1. Mang fan nrayog ni nga dogned ni bay tapgin ni nge ulul Abraham ni nge athapeg ni nge fakay reb e bitir nib pagel?

 I MICHEG Jehovah ngak Abraham ni fager rok ni yira tow’athnag urngin e nam nu fayleng u daken owchen. (Gen. 15:5; 22:18) Bochan nrib mich Got u wan’ Abraham, ma aram fan nib pagan’ ngay nra riyul’ e n’en ke micheg Got. Yugu aram rogon, ma nap’an ni ke gaman 100 e duw rok Abraham ma leengin e 90 e duw rok, ma ka dawor ra fakayew reb e bitir nib pagel. (Gen. 21:​1-7) Machane be gaar e Bible: “[I] par Abraham ni kab mich Got u wan’ ma be l’agan’ ko tin ni ke yog Got ngak, ma aram me yog ni mang ‘chitamangin boor e nam.’ Nri bod rogon ni be yog e babyor nib thothup.” (Rom. 4:18) Ga manang ni riyul’ e n’en ni i l’agan’ Abraham ngay. I fakay fare tir nib pagel ni ke n’uw nap’an ni i sonnag ni aram Isak. Ere mang fan nib pagan’ Abraham ngay nra rin’ Jehovah e n’en ke micheg?

2. Mang fan nib mich u wan’ Abraham nra riyul’ e n’en ke micheg Jehovah?

² Bochan nrib chugur e tha’ u thilin Jehovah nge Abraham, ma aram fan nrib mich u wan’ nra riyul’ e “tin ni ke yog Got ngak ni bay rin’.” (Rom. 4:21) Ba fel’ Abraham u wan’ Jehovah me yog ni ir be’ nib mat’aw u daken e michan’ rok. (Jas. 2:23) Be yog e Roma 4:18 ni michan’ rok Abraham e ba peth ko n’en ni i l’agan’ ngay. Ere chiney e ngad weliyed e n’en ni yog apostal Paul u murung’agen e l’agan’ nrogon ni bay ko Roma ko guruy ni 5.

3. Mang e weliy Paul u murung’agen e l’agan’?

³ I weliy Paul fan nrayog ni nge pagan’dad ngay ni l’agan’ rodad e “dabi m’ing lanin’dad riy.” (Rom. 5:5) Ki ayuwegdad ni ngad nanged rogon nrayog ni ngari pagan’dad nra riyul’ e tin ke l’agan’dad ngay. Nap’an ni gad be weliy e n’en ni yog Paul ko Roma 5:​1-5, mag lemnag e n’en ke buch rom. Faan ga ra rin’ e re n’ey, ma dabisiy ni ga ra guy ni kab kafram i yib ke mada’ ko chiney ni be gel e pagan’ rom ngay nra riyul’ e tin ke l’agan’um  ngay. N’en gad ra weliy e ku ra tamilang riy rogon nrayog ni nge gel boch e l’agan’ rom nga rogon ni bay e chiney. Machane som’on e ngad weliyed murung’agen reb e l’agan’ nib manigil ndabi m’ing lanin’uy riy.

4. Mang e kan weliy ko Roma 5:​1, 2?

⁴ Mu beeg e Roma 5:​1, 2. I yoloy Paul e pi thin ney ko ulung nu Roma. Ke fil e pi walag u rom murung’agen Jehovah nge Jesus, ma kar maruweliyed e michan’ rorad, ma kar manged boch e Kristiano. Ere ‘mat’awnagrad Got ngak u daken e michan’ rorad,’ me dugliyrad nga gelngin nib thothup. Arrogon, ke yag reb e l’agan’ ngorad nib manigil, ma rayog ni nge pagan’rad ngay ni yira pi’ ngorad.

