1. Gad ra fal’eg i lemnag e yafos ndariy n’umngin nap’an ni ke micheg Jehovah nra pi’ ngodad, ma mang angin nra yib ngodad?

 KE MICHEG Jehovah ni piin yad ra fol rok e ra yag e “yafos ndariy n’umngin nap’an” ngorad. (Rom. 6:23) Nap’an ni gad ra fal’eg i lemnag e n’en be ognag Jehovah ngodad, ma aram e ra gel feni t’uf rodad. Am lemnag e re n’ey: Bochan nri gad ba t’uf rok e Chitamangidad ni bay u tharmiy, ma aram e dariy ba ngiyal’ ni gad ra palog rok.

2. Uw rogon ni ma ayuwegdad e yafos ndariy n’umngin nap’an ni kan micheg ngodad?

² Yafos ndariy n’umngin nap’an ni ke micheg Got ngodad e ma ayuwegdad ni ngad athamgilgad u fithik’ e pi magawon ni gad be mada’nag. Mus ni faanra ke yog e pi toogor rodad ni ngar thanged e fan rodad, ma dab da talgad ko pigpig ngak Jehovah. Mang fan? Reb i fan e bochan ni gad manang ni faan gad ra par ni gad ba yul’yul’ ngak Jehovah nge mada’ ko yam’, ma ra fasegdad miki pi’ e athap ngodad ndab kud m’ad bayay. (John 5:28, 29; 1 Kor. 15:55-58; Heb. 2:15) Mang fan nrayog ni ngari mich u wan’dad nrayog ni ngad pared ndariy n’umngin nap’an? Ngad weliyed boch i fan.

3. Mang fan nrayog ni nge pagan’dad nrayog ni nge taydad Jehovah ni gad ba fos ndariy n’umngin nap’an? (Psalm 102:12, 24, 27)

³ Gad manang nrayog ni nge taydad Jehovah ni gad ba fos ndariy n’umngin nap’an ni bochan e ir Enggin gubin e yafos maku ra par ndariy n’umngin nap’an. (Ps. 36:9) Baaray in e thin nu Bible ni be micheg ni Jehovah e de sum ma ra par ndariy n’umngin nap’an. Be yog e Psalm 90:2 ni Jehovah e ‘de sum ma dariy e rofen ni ra mus.’ Ku aram e n’en be yog e Psalm 102. (Mu beeg e Psalm 102:12, 24, 27.) Me Habakkuk ni profet e weliy murung’agen e Chitamangidad ni bay u tharmiy ni gaar: “Somol, ka nap’an ko tabolngin ni ga be par ni gur  e Got. Gur e Got rog, ni gab thothup ma bay um par ndariy n’umngin nap’an.”​—Hab. 1:12.

4. Bay rogon ni nge magafan’dad ni faanra dabiyog ni ngari tamilang u wan’dad ni Jehovah e de sum, fa? Mu tamilangnag.

⁴ Gur, ba mo’maw’ ngom ni nge tamilang u wan’um ni Jehovah e be par “ndariy n’umngin nap’an,” fa? (Isa. 40:28) Boor e girdi’ nib mo’maw’ ni nge tamilang u wan’rad e re n’ey. I weliy Elihu murung’agen Got ni gaar: “Dabiyog ni ngar . . . da theeged urngin e duw rok.” (Job 36:26, BT) Machane faanra der tamilang ban’en u wan’dad, ma gathi aram e be yip’ fan nde riyul’. Bod ni yugu aram rogon nrayog ni gathi gubin ban’en u rarogon e tamilang ni gad manang, machane gur, re n’ey e be yip’ fan ndariy e tamilang? Danga’! Ere ku arrogodad e girdi’ nrayog ndabiyog ni ngari tamilang u wan’dad ni Jehovah e de sum ma ra par ndariy n’umngin nap’an. Machane gathi be yip’ fan nde riyul’ e re n’ey. Tin riyul’ u murung’agen e En Ke Sunmiydad e der tor nga daken e tin rayog ara tin dabiyog ni ngad nanged fan. (Rom. 11:33-36) Ku immoy Jehovah u m’on ni nge sum urngin ban’en u lan e palpalth’ib nib muun e yal’ nge pi t’uf ngay. Ke micheg ngodad ni ir e ke “ngongliy e fayleng nga gelngin.” Ma immoy u m’on ni nge “filath e pi tharmiy.” (Jer. 51:15, BT; Acts 17:24) Ku mang reb i fan nrayog ni ngari mich u wan’dad nrayog ni ngad pared ndariy n’umngin nap’an?

