1. Uw rogon nib ga’ ni ma fulweg Jehovah taban e meybil ko pi tapigpig rok?

 GA MANANG nrayog ni nge fanayem Jehovah ni nge fulweg taban e meybil ni yugu be tay be’, fa? Demtrug ko gur reb e piilal, ara ministerial servant, ara pioneer, ara yugu reb e walag u lan e ulung, ara ka gab bitir, ara kam pilibthir, ara gur reb e walag ni pumoon ara ppin, ma rayog ni nge fanayem Jehovah. Nap’an nra ning be’ nib t’uf Jehovah rok e ayuw ngak, mab ga’ ni ma fanay e piin piilal nge pi tapigpig rok ni yad ba yul’yul’ ni ngar ‘ayuweged’ ara ra fal’eged laniyan’ facha’. (Kol. 4:11) Ri gad ba felfelan’ nrayog ni ngad pigpiggad ngak Jehovah ma gad ayuweg pi walagdad ko biney e kanawo’! Sana rayog ni ngad rin’ed e re n’ey u nap’an ni ke garer ba mit e m’ar, ara ke buch ban’en ni kan gafgow riy, ara nap’an ni yibe gafgownag e pi walag.

2. Mang fan nrayog ni nge mo’maw’ ni ngad ayuweged yugu boch e girdi’ u nap’an ni ke garer ba mit e m’ar?

² Nap’an nra garer ba mit e m’ar mab mo’maw’ ni ngad ayuweged gadad. Rayog ni gad baadag ni nga darod da guyed e pi fager rodad, machane de fel’ ni ngad rin’ed e re n’ey ya rayog ni nge af e m’ar ngodad. Ku rayog ni gad baadag ni ngad pininged e piin yad be magawon ko salpiy ni ngad abichgad u taabang, machane dabiyog. Ku rayog ni gad baadag ni ngad ayuweged yugu boch e girdi’, machane ba mo’maw’ ni faanra ku be gafgow girdien e tabinaw rodad. Yugu aram rogon, ma gad baadag ni ngad ayuweged pi walagdad, ma ma felfelan’ Jehovah u nap’an ni gad ra rin’ e re n’ey u rogon nrayog rodad. (Prov. 3:27; 19:17) Ere mang e rayog ni ngad rin’ed?

3. Mang e gad be fil ko n’en ni rin’ e piin piilal ko ulung rok Desi? (Jeremiah 23:4)

³ N’en nrayog ni nge rin’ e piin piilal. Faanra gur reb e piilal, mag guy rogon ni ngam nang e pi walag nib fel’ rogon. (Mu beeg e Jeremiah 23:4.) Desi ni fare walag nib pin ni bay e thin rok ko fa binem  e article e yog ni gaar, “Piin piilal ko re ulung nug ma un riy ko machib e gubin ngiyal’ ni yad ma un ngog nge yugu boch e walag ko machib u taabang, maku gamad ma rin’ boch ban’en u taabang.” b Re n’ey e momnag ngak e pi piilal nem ni ngar ayuweged Desi u nap’an ni tabab fare m’ar ni COVID-19, ngu nap’an ni yim’ boch i girdien e tabinaw rok ko re m’ar nem.

4. Mang fan ni yag ni nge ayuweg e piin piilal Desi, ma mang e gad ra fil riy?

⁴ I weliy Desi ni gaar, “Bochan ni pi piilal nem e yad boch e fager rog, ma aram fan nib mom ngog ni nggu weliy lanin’ug ngorad nge pi n’en be magafan’ug ngay.” Mang e ra fil e piin piilal ko re n’ey? Mu ayuweged e piin yad bay u tan pa’med u m’on ni nge buch reb e magawon nib ga’. Mmanged fager rorad. Faanra ke sum ba mit e m’ar ni ke garer ndabkiyog ni ngam marod mu guyed yad, mi gimed gay yugu boch e kanawo’ nrayog ni ngam nonad riy ngorad. I gaar Desi: “Bay yu ngiyal’ ni ma callnageg in e piilal ara ra textnaged gag u lan taab borran. Thin nu Bible ni yad ma yog ngog e ma pi’ e athamgil nga lanin’ug ni yugu aram rogon ni gu manang e pi thin nem.”

