni yad ra mada’ facha’, ma yad ra meybil ngak Jehovah ya nge yag nra  ayuweged ni nge kalngan’. Yad ra gay murung’agen boch ban’en u lan e Bible nge yu ken e babyor rodad, mar meybilgad ni ngan ayuwegrad ni nge tamilangan’rad u rarogon facha’ nge n’en ke buch. Ku yad ra lemnag e n’en nib t’uf ni ngar nanged u murung’agen facha’ ni ir e rayog ni ke k’aring ni nge lem me ngongol ni aram rogon.​—Prov. 20:5.

7-8. Uw rogon nrayog ni nge folwok e piin piilal u rogon ni ma gum’an’nag Jehovah ir u nap’an ni yad be mada’ be’ ni ke denen?

⁷ Piin piilal e yad ma folwok u rogon ni ma gum’an’nag Jehovah ir. Darur paged talin rogon ni i guy Jehovah rogon ni nge ayuweg boch e girdi’ nra denengad kakrom. Bod ni gum’an’nag ir u puluwon Kain, me yog ngak e n’en nra buch rok ni faanra denen miki yog ngak ni faanra fol ma yira tow’athnag. (Gen. 4:​6, 7) I fonownag Jehovah David u daken Nathan ni profet ni weliy ba fanathin ni taw nga gum’irchaen e re pilung nem. (2 Sam. 12:​1-7) Ki ‘par ni be pi’’ e pi profet rok ni “nguur” ayuweged piyu Israel u nap’an nda kur folgad rok. (Jer. 7:​24, 25) Da i sonnag e girdi’ rok ni ngar kalgadngan’rad mfini ayuwegrad. Ya i tay ir ngorad ni ngar kalgadngan’rad u nap’an ni ka yad be denen.

⁸ Ma folwok e piin piilal rok Jehovah u nap’an ni yad be guy rogon ni ngar ayuweged e piin kar rin’ed reb e denen nib ubchiya’. Yad ra ngongol ngorad u “fithik’ e gum’an’” ni bod ni be yog e 2 Timothy 4:2. Ere gubin ngiyal’ nib t’uf ni nge par reb e piilal nib gapas me gum’an’nag ir ya nge yag ni ayuweg faen ke denen ni nge rin’ e tin nib fel’. Faanra damumuw fare piilal ara kankanan’, ma rayog ni nge dabi motoyil facha’ ko fonow ni kan pi’ ngak ara siyeg ni nge kalngan’.

9-10. Uw rogon nrayog ni nge ayuweg e piin piilal be’ ni ke denen ni nge lemnag e pi n’en ke warnag e tha’ u thilrow Jehovah ma ke k’aring ni nge denen?

⁹ Ma guy e piin piilal rogon ni ngar nanged e n’en ni k’aring facha’ ni nge denen. Mang e ke warnag e tha’ u thilrow Jehovah? Gur, ke tal ko fol Bible ni ma tay ni yigoo ir ni gubin ngiyal’, ara ke tal ndakir un ko machib, fa? Gur, dakir meybil ngak Jehovah ni gubin ngiyal’, fa? Ka i pag e ar’ar nib kireb ni nge gagiyegnag e ngongol rok, fa? Ka i chag ko girdi’ nib kireb e ngongol rok ara ma chuweg e chalban rok nga boch ban’en nib kireb, fa? Mang e ke rin’ e pi n’ey nga rogon e lem ni ma tay nge pi n’en ma ar’arnag? Manang rogon laniyan’ Jehovah ni Chitamangin ko n’en ke rin’, fa?

¹⁰ Rayog ni nge fith e piin piilal boch e deer ngak facha’ nra ayuweg ni nge lemnag e pi n’en ke warnag e tha’ u thilrow Jehovah ma ke k’aring ni nge denen. Yad ra rin’ e re n’ey u fithik’ e sumunguy, ma dab ra fithed boch ban’en ngak nde t’uf ni ngar nanged. (Prov. 20:5) Ku rayog ni ngar fanayed e fanathin ni ngar ayuweged facha’ ni nge lemnag e n’en ke rin’ nge fan nib kireb, ni bod e n’en ni rin’ Nathan ngak David. Sana nap’an e yay nsom’on ni yad ra mada’ ma rayog ni nge tabab facha’ ni nge kireban’ ni bochan e n’en ke rin’. Ku rayog ni nge kalngan’.