5. Mang athap e immoy ko gal nsom’on e girdi’?

⁵ Gubin ban’en nib fos ni sunmiy Jehovah u fayleng e ra munmun me yim’, ma kemus ni yigoo girdi’ e sunmiyrad me pi’ e athap ngorad ndab ra m’ad. Machane i yog Jehovah ngak Adam ni gaar: “Ke mus ni fare ke gek’iy ni ma tamilangnag an’uy ko tin nib fel’ nge tin nib kireb e dab mu koy. Thingar dab mu koy wom’engin. Ya rofen ni ga ra kay e ga ra yim’.” (Gen. 2:17) Ere faan gomanga fol Adam nge Efa rok Jehovah, ma aram e dab ra m’ow. Kub puluw ni nge mich u wan’dad ni faan gomanga ra folgow rok, ma ra munmun ma ra pagrow ni ngar kew wom’engin “fare ke gek’iy ni ma pi’ e yafos.” Re n’ey e be yip’ fan ni ke micheg ngorow ni yow ‘ra par ni dab kur m’ow’ ara ra parew ndariy n’umngin nap’an. b​—Gen. 3:22.

6-7. (a) Mang e ku be dag ndan sunmiy e girdi’ ni ngaur m’ad? (b) Mang boch ban’en ni ga baadag ni ngam rin’ u paradis? (Mu guy fapi sasing.)

⁶ Bay boch e girdi’ ni llowan’ ni kar pirieged ni urngin ban’en nrayog ni nge taw nga lan e  man’ey ko girdi’ e ka boor ko tin rayog ni ngad filed u n’umngin nap’an e yafos rodad e chiney. Nap’an e duw ni 2010, me yog ba ken e babyor ni kan susunnag ma man’ey ko girdi’ e rayog ni nge taw ngay e n’en bay u ba video nsogonap’an dalip milyon e awa n’umngin nap’an. Ere ba pag 300 e duw ni yira yaliy e n’en bay ko re video ney. Bin riyul’ riy e, sana ka boor ban’en nrayog ni nge taw ko man’ey rodad nga urngin ni ka nog u roy. Re n’ey e be dag ni ke sunmiy Jehovah e man’ey rodad ni ka boor ban’en nrayog ni nge taw ngay ko tin gad ma fil u lan 70 ara 80 e duw.​—Ps. 90:10.

⁷ Ki sunmiydad Jehovah ni gad baadag ni ngad pared ndab da m’ad. Be yog e Bible ni “ke tay e manemus nga laniyan’” e girdi’. (Ekl. 3:11, NW) Aram reb i fan ni gad ma tay ni yam’ e reb e toogor. (1 Kor. 15:26) Faanra ke yib ba mit e m’ar ngodad nib ubchiya’, ma gur, kemus ni gad ra par ngad sonnaged e ngiyal’ ni ngad m’ad riy ma dariy ban’en ni gad ra rin’ ngay, fa? Danga’, ya ba ga’ ni gad ma yan da guyed e togta ma gad unum e falay ni kan pi’ ngodad ni nge golnag fare miti m’ar. Bin riyul’ riy e, gad ma rin’ urngin ban’en nrayog rodad ya nge dab da m’ad. Maku reb e, nap’an nra yim’ be’ nib t’uf rodad ndemtrug ko kab bitir fa ke pilibthir, mab n’uw nap’an ni gad ma par nib kireban’dad. (John 11:32, 33) Ere ba mudugil ndabi taydad e En Ke Sunmiydad ni gad baadag maku rayog ni ngad pared ndab da m’ad ni faanra gathi aram e n’en nib m’agan’ ngay ni fan ko girdi’. Machane ku boor fan nrayog ni nge mich u wan’dad nrayog ni ngad pared ndariy n’umngin nap’an. Chiney e ngad weliyed boch ban’en ni i rin’ Jehovah kakrom nge boch ni be rin’ e chiney ni be micheg ndawori thil e n’en nib m’agan’ ngay aram ko som’on.

8. Mang e be fil e Isaiah 55:11 ngodad u murung’agen e n’en nib m’agan’ Jehovah ngay ni fan ngodad?

⁸ Yugu aram rogon ni denen Adam nge Efa me munmun me yim’ pi fakrow, machane de thilyeg Jehovah e n’en nib m’agan’ ngay. (Mu beeg e Isaiah 55:11.) Kab m’agan’ ngay ni nge par e girdi’ ni yad ba yul’yul’ ndariy n’umngin nap’an. Kad nanged e re n’ey ni bochan e n’en ke yog nge n’en ke rin’ ya nge yag ni lebguy e n’en nib m’agan’ ngay.

