1. Mang fare “gapas rok Got”? Faanra bay rodad, ma uw rogon nra yib angin ngodad? (Filippi 4:6, 7)

 BAY ba mit e gapas nde nang e girdi’ nu fayleng murung’agen. Re n’ey e aram e “gapas rok Got,” ara gapas ni bay rodad ni bochan e ba fel’ e tha’ u thildad e Chitamangidad ni bay u tharmiy. Ra bay e gapas rok Got rodad, ma aram e ba pagan’dad. (Mu beeg e Filippi 4:6, 7.) Ba fel’ thildad e piin yad ma t’ufeg, ma kub fel’ thildad fare “Got ni ma pi’ e gapas nga lanin’dad.” (1 Thess. 5:23) Faanra gad manang e Chitamangidad, ma be pagan’dad ngak, ma gad be fol rok, ma gapas rok Got e rayog ni nge baudeg lanin’dad u nap’an ni gad be mada’nag reb e magawon nib mo’maw’.

2. Mang fan ni gad manang nrayog ni nge yag e gapas rok Got ngodad?

² Gur, rayog ni nge yag e gapas rok Got ngodad u nap’an ni gad be mada’nag reb e magawon nib ga’, ni bod ba mit e m’ar ni ke garer, ara ke buch ban’en ni kan gafgow riy, ara nap’an e wagey ni yibe tay, ara nap’an ni yibe gafgownagdad, fa? Pi n’ey e rayog ni nge k’aring e marus ngodad. Yugu aram rogon, me fonownag Jesus pi gachalpen ni gaar: “Dabi magafan’med ma dabi wagagey lanin’med; ma dab mu tamdaggad.” (John 14:27) Gad ba felfelan’ ni bochan e be fol e pi walag ko re fonow ney ni pi’ Jesus. Bochan ni be ayuwegrad Jehovah, ma ke yag ni ngar pared nib gapas lanin’rad ni yugu aram rogon nib gel e magawon ni yad be mada’nag.

3. Nap’an nra garer ba mit e m’ar, ma uw rogon nrayog ni nge mo’maw’ ni ngad pared nib gapas lanin’dad?

³ Nap’an nra garer ba mit e m’ar, ma boor ban’en u rogon e par rodad nrayog ni nge thil. Am lemnag rogon ni ke thil rogon e par rok boor e girdi’ ni bochan fare m’ar ni COVID-19. Nap’an nni fith  murung’agen e re m’ar ney ngak boch e girdi’, mab pag baley ko urngin e girdi’ nni fithrad nrogned ni ke magawon rogon e mol rorad u nap’an e re m’ar ney. Ku boor e girdi’ ni magafan’rad, ma boch e be kireban’rad, ma boch e be muun alkul nib pag rogon ma be fanay boch e falay ni kireb, ma boch e be li’ e en mabgol rok, ma boch e be guy rogon ni nge li’ ir ngem’. Faanra ke garer ba mit e m’ar ko gin ga ma par riy, ma uw rogon nrayog ni nge war e magafan’ rom me yag fare gapas rok Got ngom?

4. Mang fan ni be gapas lanin’dad ni bochan e gad manang e n’en ni yiiynag Jesus u murung’agen e tin tomuren e rran?

⁴ I yiiynag Jesus nnap’an nra taw ko tin tomuren e rran, ma “gubin yang” nra yib e liliy riy nib machreg ni ma af. (Luke 21:11) Uw rogon nrayog ni nge gapas lanin’dad ni bochan e kad nanged e re n’ey? Darud gingad ko m’ar ni be garer nib papey. Gad manang ni be buch e pi n’ey ni bod rogon ni yiiynag Jesus. Ere bay rogon ni ngad folgad ko fare fonow ni pi’ Jesus ni fan ngak e piin yad be par ko tin tomuren e rran ni faani gaar: “Mu telmed, dab mu rusgad.”​—Matt. 24:6.