5. Uw rogon nrayog ni nge nang e piin piilal e tin nib t’uf ko pi walag mar ayuweged yad?

⁵ Reb e kanawo’ nrayog ni ngam nang e tin nib t’uf rok e pi walag riy e aram e ngam fith boch e deer ngorad ndabi k’aring e tamra’ ngorad. (Prov. 20:5) Ba gaman e ggan, nge falay, nge boch ban’en nib t’uf rorad, fa? Be n’en ni ngan n’agrad ko maruwel ara dabkiyog ni ngar pied puluwon e naun ni yad be par riy, fa? Ba t’uf ni ngan ayuwegrad ni ngar ninged e ayuw ko am, fa? I ayuweg e pi walag Desi ko tin nib t’uf ko par rok. Machane t’ufeg ni dag e piin piilal ngak nge thin nu Bible nra fanayed ni ngar pied e athamgil nga laniyan’ e aram e n’en nri ayuweg. I gaar: “Ug meybilgad e piin piilal u taabang, ma yugu aram rogon ndakir yib ngan’ug e n’en u rogned ngog, machane dawor gu pagtalin rogon e lem rog e ngiyal’ nem. Gowa aram rogon ni be gaar Jehovah ngog, ‘Gathi yigoo gur ni ga bay.’”​—Isa. 41:10, 13.

6. Mang e rayog ni nge rin’ boor e walag u lan e ulung ni ngar ayuweged yugu boch e girdi’? (Mu guy e sasing.)

⁶ N’en nrayog ni nge rin’ yugu boch e girdi’. Gad manang ni piin piilal e yad ma ayuweg e walag u lan e ulung. Machane baadag Jehovah ni gad gubin ni ngad pied e athamgil nga laniyan’ yugu boch e girdi’ mad ayuweged yad. (Gal. 6:10) Mus ni faanra kad rin’ed ban’en nib achig ni fan ngak be’ ni ke m’ar, ma rayog ni nge pi’ e athamgil nga laniyan’. Rayog ni nge yoloy reb e bitir bang e card ara yoloy yaan ban’en, me pi’ ngak reb e walag ni pumoon ni nge pi’ e athamgil nga laniyan’. Rayog  ni nge yan reb e fel’ yangaren nga kantin nge fek e chuway’ rok reb e walag nib pin ara ayuweg u ban’en. Ku rayog ni nge lith boch e walag u lan e ulung e ggan ni nge kay be’ ni ke m’ar ma ranod ra pied ngak nga tafen. Bin riyul’ riy e, nap’an nra garer ba mit e m’ar ma urngin e girdi’ u lan e ulung nib t’uf ni ngan pi’ e athamgil nga lanin’rad. Sana ku rayog ni ngad pared buchuuw u tomuren e muulung ni ngad sabethingad e pi walag. Ma piin piilal e kub t’uf ni ngan pi’ e athamgil nga lanin’rad. Bay boch e Pi Mich ni kar yoloyed e babyor kar pied ko piin piilal ni boor ban’en ni yad be rin’ u nap’an reb e m’ar ni ke garer ni ngar pininged e magar ngorad. Ere ba manigil ni faanra bagadad me rin’ e n’en nib milfan ngak ni aram e ngad ‘pied e athamgil nga lanin’dad, me bagadad me ayuweg bagadad’!​—1 Thess. 5:11.

