Nap’an nni yoloy e Bible ko som’on, min tay fare thin ni “pi engel ni kan mel’egrad” ko re verse ney ni nge yip’ fan ba ulung i engel. Mini’ e pi engel nem?​—1 Tim. 5:​21, NW.

Som’on e ngad weliyed murung’agen e piin ndar uned ko pi engel ney. Ba tamilang ni gathi yad fare 144,000. Nap’an ni yol Paul ngak Timothy, ma dawor ni tabab i faseg e pi Kristiano ni kan dugliyrad ni nga ranod nga tharmiy. Dawori tabab e pi apostal nge yugu boch e piin kan dugliyrad ni ngar manged boch e kan u tharmiy, ere fapi “engel ni kan mel’egrad” e dabiyog ni nge yip’ fan e pi cha’ney.​—1 Kor. 15:​50-54; 1 Thess. 4:​13-17; 1 John 3:2.

Maku reb e, fapi “engel ni kan mel’egrad” e ku dabiyog ni nge yip’ fan e pi engel ndar pared ni yad ba yul’yul’ u nap’an fare Ran ni Tharey e Fayleng. Pi engel nem e ra uned ko ba’ rok Satan mar manged boch e moonyan’, mu kur manged toogor rok Jesus. (Gen. 6:2; Luke 8:​30, 31; 2 Pet. 2:4) Ra boch nga m’on ma yira yon’rad nga lan fare low nib toar mar pared u rom u lan 1,000 e duw, ma nga tomuren min chagiyrad ngak Moonyan’ ngan thangrad.​—Jude 6; Rev. 20:​1-3, 10.

Fapi “engel ni kan mel’egrad” ni weliy Paul murung’agen e dabisiy ni be yip’ fan e pi engel u tharmiy ni yad ba yul’yul’ ni yad ma maruwel “Got nge Kristus Jesus” u taabang.

Bokum biyu’ e engel ni yad ba yul’yul’. (Heb. 12:​22, 23) Ma bod nib thilthil e maruwel ni ma pi’ Jehovah ngorad ni ngar rin’ed. (Rev. 14:​17, 18) Dab mu pagtalin ni bay bayay nni l’og taareb e engel ni nge thang 185,000 e salthaw nu Assyria. (2 Ki. 19:35) Ku rayog ni boor e engel ni kan tayrad ni “ngar kunuyed urngin e piin ni yad be waliy e girdi’ ngar denengad, nge urngin e piin ni yad be ngongliy e kireb ni kar maathukgad nga fithik’ e piin ni Got e be gagiyegnagrad.” (Matt. 13:​39-41) Ku rayog ni yira mel’eg boch e engel ni yad e ngar ‘kunuyed e girdi’ rok ni ke mel’egrad’ nga tharmiy. (Matt. 24:31) Ku bay boch i yad ni kan tay chilen ngorad ni ngar ‘yororiyed gadad ko gin’en ni gad be yan riy i yan.’​—Ps. 91:11; Matt. 18:10; mu taarebrogonnag Matthew 4:11; Luke 22:43.

Fapi “engel ni kan mel’egrad” ni bay murung’agrad ko 1 Timothy 5:21 e dabisiy ni be yip’ fan e pi engel ni kan tayrad ni ngar pied e ayuw u boch ban’en ni bay rogon ko pi ulung. I pi’ Paul boch e fonow u fithik’ e gonop u lan e pi verse u m’on ko pi thin ney ni be weliy rogon nsusun e nge rin’ e piin piilal e maruwel rorad, maku be yog nsusun e nga i tay e pi walag farad. Ki yog Paul ni piin piilal e susun e dab ra ‘dabuyed daken be’ ara ra folgad ngak be’,’ ma susun e dab ra dugliyed ban’en ndawor ra fal’eged i lemnag u m’on riy. Reb i fan nib ga’ fan ni ngar folgad ko fonow ni pi’ Paul e bochan ni yad be “maruwel u p’eowchen Got, nge Kristus Jesus, nge pi engel ni kan mel’egrad.” Ere ba tamilang ni bay boch e engel ni kan tayrad ni ngar rin’ed boch e maruwel ni bay rogon ko ulung ni bod ni ngar yororiyed e girdi’ rok Got, mar ayuweged yad ko fare maruwel ni machib, ma rogned ngak Jehovah e tin kar guyed.​—Matt. 18:10; Rev. 14:6.