1. Mang deer e rayog ni ngad fithed gadad riy u nap’an ni gad ra lemnag rogon e michan’ rok Abraham?

 YUGU aram rogon ni boor e girdi’ ni kar rung’aged murung’agen Abraham, machane yooren i yad e buchuuw ban’en ni manang u murung’agen. Me gur e boor ban’en ni ga manang u murung’agen Abraham. Bod ni ga manang ni yima yog ni Abraham e ir “chitamangin urngin e piin ni ke mich Got u wun’rad.” (Rom. 4:11) Machane sana ra lungum u wan’um, ‘Gur, rayog ni nggu folwok rok Abraham me yag e michan’ rok ngog, fa?’ Arrogon, rayog.

2. Mang nib ga’ fan ni ngad filed murung’agen Abraham? (James 2:​22, 23)

² Reb e kanawo’ nrayog ni nge yag e michan’ rok Abraham riy ngodad e aram e ngad filed murung’agen. I fol ko n’en ni yog Got ngak, ma aram me chuw nge yan i par nga reb e nam nib palog, ma boor e duw ni i par u lan e tent, miki m’agan’ ngay ni nge pi’ Isak ni fak nrib t’uf rok ni maligach. Gubin e pi n’ey ni be m’ug riy nib gel e michan’ rok. Michan’ rok Abraham nge tin ni i rin’ e ayuweg ni nge fel’ u wan’ Got me mang fager rok. (Mu beeg e James 2:​22, 23.) Gubin e girdi’ ni baadag Jehovah ni ngar fel’gad u wan’ mar manged fager rok ni ka gab muun ngay. Aram fan ni thagthagnag nga laniyan’ Paul nge James nra yoloyew boch e babyor u Bible ni ngar weliyew murung’agen Abraham. Ere chiney e ngad weliyed e n’en ni rin’ ni bay ko Roma ko guruy ni 4 nge James ko guruy ni 2. Gal guruy ney e be weliy ban’en nni weliy u murung’agen Abraham nrib ga’ fan.

3. Mang thin nu Bible e sul Paul nge James u daken?

³ I sul Paul nge James u daken fapi thin ni bay ko Genesis 15:6 ni be gaar: “Me pagan’ [ara michan’] Abram ko tin ni ke yog Somol, ma aram me matheeg Somol ngak Abram ni be’ ni ke mat’aw.” Ra mat’aw be’ ara par ndariy thibngin u wan’ Got ni faanra  be rin’ e tin nib m’agan’ ngay. Ere riyul’ ni yira ngat nga rogon nrayog ni nge par be’ ndariy thibngin u wan’ Got ni yugu aram rogon ndawori flont ma kab tadenen! Dabisiy ni ga baadag ni ngkum mat’aw u wan’ Got, ma re n’ey e ban’en nrayog ni nge buch. Ere ra ngad nanged rogon nrayog ni ngad mat’awgad u wan’ Got, ma aram e ba t’uf ni ngad nanged fan ni yag ni ngki mat’aw Abraham u wan’ Got.

4. Mang e be taleg e girdi’ ndab ra mat’awgad?

⁴ Nap’an ni yol Paul ngak piyu Roma, me yog ni gubin e girdi’ ni yad bogi tadenen. (Rom. 3:23) Ere uw rogon nrayog ni nge mat’aw be’ me par ndariy thibngin me fel’ u wan’ Got? I weliy Paul murung’agen Abraham ya nge ayuweg urngin e tin riyul’ e Kristiano ni ngar nanged e fulweg ko re deer ney.

5. Mang fan ni yog Jehovah ni Abraham e ir be’ nib mat’aw? (Roma 4:​2, 4)

⁵ I yog Jehovah ni Abraham e ir be’ nib mat’aw u nap’an ni be par u Kanaan. Mang fan nrayog ni nge yog Jehovah nib mat’aw Abraham? Gur, bochan e be fol ko fare Motochiyel rok Moses? Danga’. (Rom. 4:13) Ba pag 400 e duw nga tomuren ni yog Got ni Abraham e ir be’ nib mat’aw, mfin nni pi’ fare Motochiyel ngak piyu Israel. Ere mang fan nrayog ni nge yog Got ni Abraham e ir be’ nib mat’aw? Bochan e runguy rok Jehovah ngak Abraham, me yog ni ir be’ nib mat’aw u daken e michan’ rok.​—Mu beeg e Roma 4:​2-4.

