Nap’an ni immoy Jesus u tharmiy, me guy rogon ni nge yag boch e fel’ngin ngak nra ayuweg ni ngar maruwelgad boch e girdi’ u taabang nib fel’ rogon. Uw rogon nra yib angin ngodad e n’en ni rin’ Jesus? Faan gad ra fil murung’agen e n’en ni rin’, ma gad ra guy riy dalip ban’en nra ayuwegdad u rogon ni ngad maruwelgad yugu boch e girdi’ u taabang nib fel’ rogon. Pi n’ey e ra ayuwegdad ni nge taareban’dad e pi walag.

Be’ nib fel’ rogon ni yad ma maruwel yugu boch e girdi’ u taabang e ba sobut’an’, mab ga’ farad u wan’, ma der ma guy rogon ni nga nog e sorok ngak. Aram e n’en ni fil Jesus rok e Chitamangin. Yugu aram rogon ni yigoo Jehovah e bay rogon ni nga nog ni Ir e En Tasunmiy, machane baadag ni ngki nang yugu boch e girdi’ murung’agen e maruwel nib ga’ fan ni ke rin’ Fak. Gad ra guy e re n’ey ko thin ni yog ni gaar: “Chiney e ngad ngongliyew e girdi’ ni bod yaadow.” (Gen. 1:26, NW) Nap’an ni yog Jehovah e pi thin ney me nang Jesus ni ir be’ nrib sobut’an’.​—Ps. 113:5-7.

Nap’an ni immoy Jesus u fayleng miki dag ni ir be’ nib sobut’an’. Nap’an ni i pining e girdi’ e sorok ngak ko n’en ke rin’, me yog ni Got e Ir e bay rogon ni ngan pining e sorok ngak. (Mark 10:17, 18; John 7:15, 16) I guy rogon ni nge par ni bay e gapas u thilrad pi gachalpen, me tayrad ni yad e fager rok ma gathi yad e sib rok. (John 15:15) Ki maluknag rifrifen ayrad ni bochan e nge fil ngorad rogon ni ngar daged e sobut’an’. (John 13:5, 12-14) Ku arrogodad nsusun e ngaud ted fan e piin gad ma maruwel u taabang ko bin ngad m’oneged e tin gad baadag. Faan gad ra guy rogon ni nge ‘bagadad mi i ta’ fan bagadad’ ma dab da guyed rogon ni nga nog e sorok ngodad, ma  aram e boor ban’en nrayog ni ngad rin’ed u taabang.​—Rom. 12:10.

Be’ nib sobut’an’ e manang ni boor ban’en nrayog ni ngan rin’ ni faanra ba “pire’ e fonow nib fel’ ni be pi’ e girdi’.” (Prov. 24:6) Demtrug urngin ban’en ni gad manang ara tin nrayog rodad, ma thingar dab da paged talin ndariy be’ ni urngin ban’en ni manang. Mus ngak Jesus miki yog ni bay boch ban’en nde nang. (Matt. 24:36) Baadag ni nge nang rogon laniyan’ pi gachalpen ndawor ra flontgad nge pi n’en yad manang. (Matt. 16:13-16) Dariy e maruwar riy ni aram fan ni piin ur maruwelgad u taabang e yad ba pufpuf ngak! Ere ku arrogodad ni faanra ba sobut’an’dad, ma darud paged talin ni gathi gubin ban’en ni gad manang, maku gad ma motoyil ngak yugu boch e girdi’ u nap’an yad be weliy rogon lanin’rad u boch ban’en, ma aram e rayog ni ngad pared ni bay e gapas u thildad, ma boor ban’en nrayog ni ngad rin’ed u taabang.

Rib ga’ fan ni nge folwok e piin piilal rok Jesus ngaur daged e sobut’an’ u nap’an yad be rin’ boch ban’en u taabang. Thingar dab ra paged talin nnap’an ni yad ra muulung nga taabang, ma demtrug reb e piilal nrayog ni nge maruwel gelngin Got nib thothup u daken ni nge yog ban’en nra ayuwegrad ni ngar dugliyed ban’en nib fel’ rogon. Ere faan yad ra guy rogon ni ngar pufpufgad ngorad, ma aram e rayog ni ngar dugliyed boch ban’en nra yib angin ko ulung ni ga’ngin.

