Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:

Mang e be micheg e James 5:11 ngodad u nap’an ni yog ni Jehovah e “ri ma runguy ma ma taganan’ ngak e girdi’”?

Gad manang ni bochan e ma runguydad Jehovah, ma aram fan ni ma n’ag fan e kireb rodad. Be micheg e James 5:11 ni ma ayuwegdad ni bochan e ma runguydad. Ere ba fel’ ni ngad folwokgad rok.​—w21.01, p. 21.

Mang fan ni ke yarmiy Jehovah ni bay e piin nga u rogned e thin u boch ban’en?

I rin’ e re n’ey ni bochan e t’ufeg ni bay rok. Bochan e re yaram ney, ma aram e rayog ni nge par e tabinaw rok nib gapas mab yaram gubin ban’en riy. Girdi’ u lan e tabinaw ni ma fol ko re yaram ney e manang ko mini’ e ba milfan ngak ni nge dugliy e n’en ngan rin’ nge en nge guy rogon ni ngan rin’ e n’en kan dugliy.​—w21.02, p. 3.

Mang fan nsusun e nge kol ayuw e piin Kristiano u rogon ni yad ma fanay boch e app ni yima non riy ngak yugu boch e girdi’ ko Internet?

Faanra ke mel’eg reb e Kristiano ni nge fanay reb e pi app ney, mab t’uf ni nge mel’eg e piin ngar manged fager rok. Ba mo’maw’ ni ngan rin’ e re n’ey ni faanra boor e girdi’ u lan reb e group chat. (1 Tim. 5:13) Ku bay e riya’ riy ni faanra un wereg murung’agen boch ban’en ndariy e mich riy nge bin yibe fanay e pi walag ni ngan guy rogon ni nge yag e salpiy.​—w21.03, p. 31.

Mang boch i fan ni pag Got Jesus ni nge gafgow me yim’?

Reb i fan e nap’an nni tining Jesus nga ba ley i gek’iy me yag ni nge chuweg e pi Jew u tan e buch waathan ni keb ngorad. (Gal. 3:10, 13) Bin l’agruw e bochan ni be fal’eg Jehovah rogon Jesus ni fan ko maruwel nra rin’ boch nga m’on ni ir e Prist Nth’abi Tolang. Bin dalip e nap’an ni par Jesus nib yul’yul’ nge mada’ ko yam’, me micheg nrayog ni nge par e girdi’ ni yad ba yul’yul’ ngak Jehovah ngki mada’ ko ngiyal’ ni kar mada’naged e tin th’abi mo’maw’ e skeng. (Job 1:9-11)​—w21.04, pp. 16-17.

Mang e rayog ni ngam rin’ ni faanra ba mo’maw’ ni ngam pirieg e girdi’ u nap’an e machib?

Rayog ni ngam guy rogon ni ngam man u ba ngiyal’ nib ga’ ni bay e girdi’ u tabinaw. Ku rayog ni ngam thilyeg e gin ga ma machib riy. Ku rayog ni ngam machib u reb e kanawo’ nib thil ni bod ni ngam yoloy e babyor ngam pi’ ngak e girdi’.​—w21.05, pp. 15-16.

Mang e be yip’ apostal Paul fan u nap’an ni gaar: “Ku gum’ kug chuw rok e Motochiyel​—ni Motochiyel e ke lieg”? (Gal. 2:19)

Fare Motochiyel rok Moses e tamilangnag ndawori flont e girdi’ me pow’iy piyu Israel ngak Kristus. (Gal. 3:19, 24) Aram e n’en ni ayuweg Paul ni nge mich Kristus u wan’. Bochan e re n’ey, ma aram fan ni ke ‘yim’ ke chuw rok e Motochiyel’ ni be yip’ fan ni Got e ir e be gagiyegnag ma gathi ka fare Motochiyel.​—w21.06, p. 31.

Uw rogon ni ke dag Jehovah e bin th’abi fel’ e kanawo’ ngodad u rogon e k’adan’ ni be tay?

Ke k’adan’ Jehovah ni yugu aram rogon ni kan darifannag fithingan, ma yibe togopuluw nga mat’awun e gagiyeg rok, ngu nap’an ni togopuluw boch i pi fak ngak, nge pi ban rok Moonyan’, nge gafgow ni be tay e pi tapigpig rok ni yad ba t’uf rok, nge pi fager rok ni kar m’ad, nge girdi’ ni kireb ni yad be gafgownag yugu boch e girdi’, nge ngongol ndarngal ni be rin’ e girdi’ ni be elmerin, nge girdi’ ni be kirebnag e fayleng ni ke sunmiy.​—w21.07, pp. 9-12.

Uw rogon ni dag Josef e kanawo’ nib manigil nrayog ni ngan folwok riy u rogon e gum’an’ ni tay?

I gum’an’ ni yugu aram rogon nde mat’aw e n’en ni rin’ pi walagen ngak. Bochan e re n’ey, ma aram min t’ar e thin nga daken min kalbusnag u Egypt u lan boor e duw.​—w21.08, p. 12.

Mang e kan yiiynag ko Haggai 2:6-9, 20-22 nra buch?

De fel’ u wan’ e pi nam fare thin nib fel’ ni yibe machibnag ni murung’agen Gil’ilungun Got, machane boor e girdi’ ni kar bad ko tin riyul’ ni bochan e re n’ey. Dabki n’uw nap’an ma yira rurug e pi nam ko yay ni tomur u nap’an yira thangrad.​—w21.09, pp. 15-19.

Mang fan nsusun e dabi mulan’dad ko machib ni gad be tay?

Ma yaliy Jehovah gelngin e athamgil ni gad ma tay mab felfelan’ ngay. Faanra dab da talgad ko machib, ma ra yag e yafos ni manemus ngodad.​—w21.10, pp. 25-26.

Uw rogon nrayog ni nge ayuwegdad e Levitikus ko guruy ni 19 ni ngad folgad ko fare fonow ni be gaar: “Ngam pired ni gimed ba thothup u fithik’ urngin e tin ni gimed be rin’”? (1 Pet. 1:15)

Rayog ni kan fek e re verse ney ko Levitikus 19:2. Guruy ni 19 e be weliy boor e kanawo’ nrayog ni ngad folgad ko fare thin ni bay ko 1 Peter 1:15 ko pi n’en ni gad ma rin’ u reb e rran ngu reb.​—w21.12, pp. 3-4.