5. (a) Mang e susun ni ngad yibilayed u nap’an nra garer ba mit e m’ar nrogon nib puluw ko Filippi 4:8, 9? (b) Faanra um motoyil ko pi thin nu Bible ni kan recordnag ni ngaun motoyil ngay, ma uw rogon nra yib angin ngom?

⁵ Nap’an nra garer ba mit e m’ar ma rayog ni ngari magafan’dad mu kud rusgad. Ireray e n’en ni buch rok reb e walag nib pin ni ka nog Desi ngak. b Tomuren ni yim’ reb e pumoon ni walagen e chitamangin, nge reb e pumoon nib walag e chitamangirow, nge togta rok ko fare m’ar ni COVID-19, ma aram me rus nri af e re m’ar ney ngak me afweg ko chitiningin ni ke pilibthir. Ki magafan’ nri chey min n’ag ko maruwel rok, ma aram mi i lemnag ko uw rogon nrayog ni nge chuw’iy e ggan ma be pi’ puluwon e naun ni be par riy. Pi n’ey ni i magafan’ ngay e k’aring ni nge daki yag ni nga i mol nnep’. Yugu aram rogon, me yag ni ngki gapas laniyan’ bayay. Ni uw rogon? I meybil ngak Jehovah ni nge ayuweg ni nge gapas laniyan’ me lemnag fel’ngin boch ban’en. (Mu beeg e Filippi 4:8, 9.) I pag Jehovah ni nge “non” ngak u daken boch e thin nu Bible ni kan recordnag ni ngaun motoyil ngay. I gaar, “Nap’an nug ra rung’ag laman e en be beeg e pi thin nem, ma ma war e magafan’ rog miki puguran ngog ni be lemnageg Jehovah.”​—Ps. 94:19.

6. Uw rogon nra ayuwegem e fol Bible ni ga ma tay ni yigoo gur nge muulung ni ga ma un ngay?

⁶ Nap’an nra garer ba mit e m’ar ma dariy e maruwar riy nra magawon rogon boch ban’en ni gad ma rin’, machane dab mu pag e re n’ey ni nge magawonnag rogon e fol Bible ni ga ma tay ni yigoo gur nge muulung ni ga ma un ngay. Pi n’en be buch ko pi walag ni bay murung’agrad ko pi babyor nge video rodad e ra puguran ngom ni yad be par ni yad ba yul’yul’ ni yugu aram rogon ni yad be mada’nag boch e magawon ni bod e tin ga be mada’nag. (1 Pet. 5:9) Muulung ni ga ma un ngay e ra ayuwegem ni ngam lemnag boch ban’en u  Bible nra pi’ e athamgil nga lanin’um. Ku aram rogon nrayog ni ngam pi’ e athamgil nga laniyan’ yugu boch e girdi’, mu kun pi’ e athamgil nga lanin’um. (Rom. 1:11, 12) Nap’an ni ga ra lemnag rogon ni ke ayuweg Jehovah e pi tapigpig rok u nap’an ni kar m’argad, ara kar rusgad, ara yad be lemnag ni yigoo yad, ma aram e ra gel e michan’ rom miki pagan’um nra ayuwegem.

7. Mang e rayog ni ngam fil rok apostal John?

⁷ Mu guy rogon ni ngam non ngak pi walagem. Nap’an nra garer ba mit e m’ar, ma rayog nib t’uf ndab kun chuchugur nga taabang ni kub muun ngay e ngiyal’ ni gad bay ko gin bay e pi walagdad riy. Ra buch ban’en ni aray rogon, ma sana rayog ni ngam lem ni bod apostal John ni baadag ni nge guy Gaius ni fager rok. (3 John 13, 14) Yugu aram rogon, ma manang John ndabiyog ni nge yan i guy Gaius u lan ba ngiyal’. Ere rin’ e n’en nrayog rok ni aram e yoloy bang e babyor nge yan ngak Gaius. Faanra gathi gubin ngiyal’ nrayog ni ngam man mu guy e pi walag, mag guy rogon ni ngam non ngorad u telefon, ara u online, ara mu textnagrad. Faanra um non ngak e pi walag, ma aram e rayog ni nge pagan’um miki gapas lanin’um. Mu non ngak e piin piilal nib ga’ ni faanra be magafan’um, me m’agan’um nga rogon ni yad be pi’ e athamgil ngom u fithik’ e t’ufeg.​—Isa. 32:1, 2.