6. Uw rogon nrayog ni nge mat’aw reb e tadenen u wan’ Jehovah?

⁶ I yog Paul nnap’an nra mich Got u wan’ be, ma aram e “ke matheeg Got ngak ni ir be’ nib mat’aw.” (Rom. 4:5) Ki ulul Paul ngay ni gaar: “Erera’ e re n’en ni i yip’ David fan ni faani weliy murung’agen e felfelan’ ni ta’ faanem nde muruwliy ban’en me matheeg Got ngak ni ir be’ ni ke mat’aw ni gaar: ‘Kari felfelan’ e piin ni ke n’ag Got fan u wan’ e kireb rorad, ni piin ni ke upunguy Got e denen rorad! Kari felfelan’ e en ni denen rok e dab ki ta’ Somol ni malfith rok!’” (Rom. 4:​6-8; Ps. 32:​1, 2) Ma n’ag Got fan ara ma upunguy e denen rok e piin nib mich u wan’rad. Ri ma n’ag fan e denen rorad ma dakir ma tay ni malfith rorad. Ma tayrad ndariy thibngirad ma yad ba mat’aw u wan’ ni bochan e michan’ rorad.

7. Mang fan nrayog ni nga dogned nib mat’aw e pi tapigpig rok Got ni yad ba yul’yul’?

⁷ Yugu aram rogon ni Abraham, nge David, nge yugu boch e tapigpig rok Got ni yad ba yul’yul’ e yad ba mat’aw u wan’, machane ka yad bogi tadenen ndawor ra flontgad. Bochan e michan’ rorad, ma aram me tayrad Got ndariy thibngirad nib ga’ nu nap’an nra taareb rogonnagrad ngak e piin ndarur liyorgad ngak. (Efe. 2:12) I tamilangnag Paul u lan e babyor rok ni faanra nge fel’ u tha’ u thildad Got, mab t’uf ni nge yag e michan’ ngodad. Aram rogon Abraham nge David, maku arrogodad nrayog ni nge fel’ e tha’ u thildad Got ni faanra bay e michan’ rodad.

8-9. Mang boch ban’en nde puluw ni ke yog boch e girdi’ u murung’agen e n’en ni yoloy Paul nge James, ma mang fan?

⁸ Ke yan bokum miriay e duw ni ma luag e pi tayugang’ ko teliw e thin u murung’agen e michan’ nge ngongol. Bay boch i yad ni ma yog nra nge yag e yafos ngom, ma kemus nib t’uf ni nge mich Somol Jesus Kristus u wan’um. Sana rayog ni kam rung’ag ni ke lungurad, “Nge mich Jesus u wan’um, ma aram e kam thap.” Ku rayog ni nge sul boch i yad u daken fapi thin ni yog Paul ni gaar: ‘Faanem nde muruwliy ban’en e matheeg Got ngak ni ir be’ ni ke mat’aw.’ (Rom. 4:6) Machane bay boch i yad ni ma yog nrayog  ni “nge yag e yafos ngom” ni faanra um man nga yu yang i ban’en ni ma tay e galesiya nib thothup, ma ga be rin’ boch ban’en nib fel’ ni fan ko girdi’. Ku rayog ni ngar sulod u daken fapi thin ni bay ko James 2:24 ni be gaar: “Ma mat’aw be’ ngak Got u daken e ngongol rok, ma gathi ke mus nu daken e michan’ rok ngak Got.”

⁹ Bochan e re n’ey, ma aram fan ni bay boch e girdi’ ni boor ban’en u murung’agen e Bible ni yad manang ni yad ma lemnag nde taareban’ Paul nge James ko n’en ur weliyew u murung’agen e michan’ nge ngongol. Rayog ni nge yog boch e tayugang’ ko teliw ni Paul e ba mich u wan’ nrayog ni nge mat’aw be’ u daken e michan’ rok nde chag e ngongol ngay, me James e yog nib t’uf ni nge rin’ be’ boch ban’en nib fel’ ya nge yag ni fel’ u wan’ Got. I yog reb e sensey u reb e skul nib tolang ni ma fil murung’agen e teliw ni gaar: “De nang James fan ni yog Paul [nrayog ni nge mat’aw be’] u daken e michan’ rok nde t’uf ni nge chag e ngongol ngay.” Machane bin riyul’ riy e Jehovah e ir e thagthagnag nga laniyan’ Paul nge James ni ngar yoloyew fapi thin nrognew. (2 Tim. 3:16) Ere dabisiy ni bay reb e kanawo’ nib mom ni ngad nanged fan riy e n’en rognew. Kub t’uf ni ngad guyed yugu boch ban’en ni ur weliyew u nap’an ni yow be yoloy e babyor rorow.