7. Mang e rayog ni nge mo’maw’ ngodad u tomuren ni ke buch ban’en ni kad gafgowgad riy?

⁷ Nap’an nra buch ban’en ni yira gafgow riy, ma rayog ni nge thilyeg rogon e par rok be’ nib tomgin. Bay boch e girdi’ nrayog ni nge kireb e chugum, ara naun rorad, ara yim’ e piin nib t’uf rorad. Pi walagdad e ku ma buch e pi n’ey rorad. Ere mang e rayog ni ngad rin’ed ni ngad ayuweged yad?

8. Mang e rayog ni nge rin’ e piin piilal nge piin lolugen e tabinaw u m’on ni nge buch ban’en ni yira gafgow riy?

⁸ N’en nrayog ni nge rin’ e piin piilal. Gimed e piin piilal e ngam ayuweged e pi walag ni ngar fal’eged rogorad u m’on ni nge buch ban’en ni yira gafgow riy. Mu guyed rogon ni nge nang urngin e girdi’ u lan e ulung e n’en nib t’uf ni ngar rin’ed ya nge dabi buch ban’en rorad, nge rogon ni ngar nonad ko piin piilal. Margaret ni bay e thin rok ko fa binem e article ni ke yan e yog ni gaar: “I pi’ e piin piilal reb e welthin ni fan ko ulung ni yad be yog ngomad ni ka bay yu yang u toobmad nib mom ni nge yik’ e garger riy. Rogned ni faanra ka nog ngomad ni nggu chuwgad u rom ara bay e riya’ ko gin gamad be par riy, ma thingar gu chuwgad ni ka chingiyal’ nem.” Rib puluw e ngiyal’ nni pi’ e re welthin nem riy, ya lal e wik nga tomuren me yik’ bang e garger u toobrad. Nap’an e fol Bible ni tabinaw ma rayog ni nge reb i lolugen e tabinaw mi yad weliy chon e tabinaw rok e n’en thingar rin’ed ni yad gubin. Faanra kam fal’eged pi fakam rogomed u m’on riy, ma aram e rayog ni ngam pared ndabi wagagey lanin’med u nap’an ni ke buch ban’en ni kan gafgow riy.

9. Uw rogon nrayog ni nge yarmiy e piin piilal e n’en ngar rin’ed u m’on ngu tomuren ni ke buch ban’en ni kan gafgow riy?

⁹ Faanra gur reb e group overseer, mag guy rogon ni ngam fek e namba ko telefon rok e pi walag ni yad bay ko birom e ulung nge gin yad ma par riy u m’on ni nge buch ban’en ni yira gafgow riy. Mu yoloy e pi n’ey nga bang mag guy rogon ni nga i par nib puluw urngin ban’en riy. Faan ga ra rin’ e re n’ey, ma aram e rayog ni ngam non ko pi walag ney ni ngam nang e n’en nib t’uf rorad u nap’an ni ke buch ban’en ni kan gafgow riy. Kub t’uf ni ngam weliy e pi n’ey nib papey ngak e en ma yarmiy e piilal, ya nge yag ni non ko en ma lekag e ulung. Nap’an nra maruwel e pi walag ney u taabang, ma aram e rayog ni ngar pied e ayuw nib fel’ rogon. Tomuren fare nifiy, ma de mol fare walag ni ma lekag fare ulung ni ma un Margaret ngay u lan 36 e awa ya be yarmiy rogon e maruwel ni be rin’ e piin piilal ni yad be guy rogon ni ngar nonad mar ayuweged sogonap’an 450 e walag ni kar digeyed e naun rorad. (2 Kor. 11:27) Bochan e re n’ey, ma gubin e walag nib t’uf bang ni ngar pared riy e goo ni ayuwegrad.