8. Nap’an nra buch ban’en ni kam gafgow riy, ma uw rogon nrayog ni nge mo’maw’ ni ngam par nib gapas lanin’um?

⁸ Faanra bay ba ngiyal’ ni kam gafgow ni bochan e ran ni ke tharey daken e binaw, ara bochan reb e durru’, ara nifiy nib ga’, ma rayog ni ngam par nib n’uw nap’an ni be magafan’um u tomuren e pi n’ey. Ma faanra ke yim’ e piin nib t’uf rom, ara ke kireb e naun nge chugum rom ma rayog ni nge kireban’um, ara mu lemnag ndakuriy e athap rom, ara mu damumuw. Re n’ey e gathi be yip’ fan ni gur be’ ni yigoo chugum e ga ma lemnag ara dariy e michan’ rom. Ba ga’ e magawon ni kam mada’nag, ere rayog ni bay boch e girdi’ ni yad manang ni aray rogon e n’en ga ra lemnag. (Job 1:11) Machane yugu aram rogon, ma ka rayog ni nge par nib gapas lanin’um. Ni uw rogon?

9. Mang e yog Jesus ni nge fal’eg rogodad ni fan ko pi n’en ma buch ni yima gafgow riy?

⁹ Dab mu pagtalin e n’en ni yiiynag Jesus. Bay boch e girdi’ ni yad ma lemnag ndabi buch ban’en rorad ni yad ra gafgow riy. Machane gad manang nra yoor e pi n’ey nra i buch ko ngiyal’ ney ni gad bay riy, ma bay boch nra i buch ko gin gad ma par riy. I yog Jesus ngak pi gachalpen nra i yib e “durru’ nib gel” nge boch ban’en ni yira gafgow riy u m’on ni nge yib e tomur. (Luke 21:11) Ki yiiynag nra garer e “tin nib kireb” u gubin yang ni bod e n’en be buch e ngiyal’ ney, ni bod e kireb ni yibe rin’ nib togopuluw ko motochiyel ko am, nge cham, nge kireb ni be rin’ e terrorist. (Matt. 24:12) De yog Jesus ni yigoo piin kar digeyed Jehovah e yad ra gafgow ko pi n’ey. Bin riyul’ riy e, boor e tapigpig rok Jehovah ni yad ba yul’yul’ ni kar gafgowgad ni bochan boch ban’en ni ma buch ni yima gafgow riy. (Isa. 57:1; 2 Kor. 11:25) Sana dabi ngongliy Jehovah e maang’ang ni nge ayuwegdad ko pi n’en ma buch ni yima gafgow riy, machane ra pi’ e n’en nib t’uf rodad ya nge yag nda pared nib gapas lanin’dad.

10. Mang fan ni faan gad ra fal’eg rogodad e chiney ni fan nga ban’en nra buch ni yira gafgow riy, ma aram e be m’ug riy ni be pagan’dad ngak Jehovah? (Proverbs 22:3)