9. Mang e ke micheg Got? (Daniel 12:2, 13)

⁹ Ke micheg Jehovah nra faseg e piin kar m’ad me bing e kanawo’ ngorad ni ngar pared ndariy n’umngin nap’an. (Acts 24:15; Titus 1:1, 2) Job ni ir be’ nib yul’yul’ e ba mich u wan’ nri baadag Jehovah ni nge faseg e piin kar m’ad. (Job 14:14, 15) Me Daniel ni profet e manang ni yira faseg e piin kar m’ad min bing e kanawo’ ngorad ni ngar pared ndariy n’umngin nap’an. (Ps. 37:29; mu beeg e Daniel 12:2, 13.) Mus ko pi Jew u nap’an Jesus ni yad manang nrayog ni nge pi’ Jehovah e “yafos ndariy n’umngin nap’an” ngak e pi tapigpig rok ni yad ba yul’yul’. (Luke 10:25; 18:18) Boor yay ni i weliy Jesus murung’agen e re n’ey, ma mus ngak ma kki faseg e Chitamangin ko yam’.​—Matt. 19:29; 22:31, 32; Luke 18:30; John 11:25.

10. Mang e be micheg e pi fos ko yam’ ni i buch kakrom? (Mu guy e sasing.)

¹⁰ Jehovah e ir e En Ke Pi’ e Yafos ngodad ma bay gelngin ni nge faseg e girdi’ ko yam’. I pi’ gelngin Elijah ni profet ni nge faseg fare pagel ni fak fare pin ni ke yim’ figirngin ni be’ nu Zarefath. (1 Ki. 17:21-23) Boch nga tomuren me ayuweg Got Elisha ni profet ni nge faseg fare pagel ni fak fare pin nu Shunem. (2 Ki. 4:18-20, 34-37) Gal fos ko yam’ ney nge yugu boch e fos ko yam’ ni buch e be micheg ni bay gelngin Jehovah ni nge faseg e girdi’ ko yam’. Nap’an ni immoy Jesus u fayleng, me micheg ni ke pi’ e Chitamangin gelngin ni nge rin’ e re n’ey. (John 11:23-25, 43, 44) Ma chiney ni bay u tharmiy e “kan pag fan urngin ban’en [ngak] u tharmiy ngu but’.” Ere rayog ni nge lebguy fare thin ni kan micheg ni aram e “gubin e yam’ ni bay u lan e low” e yira fasegrad min bing e kanawo’ ngorad ni ngar pared ndariy n’umngin nap’an.​—Matt. 28:18; John 5:25-29.

11. Uw rogon ni ke bing fare biyul e kanawo’ ngodad ni ngad pared ndariy n’umngin nap’an?

¹¹ Mang fan ni pag Jehovah Fak nrib t’uf rok ni nge yim’ u fithik’ e amith? I weliy Jesus fan ni gaar: “Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafos ndariy n’umngin nap’an ngorad.” (John 3:16) Nap’an ni pi’ Got Fak ni nge biyuliy e denen rodad, ma aram me bing e kanawo’ ni nge yag e yafos ndariy n’umngin nap’an ngodad bayay. (Matt. 20:28) Ireray bang nib ga’ fan ko n’en nib m’agan’ Got ngay ni weliy apostal Paul murung’agen u nap’an ni yoloy ni gaar: “Bod rogon ni yam’ e yib ni bochan taareb e girdi’, e aram rogon ni fos ko yam’ e yib ni bochan taareb e girdi’. Rogon ni ma yim’ urngin e girdi’ ni bochan e yad taab girdi’ Adam, e aram rogon ni gubin e girdi’ ni bay ni faseg ko yam’ ni bochan e kar taab girdi’gad Kristus.”​—1 Kor. 15:21, 22.

12. Uw rogon nra lebguy Gil’ilungun Got e n’en nib m’agan’ Jehovah ngay ni fan ngodad?

¹² I fil Jesus ngak pi gachalpen ni ngar yibilayed Gil’ilungun Got ni nge yib ma ngkur yibilayed ni ngan rin’ e n’en nib m’agan’ Got ngay u roy u fayleng. (Matt. 6:9, 10) Bang ko n’en nib m’agan’ Got ngay e aram e nge par e girdi’ u fayleng ndariy n’umngin nap’an. Ere  ke mel’eg Jehovah Fak ni nge mang Pilung u Gil’ilungun fare Messiah ya nge yag ni lebguy e re n’ey. Kab kafram i yib ni be kunuy Got 144,000 e girdi’ u fayleng ni ngar maruwelgad Jesus u taabang ni ngar lebguyed e n’en nib m’agan’ ngay.​—Rev. 5:9, 10.