10. Mang nib ga’ fan u wan’ e piin piilal ni ngar pied e athamgil nga laniyan’ e pi walag? (John 21:15)

¹⁰ Kub milfan ko piin piilal ni ngar fanayed e thin nu Bible ni ngar pied e athamgil nga laniyan’ e pi walag mar ayuweged e piin be magafan’rad. (1 Pet. 5:2) Nap’an nra buch ban’en ni kan gafgow riy, ma som’on e susun e ngar guyed rogon ni gubin e walag nib fel’ rogorad ma bay e ggan, nge mad rorad, nge gin ngar pared riy. Machane yugu aram rogon ni ke yan boor e pul ni ke buch e re n’ey, ma kab t’uf ni ngar fanayed e thin nu Bible  ni ngar pied e athamgil nga laniyan’ e pi walag ney mar ayuweged e piin be magafan’rad. (Mu beeg e John 21:15.) Harold ni ir reb i girdien e Branch Committee e boor e walag ni kar mada’gad ni kar gafgowgad u boch ban’en ni ke buch ni kan gafgow riy. I gaar: “Ba n’uw nap’an mfini sul rogon e par ko pi walag ney nga rogon. Sana rayog ni nge tabab ni nge sul rogon e par rorad nga rogon, machane ka dawori m’ay u wan’rad be’ nib t’uf rorad ni ke yim’, ara chugum rorad ni ke kireb, ara riya’ ni ur moyed u fithik’. Pi n’ey e rayog ni nge k’aring e kireban’ ngorad bayay. Re n’ey e gathi be yip’ fan ni ke war e michan’ rorad, ya ka ban’en ni ma buch ko girdi’.”

11. Mang e rayog nib t’uf ni ngan ulul ni ngan ayuweg e pi tabinaw riy?

¹¹ Piin piilal e yad ma fol ko fare fonow ni be yog ni ngar ‘uned ko meyor ngak e piin ni yad be yor.’ (Rom. 12:15) Ba t’uf ni nge micheg e piin piilal nga laniyan’ e piin kar gafgowgad u nap’an ban’en ni ke buch ni kan gafgow riy ni ka yad ba t’uf rok Jehovah nge pi walagrad. Kub t’uf ni nge ayuweg e piin piilal e pi tabinaw ni ngar ululgad ko meybil, nge fol Bible, nge muulung, nge machib. Ku rayog ni ngar pied e athamgil nga laniyan’ e piin gallabthir ni ngar ayuweged pi fakrad ni ngar tedan’rad ko tin ndabiyog ni nge kireb u nap’an nra buch ban’en ni yira gafgow riy. Piin gallabthir, mu pugeduran ngak pi fakmed ni gubin ngiyal’ nra par Jehovah ni ir e Fager rorad ma ra ayuwegrad. Ku dab mu paged talin ni ngam weliyed ngorad ni gubin ngiyal’ ni bay pi walagrad u ga’ngin yang e fayleng ni kar fal’eged rogorad ni ngar ayuweged yad.​—1 Pet. 2:17.

12. Mang e rayog ni nge rin’ boch e girdi’ ya nge yag nra pied e ayuw u nap’an ni ke buch ban’en ni kan gafgow riy? (Mu guy e sasing.)

¹² N’en nrayog ni nge rin’ yugu boch e girdi’. Faanra ke buch ban’en ni kan gafgow riy u bang nib chugur ngom, mag fith e piin piilal ko uw rogon nrayog ni ngam pi’ e ayuw. Sana rayog ni ngam pag e piin kar digeyed taferad ara piin yad be pi’ e ayuw ngak e piin kar gafgowgad ni ngar pared rom. Sana ku rayog ni ngam un i pi’ e ggan nge boch ban’en ngak e pi walag ni kar gafgowgad. Faanra ba palog e gin ke buch ban’en ni kan gafgow riy, maku rayog ni ngam pi’ e ayuw. Ni uw rogon? Aram e ngam pi’ e meybil rok e piin kar gafgowgad. (2 Kor. 1:8-11) Ku rayog ni ngam pi’ e ayuw ngak e piin kar gafgowgad ni aram e ngam pi’ e salpiy ni ayuw ni fan ko maruwel ni yibe rin’ u ga’ngin yang e fayleng. (2 Kor. 8:2-5) Faanra rayog ni ngam milekag ko gin ke buch ban’en riy ni kan gafgow riy, mag fith e piin piilal ko uw rogon nrayog ni ngam pi’ e ayuw. Faanra ka nog ngom ni ngam pi’ e ayuw, ma dabisiy ni yira fil ngom rogon ni ngam rin’ boch ban’en ya nge yag nim pi’ e ayuw ko gin’en nge ngiyal’ nib t’uf e ayuw riy.