¹⁰ Faanra kad fal’eged rogodad u m’on riy, ma aram e ra mom ni ngad pared nib gapas lanin’dad u nap’an ni ke buch ban’en nib tomgin. Machane gur, gad ra fal’eg rogodad u m’on riy ma aram e be yip’ fan nder pagan’dad ngak Jehovah, fa? Danga’. Ya bin riyul’ riy e gad ra rin’ e re n’ey, ma aram e be m’ug riy nib pagan’dad nrayog rok ni nge ayuwegdad. Ni uw rogon? Be fonownagdad e Thin rok Got ni ngad fal’eged rogodad ni fan nga boch ban’en nrayog ni nge buch ni bay e riya’ riy. (Mu beeg e Proverbs 22:3.) Kab kafram i yib ni be pi’ e ulung rok Got e athamgil nga lanin’dad ni ngad fal’eged rogodad ni fan nga ban’en ni ke buch nib tomgin u daken e pi article ko babyor rodad,  nge pi muulung ni gad ma tay, nge pi n’en yima yog u nap’an e muulung. c Ere be pagan’dad ngak Jehovah, fa? Faanra be pagan’dad, ma aram e gad ra fol ko pi fonow ney e chiney u m’on ni nge buch ban’en ni gad ra gafgow riy.

11. Mang e kam fil ko n’en ni rin’ Margaret?

¹¹ Am lemnag e n’en ni buch rok reb e walag nib pin ni ka nog Margaret ngak. Nog ngak ni nge chuw u tafen ni bochan e ke yik’ e garger ko gin ma par riy. Bochan ni boor e girdi’ ni yad be guy rogon ni ngar chuwgad u rom u lan taab ngiyal’, ma aram me yoor e karrow u kanawo’ ndabkiyog ni nge yan be’ nga bang. I sug e ath u gubin yang, ma aram e daki yag ni nge chuw u lan e karrow rok. Machane i yag ni nge magey nib fos ni bochan e fal’eg rogon u m’on riy. Bay bangi map ni ma par u lan e kabang rok nrayog ni nge pow’iy nga yugu ba pa’ e kanawo’ nrayog ni nge yan riy me chuw u rom. Ku bay bayay ni ke yan ko re pa’ i kanawo’ nem ni bochan e nge nang rogon ni nge yan riy u nap’an nra buch ban’en nib tomgin. Ere bochan ni fal’eg Margaret rogon, ma aram e de buch ban’en rok.

12. Mang fan ni gad ma fol u boch ban’en ni ka nog nra ayuwegdad ndabi buch ban’en rodad?

¹² Sana rayog ni nge yog e am ni bay e ngiyal’ nra taw ngay ma ngad sulod nga tabinaw, ara ngad chuwgad ko gin gad ma par riy, ara ngad rin’ed yugu boch ban’en ni bochan e ngad pared ndabi buch ban’en rodad nge tin ka bay e girdi’. Bay boch e girdi’ ndarur folgad ko pi n’ey ni ka nog ni bochan e dubrad ni ngar digeyed e chugum rorad. Machane mang e ma rin’ e piin Kristiano? Be gaar e Bible: “Bochan Somol ma aram fan ni ngam folgad rok urngin e piin ni yad be tay murung’agen e girdi’; ni aram e en ni pilung ni ga’, nge pi am, ni en ni pilung e l’ograd.” (1 Pet. 2:13, 14) Ku bay boch ban’en ni ma yog e ulung rok Got ni ngad rin’ed ya nge yag nda pared ndabi buch ban’en rodad. Gubin ngiyal’ ni yima puguran ngodad ni ngad pied e namba ko telefon rodad ngak e piin piilal ya nge yag nra nonad ngodad u nap’an ni ke buch ban’en nib tomgin. Kam rin’ e re n’ey, fa? Ku rayog ni nga nog ngodad ni ngad pared u tafedad ara ngad chuwgad, ara rogon ni nge yag e tin nib t’uf rodad, ara rogon nge ngiyal’ ni ngad ayuweged yugu boch e girdi’. Faanra dab da folgad ko pi n’ey, ma rayog ni ngad ted e yafos rodad nge yafos ko piin piilal nga thatharen e riya’. Dab mu pagtalin ni pi pumoon ney e yad be matanagiydad ndabi buch ban’en rodad. (Heb. 13:17) I yog Margaret ni gaar, “Rib mich u wan’ug ni fonow ni pi’ e piin piilal nge ulung nug fol riy e aram e n’en ni ayuweg e yafos rog.”