Be’ nib fel’ rogon ni yad ma maruwel yugu boch e girdi’ u taabang e ba puluw rogon ni ma lemnag boch ban’en. Ba m’agan’ ngay ni nge thilyeg boch ban’en u rarogon miki yan nga laniyan’ yugu boch e girdi’ ko ngiyal’ nib t’uf ni nge rin’. Boor yay ni guy Jesus rogon ni dag e Chitamangin nib puluw rogon ni ma lemnag boch ban’en. Bod ni l’og Jehovah Jesus ni nge yib i chuweg e girdi’ u tan gelngin e yam’ ni aram ban’en ni bay rogon ni nge yib ngorad.​—John 3:16.

I yan Jesus nga laniyan’ yugu boch e girdi’ ko ngiyal’ nib t’uf ni nge rin’ riy. Am lemnag rogon ni ayuweg be’ nib pin nu Fonicia ni yugu aram rogon ni ke yib ni nge ayuweg piyu Israel. (Matt. 15:22-28) Kub puluw rogon ni i lemnag e tin rayog rok pi gachalpen. Tomuren ni yog Peter ni fager rok u fithik’ e girdi’ ni yoor nde nang, me m’agan’ ngay ni nge n’ag fan rok. Boch nga tomuren me pi’ boch e maruwel nib ga’ fan ngak Peter ni nge rin’. (Luke 22:32; John 21:17; Acts 2:14; 8:14-17; 10:44, 45) Ere ba tamilang ko n’en ni rin’ Jesus nsusun e ngad “daged ngak urngin e girdi’ nib puluw rogon ni [gad] ma lemnag boch ban’en” ni aram e nga u darod nga laniyan’ yugu boch e girdi’.​—Fil. 4:5, NW.

Faanra ba puluw rogon ni gad ma lemnag boch ban’en, ma aram e ra m’agan’dad ngay ni ngad thilyeged boch ban’en u rarogodad ya nge yag ni ngad  maruwelgad urngin mit e girdi’ u taabang u fithik’ e gapas. Rib fel’ e ngongol ni i dag Jesus ko girdi’ u tooben. Ere aram fan ni awan’ e pi toogor rok ngak ma rogned ni “ir e fager rok e piin ntamukun tax nge piin ndabuy dakenrad” ni ur motoyilgad ko n’en ni i machibnag. (Matt. 11:19) Ere rayog ni ngad maruwelgad urngin mit e girdi’ u taabang nib fel’ rogon ni bod Jesus, fa? Louis nreb e walag ni pumoon ni boor mit e girdi’ ni ur maruwelgad u taabang u nap’an ni i lekag e ulung ngu nap’an ni be pigpig u Bethel e yog ni gaar: “Gad ra maruwel e girdi’ u taabang ndawor ra flontgad, ma bod ni gad be ubung ba yoror nib thilthil ga’ngin e malang riy. Ba gel e maruwel nib t’uf ni ngan tay ko fare yoror ni bochan e ba thilthil ga’ngin e malang riy, machane rayog ni ngan ngongliy nge yan i m’ay nib fel’ rogon. Kug gay rogon ni nggu thilyeg boch ban’en u rarogog ya nge yag ni nggu maruwelgad yugu boch e girdi’ u taabang u fithik’ e gapas me yag ni nggu mu’naged e maruwel nib t’uf ni ngan rin’.” Rib manigil rogon e lem ni ke dag e re walag ney!