10. Mang e pi n’en be “muruwliy” be’ nib ga’ ni i weliy Paul murung’agen? (Roma 3:​21, 28) (Kum guy e sasing.)

¹⁰ Mang e pi n’en be “muruwliy” be’ ni weliy Paul murung’agen ko Roma ko guruy ni 3 nge 4? Ba ga’ ni be weliy murung’agen e tin be rin’ be’ ni “be yog fare Motochiyel” ni aram fare motochiyel rok Moses nni pi’ u daken fare Burey ni Sinai. (Mu beeg e Roma 3:​21, 28.) Bod nnap’an ni immoy Paul ma bay boch e Kristiano ni yad boch e Jew nib mo’maw’ ni nge m’agan’rad ngay ndaki t’uf ni ngan fol ko fare Motochiyel rok Moses. Ere weliy Paul murung’agen  Abraham ni nge micheg nde t’uf ni nge rin’ be’ e “tin ni be yog fare Motochiyel” ni faanra nge mat’aw u wan’ Got. Ya ra mat’aw be’ u wan’ Got u daken e michan’ rok. Be pi’ e re n’ey e athamgil nga lanin’dad ni bochan e be fil ngodad ni faanra mich Got nge Kristus u wan’dad, ma aram e rayog ni ngad fel’gad u wan’ Got.

11. Mang “ngongol” e be weliy James murung’agen?

¹¹ Machane “ngongol” ni kan weliy murung’agen ko James ko guruy ni 2 e gathi taareb rogon ko tin be rin’ be’ ni “be yog fare Motochiyel” ni faani weliy Paul murung’agen. Ya be weliy James murung’agen e ngongol ko piin Kristiano ara tin yad ma rin’ u reb e rran ngu reb. Tiney e ngongol e ra dag ko riyul’ nib mich Got u wan’ reb e Kristiano fa danga’. Am lemnag l’agruw ban’en ni weliy James murung’agen.

12. Uw rogon ni weliy James e n’en nib peth u thilin e michan’ nge ngongol? (Kum guy e sasing.)

¹² Bin som’on e weliy James nib t’uf ni nge dab i laniyan’ e piin Kristiano. I tamilangnag e re n’ey u daken ba fanathin ni weliy ni murung’agen be’ nib pumoon ni gol ngak be’ ni boor ban’en rok me darifannag be’ nib gafgow. I yog James ni be’ ni aray rogon e sana rayog ni nge yog ni bay e michan’ rok, machane der m’ug ko ngongol rok. (Jas. 2:​1-5, 9) Bin migid e weliy James murung’agen be’ ni ke guy ‘walagen ni girdien Kristus ni pumoon ara ppin ni ke gafgow ko mad ma de gaman e ggan rok,’ machane de ayuweg. Ere mus ni faanra yog facha’ ni bay e michan’ rok, machane bin riyul’ riy e der dag ko ngongol rok; ere ba m’ay fan e michan’ rok. Ya yoloy James ni gaar, “faanra ke mus ni goo michan’ ngak Got ma de chag e ngongol ngay, ma aram e ba yam’ fare mich.”​—Jas. 2:​14-17.

13. Uw rogon ni tamilangnag James e n’en be weliy u murung’agen e michan’ nib chag e ngongol ngay? (James 2:​25, 26)

¹³ I weliy James murung’agen Rahab ni ir be’  ni dag ko ngongol rok ni bay e michan’ rok. (Mu beeg e James 2:​25, 26.) Ke rung’ag murung’agen Jehovah ma ke nang ni be ayuweg piyu Israel. (Josh. 2:​9-11) I dag ko ngongol rok ni bay e michan’ rok ni aram e ayuweg e yafos rok l’agruw i damit ni yow e girdi’ nu Israel u nap’an ni par e yafos rorow nga thatharen e riya’. Bochan e re n’ey, ma aram me mat’aw e re ppin ney ndawori flont ma gathi ir be’ nu Israel ngak Got ni bod Abraham. N’en ni rin’ e be tamilangnag feni ga’ fan ni nge yag e michan’ ngodad nib chag e ngongol ngay.