13. Mang e ke ayuweg boor e Kristiano ni kar digeyed taferad ni ngar pared ni yad ba felfelan’ mab gapas lanin’rad?

 ¹³ Boor e walag ni kar digeyed taferad ni bochan ban’en ni ke buch ni kar gafgowgad riy, ara bochan e mahl, ara wagey ni be tay e girdi’ ni kar rin’ed e tin rayog rorad ni ngar mechamgad nga rogon e par rorad ni ke thil, mu kur yoornaged e tin yad be rin’ ni fan ko pigpig rorad ngak Jehovah. Yad be ulul ni ngar ‘machibnaged ngak e girdi’ fare Thin Nib Fel’ ni yib rok Got’ ni bod e n’en ni rin’ e tin som’on e Kristiano nni weregrad nga ranod nga gubin yang ni bochan e gafgow ni un tay ngorad. (Acts 8:4) Machib ni yad ma tay e ma ayuwegrad ni ngar tedan’rad nga Gil’ilungun Got ko bin ngaur lemnaged e gafgow ni yad be tay. Angin ni ke yib riy e ke yag ni ngar pared ni yad ba felfelan’ mab gapas lanin’rad.

14. Nap’an ni yira gafgownagdad, ma uw rogon nrayog ni nge mo’maw’ ni ngad pared nib gapas lanin’dad?

¹⁴ Nap’an ni yira gafgownagdad, ma rayog ni nge mo’maw’ ni ngad rin’ed boor ban’en ni gad ma rin’ ni ma yibnag e gapas nga lanin’dad. Gad ma felfelan’ ni faanra ba puf rogodad ni ngaud muulunggad, ma gad be machib, maku gad be rin’ e pi n’en nib ga’ ni gad ma rin’ ndarud rusgad nri chey min kalbusnagdad. Machane faanra dabkiyog ni ngad rin’ed e pi n’ey, ma rayog ni nge magafan’dad mu kud rusgad ko n’en nra buch ni migid. De kireb ni ngad lemgad ni aray rogon. Machane thingar kud kol ayuwgad. I yog Jesus ni gafgow ni yibe tay ngak pi gachalpen e rayog ni nge warnag e michan’ rorad. (John 16:1, 2) Ere uw rogon nrayog ni ngad pared nib gapas lanin’dad u nap’an ni yibe gafgownagdad?

15. Mang fan nsusun e dab da rusgad ko gafgow ni yibe tay ngodad? (John 15:20; 16:33)

¹⁵ Be gaar e Thin rok Got: “Urngin e girdi’ ni yad ba adag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Tim. 3:12) Bay reb e walag ni pumoon ni ka nog Andrei ngak ni mo’maw’ ni nge mich e re n’ey u wan’ u nap’an nni taleg e maruwel rodad ko nam rok. I gaar u wan’: ‘Kaygi yoor e Pi Mich u roy. Ere uw rogon ni nge kalbusnagmad e am ni gamad gubin?’ Machane re lem ney e de gapaseg laniyan’ Andrei, ya k’aring ni nga i par ni be magafan’. Bay boch e walag ni pagan’rad ngak Jehovah, ma dar lemnaged ndabiyog ni ngan kalbusnagrad. Yad manang nrayog ni ngan kalbusnagrad, machane de magafan’rad ni bod rogon Andrei. Ere dugliy ni nge lem ni bod e pi walag ney me pagan’ ngak Got. De n’uw nap’an nga tomuren me thamiy ni ke gapas laniyan’, ma  chiney e be par nib felfelan’ ni yugu aram rogon ni ka boor e magawon u rom. Ere ku arrogodad. Yugu aram rogon ni yog Jesus ni yira gafgownagdad, machane ki micheg nrayog ni ngad pared ni gad ba yul’yul’.​—Mu beeg e John 15:20; 16:33.