13. Mang boch e magawon ni be mada’nag e pi walag ni yad be par ko pi nam ni kan taleg e maruwel rodad riy?

¹³ Ba mo’maw’ e par ko pi walag ko pi nam ni kan taleg e maruwel rodad riy ni bochan e gafgow ni yibe tay ngorad. Pi walag ney e ku yad ma magawon ko salpiy, maku yad ma m’ar, maku be yim’ e piin nib t’uf rorad. Bochan ni kan taleg e maruwel rodad ko nam rorad, ma rayog nib mo’maw’ ni nge yan e piin piilal ra guyed e piin nib t’uf ni ngan pi’ e athamgil nga lanin’rad. Ireray e n’en ni buch rok Andrei ni kan weliy murung’agen ko fa binem e article. Bay reb e walag nib pin ni yad ma machib u taabang ni be magawon ko salpiy. Ma nga tomuren me chafin e karrow rok nge maad’ad nib t’uf ni ngan sey, maku dabkiyog ni nge maruwel. Bochan ni kan taleg e maruwel rodad ko re nam nem nge bochan fare m’ar ni ke garer, ma aram me rin’ e pi walag e tin rayog rorad ni ngar ayuweged maku bay Jehovah ni be guy e n’en be buch.

14. Uw rogon nrayog ni nge dag e piin piilal e kanawo’ nrayog ni ngan folwok riy u rogon ni yad ma taga’ ngak Jehovah?

¹⁴ N’en nrayog ni nge rin’ e piin piilal. I meybil Andrei me rin’ e tin rayog rok. Ere mang e rin’ Jehovah? I pi’ boch e walag u lan e ulung ni ka boor e tin rayog ni ngar rin’ed ni ngar ayuweged fare walag nib pin. Bay boch i yad ni ma fek e re walag ney nga aspital ko yar rok ni nge guy e togta, ma boch e ma pi’ e salpiy ngak. I k’aringrad Jehovah ni ngar rin’ed e tin rayog rorad, me tow’athnagrad ko maruwel nra ted u taabang nib taareban’rad ni ngar ayuweged e re walag ney. (Heb. 13:16) Piin piilal, nap’an ni yira taleg boch ban’en ko maruwel rodad, mi gimed yog ngak boch e walag ni ngar pied e ayuw. (Jer. 36:5, 6) Ma bin th’abi ga’ fan riy e ngam taga’gad ngak Jehovah. Ya rayog ni nge ayuwegmed ni ngam pied e tin nib t’uf ko pi walag.

15. Uw rogon ni ngad pared e pi walag nib taareban’dad u nap’an ni yibe gafgownagdad?

¹⁵ N’en nrayog ni nge rin’ yugu boch e girdi’. Faanra kan taleg e maruwel rodad ko gin gad ma par riy, ma sana rayog nib t’uf ni nge in i gadad me mada’ nga bang. Ere rib ga’ fan ni ngaud pared ni bay e gapas u thildad. Satan e ir e ngad chamgad ngak, ma gathi pi walagdad. Mu fek owchem ko oloboch rok e pi walag, ara mu guy rogon ni ngam pithig boch e magawon ni ke sum nib papey. (Prov. 19:11; Efe. 4:26) Ma nge m’agan’um ngay ni ngaum ayuweg e pi walag. (Titus 3:14) Ayuw ni pi’ fapi walag ngak fare walag nib pin ni ke maad’ad e yib angin ko re ulung ni baaram ni yad ma machib u taabang, ya ri chugur thilrad ni bod ba tabinaw.​—Ps. 133:1.