14. Mang fan nrayog ni nga dogned nde togopuluw e n’en ni yog Paul ko n’en ni yog James?

¹⁴ Ere kemus ni be weliy Paul nge James murung’agen e michan’ nge ngongol u l’agruw e kanawo’ nib thil. Paul e be yog ngak e pi Kristiano ni yad boch e Jew ndabiyog ni ngar fel’gad u wan’ Jehovah ni faanra kemus ni yad be rin’ e n’en be yog fare Motochiyel rok Moses, ma James e be tamilangnag nib t’uf ni nge dag urngin e Kristiano ni bay e michan’ rorad u daken e tin nib fel’ ni yad be rin’ ni fan ko girdi’.

15. Mang boch e kanawo’ nrayog ni ngad daged ko ngongol rodad ni bay e michan’ rodad? (Kum guy e sasing.)

¹⁵ Der yog Jehovah ni faanra ngad mat’awgad, ma aram e thingar da rin’ed e n’en ni i rin’ Abraham. Ya bin riyul’ riy e boor e kanawo’ nrayog ni ngad daged ko ngongol rodad ni bay e michan’ rodad. Rayog ni ngad golgad ngak e piin ka yad bbeech ko ulung rodad, ma gad ayuweg e pi walag ni kari t’uf e ayuw rorad, ma gad rin’ boch ban’en nib fel’ ni fan ko girdi’ u lan e tabinaw rodad, ni aram boch ban’en nra fel’ u wan’ Got ma ra tow’athnagdad riy. (Rom. 15:7; 1 Tim. 5:​4, 8; 1 John 3:18) Reb e ban’en nra m’ug riy nriyul’ ni bay e michan’ rodad e aram e ngad machibnaged fare thin nib fel’ ko girdi’ u fithik’ e pasig. (1 Tim. 4:16) Gad gubin nrayog ni ngad daged u daken e ngongol rodad  nib mich u wan’dad nra riyul’ e tin ke micheg Jehovah ma tirok e kanawo’ e aram e tin th’abi fel’. Faan gad ra rin’ e re n’ey, ma aram e rayog ni nge pagan’dad ngay nra matheeg Got ngodad ni kad mat’awgad me taydad ni gad boch e fager rok.

16. Uw rogon nib peth e l’agan’ ni i tay Abraham ko michan’ rok?

¹⁶ Ku be tamilangnag e Roma ko guruy ni 4 reb e ban’en nib ga’ fan nrayog ni ngad filed rok Abraham. Re n’em e aram rogon feni ga’ fan e l’agan’. I micheg Jehovah nra tow’athnag “boor e nam” u daken Abraham. Am lemnag feni manigil e n’en ni i l’agan’ Abraham ngay! (Gen. 12:3; 15:5; 17:4; Rom. 4:17) Machane yugu aram rogon ni ke gaman 100 e duw rok ma Sarah e ke gaman 90, ma ka dawor ra fakayew fare pagel nni micheg ni yow ra fakay. Rayog ni ngan lemnag ndabkiyog rok Abraham nge Sarah ni ngar fakayew e bitir. Ere re n’ey e ba skeng ngak Abraham. Machane yugu aram rogon me “par Abraham ni kab mich Got u wan’ ma be l’agan’ ko tin ni ke yog Got ngak, ma aram me yog ni mang ‘chitamangin boor e nam.’” (Rom. 4:​18, 19) Munmun me riyul’ e n’en ni i athapeg. I fakay Isak ni aram fare tir ni ke n’uw nap’an ni i sonnag.​—Rom. 4:​20-22.

17. Uw rogon ni kad nanged nrayog ni ngan matheeg ngodad ni gad boch e fager rok Got ni kad mat’awgad?

¹⁷ Rayog ni ngad fel’gad u wan’ Got min matheeg ngodad ni gad boch e fager rok ni kad mat’awgad ni bod Abraham. Ireray e n’en ni tamilangnag Paul u nap’an ni yoloy ni gaar: “Pi thin ni baaray ni ke gaar e babyor e ‘matheeg Got ngak ni ir be’ ni ke mat’aw’ e gathi ni yoloy ni ke mus ni ir [Abraham] e fan ngak. Ya kan yoloy ni ku fan ngodad e piin ni bayi matheeg Got ngodad ni kad mat’awgad, ni piin ni ke mich u wun’rad e cha’ ni ir e faseg e Somol rodad i Jesus.” (Rom. 4:​23, 24) Ba t’uf ni nge yag e michan’ ngodad nib chag e ngongol ngay, miki yag e l’agan’ ngodad ni bod Abraham. Ki ulul Paul ni nge weliy murung’agen e l’agan’ rodad ko Roma ko guruy ni 5 ni aram e n’en gad ra weliy ko bin migid e article.