5. Mang e be l’agan’ e piin kan dugliyrad ngay?

⁵ Boch nga tomuren me yol Paul ko pi Kristiano ni kan dugliyrad u Efesus ni be weliy murung’agen e l’agan’ ni kan pi’ ngorad. Re l’agan’ nem e ba muun ngay e pi n’en ke yog Got ni “bayi pi’ ngak e tirok e girdi’.” (Efe. 1:18) Ki yog Paul ngak piyu Kolose murung’agen e gin nra yag e tow’ath rorad riy ngorad. I yog ni aram e ‘n’en ni ke l’agan’rad ngay, ni ir e be chaariy Got u tharmiy ni fan ngorad.’ (Kol. 1:​4, 5) Ere n’en be l’agan’ e pi Kristiano ni kan dugliyrad ngay e aram e ngan fasegrad, ma ranod nga tharmiy nge yag e yafos ni manemus ngorad u rom, mar uned ngak Kristus ko gagiyeg.​—1 Thess. 4:​13-17; Rev. 20:6.

6. Mang e yog reb e walag ni pumoon ni ir bagayad e piin kan dugliy u murung’agen e n’en be l’agan’ ngay?

⁶ Pi Kristiano ni kan dugliyrad e rib ga’ fan u wan’rad e n’en be l’agan’rad ngay. Bay bagayad e pi cha’ney ni ka nog Brother Frederick Franz ngak ni weliy rogon laniyan’ ko re n’ey ni ke l’agan’ ngay ni gaar: “Ba mudugil nra riyul’ e n’en ke l’agan’mad ngay, ma gamad gubin i girdien fare 144,000 nra yag ngomad e n’en ke micheg Got ngomad. Tow’ath romad e kab pag feni manigil ndabi chuchugur ni nge taw e lem romad ngay.” Tomuren ni pigpig Brother Franz ngak Got u fithik’ e yul’yul’ u lan boor e duw, me yog fapi thin ni baaray ko duw ni 1991 ni  gaar: “Ri kab ga’ fan u [wan’mad] e n’en be l’agan’mad ngay. . . . Ra be n’uw nap’an ni gamad be sonnag, ma aram e ri be gel feni ga’ fan u wan’mad. Ba m’agan’mad ngay ni nggu sonnaged ni mus ni faanra nggu songad u lan bokum milyon e duw. Dariy ba ngiyal’ ni ke ga’ fan u wan’ug e n’en be l’agan’mad ngay ni bod feni ga’ fan u wan’ug e chiney.”

7-8. Mang e be l’agan’ yooren i gadad ngay? (Roma 8:​20, 21)

⁷ Yooren e piin yad be liyor ngak Jehovah e ngiyal’ ney e ba thil e n’en ke l’agan’rad ngay. L’agan’ rorad e taareb rogon ko n’en ni i l’agan’ Abraham ngay ni aram e yafos ni manemus u fayleng u tan Gil’ilungun Got. (Heb. 11:​8-10, 13) I yoloy Paul murung’agen e tow’ath nra yag ngak e piin ni ireray e n’en be l’agan’rad ngay. (Mu beeg e Roma 8:​20, 21.) Nap’an nim fil e n’en be micheg e Bible nra buch boch nga m’on, ma mang e ri ga baadag riy? Gur, ri ga baadag ni kam nang nra yan i taw nga ba ngiyal’ ma kam flont ndab kum denen? Fa gur, ri ga baadag ni kam nang ni yira faseg e piin nib t’uf rom ni kar m’ad mar pared u paradis u fayleng? Bochan e re n’ey ma boor ban’en nib manigil ni ga be sonnag “u fithik’ e l’agan’.”

⁸ Demtrug ko gad be athapeg e yafos ni manemus u tharmiy ara fayleng, ma bay rogon ni ngad felfelan’gad ni bochan e n’en nib manigil ni ke l’agan’dad ngay. Ma re l’agan’ nem ni bay rodad e rayog ni nga i gel i yan. N’en ni yoloy Paul ni migid e be weliy rogon nrayog ni nge buch e re n’ey. Ere ngad weliyed e n’en ni yoloy u murung’agen e n’en ke l’agan’dad ngay. Thin ni yog e ra ayuwegdad ni ngari pagan’dad nra riyul’ e pi n’em.

9-10. Mang e manang e piin Kristiano nra buch rorad ni bochan e n’en ni buch rok Paul? (Roma 5:3) (Kum guy e sasing.)