16. Mang boch e fonow ni yima pi’ ngodad nib t’uf ni ngad folgad riy u nap’an ni yibe gafgownagdad?

¹⁶ Faanra bay boch ban’en u rogon e maruwel rodad ni kan taleg fa reb e kan taleg ni gubin, ma rayog ni nge pi’ e branch ofis nge piin piilal boch e thin ni ngad folgad riy. Pi thin ney e yima pi’ ni nge ayuwegdad ndabi buch ban’en rodad, miki ayuwegdad ni nge yag ngodad e tin nib t’uf rodad ni fan ko tirok Got ban’en, miki ayuwegdad ni ngad ululgad ko machib u rogon nrayog rodad. Ere mu athamgil u rogon nrayog rom ni ngam fol ko fonow ni kan pi’ ngom ni yugu aram rogon ni gathi ri ga be nang fan ni kan pi’. (Jas. 3:17) Maku reb e, dab mu weliy murung’agen e pi walag ara maruwel ni yima rin’ u lan e ulung ngak e piin ndariy rogon ni ngar nanged.​—Ekl. 3:7.

17. Mang e kad dugliyed u wan’dad ni ngad rin’ed ni bod e pi apostal ko bin som’on e chibog?

¹⁷ Reb i fan ni be cham Satan ko girdi’ rok Got e bochan ni yad be weliy “fare thin nib riyul’ ni yib i yog Jesus ngan nang.” (Rev. 12:17) Dab mu pag Satan nge re fayleng rok ney ni nge k’aring e marus ngom. Gad ra machib ma gad be fil e tin riyul’ ko girdi’ ni yugu aram rogon ni yibe togopuluw ngodad, ma rayog ni nge yibnag e felfelan’ nge gapas ngodad. Nap’an ni yog e pi tayugang’ ko pi Jew ngak e pi apostal ni ngar talgad ko machib u nap’an e bin som’on e chibog, mar mel’eged ni ngar folgad rok Got. Ra ululgad ko machib, ma re n’ey e k’aring e felfelan’ ngorad. (Acts 5:27-29, 41, 42) Riyul’ ni faanra bay boch ban’en u rogon e maruwel rodad ni kan taleg, ma thingar da kol ayuwgad u nap’an ni gad be machib. (Matt. 10:16) Machane faan gad ra rin’ e tin rayog rodad, ma aram e ra gapas lanin’dad ni bochan e gad be rin’ e n’en nib m’agan’ Jehovah ngay ma gad be weliy ba thin nra yognag e yafos ko girdi’.

18. Mini’ e rayog ni nge pi’ e bin riyul’ e gapas ngodad?

¹⁸ Nge pagan’um nrayog ni ngad pared nib gapas lanin’dad ngki mada’ ko ngiyal’ ni gad be mada’nag boch e magawon nrib gel e mo’maw’ riy. Ra taw ko ngiyal’ nem ma thingar dab da paged talin ni gapas rok Got ni aram fare gapas ni yigoo Jehovah e rayog ni nge pi’ e ir e ba t’uf rodad. Mu taga’ ngak u nap’an nra garer ba mit e m’ar, ara nap’an ni ke buch ban’en ni kan gafgow riy, ara nap’an ni yibe gafgownagmed e pi walag. Mu par ni gab chugur ko ulung rok. Mu athapeg e pi n’en nib manigil nra buch boch nga m’on. Faan ga ra rin’ e re n’ey ma ‘Got ni ir e be pi’ e gapas nga lanin’um e bay i par rom.’ (Fil. 4:9) Bin migid e article e gad ra weliy riy rogon nrayog ni ngad ayuweged e pi walag ni yad be mada’nag e magawon ni nge yag e gapas rok Got ngorad.