11. Uw rogon e ngongol rok Jesus ngak e pi tadenen?

¹¹ Ma guy e piin piilal rogon ni ngar folwokgad rok Jesus. Nap’an ni be non Jesus ngak Saul nu Tarsus, me fith ngak ni gaar: “Saul, Saul! Mang ni ga be gafgownigeg?” Re deer ney e ayuweg ni nge nang nib kireb e n’en be rin’. (Acts 9:​3-6) Ki weliy Jesus murung’agen “fare pin ni Jezebel” ni gaar: “Kug pi’ e tayim ngak ni nge pi’ keru’ ko denen ni be rin’.”​—Rev. 2:​20, 21.

12-13. Uw rogon nrayog ni nge pi’ e piin piilal e tayim ngak be’ ni ke denen ni nge kalngan’? (Kum guy e sasing.)

¹² Piin piilal e yad ma folwok rok Jesus ni aram e darur gurgad ngar dugliyed ni faen ke denen e dabi kalngan’. Yugu aram rogon ni bay boch e girdi’ nra kalngan’rad ko yay nsom’on ni yad ra mada’ e piin piilal, machane sana bay  boch i yad nrayog nib t’uf ni ngkun pi’ boch e tayim ngorad. Ere rayog ni nge yarmiy e piin piilal ni ngkur mada’gad in yay. Ya sana rayog nu tomuren e yay nsom’on ni kar mada’gad, ma ra tabab ni nge fal’eg i lemnag e n’en ka nog ngak. Ku rayog ni nge sobut’nag laniyan’ nge meybil ngak Jehovah. (Ps. 32:5; 38:18) Ere nap’an ni yad ra mada’ ko yay ni migid, ma rayog ni ngar guyed ni ke thil rogon e lem rok ko yay nsom’on nra mada’gad.

¹³ Ma lemnag e piin piilal rogon laniyan’ faen ke denen mar daged e sumunguy ngak, ya nge yag nra ayuweged ni nge kalngan’. Yad be athapeg ma yad be yibilay ni nge tow’athnagrad Jehovah ko athamgil ni yad be tay me sulan’ fare walag me kalngan’.​—2 Tim. 2:​25, 26.

14. Nap’an nra kalngan’ be’ ni be denen, ma mini’ e bay rogon ni ngan pining e sorok ngak, ma mang fan?

¹⁴ Faanra kalngan’ faen ke denen, ma rib gel e felfelan’ ni yira tay! (Luke 15:​7, 10) Ere mini’ e bay rogon ni ngan pining e sorok ngak? Gur, piin piilal? Dab mu pagtalin e n’en ni yoloy Paul u murung’agen e pi tadenen ni gaar: “Sana rayog ni nge ayuwegrad Got ngar pied keru’rad ko kireb ni yad be rin’.” (2 Tim. 2:25) Ere Jehovah e ir e ma ayuweg reb e Kristiano ni nge thilyeg e lem rok, ma gathi be’. I weliy Paul angin nra yib u tomuren nra kal be’ ngan’. Rayog ni nge ga’ boch e tamilangan’ rok ko tin riyul’, me puluw rogon e lem ni be tay bayay, me chuw u tan e pi ban rok Satan.

15. Uw rogon nrayog ni nge ulul e piin piilal ni ngar ayuweged be’ ni ke kalngan’?

¹⁵ Nap’an nra kal facha’ ngan’, ma aram e ra yarmiy fapi piilal ni ngaun yan ni guy ni ngan ayuweg ni ngki gel bayay e michan’ rok, me ulul ni nge siyeg e pi lumel rok Satan, me rin’ e tin nib fel’. (Heb. 12:​12, 13) Machane dabi yog e piin piilal ngak be’ murung’agen e denen ni ke rin’ facha’. Ere mang e rayog nib t’uf ni nge nang e ulung?

“MU NON U FITHIK’ E GIRDI’”

16. Mini’ fapi “girdi’” ni weliy Paul murung’agrad ko 1 Timothy 5:20?

¹⁶ Mu beeg e 1 Timothy 5:20. I yoloy Paul e pi thin ney ngak Timothy ni ku ir reb e piilal ni  be weliy ngak e n’en nge rin’ ko “piin ni yad be denen.” Mang e be yip’ fan e pi thin ney ni yog? Gathi ri be yog u roy ni “girdi’” e be yip’ fan e ulung ni ga’ngin. Ya be weliy u roy murung’agen e piin nrayog ni yad manang murung’agen fapi denen ni kan rin’. Rayog ni yad e piin nra guyed e denen ni rin’ facha’, ara yad e piin ni yan facha’ i weliy murung’agen e denen rok ngorad. Ra yog e piin piilal ngorad ni kan pithig fare magawon ma kan yal’uweg facha’ ni ke denen ni yad be guy rogon ndab ki nang yugu boch e girdi’.