⁹ Mu beeg e Roma 5:3. Mu tay fanam i yan riy ni gafgow ni gad ma yan u fithik’ e rayog ni nge gelnag e l’agan’ rodad. Sana gad ra gin ko re n’ey. Machane bin riyul’ riy e gubin i gachalpen Kristus ni yad manang ni yira gafgownagrad. Am lemnag e n’en ni buch rok Paul. I gaar ngak piyu Thessalonika: “Nap’an ni ug moyed  romed, ni dawori taw ngay ma gogned ngomed u m’on riy ni bayi gafgownagdad e girdi’; . . . nri erera’ e n’en ni kan rin’ ngodad.” (1 Thess. 3:4) Ki yol ngak piyu Korinth ni gaar: “Gamad ba adag ni nggu puged u ran ngomed, pi walagmad ni girdien Kristus, e gafgow ni yib ngomad . . . nda kug fineyed ni ka gamad ra fos.”​—2 Kor. 1:8; 11:​23-27.

¹⁰ Piin Kristiano e ngiyal’ ney e ku yad manang ni yad ra mada’nag e gafgow. (2 Tim. 3:12) Me gur e uw rogom? Yibe gafgownagem ni bochan e ke mich Jesus u wan’um ma ga be lek, fa? Rayog ni ka i moningnagem e pi fager rom nge girdi’ rom. Ma sana rayog ni kub kireb e ngongol ni ka ur rin’ed ngom. Ga be mada’nag e magawon u tabon e maruwel ni bochan e kam dugliy ni ngam yul’yul’ u gubin ban’en, fa? (Titus. 2:10) Be togopuluw e am ngom ni bochan e ga be weliy ko girdi’ murung’agen e n’en ke l’agan’um ngay, fa? Demtrug e re miti gafgow nra yib ngodad, ma ke yog Paul nsusun e ngad felfelan’gad. Mang fan?

11. Mang fan nib t’uf ni ngad dugliyed u wan’dad ni ngad k’adedan’dad u fithik’ urngin mit e skeng nrayog ni nge yib ngodad?

¹¹ Rayog ni ngad felfelan’gad u nap’an ni yibe gafgownagdad ni bochan angin nra yib ngodad. Be yog e Roma 5:3 ni “tin ni ma yib ngodad ni gadad ma gafgow riy . . . e ma yognag e k’adan’ ngodad.” Gubin e Kristiano ni yira gafgownagrad, ere yad gubin nthingar ra k’adedan’rad. Ba t’uf ni ngad dugliyed u wan’dad ni ngad k’adedan’dad u fithik’ urngin mit e skeng nrayog ni nge yib ngodad. Faan gad ra rin’ e re n’ey, ma aram e rayog ni nge yag ngodad e n’en be l’agan’dad ngay. Dubdad ni ngad boded e piin ni i lemnagrad Jesus u nap’an ni be weliy murung’agen e awoch ni wer nga daken boch thal i but’ ni bay u daken e war. Nap’an nrung’aged fare thin me m’agan’rad ngay ni kar felfelan’gad, machane “faani yib e gafgow fa togopluw” ngorad ma aram mar paged yad. (Matt. 13:​5, 6, 20, 21) Riyul’ ndariy bagadad ni ma felfelan’ ko togopuluw ara skeng ni ma yib ngak, machane faanra da k’adedan’dad u fithik’ ma ra yib angin ngodad ndariy n’umngin nap’an. Ni uw rogon?

12. Mang angin ni ma yib ngodad ni faanra da k’adedan’dad u fithik’ e skeng ni ma yib ngodad?

¹² James nreb i gachalpen Jesus e tamilangnag angin nra yib ngodad ni faanra da k’adedan’dad u fithik’ e skeng ni ma yib ngodad. I yoloy ni gaar: “Ngam guyed rogon ngam k’adedan’med nge mada’ ko tomur ndab mmulgad [“Mu paged e k’adan’ ni gimed be tay ni nge maruwel u fithik’med nge yan i mus nga rogon,” NW] nge yog ni mmarod mu pired ni kam yal’uwgad, ni aram e ke yan i mus nga rogomed ndakuriy ban’en nda mu gamangad riy.” (Jas. 1:​2-4) Ere yog James ni k’adan’ e bay e maruwel nib milfan ngak ara ban’en ni nge lebguy. Rayog ni nge ayuwegem ni nge gel boch e gum’an’ ni ngaum tay, miki gel e michan’ rom, mu um taga’ ngak Got. Machane ku bay reb i angin e k’adan’ ni gad ma tay.

