Kam beeg e pi Wulyang ko Damit ni fan ko re duw ney nib fel’ rogon, fa? Mu guy ko rayog ni ngam pi’ e fulweg ko pi deer ni baaray fa dabiyog:

Mang e ba muun ngay ni ngad ‘piliyeged lanin’dad ni polo’’? (Rom. 12:2)

Re n’ey e gathi kemus ni be yip’ fan ni ngad rin’ed in ban’en nib manigil, ya ba muun ngay ni ngad fal’eged i yaliy e bin riyul’ i rarogodad ma gad thilyeg e tin nib t’uf ni ngad thilyeged riy ya nge yag nda folgad ko pi motochiyel rok Got u rogon feni fel’ rogon nrayog rodad.​—w23.01, pp. 8-9.

Uw rogon ni ngad kol ayuwgad u nap’an ni gad be yaliy e pi n’en be buch u fayleng?

Gad baadag ni ngad guyed rogon ni be lebguy e pi n’en be buch u fayleng e pi yiiy u Bible. Ba t’uf ni nge puluw e n’en gad ma weliy ko n’en bay ko pi babyor ni ke ngongliy e ulung rok Jehovah ko bin ngaud sananaged fan boch ban’en ni kan weliy, ya rayog ni nge ruw raba’nag e ulung. (1 Kor. 1:10)​—w23.02, p. 16.

Uw rogon nib thil e taufe ni un Jesus ngay ko taufe ni ma un pi gachalpen ngay?

De t’uf ni nge ognag Jesus ir ngak Jehovah ya kan gargeleg nga ba nam ni kan mu’ i ognag ngak Got. Ir be’ nib flont ndariy e denen rok ma de t’uf ni nge kalngan’ ko denen rok.​—w23.03, p. 5.

Uw rogon nrayog ni ngad ayuweged yugu boch e girdi’ ni ngar pied e fulweg u nap’an e muulung?

Rayog ni ngad pied e fulweg nib ngoch ya nge yag ni ngki pi’ yugu boch e girdi’ e fulweg. Ku rayog ni ngad guyed rogon ndabi yoor ban’en ni ngad weliyed murung’agen. Faan gad ra rin’ e re n’ey, ma aram e rayog ni nge magey ban’en ni ngki weliy yugu boch e girdi’.​—w23.04, p. 23.

Mang e be yip’ fan fare “Wo’ nib Thothup” ni bay murung’agen ko Isaiah 35:8?

Re pa’ i kanawo’ ney nib fanathin e som’on e be yip’ fan e kanawo’ ni yan e pi Jew riy u Babylon ko nam rorad. Ma uw rogon e ngiyal’ ney? Bokum miriay e duw u m’on ko 1919, min rin’ boch e maruwel nib t’uf ni ngan rin’ ya nge yag nni bing e re kanawo’ ney, ni aram e un pilyeg ma yibe printnag e Bible maku yibe rin’ boch ban’en. Kab kafram i yib ni be milekag e girdi’ rok Got u daken fare pa’ i “Wo’ nib Thothup” nra fekrad i yan ko pi tow’ath ni bay u tan Gil’ilungun Got.​—w23.05, pp. 15-19.

Mini’ fagal ppin nib fanathin ni be pi’ e Proverbs ko guruy ni 9 boch e fonow ni bay rogon ngorow?

Be weliy e Proverbs murung’agen be’ nib “pin nib pinat” nra fekey i yan ko “fayleng ko yam’,” nge be’ nib pin ni be yip’ fan e bin riyul’ e “gonop” nra fekey i yan nga “kanawoen e llowan’” nge yafos. (Prov. 9:​1, 6, 13, 18, BT)​—w23.06, pp. 22-24.

Uw rogon ni m’ug ko ngongol rok Got ngak Lot nib sobut’an’ mab puluw rogon ni ma lemnag boch ban’en?

I yog Jehovah ngak Lot ni nge mil nga daken e burey. Machane nap’an ni wenig ngak Jehovah ni nge pag nge yan nga Zoar, ma aram me pag ni nge yan ngaram.​—w23.07, p. 21.

Mang e rayog ni nge rin’ reb i leengiy ni faanra be yaliy e en mabgol rok yaan e ngongol ni puwlag?

Thingar dabi pagtalin ni gathi ir e ba kireb e rok. Susun e nge guy rogon ni nga i lemnag e tha’ u thilrow Got me fal’eg i lemnag murung’agen boch e ppin u Bible ni ur mochuchgad me yag ni nge fal’eg Got lanin’rad. Rayog ni nge ayuweg e en mabgol rok ni nge siyeg boch ban’en nra waliy ko biney e ngongol.​—w23.08, pp. 14-17.

Uw rogon nra ayuwegdad e tamilangan’ u nap’an nra togopuluw be’ nga boch ban’en nib mich u wan’dad?

Rayog ni nge ayuwegdad e deer rok ni ngad nanged e n’en be lemnag ara n’en nib ga’ fan u wan’. Ku rayog ni nge ayuwegdad ni ngad fulweged lungun be’ u fithik’ e sumunguy.​—w23.09, p. 17.

Mang e rayog ni ngad filed rok Maria u murung’agen rogon ni nge yib gelngidad?

Nap’an ni nang Maria nra mang chitiningin fare Messiah, me sap ngak yugu boch e girdi’ ni ngar pied gelngin. I pi’ Gabriel nge Elizabeth e athamgil nga laniyan’. Ku rayog ni nge pi’ e pi walag gelngidad.​—w23.10, p. 15.

Uw rogon nrayog ni nge fulweg Jehovah taban e meybil rodad?

Ke micheg nra motoyil ko meybil rodad, maku ma lemnag rogon nib peth e pi n’en gad be ning ngak ko n’en nib m’agan’ ngay. (Jer. 29:12) Rayog nib thil rogon nra fulweg taban e meybil rok l’agruw ni’ ni taab n’en e yow be yibilay, machane gubin ngiyal’ nra ayuwegdad.​—w23.11, pp. 21-22.

Kan weliy murung’agen e “l’agan’” ko Roma 5:​2, ere mang fan ni kun weliy murung’agen bayay ko verse 4?

Nap’an nra rung’ag be’ fare thin nib fel’, ma rayog ni nge l’agan’ ko yafos ni manemus u paradis u fayleng. Machane nap’an nra mada’nag e gafgow, me k’adan’ u fithik’, me nang nib fel’ u wan’ Got, ma aram e ra gel e l’agan’ ni be tay mi ri ga’ fan u wan’.​—w23.12, pp. 12-13.