17. Faanra boor e girdi’ u lan e ulung ni manang murung’agen reb e denen nib ubchiya’ ni kan rin’ fa reb e bay ni nang murung’agen, ma mang e nga nog ko ulung, ma mang fan?

¹⁷ Bay yu ngiyal’ nrayog ni boor e girdi’ u lan e ulung ni manang murung’agen fare kireb ni kan rin’, fa reb e bay ni nang murung’agen. Faanra arrogon, ma “girdi’” e be yip’ fan e ulung ni ga’ngin. Ere ra yog reb e piilal ko ulung ni kan ginang fare walag. Mang fan? I yog Paul ni gaar: “Ya nge tamdag [ara nge ginang] e tin ni ka bay e girdi’,” ya nge dab ra denengad.

18. Faanra bay be’ nib taufe ndawori gaman 18 e duw rok ni ke rin’ reb e denen nib ubchiya’, ma mang e ra rin’ e piin piilal? (Kum guy e sasing.)

¹⁸ Uw rogon be’ nib taufe ndawori gaman 18 e duw rok ni ke rin’ reb e denen nib ubchiya’? Ra dugliy e piin piilal l’agruw e piilal ni ngar mada’gad fare tir nge gallabthir rok ni yow ba Kristiano. b Ra guy e piin piilal rogon ni ngar nanged e n’en ke rin’ fa gallabthir ni ngar ayuwegew fare tir ni nge kalngan’. Faanra motoyil fare tir ko fonow ko gallabthir rok ma be thilyeg rogon e lem nge ngongol rok, ma aram e rayog ni nge dugliy fa gal piilal ni ngar pagew e  gallabthir ko fare tir ni nge mang yow e ra ululgow ni ngar ayuwegew. Bin riyul’ riy e ke tay Got e piin gallabthir ni yad e ba milfan ngorad ni ngar yal’uweged pi fakrad u fithik’ e t’ufeg. (Deut. 6:​6, 7; Prov. 6:20; 22:6; Efe. 6:​2-4) Yugu aram rogon ma ra ulul e piin piilal ni ngaur fithed salpen fare tir ko gallabthir rok ya ngar nanged ni yibe ayuweg ko tin nib t’uf rok. Machane uw rogon ni faanra ulul fare tir ko ngongol nib kireb ni be rin’ ndabi kalngan’? Faanra arrogon, ma aram e ra mada’ dalip e piilal nge fare tir nge gallabthir rok ni yow ba Kristiano.

JEHOVAH E “RI MA RUNGUY MA MA TAGANAN’ NGAK E GIRDI’”

19. Uw rogon ni ma folwok e piin piilal rok Jehovah u nap’an ni yad be ayuweg e piin kar denengad?

¹⁹ Ba m’agan’ Jehovah ngay ni nge ayuweg e piin piilal e ulung ni nge par nib beech. (1 Kor. 5:7) Machane ku baadag e piin piilal ni ngar ayuweged e piin kar denengad ni ngar kalgadngan’rad ni faanra rayog. Aram fan ni yad ma ulul ni ngar athapeged ni nge thilyeg facha’ e ngongol rok u nap’an ni yad be ayuweg. Mang fan? Ya yad baadag ni ngar folwokgad rok Jehovah ni ir be’ ni “ri ma runguy ma ma taganan’ ngak e girdi’.” (Jas. 5:11) Mu tay fanam i yan u rogon ni rin’ apostal John e re n’ey. I yoloy ni gaar: “Kug yoloy e re n’ey ngomed, pi fakag, ni fan e nge dab mu denengad; ma faanra chey nge denen be’, ma ba’ Jesus Kristus, ni be’ nib mat’aw, ni ma wenignagdad ngak e en ni Chitamangiy.”​—1 John 2:1.

20. Mang e gad ra weliy ko bin tomur e article?

²⁰ Ba gel e kireban’ riy ya bay yu ngiyal’ ni ma siyeg reb e Kristiano ni nge kalngan’. Faanra buch e re n’ey, ma aram e thingar ni tharbog ko ulung. Mang e ma rin’ e piin piilal ni faanra ke buch e re n’ey? Ireray e n’en gad ra weliy ko bin tomur e article.