13. Mang e be rin’ Jehovah e chiney, ma mang e thingar mu rin’?

¹³ Chiney e be kunuy Jehovah e “girdi’ ni ke muulung ni pire’ ni pire’,” ma be fil ngorad rogon ni ngar pared u tan Gil’ilungun. (Rev. 7:9, 10; Jas. 2:8) Yugu aram rogon ni yooren e girdi’ u fayleng e ngiyal’ ney e kar ruw raba’gad ni bochan e fanenikan nge mahl, machane fapi “girdi’ ni ke muulung ni pire’ ni pire’” e yad be athamgil u rogon nrayog rorad ni ngar chuweged urngin mit e fanenikan ni bay rorad. Ere gowa bod ni yad be pirdiiy e sayden rorad ngar ngongliyed talin e maruwel riy ni ma gi’ e but’. (Mik. 4:3) Yad be ayuweg e girdi’ ni ngar pirieged e “bin riyul’ e yafos” ni aram e yad be fil murung’agen e bin riyul’ e Got ngorad nge tin nib m’agan’ ngay, ko bin ngar uned ko pi mahl ni yibe tay ni boor e girdi’ ni be yim’ riy. (1 Tim. 6:19) Rayog ni nge togopuluw chon e tabinaw rorad ngorad ara m’ay e salpiy rorad ni bochan e yad be ayuweg Gil’ilungun Got. Machane ma pi’ Jehovah urngin e tin nib t’uf rorad. (Matt. 6:25, 30-33; Luke 18:29, 30) Pi n’ey e be micheg ngodad nib riyul’ Gil’ilungun Got, ma ra ulul ni nge lebguy e n’en nib m’agan’ Jehovah ngay.

14-15. Uw rogon nra lebug e n’en ke micheg Jehovah ni aram e ra chuweg e yam’ ndariy n’umngin nap’an?

¹⁴ Chiney e ke Pilung Jesus u Gil’ilungun Got u tharmiy, ma ra lebguy urngin ban’en ni ke micheg Jehovah. (2 Kor. 1:20) Ka nap’an e duw ni 1914 ni be gel Jesus ko pi toogor rok. (Ps. 110:1, 2) Dabki n’uw nap’an ma ra thang Jesus nge piin yad ra un ngak ko gagiyeg urngin e piin yad ba kireb.​—Rev. 6:2.

¹⁵ Nap’an nra Gagiyeg Jesus u Lan Fare Biyu’ i Duw, ma ra faseg e piin kar m’ad me ayuweg urngin e piin yad ra fol rok Jehovah ni ngkur flontgad bayay. Tomuren e bin tomur e skeng ma piin nra dugliy Jehovah ni yad ba mat’aw e “bay ra pired u daken e binaw u fithik’ e gapas, me par ni taferad ni dariy n’umngin nap’an.” (Ps. 37:10, 11, 29) Ri gad ba felfelan’ ngay ni yira “gel ngak e yam’” ni aram e “bin th’abi tomur e toogor.”​—1 Kor. 15:26.

16. Mang e bin th’abi ga’ i fan ni gad ma pigpig ngak Jehovah?

¹⁶ Kad filed ko re article ney ni athap ko yafos ndariy n’umngin nap’an ni bay rodad e be tor nga daken e Thin rok Got. Re athap ney e rayog ni nge ayuwegdad ni ngad pared ni gad ba yul’yul’ e ngiyal’ ney ko tin tomuren e rran ni ke mo’maw’ e par riy. Machane faanra ngad fel’gad u wan’ Jehovah, ma de gaman ni kemus ni ngad adaged ni ngad pared ni gad ba fos. Ya bin th’abi ga’ i fan ni gad ma par ni gad ba yul’yul’ ngak Jehovah nge Jesus e bochan nri yow ba t’uf rodad. (2 Kor. 5:14, 15) Re t’ufeg ney e ma k’aringdad ni ngad folwokgad rorow, ma gad weliy murung’agen e athap rodad ko girdi’. (Rom. 10:13-15) Ma nap’an ni gad ra fil rogon ni ngaud golgad ma dab ud pared ni yigoo gadad e gad be lemnagdad, ma aram e gad ra mang e re miti girdi’ ni baadag Jehovah ni ngar manged fager rok ndariy n’umngin nap’an.​—Heb. 13:16.

17. Mang e ba milfan ngodad? (Matthew 7:13, 14)

¹⁷ Gad ra moy u fithik’ e piin nra yag e yafos ndariy n’umngin nap’an ngorad, fa? Ke bing Jehovah e kanawo’ ni nge yag e re tow’ath ney ngodad. Ere gadad e ba milfan ngodad e chiney ni ngad pared u daken fare pa’ i kanawo’ ni be sor ko yafos. (Mu beeg e Matthew 7:13, 14.) Uw rogon e par rodad u nap’an ni gad ra par ndariy n’umngin nap’an? Gad ra weliy e fulweg ko re deer ney ko bin migid e article.