16. Uw rogon nrayog ni ngad ayuweged e pi walagdad ni yibe gafgownagrad nrogon nib puluw ko Kolose 4:3, 18?

 ¹⁶ Bokum biyu’ e pi walagdad ni yad be pigpig ngak Jehovah ni yugu aram rogon ni ke taleg e am boch ban’en ko maruwel rodad ko gin yad ma par riy. Bay boch i yad ni kan kalbusnagrad ni bochan e michan’ rorad. Ere rayog ni ngad pied e meybil rorad, nge chon e tabinaw rorad, nge pi walag ni yad be ayuwegrad ko tirok Got ban’en, nge tin nib t’uf ko par rorad, maku yad be ayuwegrad u tagil’ e puf oloboch ni yugu aram rogon ni yad manang ni ku rayog ni ngan kalbusnagrad. c (Mu beeg e Kolose 4:3, 18.) Dab mu pagtalin ni meybil rom e rayog ni nge ayuweg urngin e pi walag ney!​—2 Thess. 3:1, 2; 1 Tim. 2:1, 2.

17. Uw rogon nrayog ni ngam fal’eg rogom e chiney ni fan ko gafgow ni yira tay ngom?

¹⁷ Rayog ni ngam fal’eged chon e tabinaw rom rogomed e chiney ni fan ko gafgow ni yira tay ngomed. (Acts 14:22) Dab mu susunnag u lanin’um urngin ban’en nib kireb nrayog ni nge buch. Ya ngam chugurnag e tha’ u thilmew Jehovah mag ayuweg pi fakam ni ngkur rin’ed e re n’ey. Faanra bay yu ngiyal’ ni be magafan’um, mag weliy lanin’um ngak Got u daken e meybil. (Ps. 62:7, 8) Mu weliyed chon e tabinaw rom urngin i fan nrayog ni nge pagan’med ngak. d Ere faan gimed ra fal’eg pi fakam rogomed u m’on ni ngan gafgownagmed me pagan’med ngak Jehovah, ma aram e rayog ni ngam ayuwegrad ni ngar pared ndab rrusgad mab gapas lanin’rad ni bod e n’en nra buch ni faanra kam fal’eged rogomed u m’on ni nge buch ban’en ni yira gafgow riy.

18. Mang e gad be athapeg boch nga m’on?

¹⁸ Gapas rok Got e ma pi’ e pagan’ ngodad. (Fil. 4:6, 7) Ireray e n’en ma fanay Jehovah ni nge gapaseg lanin’dad ni yugu aram rogon ni ke yoor e m’ar, nge boch ban’en ni be buch e ngiyal’ ney ni yira gafgow riy, nge gafgow ni yibe tay ngodad. Ma fanay e piin piilal ni ngar ayuweged gadad. Ma kki bing e kanawo’ ngodad ni nge bagadad me ayuweg bagadad. Gapas ni bay rodad e chiney e ra ayuwegdad ni ngad fal’eged rogodad ni fan ko pi skeng ni kab gel e mo’maw’ riy ni gad ra mada’nag boch nga m’on nib muun fare “gafgow” nib ga’ ngay. (Matt. 24:21) Ra taw ko ngiyal’ nem, ma ra t’uf ni ngad pared ni gad ba gapas ma gad ayuweg yugu boch e girdi’ ni ngkur rin’ed e re n’ey. Machane tomuren e re ngiyal’ i n’em ma dab kud mada’naged boch e magawon nib ga’ ni ma k’aring e magafan’ ngodad. Aram e ngiyal’ nra yag ngodad e n’en ni kab kafram i yib ni baadag Jehovah ni nge yag ngodad, ni aram e bin riyul’ e gapas nra par ndariy n’umngin nap’an.​—Isa. 26:3, 4.