13-14. Mang angin e k’adan’ ni gad ma tay, ma mang rogon ko l’agan’ ni bay rodad? (Roma 5:4)

¹³ Mu beeg e Roma 5:4. I yog Paul ni k’adan’ e “ma fal’egdad u wan’ Got.” Ere ra um k’adan’um, ma aram e ga ra fel’ u wan’ Jehovah. Machane re n’ey e der yip’ fan nib felfelan’ Jehovah ni ga be mada’nag e skeng ara magawon. Ya ba felfelan’ ni bochan e ga be athamgil u fithik’ e yul’yul’. Rib gel e athamgil ni ma yib nga lanin’dad ni kad nanged nnap’an ni gad ra k’adedan’dad, ma aram e gad be felfelan’nag Jehovah.​—Ps. 5:12.

¹⁴ Dab mu pagtalin ni Abraham e k’adan’ u fithik’ e skeng ni yib ngak me yag ni nge fel’ u wan’ Got. I tay Jehovah ni ir reb e fager rok me matheeg ngak ni ir be’ nib mat’aw. (Gen. 15:6; Rom. 4:​13, 22) Ku arrogodad ni gathi gad ba  fel’ u wan’ Jehovah ni bochan urngin e maruwel ni gad be rin’ ni fan ko pigpig rodad ngak ara re miti maruwel ni gad be rin’ ni fan ngak. Ya gad ba fel’ u wan’ ni bochan e gad be athamgil u fithik’ e yul’yul’. Ma demtrug yangardad, ara rarogodad, ara tin rayog rodad, ma gad gubin nrayog ni ngad k’adedan’dad. Ga be athamgil ni ngam par ni gab yul’yul’ u fithik’ reb e skeng ni ga be mada’nag e chiney, fa? Faanra arrogon, ma dab mu pagtalin ni ga be felfelan’nag Jehovah. Faanra gad manang ni gad ba fel’ u wan’ Got mab ga’ angin nrayog ni nge yib ngodad, ya rayog ni nge gel e l’agan’ rodad.

15. Mang e ki ulul Paul ni nge weliy murung’agen, ma mang fan nrayog ni nge balyangan’ boch e girdi’ ko re n’ey?

¹⁵ I weliy Paul nrayog ni ngad fel’gad u wan’ Jehovah ni faan gad ra athamgil ngad pared ni gad ba yul’yul’ u fithik’ e pi skeng ni be yib ngodad. Mu tay fanam i yan u rogon ni ulul Paul ko n’en be weliy ni gaar: “Fel’ u wan’ ni gadad ma tay e ma yognag e l’agan’ ngodad. Re l’agan’ ney e dabi m’ing lanin’dad riy.” (Rom. 5:​4, 5) Rayog ni nge balyangan’ boch e girdi’ ko re n’ey. Mang fan? Ya u m’on ni nge yog Paul e pi thin ney me yog ko Roma 5:2 ni pi Kristiano nem u Roma e bay ban’en ni ke l’agan’rad ngay ni aram e ‘ke l’agan’rad ko flaab rok Got.’ Ere rayog ni nge fith be’ ni gaar, ‘Faanra bay ban’en ni ke l’agan’ e pi Kristiano nem ngay, me ere mang fan ni weliy Paul murung’agen e l’agan’ boch nga tungun e n’en be weliy murung’agen?’