Mang boch e kanawo’ nrayog ni ngad daged riy nib puluw rogon ni gad ma lemnag e pi walag u lan e ulung? Rayog ni ngad rin’ed e re n’ey u nap’an ni gad be machib e pi walag u taabang. Rayog ni ngad machibgad boch e walag u taabang ni boor e maruwel nib milfan ngorad u lan e tabinaw rorad ko tin nib milfan ngodad ara ba thil yangardad. Ere rayog ni ngad thilyeged rogon e machib ni gad be tay ya nge m’ag ko tin rayog rorad ara rogon ni yad be lemnag ni ngar rin’ed ya nge yag nra felfelan’gad ko machib ni yad be tay.

Be’ nib fel’ rogon ni yad ma maruwel yugu boch e girdi’ u taabang e ba ‘m’agan’ ngay ni nge pi’ boch e tin nib ba’ rok ngak boch e girdi’.’ (1 Tim. 6:18) Nap’an ni i maruwel Jesus nge Chitamangin u taabang, ma dabisiy ni guy ni Jehovah e der ma mithag boch ban’en rok. Nap’an ni fek Jehovah “lan e lang nge tay nga tagil’,” ma “bay” Jesus u tooben nrayog ni nge fil boch ban’en rok. (Prov. 8:27) Boch nga tomuren miki fil Jesus ngak pi gachalpen e “tin ni [ke] rung’ag” rok e Chitamangin. (John 15:15) Rayog ni ngad folwokgad rok Jehovah ni aram e ngaud weliyed ngak e pi walag e tin kad filed. Be’ nib fel’ rogon ni yad ma maruwel yugu boch e girdi’ u taabang e der ma guy rogon ni nge tay boch ban’en rok ndabi yog nib t’uf ni nge nang yugu boch e girdi’ ara ra ayuwegrad ni bochan e be guy rogon ni nge mang ir e nga i gagiyegnagrad. Ba felfelan’ ngay ni nge yog e tin ni manang ngak yugu boch e girdi’.

Ku rayog ni ngad pied e athamgil nga laniyan’ e piin gad ma maruwel u taabang. Nap’an nra yog be’ ban’en nib fel’ ni kam rin’ ara pining e magar ngom, ma gathi ma k’aring e re n’ey e felfelan’ ngom? Jesus e ma yog fel’ngin e piin yad ma maruwel u taabang. (Mu taarebrogonnag ko Matthew 25:19-23; Luke 10:17-20.) Ki yog ngorad ni ‘ka ba ga’ e tin yad ra rin’’ ko tin ra rin’. (John 14:12) Fare nep’ u m’on ni nge yim’ me yog fel’ngin e pi apostal rok ni yad ba yul’yul’ u nap’an ni gaar: “Urngin e gafgow ni yib ngog ma mpired rog nda mpaged gag.” (Luke 22:28) Am lemnag gelngin e athamgil ni tay lanin’rad u nap’an nrung’aged e re thin ney me k’aringrad ni ngar rin’ed boch ban’en! Faanra u dogned fel’ngin e piin gad ma maruwel u taabang, ma yad ra felfelan’ miki yib e athamgil nga lanin’rad ni ngkur rin’ed boch ban’en.

I gaar reb e walag ni pumoon ni ka nog Kayode ngak: “Be’ nib fel’ rogon ni yad ma maruwel yugu boch e girdi’ u taabang e de t’uf ni nge rin’ gubin ban’en nib fel’ rogon. Machane ma yibnag e felfelan’ ngak e piin yad ma maruwel u taabang miki momnag rogon e maruwel ni yad be tay.” Gur be’ ni aray rogon, fa? Sana rayog ni ngam fith yugu boch e walag ni gimed ma maruwel u taabang ni nga rogned ngom ko uw rogom ko maruwel ni yima tay. Faanra yad baadag ni gimed ma maruwel u taabang ni bod pi gachalpen Jesus ni yad baadag ni yad ma maruwel Jesus u taabang, ma aram e rayog ni nga mog fapi thin ni yog apostal Paul ni gaar: “Gamad be ayuwegmed [“Gad be maruwel u taabang,” NW] ni fan ko felfelan’ romed.”​—2 Kor. 1:24.