16. Uw rogon ni ma gel i yan e l’agan’ ni ma tay be’? (Kum guy e sasing.)

¹⁶ Rayog ni ngad nanged fan e n’en ni yog Paul ni faan gad ra lemnag ni l’agan’ e ban’en ni ma gel i yan. Baaray rogon nrayog ni ngan susunnag: Ka be yib ngan’um e yay nth’abi som’on nim rung’ag murung’agen e n’en nib manigil ni be l’agan’dad ngay ni bay ko Thin rok Got, fa? Rayog nim lemnag e ngiyal’ nem nre n’ey ni yima weliy ni aram e ngan par ni manemus u paradis u fayleng e ban’en ni yugu yibe athapeg ndabi buch. Machane nap’an ni yoor ban’en nim nang u murung’agen Jehovah nge n’en be micheg e Bible, ma aram mi ri mich u wan’um nra riyul’ e re n’ey ni be l’agan’uy ngay.

17. Uw rogon ni ma ulul ni nge gel i yan e l’agan’ ni bay rom u tomuren ni kam ognagem kam un ko taufe?

 ¹⁷ Mus nga tomuren nim ognagem ngam un ko taufe, ma ka be gel i yan e l’agan’ ni bay rom u nap’an ni ka ga be fil boch ban’en ma ga be ilal i yan ko tirok Got ban’en. (Heb. 5:13–6:1) Dabisiy ni ke buch rom e n’en bay ko Roma 5:​2-4. Boor e gafgow ni kam man u fithik’, machane kam athamgiliy ni gubin ma ke yag ni ngam fel’ u wan’ Got. Bochan ni kam nang ni gab fel’ u wan’ Got, ma aram e ke yib tapgin ni ngam athapeg ni nge yag ngom e tin ke micheg. Ke gel boch e l’agan’ rom nga rogon ni immoy ko som’on, ma kari riyul’ ma kari ga’ fan u wan’um. Ma l’agan’ ni bay rom e be gagiyegnag gubin ban’en ni ga ma rin’ u lan e yafos rom, ma be thilyeg rogon e ngongol rom ko girdi’ u lan e tabinaw rom, nge rogon ni ga ma dugliy boch ban’en, nge rogon ni ga ma maruwel ko tayim rom.

18. Mang e ke micheg Jehovah?

¹⁸ Ku bay ban’en nrib ga’ fan u murung’agen e l’agan’ ni ma yag ngom u tomuren ni kam fel’ u wan’ Got ni ki weliy e re apostal ney murung’agen. Ke micheg ngom nra riyul’ e n’en be l’agan’um ngay. Mang fan nrayog ni ngari pagan’um ko re n’ey? Ki uneg Paul e n’en ke micheg Got ngak e piin Kristiano ko fapi thin ni yog ni gaar: “Re l’agan’ ney e dabi m’ing lanin’dad riy, yi Got e ke puog e t’ufeg rok nga fithik’ i lanin’dad u daken fare Kan ni Thothup, ni ir e tow’ath rok Got ngodad.” (Rom. 5:5) Ere bay tapgin ni nge mich u wan’um nra riyul’ e n’en be l’agan’um ngay.

19. Mang e rayog ni nge pagan’um ngay ni bay rogon ko n’en ke l’agan’um ngay?

¹⁹ Mu lemnag e n’en ni micheg Jehovah ngak Abraham nge rogon ni fel’ u wan’ mi i tay ni ir reb e fager rok. I riyul’ e n’en ni i l’agan’ Abraham ngay. Be gaar e Bible: “Me par Abraham nib gum’an’, ma aram fan ni yib ngak e tin ni yog Got ngak ni bay pi’ ngak.” (Heb. 6:15; 11:​9, 18; Rom. 4:​20-22) Re l’agan’ ney ni immoy rok e de m’ing laniyan’ riy. Ere ku rayog ni nge pagan’um ngay ni faan ga ra par ni gab yul’yul’ ma ra yag ngom e n’en ke l’agan’um ngay. Ra riyul’ e n’en be l’agan’um ngay, ma ra yibnag e felfelan’ ngom, ma dabi m’ing lanin’um riy! (Rom. 12:12) I yoloy Paul ni gaar: “I Got ni ir e ma pi’ e l’agan’ e nge suguymed ko felfelan’ nge gapas u daken e michan’ romed ngak, nge yog ni i ilal e l’agan’ romed ngak u gelngin fare Kan ni Thothup.”​—Rom. 15:13.